📰روتاک زرمبش بلوچی | 🔅 دو شمبے 27 اپریل 2020

#زرمبش_ھال

🗞📰سرھال🗞

🌀پنجگور:پروم ءِ ھاک گوں شھیدانی پاکیں ھوناں ریٹو بوت | گوں دژمن ءَ مڑان 4 سرمچار شھید
🌀پروم ءِ شھید: شھیدانی ھورکیں کنڈ ءِ پُر بیگ ءَ زمانے پکار اِنت، آیانی شھزانتی ءُ دیمونی پہ ما تچکیں کشکے شون دئے اَنت‘میجرگھرام
🌀شھید میجر نورا ءَ پہ براس ءِ یکجا کنگ ءَ پرارزشیں کردے پیلو کرتگ‘بشیرزیب
🌀شال:بلوچستان ءَ کورونا ءِ تالانی برجاہ | دگہ 60 نوکیں نادراھاں پد نادراھانی کچ781 ءَ سربیتگ
🌀رودرتکی بلوچستان: گوادر ءَ کورونا ءِ پژدر ءَ شھر ءِ راہ بند|ورنا ڈاکٹر گل ءَ 15 روچ ءَ سرجمیں بلوچستان ءِ بندآرگ ءِ لوٹ کرتگ
🌀پسنی: پولیس ءَ گوں ٹرک ءَ چہ سند ءَ اتکگیں کھول دزگیر کرتگ ءُ کورنٹین بنجل ءَ برتگ
🌀اگاں کورونا وائرس سرجمیں بلوچستان ءَ تالان بہ بیت مئے دست ءَ گر ءُ دار نہ بیت‘جام کمال
🌀شال:بلوچستان ءَ 18 ادار ءَ لین بیگواہ
🌀دزاپ: چہ بلوچستان ءِ سیمسر ءَ 500 ھزار یک روچی چیپک گوں ھمساھگیں ڈیھانی باپاریاں بھا کنگ بیتگ🐣
🌀ریمدان ءِ سیمسر پچ کنگ بیتگ| ھپتگے سئے روچاں وراک ءُ وردنانی بار آ دست کنگ بیت
🌀پھرگ: 110 کارٹن پس اتگیں مرگی ھیک چہ امبارے ءَ درجنگ ءُ واھند ءِ بگیری ءَ کارروائی
🌀روکپتی بلوچستان ءَ کورونا ءِ نادراھانی کچ 601 ءَ سربیتگ
🌀راسک:پارود ءَ پشامگ ءِ کور ءِ لمب ءَ دو پولنگ گندگ بیتگ🐆
🌀دزاپ:پہ بالی مدگاں25 ھزار ءُ 330 ایکٹر زمین ءِ سر ءَ 25 ٹن زھر چنڈگ بیتگ
🌀نیکشھر: 25بندیں کھن در روپگ ءُ پچ کنگ بیتگ
🌀روکپتی بلوچستان : 3 میلون ءُ 78 ھزار ءُ 586 ڈالر ءِ دست ساچ ماں درانڈیھاں بھا بیتگ| سامان : دوچی گد۔ کلنڈ ءُ تگرد بیتگ اَنت
🌀زرباری یمن ءَ دستیگ کنوکیں جنگی گل ءَ وتواکیں سرکار ءِ ٹاھینگ ءِ جار پرینتگ

🌀پاکستان:گونڈیں ھال

#پاکستان

🔹 پاکستان لشکر ءِ جارکش ءِ رد ءَ گوریچانی وزیرستان ءَ ناشرکارانی سر ءَ بیتگیں ارش ءَ 9 مردم کشگ بیتگ، اے اُرش ءَ پاکستانی لشکر ءِ دو سپاھیگ ھم مرتگ۔

🔹کراچی ءَ سرجانی میتگ ءَ آپی کنڈے ءِ تہ ءَ 5 کسانیں چک بڈ اتگ ءُ بیران بیتگ اے زھگ پہ جان شودگ ءَ کنڈ ءَ ایر کپتگ اَنت ءُ بڈ اتگ ءُ بیران بیتگ اَنت۔

🔹پاکستان ءَ دگہ 7 مردم چہ کورونا وائرس ءَ بیران ۔ بیران بیتگیں مردمانی کچ 272 ءَ سر بیتگ ءُ یک شمبے دیگہ بازیں کرونا وائرس ءِ نادراہ دیم ءَ اتکگ سرجمیں نادراھانی کچ 13106 ءَ سر بیتگ۔

