ریڈیو زْرمبش بلوچی | ریڈیو زْرمبش بلوچی

تربت: چہ کیچ ءِ بنجاھی شھر تربت ءَ 16 جون 2013 ءَ پاکستانی لشکر ءِ دست ءَ زور بیگواہ کنگ بیتگیں بلوچی زبان ءِ لچہ کار مراد جان نوانوی ءِ برات آزم ءَ وتی برات ءِ آجوئی ءِ لوٹ کرتگ۔ آئی ءَ گوشتگ کہ من ءَ سے شمبے ءِ روچ ءَ لوٹگ بیتگ کہ بیا تربت ءَ ما وھدے سے شمبے ءَ شتگ ایں مارا ھمے گوشگ بیتگ کہ چار شمبے ءَ بیا اِت۔ ما وھدے چار شمبے ءَ شُتگ ایں مارا نوربکش ءَ جُست کرتگ کہ آ تربت ءِ پٹ ءُ پولی کارمستر اِنت آئی ءَ گوشتگ کہ مراد جان ءِ بیگواھی ءِ ایپ آئی آر ءَ بیار اِت۔ آزم ءِ گوشگ اِنت کہ ما نزانیں ایپ آئی آر ءَ کجا بہ دئیں؟ مارا دہ سال اِنت پہ ایپ آئی آر ءَ ھمک دروازگ ءَ ٹکگ ءَ ایں کس مئے ایپ آئی آر ءَ دست نہ گیپت، منی برات ءَ دہ سال سرجم بیگ ءَ اِنت کہ بیگواہ کنگ بیتگ۔ آئی ءَ گوشتگ کہ من ءَ گْوشگ بیتگ کہ آئی ءِ بیگواہ کنگ ءِ وھد ءَ چم دیستیں گواھے بیار، اگاں گواہ لوٹ ایت گڑا چم دیستیں گواہ نسار دشتی اِنت کہ گوں مراد جان ءَ ھوار آوار جنگ ءُ بیگواہ کنگ بیتگ کہ آ سے چار روچ ءَ پد یل کنگ بیتگ مراد جان نوانوی انگت ءَ بیگواہ اِنت۔ آزم ءَ گوشتگ کہ تربت ءَ مئے گون ءَ اے وڑ ءَ کنگ بیتگ مارا 31 جنوری ءَ شال ءَ لوٹ اِتگ اِش، مئے ادارھانی ھال ایش اِنت۔ یات بہ بہ اِت کہ مُراد بلوچی زبان ءِ شائرے ءُ آئی ءِ کتابے جُنز ءِ نام ءَ چاپ ءُ شنگ بیتگ۔ نوں مُراد جان ءِ بیگواھی ءَ دہ سال سرجم بیگ ءَ اِنت کہ انگت بیگواہ اِنت۔ مُراد جان ءِ کھول ءِ گْوشگ اِنت کہ ما پہ آئی ءِ یل کنگ ءَ ھچ چیز پشت نہ گِپتگ ھر مردم ءُ ھمک دروازگ ٹُک اِتگ بلے انگت منی برات ھچ پیمیں ھال نیست۔ما نہ زانیں کہ ھست اگاں نہ۔ کھول ءَ چہ مردمی سیاسی، مردمی اگبالانی ادارہ ءُ چاگردی کارکناں دزبندی کُرتگ کہ پہ مُراد جان ءِ یل کنگ ءَ توار چِست بہ کن اِت۔ بنشون: کھول | اکس: دامگ