ریڈیو زْرمبش بلوچی | ریڈیو زْرمبش بلوچی,ریڈیونبشتانک,سرورپراز

مارشت:من ءَ پہ دُرستاں زھیر کنت بلے۔۔۔

مارشت:من ءَ پہ دُرستاں زھیر کنت بلے۔۔۔

APR

02
02 / 04 / 2020 ریڈیونبشتانک 83

مراگش:مارشت
بنگپ:درانڈیھی
نبشتہ کار:سرورپراز
توار:سروارپراز
پیشکش:نسیم اباس
شنگکار:ریڈیوزرمبش بلوچی


 


من ءَ پہ دُرستاں زھیر کنت بلے۔۔۔


 


مردُم کہ چہ وتی گِس ءَ ، وتی ھلک ءُ ھنکین ءَ دُور بہ بیت آئی ءَ را الم پہ گِس ءِ مردماں زھیر کنت ۔ بلے من ءَ چہ گس ءِ مردماں ابید پہ یاسین سبزی والا ءِ اے گپ ءَ اوں زھیر کنت کہ ھر وھدے من سبزی ءِ زورگ آئی کاپر ءَ شُت آں اول من سبزیانی نِھاد جست کرت، گُڑا یاسین ءِ مُدام ھبر ھمیش اَت (زر تئ کیسگ ءَ بیت یا منی پیتی ءَ تو زر مہ دئے سبزی بہ زور ) گوں وتی شیرکنیں دانکاں رند ءَ یاسین ءَ منی کیسگ اوں چنڈ اِت ۔ بلے پہ یاسین ءِ وشیں رو ءَ من ءَ انگت زھیر کنت ۔
شائر ءُ ندکار گْوش اَنت کہ زھیر زپت بہ اَنت، شیرکن ءُ تھل بہ اَنت بلے من گْوش آں زھیر ھما وروک اِنت کہ مردُم ءَ را چہ تہ ءَ وارت ۔ منزر بسمل ءَ اوں گْوشتگ ( من ءَ زھیر ورگ ءَ اَنت ) ۔ منی میتگ ءِ ابدال لالو وھدے گوں من دُچار کپت گوں چچیں زبان ءَ گْوشت ئِے : لالا کئی یے دئے ( بِزاں دہ کلدار دئے ) لال جان اگاں ترا باور کنت یا نہ کنت بلے من ءَ پہ تو سک زھیر کنت ، ھوٹل ءَ ابید کُنٹ کہ چاہ ءِ ورگ ءَ اتک الم بسکوٹے یا ڈبل روٹی یے گون اَت ئِے ۔ چائینکے چاہ ابید کُنٹ ءَ ایوکا وارت ءُ چادرئِے کوپگ ءَ کرت بچکندان ءَ چہ ھوٹل ءَ در اتک گُڑا اے ابید ءِ زھیراں کئے چہ منی دل ءَ در کرت کنت؟ بلکین ءَ نیم ساریں ھکیم ۔ مُکیش ۔ ریاض دل ءَ بہ یار اَنت کہ پہ ما کس ءَ زھیر نہ کنت بلے من پہ ایمان گْوش آں کہ شمئے اوں زھیراں منی دل کدینتگ ۔


 


سنگت ءُ دوستاں پہ من زھیر کنت یا نہ کنت بلے چہ ھاکِم ءِ تُرس ءَ ھچ ھال ءُ اھوال نہ کن اَنت۔ سنگت امان ھمراز ، زاکر زھیر ،رسول بکش اھمدی ، زبیر کوسر ، زبیر سالیھ ، لیاکت ، مکتار سکی من ءَ پہ شُما ھر روچ زھیر کنت چہ شُما من بے ترانگ نہ آں۔ آ ادار اوں من ءَ یات کاینت کہ زاکر زھیر ءَ پہ مسکرا مئے دپ پرکندگاں کرتگ ۔ امان ھمراز! ترا یات بیت من اتکگ آں ھوٹل ءَ تو ساری ءَ نندوک بوتگ ئے تو گْوشتگ میار چاھے بہ یار، میار ءَ چاہ آؤرتگ ما شما چاہ وارتگ مدام شائری ءِ سر ءَ گپ جتگ ، برے برے تو باز گپ جتگ ایدگہ سنگت بور بوتگ اَنت بلے من ءَ تئ دیوان دوست بوتگ پمیشکا من ءَ انگت پہ شُمے دیواناں زھیر کنت ۔


 