🔹سند: مٹیاری ءِ دمگ ءَ چہ کورونا وائرس ءَ بیران بیتگیں جنینے ءِ چک ءُ شودوک ھم چہ کورونا وائرس ءَ سانمند بیتگ اَنت۔

🌀ایران🇮🇷:گونڈیں ھال

#ایران 🇮🇷

🔹 شمبے ءَ گر داں یک شمبے ءَ ایران ءَ دگہ 1153 مردم کورونا ءِ نادراھی ءَ گیپتگ ، اے وھدی ایران ءَ کورونا ءِ درسی نادراھانی کچ 90481 ءَ سر اِنت۔گْوستگیں 24 ادار ءَ 60 کس بیران بیتگ۔

🔹 یک شمبے ءِ سھب ءَ ایرانی بینک *مسکن* ءِ گامگیجی چارگزار ابوالکاسم رھیمی انارکی چہ کورونا ءِ نادراھی ءَ بیران بیتگ۔

🔹 ایرانی مھتر ھسن روھانی ءَ گْوشتگ: چہ کار ءُ روزگارانی پچ بیگ ءَ مردم مہ جیڑ اَنت کورونا آسر بیتگ، زانگ نہ بیت کہ کورونا کدی آسر بیت۔ ڈیھ ءَ سئے ونڈ اسپیت، زرد ءُ سھر ءِ تہ ءَ بھر کن ایں ءُ ھمود ءَ جاندراھی ءِ وزارت بہ گْوش ایت جاور اسپیتی ءَ رس اتگ مذھبی بنجاھاں پچ کن ایں۔

🔹 ایرانی واکدارانی رد ءَ آیوکیں 10 روچاں ڈیھ ءَ ریکپادی بالی مدگانی چپڑ گیشتر بیت۔

🔹سوئزر لینڈ ءِ کوھے ءِ سر ءَ گوں پروجیکٹر ءَ ایرانی بیرک پیش دارگ بیتگ، اے کار ءِ من ھمے بیتگ کہ کووڈ19 ءِ جاوراں پہ ایرانی مردماں اوست ءُ داشت ءِ کلوہ شکسایگ بہ بیت۔

🔹 ایرانی دری کارانی وزیر جواد زریپ ءُ راجانی سنت ءِ سروک ءَ لوٹ کرتگ کہ یمن ءِ بندن پہ مردمی کمک ءِ سر کنگ ءَ پچ کنگ بہ بہ اَنت۔

🌀اوگانستان🇦🇫:گونڈیں ھال

🌀مزن ھور 🏝️ :گونڈیں ھال

#امان🇴🇲

🔹 پھلی : ریڈیو زرمبش ءِ 22 اپریل ءَ شنگ بیتگیں ھالانی تہ ءَ ماں امان ءَ کووڈ19 ءِ نادراھانی کچ چہ ردی ءَ گیش گْوشگ بیتگ۔ ما چہ ایشی ءَ امان ءِ نندوکیں مردم ءُ گوں وتی گوش داروکاں پھلی لوٹ ایں۔

🔹 یک شمبے ءِ روچ ءَ امان ءَ کورونا ءِ دگہ 93 نادراہ | چہ ایشاں 60 درانڈیھ ءُ 33 امان ءِ نندوک اَنت۔ دان انیگ ءَ درسی 1998 مردم نادراہ بیتگ | چہ نادراھاں 333 وش بیتگ ءُ 10 بیران بیتگ۔

🔹 امان ءِ جاندراھی تک ءِ وزیر ڈاکٹر اھمد ال سئیدی ءَ گْوشتگ: ما دنیگت نہ زان ایں کہ کورونا کدی آسر بیت۔ آئی ءَ پہ کورونا ءِ گر ءُ دار ءَ چست کرتگیں گامگیجانی سر ءَ دلجمی درشانتگ۔

🔹 مشکت ءِ شھرداری ءَ کورونا وائرس ءِ پژدر ءَ باپاری بنجلے بند کرتگ۔ شھرداری ءِ رد ءَ باپاری بنجل پھریزگی راھبندانی برجاھی ءَ بے سوب بیتگ۔

🔹 ماں امان ءَ ھندوستان ءِ سپیر ءَ گْوشتگ کہ ماں امان ءَ بیران بیتگیں کووڈ19 ءِ نادراھانی کنٹاں ھم ھندوستان ءَ واتر کنگ ءَ ایں۔

