ریڈیو زْرمبش بلوچی | ریڈیو زْرمبش بلوچی,کازی-ریھان-,سرشون

سرشون: بلوچی راست نبیسی بنرھبند ءِ ردءَ گچینی پہ ندکاراں |بنداتی بھر | کازی داد مھمد ریھان

سرشون: بلوچی راست نبیسی بنرھبند ءِ ردءَ گچینی پہ ندکاراں |بنداتی بھر | کازی داد مھمد ریھان

JUL

17
17 / 07 / 2021 نبشتانک 150

پہ پی ڈی ایپ ءَ وانگ ءَ جھل ءِ چیڑو ءَ گر اِت


1-Sarshoon-by-KaziRehan


بنداتی بھر


#سرشون


اے کتاب چون وانگ بہ بیت ؟


انچائیں کتابے ءَ کہ لچھی بیت یا ردانکی مردم آئی ءَ رشت ءَ وانان بیت ءُ دیم ءَ روت بلے چوشیں کتابے کہ آئی ءِ تہ ءَ چیزے ءِ بارہ ءَ سر ءُ سوج دیگ بیت باید گوں دو ھمینچک دلگوش ءَ وانگ بہ بیت۔
اے کتاب کہ شمئے دیم ءَ اِنت اے بلوچی سْیاھگ ءِ راست نبیسی ءِ بارہ ءَ اِنت چوناھیا بنرھبند ءُ سْیاھگ دو جتائیں چیز اَنت بلے منی منگ ھمیش اِنت کہ داں وھدے ما بلوچی زبان ءِ بنرھبند ءِ بارہ ءَسرپد مہ بہ ایں ما ایشی ءِ راست نبیسی ءَ شری ءَ پوہ بیت نہ کن ایں، اے دوئیں چیز گوں یک دومی ءَ ھمگرنچ اَنت بلے بنرھبند ءِ بنگپ گالرد انی تچکی اِنت ءُ سْیاھگ ءِ بنگپ دانکانی راست نبیسی اِنت۔
اے کتاب سْیاھگ ءِ راست نبیسی ءِ سر ءَ اِنت ما اے کتاب ءِ تہ ءَ وان ایں کہ ما جتائیں گالواراں گپ جنوکیں نبشہ کار چوں ماں یکیں سْیاھگ ءَ نبشتہ کرت کن ایں پہ ایشی ءَ راھبند چی اَنت ءُ اے راھبندانی بنیاد چی اِنت؟
اے کتاب مارا شون دنت کہ بلوچی نبشتاری زبان چہ گْوشگ ءِ زبان ءَ جتا اِنت ءُ ھچ دمگ ءِ گالوار نہ اِنت بلکیں گچینی زبانے کہ بلوچی بنرھبند ءُ بنتوارانی بنیاد ءَ نبیسگ بیت ۔بلوچی ءِ نبشتاری زبان گْوستگیں نزیک ء سے سد سال ءِ نبشتانکانی تہ ءَ کارمرد بیوکیں زبانانی گچین اِنت پمیشکا جتائیں ھند ءُ دمگانی دانک ءُ گالوار مروچیگیں نبشتاری زبان ءِ بھر اَنت۔
اے کتاب ءِتہ ءَ چہ ھمک بنگپ ءَ پد لھتے جست ھوار کنگ بیتگ ءُ کتاب ءِ گڈی ءَ ھما جستانی پسو گستا نبشتہ کنگ بیتگ اَنت بلے وانوک باید یک برے وت ءَ بہ چکاس ایت ءُ ھما جستانی پسو ءَ چہ وت دیگ ءِ کوشست بہ کنت۔ چہ جستانی زانگ ءَ کمک زیرگ ءَ پیسر درونت ءَ بہ وان ایت ءُ جستانی پسو ءِ زانگ ءِ کوشست بہ کنت۔
انچوش کہ من بندات ءَ گْوشت بنرھبندی ءُ سْیاھگی کتابانی زبان لچہ ءُ داستانی نبیسی زبان نہ بیت۔ سسا ءُ سما یکجا کنگ ءُ وانگ لوٹ ایت ، داں شر شرءَ مردم سرپد بہ بیت۔ اگاں شما تامربندی دْروشم ءَ اے کتاب وانگ ءَ اِت یا گوش دارگ ءَ اِت ۔ تاکان ءُ داتگیں دروراں وتی دیم ءَ ایر بہ کن اِت ءُ آیاں گوں دلگوش ءَ چہ یک گشت ءَ گیشتر رند ءَ داں ھما وھد ءَ بہ وان اِت کہ گپ شری ءِسر ءَ شمئے زھن ءَ بہ نند ایت ۔اگاں بازیں وانگ ءَ پد ھم شما سرپد نہ بیت اِت گڑا جست بہ کن اِت ۔
اے کتاب ءِ تہ ءَ لھتے نوکیں گالبند ءُ دانک کارمرد کنگ بیتگ پمیشکا پہ وانوکانی آسانی ءَ کتاب ءِ گڈی ءَ دانک بلدے (ڈکشنری) ھوار گیجگ بیتگ ۔


