ریڈیو زْرمبش بلوچی | ریڈیو زْرمبش بلوچی

21 بیست ءُ یک ستمبر ءَ ماں جینوا ءَ اکوام مھتدہ ءِ مردمی اگبالانی کونسل ءِ پنجا ءُ یکمی بهر " سیشن " ءِ وهد ءُ پاساں بلوچ مردمی اگبالانی کونسل اکوام متھدہ ءِ کارگس ءِ دیم ءَ یک زهرشانی مُچی یے ٹهینگ ءَ انت۔ بی ایچ آر سی ءَ وتی یک شنگ کرتگیں درشانے ءَ گْوشتگ کہ پاکستان بازیں دهکاں ماں بلوچستان ءَ مردمی اگبالانی چہ هد ءَ گیش بگیری ءَ کنان پیداک اِنت ءُ انیگیں ماهانی تہ ءَ پاکستان ءِ لشکر ءِ دست ءَ بلوچانی زورانسری بیگواھی، چہ کانودی راهبنداں ابیدیں کُشگ ءُ مردمی اگبالانی اے دگہ بگیریانی تہ ءَ بیمناکیں هدے ءَ گیشی اتکگ۔ بی ایچ آر سی ءِ جنوری 2022 ءَ بگر داں جولائی 2022 ءَ شنگ کرتگیں مَنتّگیں کچ ءُ کساس ءِ رد ءَ تیوک ءَ شش ماه ءِ تہ ءَ 205 بلوچ مردمی اگبالانی بیرک دار ءُ سیاسی ءُ چاگردی کارکن پاکستان ءِ لشکر ءِ دست ءَ بیگواه بیتگ۔ پاکستانی لشکر ءِ دست ءَ بیگواه بیتگیں پنجاه ءُ هشت 58 مردمانی جون دست کپتگ اَنت کہ اے درکانودی کشگ بیتگ انت۔ چد ءُ پد چہ لاهور ءَ بیگواهیں مردمانی پنجاه ءُ هشت ژانگولیں جون هم همے ششیں ماهانی تہ ءَ دست کپتگ انت کہ پجارگ ءِ وڑا نہ بیتگ اَنت۔ آئی ءَ وتی گوشتگ کہ شال ءِ نادراهجاهانی مُردگجاہ ءَ سدانی کچ ءَ بے وارسیں جون ایر انت ءُ آهانی کچ روچ پہ روچ گیش بوان انت ، مردمی اگبالانی بیرکداراں تُرس انت اے هم بلوچ بیگوانیں مردمانی جون بوت کن انت کہ اشاناں درکانودی ءُ بےراهبندی کُشگ بیتگ اَنت۔چہ اشاں ابید ماں شال ءَ سالے ءَ سدانی کچ ءَ بے وارسیں ژانگولیں جون بید ءِ چار ءُ ٹپاس کنگ ءَ کل کنگ بیگ ءَ اِنت۔ جارکش ءَ گوشتگ کہ بیست ءُ یک ستمبر ءَ نیمروچ ءِ دوازده ءُ نیم ءَ بلوچ ھیومن رائٹس کونسل گوں بلوچاں بیتگیں زوراکیانی بگیری ءَ جینوا ءَ اکوام متھدہ ءِ کارگس ءِ دیم ءَ " بروکن چیئر " پُرشتگیں کُرشی ءِ پُشت ءَ یک زهرشانی مُچی یے برجم داریت۔ بی ایچ آر سی ماں بلوچستان ءَ پاکستانی لشکر ءِ دست ءَ مردمی اگبالانی لپاشگ ءِ رد ءَ اکوام متھدہ ءِ مردمی اگبالانی مستریں کمشنر واجہ وولکر ترک ءَ یک یاداشتے هم پیش کنت۔ یاداشت ءِ تہ ءَ دزبندی کنگ بیت کہ لشکر ءِ دست ءَ بازیں کچے ءَ بلوچ سیاسی ءُ چاگردی کارکنانی کُشگ ءِ پٹ ءُ پول کنگ ءَ اکوام متھدہ ءِ یک " پیکٹ فائنڈگ مشن " یے جوڑ بہ کنت کہ آ بلوچستان ءِ تہ ءَ مردمی اگبالانی بگیریانی پٹ ءُ پول ءَ بہ کنت۔ بی ایچ آر سی گوں میان استمانی گل ءَ اے دست بندی ءَ هم کنت کہ میان استمانی گل بلوچستان ءِ تہ ءَ مردمی اگبالانی بگیری ءَ میارباریں پاکستان ءِ لشکر ءُ چیریں ادارهانی سپاهیگاں ماں آمیدگس ءَ سر بہ کنت ءُ آهانی بگیری ءَ ھیگ ءِ باز راجی آمید گس ءَ کیس بہ کنت ءُ آهاناں آهانی مردمانی بگیری ءَ بازیں میارباریاں جھانی آمیدگس ءِ رد ءَ سزا بہ دنت۔ بنشون: درشان |اکس: دامگ