#امارات 🇦🇪

🔹 امارات: کورونا ءِ دگہ 536 نادراہ | درسی نادراہ 10349 اَنت| یک شمبے ءَ دگہ پنچ بیران بیتگ۔

🔹 دبی: دبی ءَ چار سالی جنک زھگے چہ شیمک ءِ نادراھی ءَ ماھے ءَ پد کورونا ءَ گیپتگ ءُ چہ کورونا ءَ ھم وش بیتگ۔ اے ماں امارات ءَ چہ کورونا ءَ وش بیتگیں بنداتی زھگ اِنت۔

🔹پاکستان ءَ کووڈ19 ءِ پد ءَ ماں امارات ءَ گٹ بیتگیں وتی شھرمنندانی ڈیھ ءَ واترینگ ءَ دگہ 21 گچینی بالانی جار جتگ۔

#گتر🇶🇦

🔹 گتر ءَ ماں یکیں روچ ءَ دگہ 929 مردم کورونا ءِ نادراھی ءَ گیپتگ۔ اے داں انیگ ءَ ما یکیں روچ ءَ نادراہ بیتگیں مردمانی گیشتریں کچ اِنت۔83 نادراہ داں انیگ ءَ وش ءُ دراہ بیتگ۔یک شمبے ءِ روچ ءَ جاندراھی تک ءِ وزارت ءَ جار جتگ کہ ڈیھ ءَ درسی نادراھانی کچ 10287 اِنت۔

#کویت🇰🇼

🔹 کویت : چہ کووڈ 19 ءَ یک شمبےءَ دگہ مردمے بیران بیتگ ءُ 183 نوکیں نادراہ پجارگ بیتگ | یک شمبے ءِ روچ ءَ بیران بیتگیں 57 سالی ایران ءِ نندوکیں مردمے بیتگ۔درسی نادراہ 3075 اَنت۔

🗞رودرتکی بلوچستان🌴🐪🗞

🌀پنجگور:پروم ءِ ھاک گوں شھیدانی پاکیں ھوناں ریٹو بوت | گوں دژمن ءَ مڑان 4 سرمچار شھید

📎 پنجگور: 4 بلوچ سرمچار گوں پاکستانی لشکر ءَ دوازدہ ادار جنگ دیان پہ گلزمین ءَ ندر بیتگ۔شھید بیتگیں سرمچارانی تہ ءَ دو برات ھم گون اِنت۔چاریں سرمچار یکیں کھول ءِ باسک بیتگ اَنت۔

پنجگور ءِ ھند #پروم #کلگ_کور #یار_مھمد_بازار ءَ پاکستانی لشکر ءَ میتگ انگر کرتگ۔ لشکر ءَ وتی چیریک ھم ھمراہ بیتگ اَنت۔ساڑی ئیں سرمچاراں دژمن گوں رگباراں مان بستگ چہ سرمچارانی مان بندگ ءَ پاکستانی لشکر پدکنز بیگ ءَ لاچار بیتگ۔

یک شمبے 26 اپریل 2020 ءَ اے بیڑ سھب ءِ ادار سئے ءَ بندات بیتگ ءُ بلوچ سرمچار 12 ادار دژمن ءِ دیم ءَ چوش مھکمیں کوھے ءَ میلانک بیتگ اَنت۔بیگاہ ءِ نزیک ءَ دژمن لاچار بیتگ ءُ پہ وتی کمک ءَ بالگرد ئِے لوٹائینتگ۔ چہ بالگرد ءِ تیر ءُ بم گواری ءَ انگر ءَ اتکگیں چاریں گیدریں سرمچار پہ گلزمین ءِ پھازداری ءَ نْدر بیتگ اَنت۔

اے میڑ ءَ سرمچارانی دست ءَ دژمن ءِ باز سپاھیگ ءُ چیریک ھم مرتگ ءُ ٹپی بیتگ اَنت۔

اے جنگ ءَ سرمچار #نوراھمد_ء_شیردل ، #نواز_ء_ھاجی_گلام_ھسین ، #ابدالمالک_ء_ھاجی_گلام_ھسین ، #پروم ءِ جاھمنند ءُ #مومن_ء_مھمد_ ازیم #بلیدہ_سلو ءِ جاھمنند شھید بیتگ اَنت۔

