ریڈیو زْرمبش بلوچی | ریڈیو زْرمبش بلوچی,سرباز-وپا

مراد امیر ءِ جیڑہ وئیلے نہ اِنت، زوراکی یے | نبشتہ کار : سرباز وپا

مراد امیر ءِ جیڑہ وئیلے نہ اِنت، زوراکی یے | نبشتہ کار : سرباز وپا

APR

25
25 / 04 / 2021 نبشتانک 181

 


گپے مدام مارا زھن ءَ دارگ لوٹ ایت کہ وئیل ءُ زوراکی دو جتائیں چیز اَنت۔ وئیل چہ واجہ ھدا ءِ نیمگ ءَ کیت، چوش کہ ھور ءُ توپان، زمین چنڈ ءُ وبا ءِ رنگ ءَ بیت۔ وھدے مردمے گوں دومی مردم ءَ یا راجے دومی راج ءِ سر ءَ ارش کنت گڑا آ وئیلے گْوشگ نہ بیت ، بلکیں آ زوراکی یے زانگ بیت۔


انچوش کہ چہ 1948 ءَ بہ گر داں روچ ء مروچی پاکستان ءِ زوراکی بلوچ راج ءِ سر ءَ برجاہ اِنت۔ گار ءُ بیگواہ کنگ، کشگ ءُ لاش ءِ دور دیگ۔ بلوچ ءِ مات ءُ گھاراں لٹ دیگ ءُ زندانی کنگ، شھید کنگ۔ بلوچستان ءِ تہ ءَ پاکستانی لشکر ءُ آئی ءِ چریکانی زوراکی جتا جتائیں رنگاں گندگ ءَ کاینت۔


مئے گلزمین ءِ سر ءَ ھمک وھد ءُ ھمک جاہ ءَ انچیں دردناکیں زوراکی دیم ءَ کیت کہ مردم ءِ جگر کپ بیت۔ بلوچ ءِ پیر ءُ کماش، ورناھانی گار ءُ بیگواہ کنگ، آھانی لاشانی دور دیگ ءَ اَبید بلوچ لج ءُ ننگ،گیرت ءِ سر ءَ ارش بوگ ءَ اِنت۔ بلوچ راج نشتگ ءُ ھمے زوراکیاں نِدارگ کنگ ءَ اِنت۔ ابید چہ ارمانی کنگ ءَ دگہ ھچ پہ ھچ، تیوکیں ھاموشی ءَ نشتگ ءُ وتی تالہ ءِ زنگ ءَ جنت۔ یا یک دو دیمیں آدینک، سرکاری کاسگ لیسے ءِ سروکی ءَ روت دو روچ ءَ دگبندی ءُ زھرشانی کنت ءُ ھمے جار ءَ جنت کہ مارا انساپ لوٹ اِیت۔ دو روچ ءَ پد ھرکس ھاموش اِنت کس نہ زانت چی بوتگ، جیڑہ ءِ جند بے ھال کنگ بیت۔ بلوچستان ءِ تہ ءَ اے وڑیں زوراکیانی سر ءَ توار چِست کنگ ھپتگ ءِ سرءَ جُما ءِ نماز ءِ وانگ ءِ وڑ ءَ اِنت کہ جما ءِ روچ ءَ میست ءَ سداں مردم نشتگ ءُ ملا ءِ گپاں سبھان اللہ سبھان اللہ کنت ءُ دومی روچ بیت میست ءَ ابید ء ملا ءَ دگہ یک ءُ دو مردم ءَ دگہ کس گندگ نہ بیت۔ مردم نزانت اے کُج ءَ شُتگ اَنت۔


بلوچستان ءِ تہ ءَ پہ اے وڑیں جیڑھانی دارگ ءَ سرکار مرماں زور دنت ءُ ھاموش کنت، یا وتی داشتگیں وزیر ءُ میراں پہ مھلوک ءِ رد دیگ ءَ کارمرد کنت۔ باید اِنت بلوچ راج اے وڑیں زوراکی ءِ پژدر ءَ سرپد بہ بیت یک ءُ دو بر نہ اِنت اے وڑیں زوراکی بوگ ءَ اِنت، اے وڑیں درد ءِ کسہ ھزاراں گندگ ءَ کیت۔ چہ سرکار ءَ اَبید آئی ءِ داشتگیں چریکانی دست ءَ ہر ھپتگ ءُ ماہ ءَ اے وڑیں ناشرکاری بوگ ءَ اِنت۔ بلوچستان ءِ تہ ءَ اے وڑیں زوراکی سک باز اِنت۔ یکے رسانکدر ھر کج ءَ بلوچ ءِ دز رس ءَ نہ اِنت، دومی مردم پہ زوگیر ءِ ترس ءَ اےوڑیں گپ ءُ زوراکی ءَ چیر دے اَنت، یا سرکاری میر پہ ھمے جیڑھانی در آھگ ءَ مردماں رد دے اَنت ءُ ھاموش کن اَنت۔ ھمے گپ ءَ پیش کن اَنت شما اے گپ کش اِت چاگرد ءِ تہ ءَ شمئے ازت کپ ایت ءُ بدنام بہ اِت۔ ہر کج ءَ کہ پاکستانی لشکر ءِ پانگسے ھست ، آ میتگ ءِ تہ ءَ ترا اے وڑیں بدکاری ءِ یک ءُ دو زوراکی الم دز کپ ایت کہ اود ءَ یا پاکستانی لشکر ءِ کارمندے ءَ بزگیں بلوچے ءِ گِس ءَ دور کرتگ، یا آئی ءِ چریکے ءَ وتی دیم سیاہ کرتگ۔ یا گوں ماس ءُ گھارے ءَ بدکاری کنگ بوتگ، یا مراد ءِ وڑیں گْونڈلے ایشانی ھوس ءِ نشانگ بوتگ۔ اے وڑیں ناشرکاری پرچا روچ پہ روچ ءَ گیش بوگ ءُ دیم ءَ روگ ءَ اِنت۔ ایشی ءِ پژدر راجی گلامی اِنت۔