بی ایس او ءِ ورناھانی جاک ءُ کوکار دیوالانی سر ءِ نبشت (چاکِنگ) انگت منی چمان اَنت ، شپ ءَ کہ من لوگ ءَ وپتگ آں ، نر مزارانی تیر ءُ بمبانی توار ءَ من ءَ پاد کرتگ داں سُھب من ءَ واب نہ یتکگ ھما بے وابیں ساھت من ءَ انگت واب ءَ نہ ھل اَنت ، بلکیں پہ ھما تواراں من ءَ زھیر کنت ؟


 


اُپ! پہ وتی سرڈگار ءِ موسمانی کیپ ءُ لِزت ءَ ، زمستان ءُ گرماگ ھر وڑ ءَ آپ بند ءُ لِوار بہ بہ اَنت بلے ھمے آپ بند ءُ لواریں ساھتانی لِزت مردُم ءَ را انچوش وژنود کن اَنت کہ چی بہ گْوش آں ۔گرماگ ءَ کاپر ءِ چیر ءِ دیوان ءُ شپ ءِ ڈن ءِ واب ءَ کوش ءِ لھمیں کشّگ ءَ اَنچوش ملار داتگ گْوش ئے مردُم ءَ بنگ ءِ دو گِلاس وارتگ ءُ سر نِپاداں داتگ ۔زمستان گوں گوریچ ءِ شیپانکیں شیکگاں وھدے جان ءِ ھڈ ءُ بنداں پُترتگ گْوش ئے جان ءِ دراھیں درد ءُ دوران ءَ بلُکے ءَ ساٹ کُرتگ ، زمستانیں شپ ءَ کہ ما گِس ءِ تہ ءَ آس ءِ چپ ءُ چاگرد ءَ نِشتگ ایں ءُ کماش ءَ برے وتی ھشکاوگیں ڈگارانی گپ جتگ برے وتی ورنائی ءِ کسہ کرتگ بلے چہ ھمے گپ ءُ کسھاں ساری تاپگی نان ءُ سوریں ماھیگ ءِ موشک گوریچ ءِ سارتی ءِ دوا بوتگ ، ءُ گندئے وھدے گرماگ ءُ زمستان ءَ ھور بوتگ زمین ءِ ھاک ءِ بو جر ءُ بُوچانی بو ءَ من ءَ اَنچو ملما کرتگ گْوش ئے تریں بانورے گوں وتی وشبواں منی کش ءَ نِشتگ ۔ من زان آں کہ اے دْرائیں ندارگ من ءَ یات اَنت من وتی زمین وتی مردم بے ھال نہ کُرتگ اَنت ۔


 


منی پس ءَ،منی چُکاں ءُ براس ءُ گُھاراں چہ دل ءِ سوک ءَ اے شگان من ءَ ھزار رند ءَ جتگ کہ ترا مئے پرواہ نیست ترا پہ ما زھیر نہ کنت بلے من چی بہ گْوش آں دل پیشدارگی چیزے نہ اِنت ، شمارا ایوکا پہ من زھیر کنت بلے من ءَ پہ شما درستاں زھیر کنت منی زھیر ءِ سنگ جھل تِر اِنت یا شمے ؟


 


ھزار مُرادیں منی بچّ مزار جان ءَ من ءَ گْوشت: ابا من ءَ پہ تو سک زھیر کنت تو کدین کائے ؟ بلے دومی روچ ءَ بیران بوت ، مزار جان تو گوں زھیراں دُور شت ئے بلے تئ زھیریں گالوار انگت من ءَ توار ءَ اِنت پمیشکا اے ساھت ءَ اوں من گریوگ ءَ اوں ۔ مزار جان من ءَ پھل کن تئ گُڈی دیدار ءَ من اتک نہ کرت۔ تئ جنازہ نہ ونت ءُ تئی کبر ءِ سرءَ دستے نہ داشت بلے باور کن دانکہ من زندگ آں تئی زھیر ھرچ دمان منی دل ءَ داگ دئے اَنت ۔ مزار جان تئ گماں من ءَ انچوش پْروشتگ کہ مروچاں منی سر اوں برابر نہ اِنت۔ برے برے من چاگردی رسانکدر(سوشل میڈیا) ءَ گنوکیں ھبر کن آں، من ءَ راج ھمے شگان ءَ جنت کہ پراز تو دم بُرتگ ، من دم نہ بُرتگ ،منی ناوسی ءُ ر جان ءِ گماں من ءَ گنوک کُرتگ ، بس منی میار ھمیش اِنت۔