 


پیش تْران



بلوچی زبان ءِ مستریں اَڑ آئی ءِ یکزریں سْیاھگءَ نبیسگ نہ بیگ نہ اِنت بلکیں بلوچی بنرھبند ءِ گیش ءُ گیوار نہ بیگ اِنت ۔ زبانے کہ چہ گپ ءَ نبشتاری جوڑ بیت آ رشت ءُ ردوم کنت ۔ نبشتار ءَ پہ مردمانی سرپدی ءَ لھتے راہ ءُ راھبند پکار بہ اَنت۔
چہ سیدھاشمی ءِ سوج ءُ سراں پیش پہ بلوچی نبیسگ ءَ چوشیں راھبندے نیست اَت کہ درسیں نبشتہ کار ھما راھبند ءَ بہ زیر اَنت ءُ یکیں وڑ ءَ نبشتہ بہ کن اَنت۔دراجیں باریگے ءَ سیدھاشمی ءِ نبشتہ راھبند ءِ سر ءَ بلوچانی رندی اڑ برجاہ بیتگ۔باید ھمیش اَت کہ سیدھاشمی ءِ اے کار ساڑا ءُ ستا دیگ بوتین ءُ آئی ءِ اے دیدانک ءِ پلہ مرزی بوتیں کہ آئی ءَ گْوشتگ اَت کہ اے وھدی گوں یک دومی ءِ نبشتہ راھبند ءِ سر ءَ اڑ کنگ ءُ ایرجنگ ءَ گھتر اِنت کہ ما نبشتہ کنوک ءُ وانوکانی سر ءَ اے گپ ءَ یلہ بہ کن ایں کہ آ کجام راھبند ءَ گیشتر سرپد بہ اَنت ءُ کارمرد کن اَنت۔سید ءَ باور اَت کہ آئی ءِ گیش اتگیں سْیاھگ ءِ سر ءَ بلوچ نبشتہ کار ھم پت بہ اَنت۔ گپ سید ءِ بوت مروچی سیدھاشمی ءِ سْیاھگ بلوچی زبان ءِ مستریں سْیاھگے کہ گیشتریں نبشتہ کار ماں ھمے سْیاھگ ءَ بلوچی نبیس ایت۔ اے تیوکیں سْیاھگے کہ ایشی ءِ راھبند گیش اتگ اَنت ءُ کسے ھم بہ لوٹ ایت ایشی ءَ تاکانی سر ءَ ونت ءُ ھیل گپت کنت ءُ دگراں وانینت کنت۔
بلے گْوستگیں دہ سالانی تہ ءَ سیدھاشمی ءِ سْیاھگ ءِ نیمگ ءَ گیشتر دلگوش گْور کنگ بیتگ۔بازیں نبشتہ کار، ورنائیں ندکار ءُ زبانزانتاں بلوچی سْیاھگ ءِ راست نبیسگ ءِ سر ءَ کتاب ءُ نبشتانک نبشتہ کرتگ۔
ھمے جیڑگ ءُ نبیسگ ءِ پد ءَ سیدھاشمی سْیاھگ ءَ نوکتریں گوناپے زرتگ ءُ گچینی رنگے ءَ دیم ءَ اتکگ۔ مروچی اے سْیاھگ ءَ کہ گیشتریں بلوچ نبشتہ کار نبیسگ ءَ اَنت ایشی ءِ بنیاد سیدھاشمی ءَ ایر کرتگ گیشتریں توار ءُ راھبند یک ءُ ٹک ھما اَنت کہ سیدھاشمی ءَ گْوشتگ اَنت بلے دو بنیادی مٹی اتکگ کہ چہ ایشی ءَ اے سیاھگ گھتر ، واناک ءُ پہ نودربرانی سرپد بیگ ءَ آسان تر بیتگ۔