دلگوش: گیشتریں ھالانی آیگ ءَ پد اے ھال نوکاز بوت کنت۔
—★—
🌀پروم ءِ شھید: شھیدانی ھورکیں کنڈ ءِ پُر بیگ ءَ زمانے پکار اِنت، آیانی شھزانتی ءُ دیمونی پہ ما تچکیں کشکے شون دئے اَنت‘میجرگھرام

📎 شال: بلوچستان آجوئی سنگر ( بی ایل ایپ ) ءِ جارکش #میجرگھرام ءَ #پروم ءَ شھید بیتگیں سرمچار ستاشانی ءُ دروت ندر کُرتگ اَنت ءُ گْوشتگ: شمبے ءُ یک شمبے ءِ میانی شپ ءَ ادار 3 ءَ پاکستانی لشکر ءَ پنجگور ءِ ھند پروم کلگ کور یار مھمد بازار ءَ سرمچار انگر ءَ کرتگ اَنت چہ ایشی ءَ پاکستانی لشکر ءُ سرمچارانی میان ءَ جنگ بنا بیتگ ۔ اے جنگ داں 12 اَدار ءَ برجاہ بیتگ۔

اےدگہ روچ ءِ دو ءُ نیم ءَ پاکستانی زمینی لشکر ءِ بے سوب ءُ چہ جنگ ءَ ژند بیگ ءَ پد لشکر ءِ جنگی بالگرداں سرمچارانی سر ءَ تیرگواری کُرتگ ءُ 4 سرمچار شھید کُرتگ۔ اے میڑ ءَ #میجر_نورا_ء_شیردل پنام #پیرک ، #لیپٹیننٹ_نواز_ء_ھاجی_گُلام_ھسین ، #ابدالمالک_ء_ھاجی_گُلام ھسین جاھمنند پروم ءُ #مومن_ء_مھمد_آزیم جاھمنند #بلیدہ #سلو شھید بیتگ اَنت۔اے جنگ ءَ پہ زورگیریں پاکستانی لشکر ءِ کمک ءَ چیریک ھم گون بیتگ اَنت۔دراجیں میڑ ءَ پاکستانی لشکر ءُ چریکانی بازیں کارمندے ھم مرتگ ءُ زدگ بیتگ۔

میجر گھرام ءَ گْوشتگ: میجر نورا پنام میجر پیرک چہ دھکے ءَ گیش بلوچ زرمبشت ءُ سلاہ بندیں جُھد ءَ گوں بندوک بیتگ۔آ یک جوانیں سسایے واھند ءُ بودیگیں سرمچارے اَت۔آ بلوچستان ءِ بازیں دمگاں بازیں اگدھانی سر ءَ برجاہ بیتگ ءُ پہ بلوچ گلزمین ءَ پرارزشتیں جنگی کردے پیلو کرتگ آئی ءَ گوں وتی زانت ءُ زانگ ءَ بلوچستان آجوئی سنگر ءِ ترامکاریانی تہ ءَ جوانیں کردے پیلو کرتگ۔

آئی ءَ گْوشتگ: الم یک سرپد ءُ بودیگیں سنگتے ءِ شھید بیگ مزنے تاوانے ۔چہ آئی ءِ شھیدی ءَ بی ایل ایپ ءُ بلوچ راجی زْرمبشت ءِ تہ ءَ مزنیں کنڈیں ھورک بیتگ کہ آئی ءِ پُر کنگ ءَ زمانے درکار بیت بلے شھیدانی دیمونی ءُ شھزانتی پہ درساں گواچنیں کشکے ءُ ھزاراں شھیدانی ھون ءِ بدل یک روچے گیدی ءِ سر ءَ یک برے پد ءَ آجوئیں بلوچستان ءِ دروشم ءَ گِرگ بیت۔

لیپٹیننٹ نواز پنام گلاب چہ دہ سالاں بی ایل ایپ ءُ سلاھبندیں جُھد ءَ بندوک بیتگ ءُ گوں وتی کرد ءُ کارانی بنیاد ءَ لیپٹیننٹ ءِ اگدہ ءِ سر ءَ برجاہ بیتگ۔سرمچار ابدالمالک ءُ سرمچار مومن دو سال اِنت گوں سلاھبندیں جُھد ءَ ھمگرنچ بیتگ اَنت۔من پہ درائیں شھیداں ستا شانی ءُ دروت ندر کن آں
—★—
🌀شھید میجر نورا ءَ پہ براس ءِ یکجا کنگ ءَ پرارزشیں کردے پیلو کرتگ‘بشیرزیب

