ریڈیو زْرمبش بلوچی | ریڈیو زْرمبش بلوچی,کازی-ریھان-,سرشون

سرشون: بلوچی راست نبیسی بنرھبند ءِ ردءَ گچینی پہ ندکاراں |پنچمی بھر | کازی داد مھمد ریھان

سرشون: بلوچی راست نبیسی بنرھبند ءِ ردءَ گچینی پہ ندکاراں |پنچمی بھر | کازی داد مھمد ریھان

JUL

25
25 / 07 / 2021 نبشتانک 107

پہ پی ڈی ایپ ءَ جھل ءِ چیڑو ءَ گر


 


5-Sarshoon-by-KaziRehan


 


چکاس نمبر 4ءِ پسو :


1۔جستانی پسو ءَ بہ دئے :


الپ: سے


ب: بنداتی : من ۔ ما۔ تو۔ شما ۔ آ۔ آیاں
میانی : آن۔ اِن۔ اِت۔اِت۔ ئِے۔اِش
گڈی : آں۔ ایں۔ ئے۔ اِت۔ اِیت، اِنت۔ اَنت۔


پ: گڈی پنامدانکاں «کارکن شناس» ھم گْوش اَنت کہ درسی ھپت اَنت: آں ، ایں، ئے ، اِت ، ایت ، اِنت ءُ اَنت۔
ت۔کارکن شناس چہ کاردانک ءُ نامدانکاں گستا نبشتہ کنگ بہ اَنت۔ گالردانی ھرجاہ ایشانی نبیسگ ءِ دْروشم ھمے یکیں وڑ ءَ بیت۔
ٹ۔چوش کہ کارکن شناساں وت ءَ جتائیں بزانت ھست ءُ پنامدانکانی جھگیری کن اَنت ءُ آیانی بارہ ءَ گْوش اَنت پمیشکا ایشانی گستانبیسی ءَ گالرد گیش ایت ءُ واناک بیت۔


2۔ الپ: راست ۔ ب : رد ۔ پ:رد ۔ ت : راست۔ ٹ: راست ۔


3۔ گالردانی راست نبیس:


الپ: من روگ ءَ آں۔
ب: تو نبشتہ کنگ ءَ ئے۔
پ: آ کسمانک ءِ تہ ءَ کار کنگ ءَ اِنت۔
ت: شما باند ءَ کراچی ءَ روگ ءَ اِت۔
ٹ: ما ھمد ءَ نشتگ ایں شما بہ رو اِت۔
ج: آ سک شر نبیسگ ءَ اِنت۔
چ: آ دوئیں مروچاں بلوچی در برگ ءِ کوشست کنگ ءَ اَنت۔


----------------------------


 


جتکدانک (ترکیب )


 


ھما دانک کہ گوں دو یا گیشتردانکانی ھوار کنگ ءَ جوڑ بہ اَنت ءُ دگہ نوکیں بزانتے درا کن اَنت « جتکدانک » گْوشگ بہ اَنت۔جتکدانکانی «دانک» اگاں ماں سْیاھگ یا کہ نبیسگ ( کمپوزنگ ) ءَ بے براہ نہ بہ اَنت ھوار نبیسگ اِش جْوان تر اِنت داں کہ زانگ بہ بیت کہ یکیں دانک اَنت ۔ لھتے دانک کہ میان ءَ اِش انچیں « آب » اَنت کہ گوں دگہ دانکاں ھوار نہ بہ اَنت گستا نبیسگ اِش شر تر اِنت ۔ چوش کہ « پلہ مرزی ۔ کریچ اگریچ »۔ گیشتریں جتکدانک ھوار نبیسگ بہ اَنت۔چوش کہ : آپبند ، راھبند ، سرمگدان ، نوکاپ،پاگواجہ ۔
اے جتکدانکاں یک رندے پد ءَ دلگوش کن اِت۔
«آپبند » ءِ تہ ءَ «آپ »ءِ بزانت «آپ » ءِ جند اِنت ءُ «بند» ھما ھاکی ڈمپگ ءَ گْو ش اَنت کہ ڈگارانی گرد ءَ جوڑ کنگ بیت داں ڈگار آپ بہ دار اَنت ۔
بلے «آپبند» ءِ بزانت آپی بند نہ اِنت بلکیں آپبند سیمسر ءَ گْوش اَنت۔
ھمے پیم «سرمگدان» ءِ دو جتائیں دانک «سرمگ +دان» اَنت بلے ھوار کنگ ءَ پد یک چیزے ءِ نامے بہ اَنت۔نوکاپ ءُ پاگواجہ ھم انچوش۔
-لھتے جتکدانک وھدے کہ ھوار نبیسگ بیت آیانی میان ءِ لھتے آب کم کنگ بیت داں جتکدانک وانگ ءَ روان بہ بیت ۔ چوش کہ :روچ زرد : رو زرد ، نوک جوان : نوجوان ءُ ھمے پیم ۔
- « دست » وھدے گوں دگہ دانکاں ھوار کنگ ءُ جتکدانک جوڑ کنگ بیت ۔ «ت » دیر کیت ءُ «س » ءِ جاہ ءَ «ز» گون کنگ بیت۔ چوش کہ : دست مال : دزمال ۔ دست رند ۔ دز رند۔
-«وش» اگاں گوں دگہ دانکاں ھوار کنگ ءُ جتکدانک جوڑ کنگ بہ بیت «ش » ءِ جاہ ءَ «ژ» وانگ بیت۔ چوش کہ : وش +نام :وژام ، وش+دل : وژدل ۔


 


---------------
چکاس نمبر 5


 


1۔جتکدانک چی ءَ گْوش اَنت ؟
2۔بیست جتکدانک نبشتہ بہ کن۔
3۔جھل ءِ نبشتگیں جتکدانکاں راست نبشتہ بہ کن۔
بن راھبند ۔ دل بر۔ منت وار۔ دل دار۔پنت تاک۔ گل گدار۔ آپ دست۔آپ لاپ۔گْوات جن۔آمید بند ۔گروہ تاچ۔دست جن


 


-----------------------


 


دیم ۔ پشت


 


ما اے گپ ءِ ھچ منوک نہ ایں کہ”دیم ءُ پشت “ءِ دانک ھر وھدے پہ مردمی بالادے ءِ بھرے ءَ کارمرد بہ اَنت گوں « ءَ » ءَ گستا نبیسگ بہ بہ اَنت ءُ وھدے پہ نیمگ (ڈائریکشن) ءَ کارمرد بہ اَنت گڑا گوں « الپ » ءَ ھوار کنگ ءُ « دیما ءُ پشتا » نبیسگ بہ بہ اَنت ، ما ایشی ءِ پمیشکا منوک نہ ایں کہ ھردو گپانی بزانت یکین اِنت ۔اگاں کسے گْوش ایت کہ « دیم ءَ بہ رو » من ئِے ھمیش اِنت کہ وتی دیم ءِ تچکی ءَ بہ رو یا پشت ءِ نیمگ ءَ ۔


 


-----------------------


 


چکاس نمبر6۔


 


1۔جھل ءِ گالرداں راست کن۔


 


الپ: آ اتک ءُ وتی پشت ئِے پر کرت ءُ چہ گوریچانی نیمگا گْوست، آئی ءِ پشتا وشیں بویے تالان اَت۔
ب۔دیما بہ چار کہ چون بیت۔
پ۔پشتا مہ کنز کہ کپ ئے۔
ت۔آئی ءِ دیما ٹکے پر اِنت۔
ٹ۔بہ رو وتی دیما شود ءُ بہ یا۔