ھال : 25جنوری 2020

زرمبش ھال »25 جنوری 2020 | ڈاؤنلوڈ

مراگش : ریڈیو ھال
بنگپ : 25 جنوری 2020
شنگکار : ریڈیو زْرمبش بلوچی

روتاک زْرمبش بلوچی

رودرتکی بلوچستان

• بلوچستان ءَ بیگواھیں مردمانی درگت ءَ بی این پی مینگل ءُ بلوچستان اوامی پارٹی ءِ میان ءَ یک بھمانگیں گر ءُ چیلے دیم ءَ اَتکگ ۔ آ گر ءُ چیل ایش اِنت کہ باپ ءِ سروک لوٹ اَنت مردم یلہ کنگ ءَ پد آیانی دست ءَ دیگ بہ بہ اَنت داں آ ماں رسانکدر ءُ راج ءِ دیم ءَ اے گْوشت بہ کن اَنت کہ مردمانی درکنگ ءَ آیانی کوشست گون اِنت ، دومی اکترمینگل ءِ سروکی ءَ بی این پی ءَ وتی سرجمیں سیاست ءِ زور ھمیشی ءِ سر ءَ داتگ کہ سالانی سال آزار جاھاں بندیں مردمانی یلہ کنگ ءِ کوشست گوں آئی ءِ پارٹی ءِ نام ءَ بندوک بہ بیت ۔ چہ پنجگورءِ ھند پروم ءَ سیادی داروکیں « زپر ء زریپ » 13 ماہ ءِ بیگواھی ءَ پد یلہ کنگ بیتگ بلے چہ یلہ کنگ ءَ اَدارے ءَ پد ایپ سی بنجل ءَ لوٹائینگ ءُ یک رندے پد ءَ بیگواہ کنگ بیتگ ۔وائس پار بلوچ مسنگ پرسنز ءِ نیمگ ءَ زپر ءِ پد ءَ بیگواھی گپ راست گْوشگ بیتگ وھدے کہ چہ یلہ بیگ ءَ پد بی این پی ءِ کارگس ءَ گوں بی این پی ءِ راھشوناں آئی ءِ اکس ھم شنگ بیتگ اَنت۔
مردمانی گْوشگ اِنت کہ اے کار بی این پی ءُ باپ ءِ سروکانی وت ماں وتی اڑ ءِ سر ءَ بیتگ ۔ باپ ءِ سروک ھمے لوٹ اَنت کہ بیگواھیں مردمانی درگت ءِ وژنامی آیاں بہ رس ایت ، وھدے کہ بی این پی مینگل لوٹگ ءَ اِنت کہ اے رد ءَ آ وتی نام ءَ برز بہ کنت ۔
پروم ءِ مردماں دوئیں سیاسی گلانی کرد گوں ترندی ءَ ایر جتگ ءُ گْوشتگ کہ باید نہ اِنت دوئیں گل مردمانی اُگبالانی جیڑہ ءِ سر ءَ وتی سیاست ءَ بہ کن اَنت۔
۔۔۔۔۔۔۔۔
• پاکستانی لشکر ءَ دشت ءِ دمگ کاشاپ ءَ بیڑبرتگ ءُ لشکر کشی برجاہ ءَ اِنت ۔ لشکر لوگ لوگ ءَ پَٹ ءُ پول کنگ ءَ اِنت ءُ سرجمیں بازار ءَ لشکر ءِ کارمند پادانی گردگ ءَ اَنت –
دومی نیمگ ءَ تیرءُ بمب گواری ءِ رِد ھم برجاہ اِنت انگت زانگ نہ بیگ ءَ اِنت کہ چہ کجام نیمگ ءَ تیرگواری کنگ بیگ ءَ اِنت-
۔۔۔۔۔۔۔
• سنجاوی ءَ دوشی شپ ءَ « اھسان دمڑ» ءِ لوگ ءِ سر ءَ ایپ سی ءَ بیڑ برتگ چہ لوگ ءَ مردم دزگیر کنگ ءَ پد لٹ داتگ اَنت ۔ ایپ سی ءِ اے کارپد ءِ بگیری ءَ مروچی سنجاوی شھر ءَ دربندیں زھرشانی بیتگ ۔ زانگ بہ بیت کہ لیویز کارمندانی کوش ءَ پد «اھسان دمڑ» ءَ سنجاوی ءَ 14 روچاں بیتگیں زھرشانی ننداک ءِ سروکی کرتگ اَت۔
۔۔۔۔۔۔۔
• شال ءِ میکانگی دگ ءَ چہ اوتاکے ءَ گیس پُر بیگ ءَ پد مردمے بیران ءُ دگرے بے سار بیتگ ۔بلوچستان ءَ ھمک سال زمستان ءَ مردم چہ گیس ءِ لیک بیگ ءَ مزنیں کچے ءَ مر اَنت ۔ گْوستگیں روچ ءَ رسانکدر ءَ شنگ بیتگیں گزارشے ءَ اے گپ پدر کنگ بیتگ کہ بلوچستان ءَ گیسانی تہ ءَ بو دئیں کمیکل مان گیجگ نہ بیتگ ۔ اگاں گیس ءِ تہ ءَ بو تالان کنوکیں کیمیکل مان مہ بیت مردماں اوتاک ءِ تہ ءَ گیس ءِ سما نہ بیت ءُ چہ ایشی ءَ مردم بیران ھم بوت کنت ۔
۔۔۔۔۔۔ ‎‎
•شال ءَ نا ایمنی ءِ دْرچ مدامگیں رنگ ءَ برجاہ اِنت ، کروٹ آباد ءَ تیرگواری کنگ ءُ مردمے کشگ بیتگ ۔
۔۔۔۔۔۔
•بلوچستان ءِ کاسگ چٹیں سرکار ءَ ٹاہ داتگ کہ آ گوں وتی جند ءِ بجٹ ءَ بلوچستان ءَ 2500 کیلومیٹر ءِ کچ ءَ دگ بند ایت ۔ آئی ءَ گْوشتگ کہ سرکار کوشست کنگ ءَ اِنت کہ گوں دگانی بندگ ءَ رھوتی تک ءَ گھتری بہ یار ایت ۔
