ریڈیو زْرمبش بلوچی | ریڈیو زْرمبش بلوچی

واشُک ءُ بسیمگ دمگ ءَ زانشتی پدمنتگی ءُ زانشتی ادارھانی نہ بیگ بژنی گپے۔بساک

واشُک ءُ بسیمگ دمگ ءَ زانشتی پدمنتگی ءُ زانشتی ادارھانی نہ بیگ بژنی گپے۔بساک

SEP

22

بلوچ اسٹوڈنٹس ایکشن کمیٹی ءِ بنجاھی جارکش ءَ بسیمگ ءُ واشُک دمگ ءَ زانشتی ادارھانی زوالی ءُ زانشتی بے آسراتی ءِ سر ءَ ایراد گِپتگ ءُ گْوشتگ کہ واشُک ءُ بسیمگ دمگ ءِ آبادی دو لَک ءَ گیش اِنت بلے انگت اود ءَ پہ شریں وانگ ءُ زانگ ءَ بُنکی ادارہ نیست ءُ دومی نیمگ ءَ سرجمیں دمگ ءِ وانشجاہ گْوستگیں شش سال بیت کہ بند اِنت۔ 2008 ءَ کہ ھمے وانشجاہ ءِ بندگ منّگ بیتگ اَت، انگت ءَ ایشی ءِ جاڑی نہ بیگ آجکھی گپے ءُ زانشتی تک ءِ سر ءَ سرکار ءِ نادلگوشی ءَ ھم پدر کنت۔ سدانی کچ ءَ نودربر دہ کلاس ءِ وانگ ءَ پد وانگ ءَ یلہ کن اَنت ءُ ایشی ءِ تاوان بلوچ چاگرد ءِ باندات تھاری ءِ نیمگ ءَ دکہ دیگ ءِ سْوب جوڑ بیت۔ زانشتی تک ءِ دمگی کارمستر پہ سپارش ءُ سیاسی مردمانی گْوشگ ءِ سْوب ءَ دارگ بہ بنت گڑا وانگجاہ ءُ وانشجاھانی تہ ءَ وانگ ءُ ٹیچرانی ساڑی بیگ ھمے سِلیں تْرام ءِ ارجان بیت۔سرجمیں بلوچستان ءَ وانگجاھانی تہ ءَ ٹیچرانی ساڑی نہ بیگ برجاہ اِنت بلے وتگڑیں سرکار ءِ نیمگ ءَ وانگ ءُ زانگ ءِ بابت ءَ ھُشکیں ٹاپار جنگ برجاہ اِنت۔اے دومی سرکار اِنت وانگ ءُ زانگ ءِ نام ءَ لکانی کچ ءَ کلدار ھرچ کنگ ءِ ٹاپار جنگ ءَ اِنت بلے ایشانی ھچ کار کِرد ماں زمین ءِ سر ءَ گندگ بیگ ءَ نہ اِنت۔ آئی ءَ گْوشتگ کہ بلوچ راج ءِ آؤکیں بانداتاں تھاری ءِ نیمگ ءَ دکہ دیگ ءِ موکل ءَ ھچ پیم ءَ نہ دئیں۔ بساک بلوچ لٹریسی کیمپین بلوچستان ءَ وانگجاھانی پُرکار کنگ ءَ گیشتر جُھد کنت۔واشک ءُ بسیمگ ءَ گل ءِ باسکاں وانگجاہ ءُ وانشجاھانی نام ءُ ڈس یکجاہ کُرتگ اَنت کہ چہ ایشاں گیشتر وانگجاہ چہ بنکی آسراتیاں زبھر اَنت ءُ ٹیچر ھم وانگجاھاں آھگ ءَ نہ اَنت۔ بسیمگ ءِ وانشجاہ ءَ کلاسانی پچ نہ بیگ ءِ سْوب ءَ سدانی کچ ءَ نودربراں وانگ یل داتگ ءُ نوں ھمے گُمان کنگ بیتگ کہ اے نودربر در چاگردی ءُ در سیاسی چِست ءُ ایرانی بھر جوڑ بنت کہ چاگرد ءِ تہ ءَ یک مزنیں جنجال ءُ آؤکیں وھداں یک تباھی یے جوڑ بوت کنت۔اے جنجال لس مردم،سیاسی سروک ءُ سرجمیں دمگ ءَ سانمند کنت۔ وتی درشان ءِ گُڈّی ءَ آئی چہ سرکار ءُ وانگ ءُ زانگ ءِ دمگی واکداراں لوٹ کُرتگ ءُ گْوشتگ کہ زوت بسیمگ ءُ واشک ءِ زانشتی جیڑہ گوں سنگینی ءَ گیش ءُ گیوار کنگ بہ بنت کہ چہ ایشاں وانشجاہ ءِ پُرکار کنگ، وانگجاھاں استاد ءُ نودربرانی ماں وانگجاھاں آھگ ءِ سر ءَ دلگوش گْور کنگ بہ بیت۔ وانگجاھانی تہ ءَ کیمپس پچ کنگ بہ بیت داں اے پدمنتگیں دمگ چہ زانت ءُ زانشت ءَ رُژنا کنگ بہ بیت۔اگاں سرکاری نمائندہ ءُ کارمستراں زوت گامگیج نہ زُرت گڑا گل راھبندی ءُ کانودی راہ ءِ بنیاد ءَ دیمتر ءَ تُرندیں گامگیجے زور ایت۔ بنشون: درشان |اکس: دامگ