ریڈیو زْرمبش بلوچی | ریڈیو زْرمبش بلوچی

بی ایل اے ءَ زامران ءُ تُمپ ءَ پاکستانی لشکر ءُ کُشندہ ٹولی ءِ پنچ کارمندانی کوش ءِ زمہ واری منّ اِتگ

بی ایل اے ءَ زامران ءُ تُمپ ءَ پاکستانی لشکر ءُ کُشندہ ٹولی ءِ پنچ کارمندانی کوش ءِ زمہ واری منّ اِتگ

NOV

11
11 / 11 / 2022 بی این اے  ,  بی ایل ایپ 52

بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں کیچ ءِ ھند زامران ءُ تمپ ءَ دو جتائیں اُرشاں زورگریں پاکستانی لشکر ءِ دو کارمندانی ھواری ءَ کُشندہ ٹولی ءِ سَے کارمند کُشتگ بازینے ءِ ٹپیگ کرتگ۔ جارکش ءَ گوشتگ کہ بی ایل اے ءِ سرمچاراں گْوَستگیں روچ ءَ زامران ءِ سھر کور ءَ سیمسر ءَ ٹٹ کنوکیں کارمندانی پھازداریں ٹولی ءِ سر ءَ ھما وھد ءَ اُرش کرتگ کہ آ پند ءَ ترّ ءُ گرد کنگ ءَ بیتگ اَنت۔ اُرش ءِ آسر ءَ دو کارمند جاھی مرتگ ءُ یکے ٹپی بیتگ۔ جارکش ءَ گوشتگ کہ ھمے وڑ ءَ اسپیشل ٹیکٹیکل آپریشنز اسکواڈ (ایس ٹی او ایس ) ءَ تمپ ءَ پاکستانی لشکر ءُ چیریں ادارھانی جوڑ کرتگیں کشندہ ٹولی ءِ سروک ھمید ءُ آئی ٹولی ءِ کلبر ءِ شاھاپ ءَ ساڑی بیگ ءِ ھال ءِ رسگ ءَ کاروائی کرتگ ءُ زورگر ءِ کمکارانی سر ءَ ھما وھد ءَ اُرش کرتگ کہ وھدے آ دو گاڑیانی سر ءَ گوزگ ءَ بیتگ اَنت۔ جارکش ءَ گوشتگ کہ سرمچارانی اُرش ءَ سے کمکار ھنیپ ء مھمد جھمنند بالیچہ تلکان، امجد ءُ بالاچ ء ٹاپی جھمنند پُل آباد مرتگ اَنت ءُ آدگہ ٹپی بیتگ اَنت۔ اے ٹولی زورگریں لشکر ءِ کمک ءَ زْر گرگ، لُٹ ءُ پُل ءِ ھواری ءَ لشکر ءِ لشکر کشیاں دُژمنیں لشکر ءِ کمکاری ءَ کنگ ءَ بیتگ اَنت۔ گوستگیں دراجیں وھدے بیت کہ اے ٹولی ءِ کارپدانی باروا لّس مردمانی گِلگ سر بیتگ اَنت۔ ‎ جیھند ءَ وتی درشان ءِ گُڈی ءَ گوشتگ کہ بلوچ آجوئی لشکر ءَ اے گپ تچک کرتگ کہ زورگریں لشکر ءُ آئی کمکاراں بلوچ راج ءِ سر ءَ بیوکیں زوراکیانی جُست ءَ کنت۔ ما اے ٹولی ءِ ھواری ءَ ریاست ءِ درسیں کمکاراں اے کلوہ ءَ دئیں کہ آ زْر ءِ لَب ءَ راج دُژمنی ءِکار ءَ یل بہ کن اَنت، اگاں نہ چو آدگرانی وڑ ءَ پہ دردناکیں سزا ءَ جاڑیگ بہ بنت۔ ‎ بنشون: درشان | اکس: زْرمبش