📎 شال: #بلوچ_آجوئی_لشکر ( #بی_ایل_اے ) ءِ سروک #بشیرزیب ءَ گْوشتگ: یک شمبے ءَ شھید بیتگیں بی ایل ایپ ءِ سرمچار #میجرنورا یک مزنیں مردم ءُ راھشونیں بودشت ءِ واھند بیتگ۔

آئی ءَ گْوشتگ: نورا ءَ بلوچ ھاٹیگ ءِ #براسءِ دروشم ءَ یکجا کنگ ءَ پرارزشیں کردے پیلو کرتگ ءُ داں گڈی دم ءَ پہ اے سنت ءِ پرھاٹیگ کنگ ءَ کوشست ءَ بیتگ۔زرمبشت ءِ تہ ءَ اے بھادریں بلوچ سرمچار ءِ پرستکیں کرد ءُ گڈی ءَ جان ءِ دیمونی پہ درسیں جھدکاراں راہ سراں بلوکیں کندیلے ءِ بستار ءَ مان ایت۔
—★—
🌀شال:بلوچستان ءَ کورونا ءِ تالانی برجاہ | دگہ 60 نوکیں نادراھاں پد نادراھانی کچ781 ءَ سربیتگ

📎 شال: #کوروناوائرس بلوچستان ءَ گوں تْرندی ءَ تالان بیگ ءَ اِنت،کورونا وائرس ءَ بلوچستان ءِ 13 ھنکین وتی انگراں زرتگ ۔دگہ نوکیں 60 مردمانی نادراہ بیگ ءَ پد نادراھانی کچ 781 ءَ سربیتگ۔
—★—
🌀رودرتکی بلوچستان: گوادر ءَ کورونا ءِ پژدر ءَ شھر ءِ راہ بند|ورنا ڈاکٹر گل ءَ 15 روچ ءَ سرجمیں بلوچستان ءِ بندآرگ ءِ لوٹ کرتگ

📎شال: #ورناڈاکٹرگل ءَ گْوشتگ: #بلوچستان ءَ #کورونا وائرس گوں تْرندی ءَ تالان بیگ ءَ اِنت ءُ سرکار ءَ بندآرگ ءِ سر ءَ نرمی کُرتگ۔باید سرجمیں بلوچستان داں 15روچ ءَ بند کنگ بہ بیت۔پہ کورونا وائرس ءِ گِر ءُ دار ءَ گڈی راہ ھمیش اِنت۔

#گوادر ءِ کمک دمگدار #کپٹن_مھمد_وسیم ءَ گْوشتگ: گوادر دمگ ءِ تھی راہ ءُ در بند کنگ بیتگ اَنت،چہ #کراچی ءُ #شال ءَ آؤکیں مردم گوادر ءِ نیمگ ءَ مہ یا اَنت۔آئی ءَ گْوشتگ کہ چہ کراچی ءُ شال ءَ اتکگیں مردم داں 14روچ کورنٹین کنگ ءَ پد وتی گِساں راہ دیگ بہ اَنت۔

گوادر ءَ شھدگانی تک ءِ کارگس ءَ کارکنوکیں سرکاری کارمندانی چہ کورونا ءَ نادراہ بیگ ءَ پد گوادر ءَ چہ ھندی واکدارانی نیمگ ءَ ترندیں گامگیج زیرگ بیتگ۔ دومی نیمگ ءَ بلوچستان ءِ آ دگہ دمگاں مزنیں اگدھانی سر ءَ کارکنوکیں سرکاری کارمندانی نادراہ بیگ ءِ ھال اِنت۔

ناگتیں وھیلانی گر ءُ داری تک ءِ ماں بلوچستان ءَ کمک تْرامکار #سلیمان_مینگل ءُ اسسٹنٹ کمشنر #سناماہ_جبین ھم کورونا ءِ آماچ بیتگ اَنت۔
—★—
🌀پسنی: پولیس ءَ گوں ٹرک ءَ چہ سند ءَ اتکگیں کھول دزگیر کرتگ ءُ کورنٹین بنجل ءَ برتگ

