ریڈیو زْرمبش بلوچی | ریڈیو زْرمبش بلوچی

تربت:پاکستانی لشکر ءِ بند ساچی شرکت ایپ ڈبلیو او ءِ سر ءَ اُرش ءِ زمہ واری بی ایل ایپ ءَ منّ اِتگ

تربت:پاکستانی لشکر ءِ بند ساچی شرکت ایپ ڈبلیو او ءِ سر ءَ اُرش ءِ زمہ واری بی ایل ایپ ءَ منّ اِتگ

JUL

03
03 / 07 / 2021 بی ایل ایپ 21

بلوچستان آجوئی سنگر ءِ جارکش میجر گھرام ءَ چہ پجار نہ بیتگیں جاھے ءَ ماں رسانکدر ءَ وتی شنگ کُرتگیں درشانی ءَ دوشی تربت ءَ بیتگیں اُرش ءِ زمہ واری منّ اِتگ۔ جارکش ءَ گوشتگ کہ دوشی شپ ءِ ادار ھشت ءُ نیم ءَ سرمچاراں تربت ءَ بالی پٹ ءِ نزیک ءَ لشکر ءِ بند ساچی شرکت پرنٹیر ورکس آرگنائزیشن (ایپ ڈبلیو او) ءِ سائیٹ ءِ سر ءَ اُرش کُرتگ۔ جارکش ءَ گْوشتگ کہ اُرش ءَ مشین ءُ دگہ سامان مانداشتگ اَنت ءُ ھمے میان ءَ ایپ ڈبلیو او ءِ جھمنندی تمبو ھم نشانگ کُرتگ اَنت چہ ایشی ءَ زورگیریں لشکر ءِ شرکت ءَ جانی ءُ مالی تاوان بیتگ۔بندساچی سائیٹ ءِ نزیک ءَ برجاھیں لیویز ءِ پانگس ءَ لیویز ءِ کارمنداں تیرگواری کُرتگ بلے سرمچاراں آ نشانگ نہ کُرتگ اَنت، آھاں مکن کن اِیں کہ آ زورگیریں لشکر ءِ ھچ شوربندی ءِ پھازگ ءَ بلوچاں نشانگ مہ کن اَنت ءُ ما ھندی ٹیکداراں ھم مکن کن اِیں کہ آ اے شوربندیاں زورگیریں استان ءِ ھمراداری ءَ مہ کن اَنت اگاں ناں گڑا وتی جانی ءُ مالی تاوان ءِ زمہ وار وت بنت۔ میجر گھرام ءَ گوشتگ کہ اے شرکت چہ بالی پٹ ءَ بگر داں ڈی بلوچ ءَ دگے جوڈ کنگ ءُ ھمے دگ ءِ سر ءَ داں پنچ کلومیٹر ءَ میرانی ھاؤسنگ اسکیم ءِ نام ءَ نوکیں آبادی یے جھمنند کنگ ءِ جھد کنگ ءَ اِنت کہ اود ءَ دَر بلوچ مردمانی آرگ ءُ آباد کنگ ءِ یک پندلے سرجم کنگ بیگ ءَ اِنت۔میرانی ھاؤسنگ ءَ ھمے زمین پہ زانشجاھے ءِ جوڈ کنگ ءِ نام ءَ لس مردم ریپینتگ ءُ زمین ھشک ءَ پچ گپتگ۔ بنشون:درشان/اکس:بی ایل ایپ