۔۔۔۔۔۔
•بلوچستان ءِ دگ ءُ شھدگانی ھونواری برجاہ اِنت ، جنوری ءِ ماہ ءَ دگ وھیلاں بیران بیتگیں مردمانی کچ چہ بیست ءَ گْوستگ ۔ گْوستگیں روچ ءَ ھب آر سی ڈی شھدگ ءَ ٹرک ءُ کوچے ءِ ڈِکگ ءَ 3 کس بیران ءُ بازیں زدگ بیتگ ۔
۔۔۔۔۔۔
•کاسگ چٹیں بلوچستان پارلیمان ءِ جارچین «کدوس بزنجو» ءَ مزن وزیر ءِ بگیری ءَ پہ ریس ءُ پریس ءَ پارلیمان ءَ بنگپ داتگ ۔آئی ءَ وتی گپانی تہ ءَ گْوشتگ کہ سروزیر جام کمال ھان ءَ وتی درشانانی تہ ءَ منی کم منگھی کرتگ ۔ پارلیمان ءِ جارچین ءِ بستار ءَ من ءَ اگبال ءُ آجوئی ھست کہ وتی سیاسی سسا ءِ درانگازی بہ کن آں ۔ کدوس بزنجو ءَ درائینتگ : ’’ بلوچستان اوامی پارٹی ءِ ماں پارلیمان ءَ درسیں باسک دلگران اَنت ، ھما روچ ءَ کہ نوکیں سرکارے جوڑ بیت سرجمیں باپ یکجا بیت ۔ آئی ءَ وتی پیشیگیں دانکے دمپار اتگ کہ مردمے اگاں گلے ءَ ھلائینت مہ کنت آ اُستان ءَ چون ھلائین ایت ۔‘‘
آئی ءِ رد ءَ آئیءَ ھشت ماہ پیش سرکارءِ مٹ کنگ ءِ شور چہ پاکستان ءِسینٹ ءِ چیئرمین ءِ گْوشگ ءِ سر ءَ ماٹو کرتگ ۔ چد ءُ پیش کدوس بزنجو ءَ گْوشتگ اَت کہ پہ سرکار ءِ مٹ کنگ ءَ آئی ءَ دلجمیں رنگے ءَ پارلیمان ءِ باسکانی ھم پتی ھست ۔
۔۔۔۔۔
• « پاکستان تھریک ء انساپ » ءِ بلوچستان ءِ راھشون « بابریوسپ زھی » ءَ گْوشتگ کہ بلوچستان سرکار پہ مردمانی سیت ءَ جوانیں رنگے ءَ کار ءَ اِنت ۔ پی ٹی ایم آئیءِ چہ درساں مستریں ھم سنّتی اِنت ، ما وتی پلہ مرزی ءَ برجاہ دار ایں۔
۔۔۔۔۔
•بلوچستان ءَ بست ءُ بندی ھنکین پشین ءَ چہ «پریشر ککر» ءِ تْرکگ ءَ سئے برات ءُ گھار بیران ءُ دو زدگ بیتگ ۔
۔۔۔۔۔
•ینگ ڈاکٹرز ایسوسی ایشن بلوچستان ءِ جارکش ءَ ڈاکٹراں دژنام دیگ ءِ کارپد گوں ترندی ءَ ایر جتگ ۔ آئی ءَ وتی درشان ءَ گْوشتگ کہ « سنڈیمن پراونشل ھسپتال» ءَ لھتے پجارگ نہ بیتگیں مردماں نادراھجاہ ءِ چارگزارانی پرمان لپاشتگ اَنت ءُ جتائیں تک ءُ ٹراما سینٹر ءِ تامر گیپتگ ءُ شنگ کرتگ اَنت ۔ ڈاکٹرانی کارانی تہ ءَ ناراھیں رنگے ءَ دزمانجنی کرتگ ءُ زاہ ءُ بد داتگ اَنت۔
۔۔۔۔۔۔۔
•اگاں کزدار زانشتجاہ بند کنگ بوت ما زھرشانی زرمبشتے پاد کن ایں ۔ اے گپ نیشنل پارٹیءِ راھشون « تاھربزنجو » ءَ کزدار زا نشتجاہ ءِ جیڑہ ءِ سر ءَ ماں اسلام آباد ءَ پاکستان ءِ سینٹ ءَ جتگ ۔ آئی ءَ گْوشتگ کہ بلوچستان ءَ بنداتی زانشتجاہ ءُ جاندْراھی شھدربرجاہ 1970 ءَ نیپ ءِ سرکار ءَ جوڑ کنگ بیتگ اَنت ۔
۔۔۔۔۔۔
•بلوچستان ءِ پولیس ءِ مستر «مھسن بٹ» ءَ گْوشتگ کہ بلوچستان سرکار پہ پولیس ءِ بودشت ءُ توان ءِ گیش کنگ ءَ گچینی پوڑی دیگ ءَ اِنت ۔ بلوچستان ءِ پولیس ءِ نوک کنگ ءَ پولیس سپاھیگانی پجیگ ءَ سرھنگانی ھم پاکستانی لشکر ، امریکا ءُ چین ءِ کمک ءَ ھیلکاری بیگ ءَ اِنت ۔
۔۔۔۔۔
•کرک ءِ ھنکین ءِ چہ ھوراں پرشتگیں دگ دنیگت شر کنگ نہ بیتگ اَنت ۔ اے گپ کرک ءِ جتائیں گلانی ھنکینی راھشوناں کزدار ءَ اھوالکاری تْران ءِ تہ ءَ گْوشتگ۔
۔۔۔۔۔
•گْرانی ءُ بے روزگاری ءِ بگیری ءَ جمات اسلامی ءِ چیردستی ءَ بلوچستان ءِ بنجاھی شھر شال ءَ ابید بازیں شھراں زھرشانی ءُ روانک کشگ بیتگ ۔ اے روانک ءُ زھرشانی مچی لورالائی ، گوادر، نوشکے ، ژوب، نسیرآباد، جاپرآباد، کزدار، ھب ءُ بیلہ ءَ بیتگ اَنت۔