📎 پسنی: پولیس ایس ایچ او #چاکرھان ءَ پٹ ءُ پول ءِ میان ءَ چہ #سند ءَ گوں ٹرک ءَ #پسنی ءَ اتکگیں کھولے دزگیر کرتگ ءُ کورنٹین بنجل ءَ برتگ۔ ایشانی تہ ءَ دو جنین،یک زھگ ءُ یک مردینے گون اِنت۔
—★—
🌀اگاں کورونا وائرس سرجمیں بلوچستان ءَ تالان بہ بیت مئے دست ءَ گر ءُ دار نہ بیت‘جام کمال

📎شال: وتگڑیں مزن وزیر #جام_کمال ءَ ماں وتی تامُر بندے ءَ گْوشتگ: اگاں #کوروناوائرس سرجمیں ڈیھ ءَ تالان بوت گڑا گوں ما دارگ نہ بیت۔

آئی ءَ گْوشتگ باید مردم پھریز بہ کن اَنت۔

آئی ءَ درائینتگ: اگاں ما کمیں پھریز بہ کن ایں، سیاسی ءُ چاگردی نیاداں مہ رو ایں ھچ نہ بیت۔سرکار ءُ ازگاریں مردم بندآرگ ءِ پژدر ءَ تاوانبار بیتگیں کھولاں کمک کنگ ءَ اَنت ءُ اگاں ما چیزے روچ باپار مہ کن ایں مارا گژن نہ کش ایت۔
—★—
🌀شال:بلوچستان ءَ 18 ادار ءَ لین بیگواہ

📎 شال: #بلوچستان ءَ 18 ادار لین نیست ، مردم گوں روچگیں دپاں چہ بے لینی ءَ شزار اَنت۔ماں ڈیھ ءِ بندآرگ ءِ پژدر ءَ لین ءِ کارمردی ءِ تہ ءَ کمی اتکگ باید لینانی بندش ءِ جاور گھتر بہ بیت بلے چوش نہ اِنت۔کیسکو ءَ شال ءَ سھیر، دبوج ءُ ترابی ءِ وھداں لینانی لوڈشیڈنگ آسرینتگ بلے 24 ادارانی تہ ءَ ایوک ءَ 6 ادار لین ھست ءُ آ دگہ 18 اداراں نیست۔

🗞روکپتی بلوچستان🌄🗞

🌀دزاپ: چہ بلوچستان ءِ سیمسر ءَ 500 ھزار یک روچی چیپک گوں ھمساھگیں ڈیھانی باپاریاں بھا کنگ بیتگ🐣

📎 دزاپ :چہ بلوچستان ءِ سیمسراں 500 ھزار یک روچی چیپک گوں ھمساھگیں ڈیھانی باپاریاں بھا کنگ بیتگ۔ #بلوچستان ءُ #سیستان ءِ سیم سری بازرکانی چارگزار #مبین_الی_میر ءَ یک شمبے ءِ روچ ءَ گوں اھوالکاراں گْوشتگ: ما چہ بلوچستان ءِ سیمسری بازارکاں نزیک ء 120 ھزار یک روچی چیپک گوں ڈنی ڈیھاں بھا کنگ ءِ درگت ءَ وت ءَ ساڑی کرتگ۔

آئی ءَ گْوشتگ : ھمساھگیں ڈیھانی باپاریاں مئے اے باوست وش اتک کرتگ ءُ ما کوشست کن ایں کہ ھمینچو زیت بار مئے بازارکاں سر بہ بیت ما کمتریں وھد ءُ پاساں آیاں ھمساھگیں باپاریانی دست ءَ دئے ایں۔

زانگ بہ بیت کہ گْوستگیں روچاں ما #ایران ءَ اے گپ جیڑھے بیتگ ءُ دیم ءَ اتکگ وھدے چیپک کَشوکیں شرکتاں ھزارھانی یک روچی چیپک ماں زندگ ءَ کل کرتگ اَنت۔ایرانی مھتر #ھسن_روھانی ءُ دینی پیشوکاں اے کار اسلام ءِ بگیر لیک اتگ ءُ ایر جتگ۔گْوشگ بیگ ءَ اِنت کہ اے چیپک چینکانی کمی ءِ پد ءَ کُشگ بیتگ اَنت۔
—★—
🌀ریمدان ءِ سیمسر پچ کنگ بیتگ| ھپتگے سئے روچاں وراک ءُ وردنانی بار آ دست کنگ بیت