 اے دوئیں مٹی ایش اَنت :


① گستا نبیسی : سیدھاشمی ءَ ھم گستا نبیسی ءِ نیمگ ءَ زور داتگ ءُ وتی سوجانی تہ ءَ گستا نبیسی ءُ بازیں گالانی ھوار نبیسگ راست لیک اتگ۔ بلے اے وھدی کہ ما بلوچی نبشتہ کنگ ءَ ایں اے سْیاھگ ءِ بنیاد گستا نبیسی ءِ سر ءَ ایر اِنت۔ گستا نبیسی ءِ من ایش اِنت کہ ھرچ ھما دانکے کہ آئی ءَ وت ءَ جتا ءُ سرجمیں بزانتے ھست ءُ آئی ءَ وت ءَ جتا ءُ برجمیں توارے گون اِنت آدانک گستا نبیسگ بہ بیت۔
پمیشکا ھم المی اَت کہ سیدھاشمی ءِ نبشتہ کرتگیں بنداتی کتاب « بلوچی بنگیجی ، بلوچی سْیاھگ ءِ راست نبیسگ ءُ سید نمدی » کہ ایشانی تہ ءَ دو بندات ءَ نام گپتگیں کتاب و گچینی سْیاھگ ءُ بلوچی نبیسگ ءِ سر ءَ اَنت ءُ سیمی کتاب کہ سیدھاشمی ءِ نمدیانی نچین اِنت آئی ءِ تہ ءَ سیدھاشمی ءَ سْیاھگ ءِ راست نبیسگ ءِ سر ءَ گپ جتگ۔سید ھاشمی ءَ وتی کتابانی تہ ءَ بازیں برجم ءُ سرجمیں دانک ھوار نبشتہ کرتگ اَنت۔
اے پیم کنگ ءِ لھتے بنیادی انگیز بیتگ اَنت : آ وھدی مروچیگیں کچ ءَ بلوچی نبشتہ کنگ نہ بیتگ۔ سید ھاشمی راھبند ءِ نبیسوک ءُ ٹپاسوک نہ بیتگ کہ داں اے نزوری دیم ءَ بہ اتکین اَنت۔سید ھاشمی ءِ جند ھم ھما راھبند ءَ نبشتہ کنگ ءُ وانگ ءَ بیتگ کہ آئی ءِ تہ ءَ پارسی زبان ءِ رندگیری ءَ کارکن شناس ، ھمگرنچ دانک ءُ پرماندانک ھوار نبیسگ بیتگ اَنت۔ سیدھاشمی ءِ جند ءَ بازیں چیز سما کرتگ ءُ آیانی بندری دْروشم گْوشتگ اَنت کہ دانک بندر ءَ چوش اَنت بلے یا و آئی ءَ نہ لوٹ اتگ کہ یپارگی سْیاھگ ءِ تہ ءَ اینچو مٹی آرگ بہ بیت یا کہ آ ایشاں دانکانی پدونڈ سرپد اَت۔بلے مروچی ما اے سرپد بہ ایں کہ اے دانک پدونڈ ءُ پیش ونڈ نہ اَنت بلکیں زبان ءِ تہ ءَ اے دانکانی کہ ما ایش گستا نبیس ایں ایشاں جتائیں بزانت ھست ءُ اگاں ما ایشاں گستا نبشتہ مہ کن ایں زبان ءِ سرپد بیگ ءُ نبشتہ کنگ گْران تر بیت۔
اے راھبند باز مردماں ناسمائی کارمرد کرتگ۔سال 2009 ءَ بلوچ نیشنل موومنٹ ءِ جارینک « زْرمبش » ءِ بلوچی زبان ءَ چاپ ءُ شنگ بنا بیتگ۔ ھمے وھد ءَ گوں زْرمبش ءَ بندوکیں مردمانی نیمگ ءَ دگہ تاکبندے « مروارد » ءِ نام ءَ ھم چاپ ءُ شنگ بیگ ءَ اَت۔ما ھمے شور کرت کہ مروارد ءَ سیاسی نکان چاپ نہ کن ایں بلکیں مروارد ءَ ندانکی نکان چاپ کن اینءُ درسیں نبشتانکاں یکیں سْیاھگ ءَ شنگ کن ایں۔
بنداتی بر ءَ پہ مروارد ءِ نبشتہ کاراں لھتے سرشون نبشتہ کنگ بوت۔اے گستا نبیسی ءِ راھبند ءِ بندات اَت کہ یکیں وھد ءَ زْرمبش ءُ مروارد ءِ تہ ءَ کارمرد کنگ بوت۔
سال 2011 ءَ من« بام ھال » ءِ نام ءَ بلوچی زبان ءَ بنداتی ھالی تندجاھی شنگ کرت۔گوں بام ھال ءَ دگہ دو تندجاہ ھم ھمگرنچ اَت اَنت یکے بام ھال نبشتانک ءُ دگرے پہ بلوچی بلاگرانی ھیلکاری ءَ تندجاھے کہ آئی ءِ تہ ءَ بلاگانی بلوچی جوڑ کنگ ءِ سر ءُ سوج شنگ کنگ بیتگ اَت۔بام ھال ءِ تہ ءَ گستا نبیسی ءِ راھبند کارمرد کنگ بیتگ ءُ پہ ایشی ءَ تندجاہ ءَسْیاھگی سر ءُ سوجے گون اَت۔ اے سرشون ءِ تہ ءَ ھم لھتے بھر چہ ھمود ءَ زیرگ بیتگ بلے اے چہ پیشیگیں سر ءُ سوجاں گھتر کنگ بیتگ اَنت۔
سال 2014 ءَ زْرمبش شکسار (زْرمبش براڈ کاسٹنگ کارپوریشن ) ءِ بن ھشت ایر بیگ ءَ پد « بام ھال » ءِ کار دارگ بوت اَنت ءُ ھمے بنیاد ءَ ریڈیو زْرمبش بلوچی ءِ ھال ءُ نکانانی تہ ءَ ھمے سْیاھگ کارمرد کنگ بوت۔
جھل ءَ سیدھاشمی ءِ نبشتگیں نمدی یے ءِ درورے داتگ کہ چہ « سیدنمدی » ءِ بنداتی چاپ جنوری 1993 ءَ زیرگ بیتگ۔


