ریڈیو زْرمبش بلوچی | ریڈیو زْرمبش بلوچی

بلوچ آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل ایپ ءِ سرمچاراں گل ءِ اھوتی ھالے ءِ سر بیگ ءِ بنیاد ءَ کار کُرتگ ءُ پاکستانی لشکر ءِ چریک سناء اللہ دیدگ پنام گرنیڈ ء نسرت اللہ‘ ءِ سر ءَ اُرش کُرتگ ءُ کُشتگ۔ آئی ءَ گوشتگ کہ سناء اللہ پنام گرنیڈ پیش ءَ یک بلوچ آجوئی دوستیں سلاہ بندیں گلے ءِ باسک بیتگ بلے دُژمن ءِ دیم ءَ سلاہ ءِ چگل دیگ ءَ پد راجدروھی کاراں ھوار بیتگ۔گْوستگیں سال ءَ ھم سرمچاراں نشانگ کُرتگ اَت بلے انگت چہ وتی ردیں کاراں دزکش نہ بوت۔ جارکش ءَ گوشتگ کہ دیر اِنت کہ اے مردم ءِ کارانی سر ءَ پر بی ایل ایپ ءِ سرمچارانی چم سَک بیتگ اَنت،سرمچاراں شمبے نوہ ستمبر ءَ کیچ ءِ ھند دشت ءَ شئے زنگی ءُ جنگل بازار ءِ میانجی ءَ تیر جتگ ءُ کُشتگ۔آ چہ پاکستانی لشکر ءِ بُنجل ءَ گند ءُ نند کنگ ءَ پد واتر چہ تربت ءَ دشت ءَ آھگ ءَ بیتگ۔ آئی ءَ گوشتگ کہ سناء اللہ ءِ بابت ءَ گل ءَ پٹ ءُ پول کُرتگ کہ آ میاربار بیتگ، چہ ایشی ءَ راجی میاربارے لیکگ ءُ آئی ءِ بگیری ءَ کار کنگ ءِ شور کنگ بیتگ۔مدام سلاہ بند بیتگ ءُ سرمچارانی بگیری ءَ پاکستانی لشکر ءِ لشکرکشی ءُ کاراں ھوار بیتگ۔ سیاھجی ءُ مزن بند ءَ پاکستانی لشکر ءِ لشکرکشیاں گندگ بیتگ، سرمچارانی اوتاگاں اُرش کنگ ءِ میان ءَ آ راجی مڈیانی لُٹ ءُ پُل کنگ ءُ ماندارگ ءَ ھوار بیتگ۔ آئی ءَ وتی تامُربند ءُ اکس مردماں پیش داشتگ اَنت ءُ ناز کُرتگ۔ جارکش ءَ گوشتگ کہ پہ پاکستانی لشکر ءِ آسراتی ءَ چاریگی ءُ جنگی پِڑ ءَ جنگ کنگ ءَ ابید سناء اللہ چاگردی دگہ سلکاریاں ھوار بیتگ۔ منشیات ءِ کاروبار ءُ بلوچ شھیدانی مانشانی کم منگِھ کنگ ءِ میار آئی ءِ سر ءَ سابت بیتگ۔ میجر گھرام ءَ گوشتگ کہ شھید ابداللہ ء رسول بکش جھمنند جمک ءِ شھید کنگ ءُ بلوچ راجی آجوئی ءِ باسکانی زور بیگواہ کنگ ءَ ھوار بیتگ۔ پِدائی شھید نوید (اسلم) ءِ جنازہ ءِ نماز ءِ سر ءَ پہ مردمانی نشان کنگ اتکگ ءُ  پاکستانی لشکر ءِ نیمگ ءَ سرمچارانی بگیری ءَ کارانی بھر بیگ ءِ میار ءَ گل ءِ شورانی بنیاد ءَ کُشگ بیتگ۔ جارکش ءَ گوشتگ کہ دگہ یک اُرشے ءَ بی ایل ایپ ءِ سرمچاراں 10 ستمبر ءَ یکشمبے ءِ روچ ءِ سَے ءَ وتگڑیں سیمسر (گولڈسمتھ) ٹٹ ءِ پھریزگ ءَ برجاھیں پاکستانی لشکر ءِ پانگس ءِ سر ءَ اُرش کُرتگ ءُ زروگریں پاکستانی لشکر ءِ یک کارمندے کُشتگ۔ آئی ءَ گوشتگ کہ سرمچاراں کیچ ءِ ھند مند ءَ ھمزھی ءِ بند ءَ کاسگانی کور ءَ برجاھیں پاکستانی لشکر ءِ پانگس ءِ سر ءَ گوں اسنائپر توپک ءَ نشانگ کُرتگ ءُ یک کارمندے کُشتگ۔ بی ایل ایپ ءِ جارکش میجر گھرام ءَ ریاست ءِ چریک ءُ دُژمنیں لشکر ءِ کارمند ءِ کوش ءِ زمہ واری ءَ منّ اِتگ ءُ گوشتگ کہ بلوچ راج، چاگرد ءُ آجوئی زْرمبشت ءِ بگیری ءَ پُرکاریں ریاست ءِ دُرسیں چریکاں کڈن کنت کہ شَر بہ بنت۔بی ایل ایپ بلوچ راجی سیتانی پھریزگ ءَ چوشیں مردمانی گرگ ءُ سزا دیگ ءَ برجاہ دار ایت۔ بنشون: درشان / اکس: زرمبش