ریڈیو زْرمبش بلوچی | ریڈیو زْرمبش بلوچی

ھب ءَ پاکستانی لشکرءِ چریک شاھد زھری بی ایل اے ءِ سرمچاراں کشتگ - جیھند

ھب ءَ پاکستانی  لشکرءِ چریک شاھد زھری بی ایل اے ءِ سرمچاراں کشتگ - جیھند

OCT

11
11 / 10 / 2021 بی ایل اے 97

ھب: بلوچ آجوئی لشکر ءِ جار کش جیھند ءَ وتی درشانی ءَ گْوشتگ کہ سرمچاراں دہ اکتوبر ءَ ھب شھر ءَ پاکستانی لشکر ءِ چریک شاھد زھری بمب اُرشے ءَ نشانگ کرتگ ءُ کُشتگ ۔ جارکش ءَ گْوشتگ کہ اے کارروائی بی ایل اے ءِاسپیشل ٹیکٹیکل آپریشنل ٹولی ءَ کرتگ ،تراک ءِ آسرءَ چیریں تْرامگیجانی چریک شاھد زھری مُرتگ ءُ آئی ءِ گاڑی تباہ بیتگ ۔ ’’پاکستانی لشکر ءِ چیریں تْرامگیج ایم آئی ءِ چریک شاھد زھری 2008 ءَ اھوالکاریءِ پوشاکاں بلوچ زْرمبشت ءِ بگیریءَ کار کنگ ءَ بیتگ۔ آ چیریں تْرامگیجانی نیمگ ءَ جوڑ کنگ بیتگیں مارھور نامی ٹولی یے ءِ سروکیءَ کنگءَ بیتگ ،ایشانی کار زَر ءِ لَب دیگ ءُ لس نیزگاریں مردماں زورگ ءُ چاورگی، بلوچ ورناھانی بیگواہ ءُ نشانگ کنگ ءِ کار گرگ بیتگ ۔‘‘ آئی گْوشتگ کہ ھمے ٹولی ءِدگہ یک چریکے جلیل زھری 26 ستمبر 2018 ءَبی ایل اے ءِ سرمچاراں ھب ءَ نشانگ کرتگ ءُ کشتگ اَت۔ جیھند ءَ گْوشتگ کہ شاھد زھری اھوالکاری ءِ پیمیں شرپمندیں بھرگےءِ پُژدرءَ گوادر ءُکراچی ءَشراب ءُ دگہ منشیات ءِ آرگ، میارباریں ٹولیانی گونءَ باپارءُ کودکیں زھگانی بدکاری کنگءَ ھوار دگہ چاگردی بازیں سلکاریاں ھوار بیتگ وھدے کہ اے میار باریاں آئی ءَ پاکستانی لشکر ءِ کمک گون بیتگ ۔ درشان ءِ گڈی ءَ بی ایل اے اے گپءَ تچک کنت کہ مئے گل ھیال ءِ درشان ءُ رسانکدر ءِ سر ءَ سدک اِنت ءُ مدام گوں اھوالکاراں توان کنگ بیتگ بلے پاکستانی لشکر ءَاھوالکارانی پوشاکءَ وتی باز یں چریکے پریس کلبانی تہ ءَ راہ داتگ ، ایشانی کار بس بلوچ سیاسی کارکنانی نشان کنگ ءُ بلوچ راجی زْرمبشت ءِ بگیری ءَ کار کنگ اِنت۔ اے بابت ءَ آدگہ اھوالکار شری ءَ سرپد اَنت ۔ ما گوں اھوالکاراں دزبندی کنیں کہ آ وتی کار شرپ ءَ بہ دار اَنت ،چہ وتی تہءَ شاھد زھری ءِ پیمیں رستراں در بہ کن اَنت ،اگاں نہ گڑا بی ایل اے چوشیں دُرسیں راج ءُ زْرمبشت دُژمناں وت ھلاس کنت ،توری چوشیں مردمانی سیادی چہ کجام رنگ،ٹک ءُ کارءَ بہ بیت۔


بنشون: درشان | اکس: بی ایل اے