بھرن
30 اکتوبر 1961ء
لالی ! وشّ ءُ جوڑ بات ئے !
تئی بے تواری ءِ نیمّون ءَ نہ زاناں!زاناں گوں جْوانیں کارے ءَ مرچاں دست گٹّ ئے کہ دگہ ھچ موہ اِت نہ بیت۔
چما گالاں رند دگہ پربستگیں گال پمن سر نہ بوت۔بلکیں منی بُرّبین پہ تئی گالاں باز گْران کپتگ؟
چہ وتی جاور ءَ زانتکاربکن۔ءُ دگہ مھربانی یے بکن کہ من ءَ لھتیں انچیں بلوچ بْراتانی نشان ءَ نبشتہ بکن کہ گوں ما ءُ شما پجّا آروک اَنت یا کہ ونتگ ءُ سرپدیں مردم اَنت۔اے نشان منی دوستے ءَ پکار اَنت۔بلے کوشست بکن ھرچنت زوت تر بیت اے کار ءَ بکن۔
تئی پسو ءِ رھچاراں۔
تئی
سیدھاشمی
نوکیں راھبند ءَ ما ایشی ءَ چوش نبیس ایں ، ھما جاہ ءَ کہ مٹی اتکگ تیرانی «» شم ءَ کنگ بیتگ اَنت:


بھرن
30 اکتوبر 1961ء
لالی! وش ءُ جوڑ بات ئے !
تئی بے تواری ءِ نیمون ءَ نہ « زان آں۔» زاناں! گوں جْوانیں کارے ءَ « مروچاں » دست گٹ ئے کہ دگہ ھچ موہ اِت نہ بیت؟
«چہ ھما» گالاں رند دگہ پربستگیں گال « پہ من » سر نہ بوت بلکیں منی « بر ءُ بین » پہ تئی گالاں باز گْران کپتگ؟
چہ وتی جاور ءَ زانتکار « بہ کن » ءُ دگہ مھربانی یے « بہ کن » کہ من ءَ « لھتے » انچیں بلوچ بْراتانی نشان ءَ نبشتہ « بہ کن » کہ گوں ما ءُ شما پجا آروک اَنت یا کہ ونتگ ءُ سرپدیں مردم اَنت۔ اے نشان منی دوستے ءَ پکار اَنت۔بلے کوشست « بہ کن » ھرچنت زوت تر بیت اے کار ءَ « بہ کن »۔
تئی پسو ءِ « راھچار آں »۔
تئی
سیدھاشمی


