ریڈیو زْرمبش بلوچی | ریڈیو زْرمبش بلوچی

بلوچ آجوئی سنگر ( بی ایل ایپ ) ءِ جارکش جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل ایپ ءِ سرمچاراں سَے شمبے ءِ بیگاہ ءِ شش ءَ کیچ ءِ ھند مند ءَ چکاپ کور ءَ پاکستانی لشکر ءِ نوک جوڑ بیتگیں پانگس ءِ سر ءَ اُرش کُرتگ۔ سرمچارانی اُرش ءَ دُژمنیں لشکر ءِ یک کارمندے جاھی مُرتگ ءُ یکے ٹپی بیتگ۔

آئی ءَ گوشتگ کہ بلوچ سرمچاراں سَے شمبے ءِ بیگاہ ءَ چکاپ کور ءَ برجاھیں پانگس چہ نزیک ءَ گوں ٹوھین ءُ وتکاریں سلاھاں نشانگ کُرتگ۔ اُرش ءِ دومی روچ ءَ پاکستانی لشکر ءِ جنگی بالیگاں ھمے جاہ ءُ کش ءُ گْور ءِ ھند ءُ دمگاں تیرگْواری کُرتگ بلے دُژمن ءِ پسھی اُرش ءَ ھچ پیمیں تاوان نہ بیتگ ءُ سرمچار وتی مھکمیں سنگراں سر بیگ ءَ سوبین بیتگ اَنت۔

جارکش ءَ گوشتگ کہ بی ایل ایپ دُژمنیں لشکر ءِ چیست ءُ ایراں چہ نزیک ءَ چارگ ءَ اِنت ءُ اے پانگس ءِ جوڑ کنگ ءَ پد اُرش کنگ بیتگ داںکہ دمگ ءَ دُژمن ءِ چیست ءُ ایر کم کنگ بہ بنت۔

بی ایل ایپ ءِ جارکش میجر گھرام ءَ اُرش ءِ زمہ واری منّ اِتگ ءُ گوشتگ کہ دُژمن ءَ کڈن کن ایں کہ آ زورگیپتیں بلوچستان ءَ وتی کلات، پانگس ءُ سنگراں پھریز نہ اِنت۔ بی ایل ایپ ھر کجا آئی ءِ سر ءَ اُرش کنگ ءِ توان ءَ دار ایت ءُ اے اُرش داں بلوچستان ءِ آجوئی ءَ برجاہ بنت۔

بنشون: درشان / اکس: زرمبش