ریڈیو زْرمبش بلوچی | ریڈیو زْرمبش بلوچی

اوگانستان:نمروز ءِ بنجاھی شھر زْرنج تالبان ءَ دستیگ کُرتگ ءُ بازیں بلوچ نودربرے دزگیر کنگ بیتگ

اوگانستان:نمروز ءِ بنجاھی شھر زْرنج تالبان ءَ دستیگ کُرتگ ءُ بازیں بلوچ نودربرے دزگیر کنگ بیتگ

AUG

06
06 / 08 / 2021 اوگانستان 91

نمروز ءِ اوگانستان ءِ ھما استان اِنت کہ آئی ءِ گیشتریں جھمنند بلوچ اَنت ءُ نمروز ءِ بنجاھی شھر زْرنج اِنت کہ مرچی نمروچ ءَ تالبان ءَ دستیگ کُرتگ۔ دمگی اھوالکار ءِ رد ءَ تالبان ءَ استان ءِ بنجاھی شھر ءِ گورنر گِس ءُ بالی پٹ ءَ ھوار بازیں سرکاری ماڑی یے ابید گھگیری کنگ ءَ دستیگ کُرتگ۔ چاگردی رسانکدر ءَ شنگ بیتگیں اکسانی تہ ءَ گندگ بیت کہ مردم سرکاری ماڑیاں لُٹ ءُ پُل کنگ ءَ اَنت۔ وھدے کہ یک تامُر بندے ءَ گندگ بیگ ءَ اِنت کہ بازیں بلوچ ورنایے تالبان ءَ دستیگ کُرتگ ءُ دست پُشت ءَ بستگ اَنت۔کہ اےشانی تہ ءَ یکے بلوچی ءَ گْوشگ ءَ اِنت کہ ایشاں مئے دست پُشت ءَ بستگ اَنت بوت کنت کہ اے نی مارا بہ کُش اَنت۔ انیگیں دور ءَ اے اوگانستان ءِ اولی استان اِنت کہ تالبان ءَ دستیگ کُرتگ۔ زْرنج ایران ءِ سیمسر ءِ نزیک ءَ اِنت ءُ باپاری شھرے۔ایشی ءِ کش ءُ گْورانی دمگانی دستیگ کنگ ءَ پد تالبان ءَ پہ بنجاھی شھر ءِ دستیگ کنگ ءَ مدام اُرش برجاہ بیتگ اَنت۔ نمروز پولیس ءِ کارمندے ءِ رد ءَ چہ سرکار ءِ نیمگ ءَ گیشیں لشکر ءِ راہ نہ دیگ ءِ سْوب ءَ تالبان شھر ءِ دستیگ کنگ ءَ سوبین بیتگ۔ دومی نیمگ ءَ اوگان تالبان ءَ وتی شنگ کُرتگیں درشانی ءَ گْوشتگ کہ تالبان ءَ نمروز استان دستیگ کُرتگ کہ آیانی تہ ءَ گورنر گس، پولیس بنجل ءُ چیریں تْرامگیجانی بنجل ھوار اِنت۔ بنشون: دمگی اھوالکار/اکس: چاگردی رسانکدر