شما اے مٹیاں ھیرت بہ چار اِت: زان آں ، سیدنمدی ءَ ھوار نبشتگ۔ مروچاں ءِ جاہ ءَ مرچاں نبشتگ۔پہ من ، چہ ھما ،بہ کن ھم ھوار نبیسگ بیتگ اَنت۔ ھمے پیم «بر ءُ بین» ءِ تہ ءَ « ءُ » گون نہ اِنت۔ بلے آ دگہ جاھاں مئے سجھیں نبشتانک سید راھبند ءَ اِنت۔ اے گپ ھم دلگوش کنگی اِنت کہ سید ءَوت ھم اے دانک لھتے جاھاں گستا نبشتہ کرتگ اَنت۔
چہ سیدنمدی ءَ اگاں ما درور بہ دئے ایں مئے اے نیاد دراج بیت اد ءَ من اے گْوشگ المی زان آں کہ چوش بھ نہ اِنت کہ اے نوکیں راھبند سید سرشوناں رد کنت ءُ نوکیں رنگے ءَ اِنت بلکیں اے گچینے چہ سید ءِ داتگیں دو سوجانی میان ءَ۔ چوش کہ سیدنمدی ءِ نام گپتگیں چاپ ءِ تاکدیم «21» ءَ سید ءَ «چتّو» ھوار نبشتگ بلے «چہ وتی» ءِ تہ ءَ «چہ» گستا نبشتگ۔ « اَنت ، اِنت ، ئے، ایت اِت » کہ بلوچی سْیاھگ ءِ گیشینگ ءَ مزنیں کردے پیلو کن اَنت سیدھاشمی ءَ گستا نبشتگ اَنت۔
② دومی ءُ کْوھنیں اڑے بلوچی زبان ءِ آبانی بیتگ۔انیگیں زبانزانت ءُ ندکار اے گپ ءِ منوک اَنت کہ بلوچی زبان بلوچی ءِ توارانی وڑ ءَ نبیسگ بہ بیت۔ بلوچ ھما آب ءُ تواراں گْوشت کن اَنت ما ایوک ھمایاں بہ زیر این ءُ وتی سرجمیں نکانانی تہ ءَ کارمرد بہ کن ایں۔ سید ھاشمی ءَ آ زمانگ ءَ مزھبی مردمانی ایراد ءِ دیم ءِ دارگ ءَ تازی نامانی کہ گیشتر اسلامی ستکی نام اَنت تازی آباں نبیسگ ءِ گْوشتگ اَت۔ بلے رند ءِ زبانزانت چوش کہ « استاد گوس بھار» ءِگْوشگ اِنت کہ اگاں ما وتی 25 ئیں آباں گچین کن ءُ چوش گْوش ایں کہ بلوچی ءِ آب ھمیش اَنت گڑا مارا ھمے آبانی تہ ءَ بلوچی نبشتہ کنگی اِنت۔
من چہ ھما نبشتہ کاران آں کہ من سال 1998 ءَ بلوچی نبشتہ کنگ بندات کرتگ ءُ وتی نام ءِ تہ ءَ تازی آب کارمرد نہ کرتگ اَنت۔منی نبشتانک ءُ آزمانک سال 1999 ءَ ماھتاک بلوچی ءَ مزنیں کچے ءَ چاپ ءُ شنگ بیتگ اَنت کہ آیانی تہ ءَ منی نام «کازیداد مھمد ریھان » نبشتگ ۔ آ وھدی چوشیں نبشتہ کار نیست اَت۔بلے انی سیدھاشمی راھبند ءِ منوکانی تہ ءَ گیشتریں بھر وتی ناماں ھم ھمے 25 ئیں آبانی تہ ءَ نبیس ایت۔گیشتریں بلوچی تندجاھانی راھبند ھم ھمیش اِنت کہ آ تازی آباں چگل دئے اَنت۔بازیں ندکارانی کتاب چاپ بیگ ءَ اَنت کہ ابید چہ سید ءِ گیشینتگیں 25 ئیں آباں دگہ آب کارمرد نہ کن اَنت۔
گستا نبیسی ءُ تازی آبانی چگل دیگ ءَ ابید نوکیں سْیاھگ ءِ تہ ءَ چوشیں بازیں بنگپ ھست اَنت کہ سیدھاشمی ءِ کتابانی تہ ءَ آیانی بارہ ءَ نبشتہ کنگ نہ بیتگ۔پمیشکا پہ ندکاراں نوکیں راھبند ءِ سرپد بیگ ءَ اے تاکانی وانگ المی اِنت۔اے ھمے راھبند اِنت کہ مروچی بلوچ ندکارانی گیشتریں بھر ھمیشی ءَ نبیسگ ءَ اِنت۔ اے نبشتہ راھبند ءِ سوبمندی، آسانی ءُ رھواری چہ ھمد ءَ زانگ بیت کہ:


