ریڈیو زْرمبش بلوچی | ریڈیو زْرمبش بلوچی

جیونی ءَ پاکستانی لشکر کوسٹ گارڈ ءِ سر ءَ دستی بمب اُرش ءِ زمہ واری بی ایل ایپ ءَ منّ اِتگ۔

جیونی ءَ پاکستانی لشکر کوسٹ گارڈ ءِ سر ءَ دستی بمب اُرش ءِ زمہ واری بی ایل ایپ ءَ منّ اِتگ۔

SEP

12
12 / 09 / 2022 بی ایل ایپ 47

بلوچستان آجوئی سنگر ( بی ایل ایپ ) ءَ گْوادر ءِ ھند جیونی ءَ پاکستانی لشکر کوسٹ گارڈ ءِ سر ءَ دستی بمب اُرش ءِ زِمہ واری منّ اِتگ۔ بی ایل ایپ ءِ جارکشّ میجر گھرام ءَ وتی شِنگ کُرتگیں درشان ءَ گْوشتگ کہ 11 ستمبر یکشمبے ءِ روچ ءِ ادار نُھ ءُ چِل ءَ گْوادر ءِ ھند جیونی ءَ مئے سرمچاراں پاکستان ءِ زِر لشکر (بحری فوج) ءِ ادارہ کوسٹ گارڈ ءِ سر ءَ جیونی ءِ تیاب دپ ءَ ھما وھد ءَ اُرش کرتگ کہ آ زِر ءِ پھنات ءَ بوجیگ ءَ سوار بیتگ اَنت۔ اُرش ءِ آسر ءَ دوئیں کارمند سک ءَ ٹپّی بیتگ اَنت۔ آئی ءَ دیمتِر ءَ گْوشتگ کہ بوجیگ ءَ سواریں کارمنداں ابید تیاب دپ ءَ دِگہ کوسٹ گارڈ ءِ کارمند ھم ساڑی بیتگ اَنت کہ آ ھمک بیگاہ ءَ ماھی گِر ءُ سِیمسر ءَ کارکنوکیں پوریاگِراں ھمک روچ سُنگ گِر اَنت۔ جارکشّ ءَ دیمتِر ءَ گْوشتگ کہ کوسٹ گارڈ پاکستان ءِ زِر لشکر (بحریہ) ءَ گوں ھمگْرنچیں ادارھے کہ آ زُورگِپتیں بلوچستان ءِ زِر، بلوچ ماھی گِر ءُ پوریاگِراناں ھمک روچ ءِ وڑ ءَ سُنگ گِر اَنت۔ چہ گُجّو (ٹرالرز ماپیا) کنوکاں سُنگ گِر اَنت ءُ چہ رھبند ءَ در زُورگِپتیں بلوچستان ءَ زِر ءَ گُجّو کن اَنت۔ اے گُجّو کنگ ءَ چینی شِرکت ءِ ٹرالر ھم ھوار اَنت کہ آ بلوچستان ءِ زِر ءِ ماھیگانی چُکچینی ءَ کنگ ءَ اَنت ءُ ماھی گِراناں پہ چُنڈے نان ءَ زِبھر کنگ ءَ اَنت۔ جارکشّ ءَ وتی درشان ءَ دیمتِر ءَ گْوشتگ کہ چین وتی باپاری ءِ شونداتانی نام ءَ بلوچستان ءَ پاکستان ءِ کُمکّ ءَ لشکری بُنجل جوڑ کنگ ءَ اِنت کہ آ اے دمگ ءِ جاورانی ھراب کنگ ءِ کُوشستے۔ پاکستان ءُ چین ءِ ساڑی بیگ گوں بلوچ راج ءَ ھوار اے دمگ ءِ پہ آدِگہ مُلکاں ھم تُرسے۔ مئے اُرش پہ پاکستان ءُ چین ءِ وڑیں زُورگریں توانمنداں کلوھے کہ بلوچ سرمچار وتی سرڈگار، زِر ءُ گْواجنانی پاسپانی کنگ ءَ زان اَنت۔ جارکشّ ءَ وتی درشان ءِ گُڈّی ءَ گْوشتگ کہ داں زُورگِپتیں بلوچستان ءِ آجوئی ءَ مئے اے وڑیں اُرش گوں تْرندی ءَ برجاہ بنت۔ بنشون: درشان | اکس: زْرمبش