📎چھبار: چہ پاکستانی واکدارانی نیمگ ءَ رودرتکی ءُ روکپتی بلوچستان ءِ میان ءَ #ریمدان ءِ سیمسر پچ کنگ بیتگ۔14 باری گاڑی چہ روکپتی نیمگ ءَ آ دست بیتگ کہ چہ ایرانی ساماناں بار بیتگ اَنت۔

چہ پاکستانی واکدارانی نیمگ ءَ جار جنگ بیتگ: شمبے، دو شمبے ءُ چار شمبے ءِ روچاں گوں جاندراھی ءِ پھریزاں داں سھب ءِ 8 ءَ بہ گر داں نیمروچ ءِ 2 ءَ روچے 20 باری گاڑی آ دست ءَ روت کنت۔ اے بارانی تہ ءَ وراک ءُ وردنی سامان مان بیت۔
—★—
🌀پھرگ: 110 کارٹن پس اتگیں مرگی ھیک چہ امبارے ءَ درجنگ ءُ واھند ءِ بگیری ءَ کارروائی

📎 پھرگ: سرکاری واکداراں 110 کارٹون گَھ اتگیں مرگی ھیک چہ امبارے ءَ در جتگ۔ھیک چہ ورگ ءِ کٹ ءَ شتگ اَنت۔

#پھرگ ءِ سانائی، مادن ءُ باپاری تک ءِ سروک #ھلیل_نوزری ءَ گْوشتگ: ھیک داں دیراں پھرگ ءَ پارابی دمک ءَ یک امبارے ءَ ایر کنگ بیتگ اَنت کہ ھراب بیتگ اَنت۔چہ لس ءُ آشوبی آمیدکار ءِ ھمکاری ءَ امبار ءِ واھند ءِ بگیری ءَ کارروائی کنگ بیتگ۔
—★—
🌀روکپتی بلوچستان ءَ کورونا ءِ نادراھانی کچ 601 ءَ سربیتگ

📎 دزاپ: سرکاری بنشون ءِ رد ءَ گوستگیں 24 ادار ءُ داں یک شمبے ءِ نیم روچ ءَ #کورونا ءِ نادراھانی تہ ءَ دگہ 19 نادراہ گیش بیتگ ءُ نادراھیانی کچ 601 ءَ سربیتگ۔
—★—
🌀راسک:پارود ءَ پشامگ ءِ کور ءِ لمب ءَ دو پولنگ گندگ بیتگ🐆

📎 راسک: #راسک شھرستان ءِ زرباری نیمگ ءَ #پارود ءَ مردماں ماں #پشامگ کور ءِ لمب ءَ دو پولنگ دیستگ۔
—★—
🌀دزاپ:پہ بالی مدگاں25 ھزار ءُ 330 ایکٹر زمین ءِ سر ءَ 25 ٹن زھر چنڈگ بیتگ

📎 دزاپ: سرکاری بنشون ءِ رد ءَ بالی مدگانی کشگ ءَ ماں #بلوچستان ءَ 25 ٹن جتاجتائیں زھر 25 ھزار ءُ 330 ایکٹر زمین ءِ سر ءَ چنڈگ بیتگ۔اے وھدی 44 کارگل ماں بلوچستان ءُ سیستان ءِ پرگنگ ءَ ریکپادی بالی مدگانی گر ءُ دار کنگ ءَ اَنت۔
—★—
🌀نیکشھر: 25بندیں کھن در روپگ ءُ پچ کنگ بیتگ

📎 نیکشھر: 25 کھن در روپوگ ءُ شر کنگ ءَ رند پد ءَ پچ کنگ بیتگ اَنت۔

کشاری تک ءِ ماں #نیکشھر ءَ چارگزار #ھبیب_رئیسی ءَ یک شمبے ءِ روچ ءَ گْوشتگ: 25 کھنانی درروپگ ءُ شر کنگ ءَ گْوستگیں سال ءَ 18 میلیارد ءُ 330 میلون ریال ھرچ کنگ بیتگ۔

آئی ءَ گْوشتگ: چہ اے کھناں نیکشھر ءِ 200ایکٹر زمیناں آپ رس ایت۔ نیکشھر ءِ شھرستان ءِ 85 ماں سدی کشاری زمین چہ 348 کھناں آپ زیر اَنت۔ چہ ھار ءَ 260 کھناں تاوان بیتگ کہ کشاری تک ءُ کشاوردانی کمک ءَ پد ءَ شر کنگ بیتگ اَنت۔

