ریڈیو زْرمبش بلوچی | ریڈیو زْرمبش بلوچی

بلوچ آجوئی لشکر (بی ایل اے) ءِ جارکش جیھند ءَ وتی شنگ کُرتگیں درشانے ءَ گْوشتگ کہ سرمچاراں کیچ ءِ ھند زامران ءُ ھرنائی ءَ سَے جتائیں اُرشاں زورگریں پاکستانی لشکر ءُ مڈّی بروکیں گاڑیانی سر ءَ اُرش کُرتگ۔ اُرشاں دُژمنیں لشکر ءِ سَے کارمند مُرتگ ءُ ھشت ٹپی بیتگ، چِل ءُ یک گاڑیاں تاوان بیتگ۔ آئی ءَ گْوشتگ کہ سرمچاراں گْوستگیں شپ ءَ زامران ءِ لد ءَ برجاھیں زورگریں پاکستانی لشکر ءِ یک بُنجلے ءِ سر ءَ اُرش کُرتگ،سرمچاراں نوکیں سلاہ ءُ آر پی جی کارمرد کُرتگ، اُرش ءَ دُژمنیں لشکر ءِ سَے کارمند جاھی مُرتگ ءُ دُژمن ءِ سنگر ءِ تہ ءَ چہ راکٹ گولا ءِ کپگ ءَ کم چہ کم چار کارمند ٹپی بیتگ۔ آئی ءَ گْوشتگ ھمے وڑ ءَ سرمچاراں ھرنائی ءِ زردآلو ءَ شھدگ ءِ سر بستگ ءُ مڈی بروکیں چل گاڑیانی ٹائر تیرجتگ ءُ تراکینتگ اَنت ءُ ڈرائیور ءُ کلینڈر یل داتگ اَنت۔ بی ایل اے ءِ جارکش ءَ گْوشتگ کہ مرچی نیمروچ ءَ ھمے جاہ ءَ آؤکیں زورگریں پاکستان ءِ جھلی ادارہ لیویز ءِ یک گاڑی یے سرمچاراں بمب اُرشے ءَ نشانگ کُرتگ،کہ چہ ایشی ءَ کم چہ کم چار کارمند ٹپی بیتگ ءُ گاڑی ءَ باز تاوان بیتگ۔ آئی ءَ گْوشتگ کہ بی ایل اے ءَ پیش ءَ ھم گْوشتگ کہ گُڈّی رَند ءَ 20 مئی 2023 ءَ وتی یک درشانے ءَ گْوشتگ کہ اشکر کھن ءِ ٹیکدار ءُ مُزور پہ زورگریں لشکر ءَ چاریگی، راشن ءُ آپ مہ دے اَنت اگاں نہ گڑا وتی جان ءُ مال تاوان ءِ زمہ وار وت اَنت۔ جیھند ءَ گْوشتگ کہ ھرنائی ءُ کش ءِ گْوراں زورگریں پاکستانی لشکر شپاں اشکر بروکیں گاڑیانی ھمراہ ءُ سُر ءُ پُر کنت ءُ ھمے گاڑی زورگریں لشکر ءَ راشن ءُ دگہ سامان ءِ دیگ ءَ ھوار اَنت۔ آئی ءَ گْوشتگ کہ بی ایل اے ھرنائی داں ناکس، ناکس داں شاھرگ، شاھرگ داں کوسٹ ءُ زرد آلو، ڈومرا داں زیارت دوراھی ءُ مارگٹ داں پیر اسمائیل ءَ شھدگانی بندگ ءَ برجاہ کنت، زورگریں لشکر ءِ آسراتی دیگ ءَ ھواریں مردم وتی جان ءُ مال ءِ تاوان ءِ زمہ وار وت اَنت۔ آئی ءَ گْوشتگ کہ ما لیویز ءُ پولیس ءَ تچکی ءَ گْوش ایں کہ وت ءَ داں وتی بُنجلاں بہ دار اِنت زورگریں پاکستانی لشکر ءِ کمک ءَ مہ کن اِت، ایشی ءَ پیش ھم ما گْوشتگ کہ پولیس ءُ لیویز چونائی ءَ مئے نشانگ ءَ نہ اَنت بلے زورگریں لشکر ءِ کمک کنگ ءَ کَس پھل کنگ نہ بیت۔ جارکش ءَ سئیں اُرشانی زمہ واری منّ اِتگ ءُ گْوشتگ کہ زورگریں پاکستانی لشکر ءُ آئی ءِ کمکارانی سر ءَ مئے اُرش داں بلوچستان ءِ آجوئی ءَ برجاہ بنت۔ بنشون: درشان | اکس: زْرمبش