ریڈیو زْرمبش بلوچی | ریڈیو زْرمبش بلوچی

ھاران ءَ شیک سلیم ءَ ھوار کشندہ ٹولی ءِ چار کارمَنْدانی کوش ءِ زمہ واری بی ایل اے ءَ منّ اِتگ

ھاران ءَ شیک سلیم ءَ ھوار کشندہ ٹولی ءِ چار کارمَنْدانی کوش ءِ زمہ واری بی ایل اے ءَ منّ اِتگ

NOV

18
18 / 11 / 2022 بی این اے  ,  بی ایل ایپ 89

بلوچ آجوئی لشکر ( بی ایل اے ) ءِ جارکش آزاد ءَ ماں رسانکدر ءَ وتی شنگ کرتگیں درشانے ءَ ھاران ءَ کشندہ ٹولی ءِ کارمنْدانی کوش ءِ زمہ واری منّ اتگ ءُ گوشتگ کہ گوستگیں شپ ءَ مئے سرمچاراں ھاران ءِ شھر ءَ ھاجی ابراھیم چنگیزی میتگ ءَ کشندہ ٹولی ءِ سروک شیک سلیم تگاپی ءِ ڈوار ءَ اُرش کرتگ ءُ گوں آئی ءَ دگہ سے کارمند اَبدرزاک، سیپ اسلام ءُ سنا اللہ کشتگ ءُ دلشاد نامیں کارمندے ٹپی بیتگ۔ اُرش ءِ وھد ءَ آدگہ کارمنداں ڈوار یلداتگ ءُ جستگ اَنت۔ جارکش ءَ گوشتگ کہ اے اُرش ءِ زمہ واری ءَ مئے گل بی ایل اے منّ ایت۔ آزاد ءِ رد ءَ شیک سلیم تگاپی گوستگیں یک دھکے ءَ گیشیں وھدے ءَ گوں وھد ءِ بنّامیں مزھبی ناشرکار شپیک مینگل ءِ چیردستی ءَ کارکنگ ءَ بیتگ۔ شال، ھاران، ھزدار ءَ ھوار بلوچستان ءِ بازیں جاھاں پاکستانی لشکر ءِ گوشگ ءِ رد ءَ آ بلوچ ورنایانی زور بیگواھی، نشانگ کنگ، بندیگجاھاں آزار دیگ ءُ بلوچ چکچینی ءِ کاراں یک کماندارے ءِ وڑ ءَ کنگ ءَ بیتگ۔ چہ ایشی ءَ اَبید دُزی، لُٹ ءُ پُل، باجگری، آوار جنگ ءُ زْر گرگ کجام ھم چاگرد دُژمنیں کاراں ساری ءَ بیتگ۔ گوستگیں چنچو سالاں ھزدار ءِ ھند توتک ءُ وڈ ءَ برجاھیں شپیک مینگل ءِ بنجلانی تہ ءَ بیتگ ءُ کشندہ ٹولی ءِ بازیں نِٹورکانی سروکی ءَ کنگ ءَ بیتگ۔ آزاد ءَ دیمتر ءَ گوشتگ کہ چہ ایشی ءَ اَبید جھاد ءِ نام ءَ بازیں سادگ ءُ کسان سالیں ورنا رد داتگ اَنت ءُ پنجاپ ءَ پہ ھیلکاری ءَ دیم داتگ اَنت۔ اود ءَ پاکستانی لشکر ءُ چیریں ادارھانی سروگان ورنایانی زھناں ٹگلین اَنت ءُ پد ءَ آیاں بلوچستان ءَ راجی جُنز ءُ دومی ھمساھگیں ڈیھانی بگیری ءَ کارمرز کن اَنت۔ آئی ءَ گوشتگ کہ شیک سلیم گوستگیں پنچ ماھاں ھاران ءِ کِر ءُ کشانی ھنداں پاکستانی لشکر ءُ چیر ادارھانی ھمراھی ءَ ورنایانی آوارجنی ءَ ھوار لشکر ءِ چیردستی ءَ بے میار ءُ کودگیں مردماں بیھار دیگ ءُ آیانی ڈگارانی دستیگ کنگ ءَ ھوار بیتگ۔ چہ ایشی ءَ اَبید ھک توار ءِ نام ءَ ھندی نزوریں باپاریانی سر ءَ کاگد دیم دیگ ءُ باجگری لوٹگ ءَ بیتگ۔ جارکش ءَ وتی درشان ءِ گُڈی ءَ گوشتگ کہ ھاران ءَ ھوار زورگپتیں بلوچستان ءِ درسیں ھندانی کشندہ ٹولی ءِ ھمک کارمند مئے نشانگ ءَ اَنت۔ بنشون: درشان | اکس: بی ایل اے