◘ بھمانگیں رنگے ءَ گْوستگیں دہ سالانی تہ ءَ اے راھبند سرجمیں بلوچستان ءُ درانڈیھ ءَ تالان بیتگ۔
◘ بنداتی رند اِنت کہ «سلیمانی گالوار» ءِ نبشتہ کار گوں 25 ئیں آباں سیدھاشمی ءِ سوجانی سر ءَ نبشتہ کنگ ءَ اَنت۔
◘ رودرتکی بلوچستان ءَ گیشتریں بھر ھمے راھبند ءَ نبیس ایت۔
◘ مزن ھور ءِ تہ ءَ کہ بلوچانی مزنیں آبادی یے ھست ، نبشتہ کارانی مستریں بھر ھمیشی ءِ منوک اِنت۔
◘ سرجمیں روکپتی بلوچستان ءَ تیوک ءَ ھمے یکیں راھبند کارمرد بیگ ءَ اِنت۔
اے راھبند ءَ وت رودی ردوم زرتگ ءُ بازیں انچیں چیز بیتگ اَنت کہ چاگردی رسانکدر ءِ نبشتانکانی تہ ءَ ندکاراں ونتگ ، دوست کرتگ ءُ پد ءَ وتی نبشتانکانی تہ ءَ کارمرد کرتگ اَنت۔
بازیں استاداں ھمے وڑ ءَ نودربر وانینتگ اَنت بلے آیانی گْور ءَ چوشیں نبشتگیں چیزے نہ بیتگ ءُ نا ں کہ گستا نبیسی ءُ گیش کرتگیں بنگپانی بارہ ءَ آیانی دیم ءَ دلجمیں مناک بیتگ۔بازیں جاھاں نودربر منی نبشتہ کرتگیں «گال تھر » ءُ «بنرھبندی» نبشتانکانی سر ءَ وانینگ بیتگ اَنت۔ چہ ھمیشانی بنشون ءَ دگہ سْیاھگی نبشتانک ھم نبشتہ کنگ بیتگ۔
اے جست ءِ دیم ءَ آیگ ءَ پد کہ اے راھبند نوکیں راھبند اِنت یا کہ سید راھبند اِنت۔نودربر ءُ بلوچی نبشتہ کار مان گیش اتگ اَنت۔ باز ھمے سرپد بیت چوش کہ سید ھاشمی رنگیں زانتکارے ءِ راھبند ءِ مٹ کنگ مزنیں میارے باید ھچ چیز مٹ کنگ مہ بیت ۔ ھچ وانندگ ءُ زانتکار اے گپ ءِ منوک نہ بیت۔من اےگپ ءِمنوک نہ آں کہ اے چہ سیدھاشمی ءِ راھبند ءَ گستائیں راھبندے بلکیں اے سیدھاشمی ءِ راھبند اِنت کہ وتی جاہ ءَ وش تر ءُ وتی گوناپ ءَ گھتر کنگ ءَ اِنت۔
اے نبشتانک ءِ تہ ءَ پہ مٹ تواراں ھم نوکیں «کارست» پیشنھاد کنگ بیتگ کہ بلوچی زبان ءَ سْیاھگ ءِ بنگپ ءَ چد ءُ پیش ھم چوشیں پیش نھاد دیم ءَ اتکگ بلے اے سری رند اِنت کہ کسے اے بارہ ءَ دلجمیں تْرانے کنگ ءَ اِنت۔


----------------------------------
چکاس نمبر : 01
1۔بلوچی نبشتاری زبا ن کجام دمگ ءِ گالوار اِنت؟
2۔سیدھاشمی ءِ سْیاھگ ءِ راست نبیسگ ءُ انیگیں نبشتاری سْیاھگ ءِ تہ ءَ دگری چی ھست ؟
3۔اگاں مٹی ھست گڑا ما پر چا چوش گْوش ایں کہ اے سید ھاشمی سْیاھگ اِنت ؟