روکپتی بلوچستان ءَ درسی ھزار ءُ 925 کھن اَنت کہ 2 ھزار ءُ 327 کیلومیٹر دراجی ءَ تالان اَنت۔اے کھن واش، نیکشھر، شستون ءُ پھرگ ءَ اَنت۔

نیکشھر ءَ 9 ھزار ءُ 400 ایکٹر کشاری ءُ باگی زمین ھست۔
—★—
🌀روکپتی بلوچستان : 3 میلون ءُ 78 ھزار ءُ 586 ڈالر ءِ دست ساچ ماں درانڈیھاں بھا بیتگ| سامان : دوچی گد۔ کلنڈ ءُ تگرد بیتگ اَنت

📎 دزاپ: گْوستگیں سال ءَ چہ بلوچستان ءَ 3 میلون ءُ 78 ھزار ءُ 586 ڈالر ءِ دست ساچیں سامان ماں درانڈیھاں برگ ءُ بھا کنگ بیتگ۔

اے رد ءَ سرکاری تک ءِ واکدار #مھمد_بھروز_ئیسازھی ءَ یک شمبے ءِ روچ ءَ گوں اھوالکاراں گْوشتگ: اے چیزانی تہ ءَ دوچی گد، بلوچی جَر، کلنڈی ءُ تگرد ھوار بیتگ اَنت۔ اے ماں اراک ، تاجکستان ، جرمنی ءُ دگہ ڈیھاں برگ ءُ بھا کنگ بیتگ اَنت۔

🗞جھان🌍🗞

🌀زرباری یمن ءَ دستیگ کنوکیں جنگی گل ءَ وتواکیں سرکار ءِ ٹاھینگ ءِ جار پرینتگ

📎 ادن: زرباری #یمن ءَ برجاھیں #سدرن_ٹرانزیشنل_کونسل ( #ایس_ٹی_سی ) ءَ زرباری یمن ءِ چہ بنجاھی سرکار ءَ گستا کنگ ءُ پرگنگ ءِ وتواکی ءِ جار پرینتگ۔

#ادن (عدن ) ءَ سدرن ٹرانزیشنل کونسل ( ایس ٹی سی ) ءَ اشتاپی نیادے لوٹائینتگ ءُ گْوشتگ: ما زرباری استان ءُ تیابدپی شھراں چہ بنجاھی سرکار ءِ پرمان ءَ آزادیں سرکارے جوڑ کن اِیں۔ چد ءُ پیش ایس ٹی سی ، ھوسیانی بگیر ءَ گوں یمن ءِ بنجاھی سرکار ءَ ھمدست اَت۔اے گل ءَ امارات ءِ ھم کمک گون اِنت۔

یمنی سرکار ءِ دری کارانی وزیر #مھمدالھدھرامی ءَ گْوشتگ:وتگڑیں ایس ٹی سی کونسل ءِ نیمگ ءَ زرباری پھناتاں وتکواکیں سرکار جوڑ کنگ ءَ پد ناشرکاری تیجار کنت ءُ اے کارپد ماں ریاز ءَ بیتگیں مسامانی رد کنگ ءُ چہ مسام ءَ دراھگ ءِ جار اِنت

دوئیں تکاں پیسرگیں سال ءِ نومبر ءَ واکداریانی بھر ءُ بانگ کنگ ءِ مسامے ءِ سر ءَ دزرند جنگ بیتگ اَت۔ اے مسام راجانی سنت ( یو این) ءَ ماں یمن ءَ پہ برات کشی ءِ آسرینگ ءَ جوانیں مستاگے لیک اتگ اَت۔

سھودی ارب ءِ سروکی ءَ یمن ءِ سرکار ءِ کمک کنگ ءَ 2015 ءَ ھما وھد ءَ ھوسی جنگولانی بگیری ءَ لشکر کشی کنگ بیتگ وھدے کہ ھوسیاں یمن ءِ بنجاھی شھر سنا گیپتگ اَت ءُ رند ءَ امارات ھم یمنی سرکار ءِ پلہ مرزی ءَ گوں سھودی ارب ءَ ھمدست بوت۔ ایس ٹی سی ھم یمن ءِ بنجاھی سرکار ءِ ھم سنتیں گلے بیتگ کہ نی پہ بگیرداری چہ آئی ءَ سستگ۔
🔚