یات بہ بیت 29 اکتوبر 2017 ءَ پاکستانی لشکر ءَ جاہ ء آھو کوھڑو ءَ میتگ ءِ کلیں زھگ ءُ زالبول وتی پانگس ءَ برت اَنت چہ لَٹ ءُ آزار دیگ ءَ گل بھت ء شھداد بے ھوش بوتگ اَت۔ گوں ھمے بے ھوشی ءِ جاوراں کراچی ءَ برگ بوتگ اَت۔ 2019 ءَ کسوئی زامران ءَ پاکستانی لشکر ءَ بانک مھرجان ءُ آئی ءِ براس دزگیر کرتگ ءُ یک شپے وتی زندان ءَ آزار داتگ اَت ، مھرجان ءِ دست پْروشتگ اَت۔ 15 مارچ 2020 ءَ پاکستانی لشکر ءَ چہ آواران زیارت ڈن ءَ سکی داد ءِ لوگبانک بی بی رزیہ برتگ اَت چہ آزار دیگ ءَ پد بے ھوشی ءَ آ لوگ ءَ سر کرتگ اَت۔ یا کہ پاکستان ءِ چریکانی دست ءَ شھید ملکناز ءُ کلسوم ءِ زوراکیں کوش بہ بہ اَنت، یا نودربریں ھیات جان بہ بیت۔


شھید ملکناز ءِ کوش ءِ ھلاپ ءَ سرجمین بلوچستان ءِ تہ ءَ زھرشانی کنگ بوت، آئی ءِ کشندہ سمیر سبزل دزگیر بوت۔ چہ مھلوک ءِ ھاموش بوگ ءَ پد پاکستان ءِ انساپجاہ ءَ سمیر سبزل بے میار کرت۔ ھمے وڑ ءَ کسانسالیں ھیات ءِ ناھکیں کوش بہ بیت کہ داں لھتیں روچ ءَ مردماں توار چِست کرت بلے انوں ھر کس ھاموش اِنت۔ پہ بلوچ ءِ لاپ ءِ شوھازگ ءَ ایرانی سیمسر ءِ بند کنگ بہ بیت کہ چار بلوچ پہ تن ءُ گژن ءَ بیران بوت۔ یا کہ بلوچستان ءِ تہ ءَ ترا اے وڑیں ھزاراں زوراکی گندگ ءَ کیت پاکستانی لشکر ءَ تیرگواری کرتگ، بلوچ ءِ ورناہ ، پیر ءُ کماش شھید کنگ بیتگ اَنت۔ اے کلیں زوراکی بلوچ راج ءَ ھمے گپ ءَ پیشدار اَنت تو گلام ءُ ترا اے گلزمین ءِ سر ءَ ھچ ھک ءُ مز نیست، زوراک ھرچی بہ لوٹ ایت کرت کنت۔


پاکستانی زور گیریں لشکر ءِ گوں کسانسالیں مراد جان ءَ رستری کنگ، بلوچ راجی گیرت ءِ جیڑہ اِنت۔ بلکیں اے وئیلے نہ اِنت ،زُوراکی یے ۔زوراکی ءِ آماچ بوتگیں مُراد ، آ تھنا امیر بکش ءِ زھگ نہ اِنت، بلوچ راجی پرزندے۔ بائد اِنت سرجمیں بلوچ راج اے زوراکی ءَ ھلاپ ءَ پاد بئیت ءُ وتی جوھر ءَ پیش بہ دار اِیت۔ پمیشکا مارا راستی منگی اِنت کہ پہ وتی وتن ءِ آجو کنگ ءَ جھد کنگی اِنت داں بلوچستان چہ زورگیریں پاکستان ءَ آجو کنگ نہ بوتگ، ہر روچ مئے راج ءِ باندات ءِ چِراگ، مئے ماس ءُ گھار زورگیریں دژمن ءِ زوراکیانی نشانگ بہ اَنت۔ یات بہ بیت اے ھما لشکر اِنت گوں بنگالیانی ماس ءُ گھاراں ءُ پرزنداں کجام داب ءَ پیش بوتگ۔ بلوچ ءِ لَج ءُ گیرت چہ اے زوراک ءِ دست ءَ کدی رک اِت نہ کنت دانکہ آجو نہ بوتگ۔ بلوچ راج ءُ آئی ءِ پرزندانی پھازوک آزات بلوچستان اِنت۔ داں بلوچستان آجو نہ بوتگ۔ اے گلزمین ءِ سر ءَ کس پشت نہ کپ ایت۔