ریڈیو زْرمبش بلوچی | ریڈیو زْرمبش بلوچی

جرمنی: بلوچستان ءَ کلپیں میڑ ءِ نام ءَ بیگواھیں مردمانی کوش ءِ بگیری ءَ بی این ایم ءَزھرشانی کرتگ

جرمنی: بلوچستان ءَ کلپیں میڑ ءِ نام ءَ بیگواھیں مردمانی کوش ءِ بگیری ءَ  بی این ایم ءَزھرشانی کرتگ

OCT

03
03 / 10 / 2021 بی این ایم 97

بلوچ راجی زْرمبشت (بی این ایم) جرمنی ھنکین ءِ نیمگ ءَ زھرشانی کنگ بیتگ۔ بلوچستان ءَ زورانسری بیگواھی ءِ آماچیں سیاسی کارکنانی سی ٹی ڈی ءِ دست ءَ کلپیں میڑ ءِ نام ءَ نشانگ کنگ ءِ بگیری ءَ برلن گیٹ ءِ دیم ءَ زھرشانی کنگ بیتگ۔زھرشانی کنوکانی دست ءَ پلے کارڈز ءُ بینرز بیتگ۔زھرشانی کنوکاں بلوچستان ءَ زوراکی ءِ بگیری ءَ اوگام جتگ ءُ چہ جھان ءَ دزبندی کُرتگ کہ پاکستانی لشکر ءِ دست ءَ سیاسی کارکنانی نشانگ ءِ بگیری ءَ توار چِست بہ کنت۔ اے درگت ءَ بی این ایم جرمنی ھنکین ءِ سرکماش ھمل ءُ کارگشاد اسگر ءَ تران کنان ءَ گْوشتگ کہ پاکستان ءَ سیاسی کارکنانی نشانگ کنگ،زورانسری بیگواہ کنگ ءَ پد کلپیں میڑ ءِ نام ءَ بیگواھیں مردمانی شھید کنگ ءِ یک دْرچے بندات کُرتگ۔ آیاں گْوشتگ کہ چہ سالاں پاکستانی چیریں تْرامگیجانی دست ءَ سیاسی کارکنانی کلپیں میڑ ءِ نام ءَ شھید کنگ بلوچ چکچینی ءِ دْرچ اِنت۔اگاں مردمی اگبالانی جھانی تْرامگیج بلوچستان ءَ چوشیں زوراکیاں بےتوار بوت اَنت گڑا بلوچستان ءَ مردمے ناگیگیانی جنجالے ودی بیت۔ آیاں گْوشتگ کہ گْوستگیں چیزے ماھاں سدانی کچ ءَ بیگواھیں مردم کلپیں میڑ ءِ نام ءَ کشگ بیتگ کہ اے مردم چہ بازیں سالاں پاکستانی چیریں تْرامگیجانی دستاں زورانسری بیگواہ کنگ بیتگ اَنت۔ آیاں گْوشتگ کہ ما مرچی شرپمندیں جھان ءِ دیم ءَ پاکستان ءِ زوراکیاں آشکار کنگ ءَ ایں۔ زھرشانی ءِ میان ءَ جرمن ءُ انگلش زبان ءَ پنتاک بھر کنگ بیتگ۔پنتاک ءَ کلپیں میڑ ءَ کشگ بیتگ سیاسی کارکن ءُ دگہ زوراکیانی بابت ءَ نبشتہ کنگ بیتگ۔


بنشون:بی این ایم/اکس:بی این ایم