روکپتی بلوچستان

•چھبار ءِ شھرستان ءَ پہ ھار آماچیں مردماں چہ شانزدہ ھزار ءَ گیش گس بندگ ءِ کار بنا کنگ بیتگ ۔ گْوستگیں چار شمبے ءَ اے درگت ءَ برجم داشتگیں مراگشے ءِ تہ ءَ ڈیھ ءِ الس مھتر ءِ کمک، ڈیھ ءِ بجٹ مراگش ٹاھینوکیں سازمان ءِ سروک ، بنیاد ء مسکن انکلاب ءِ سروک ءُ بلوچستان ءُ سیستان ءِ استاندار ءِ پجیگ ءَ بازیں واکداراں بھر زرتگ ۔ اے گس « بنیاد ء مسکن انکلاب» ءِ نیمگ ءَ جوڑ کنگ بہ اَنت ۔ واکدارانی گْوشگ اِنت کہ ھمے پیم ھشت ھزار تاوانبار بیتگیں لوگ ھم شر کنگ بہ اَنت ۔ اے گس سالے ءِ تہ ءَ جوڑ کنگ بہ اَنت ءُ ایشانی سر ءَ ھزار ءُ 800 میلیارد تومن ھرچ بیت ۔
۔۔۔۔۔
•ھورانی نوکتریں دْرچ ءَ پد بلوچستان ءِ پنچ دمگانی راہ بند بیتگ ۔ دوشی شپ ءَ چہ کورانی ھار کنگ ءَ اے راہ بند بیتگ اَنت ۔ بلوچستان ءِ استانداری ءَ نگیگیں جاورانی چارگزار «اباس الی ارجمندی» ءَ گوں اھوالکاراں گپ جنان گْوشتگ کہ مولم پجاری ءِ سازمان ءِ رد ءَ شپ روچ گْورتگیں گیشتریں ھور 60 ملی لیٹر واش ءِ شھرستان ءَ بیتگ۔
چہ ایشی ءَ کوراں ھار کرتگ ءُ پنچ راہ کنرُک ۔ جاشک ، دلگان ۔ پھرہ ، پنوچ ۔ کتیچ ۔ رمشک ، دلگان۔ زھکلوت ءُ میل نادر ءِ راہ بند بیتگ اَنت ۔ آئی ءَ گوں مردماں دزبندی کرتگ کہ سپر ءُ سواد ءَ وتی نگھداری ءَ بہ کن اَنت ۔
آئی ءَ درائینتگ: بلوچستان وتی زمین جاور ءُ شاھگانی ءِ انگیز ءَ باز بر ءَ یکپارگی بازیں نگیگیانی آماچ بیتگ چوش کہ ڈکال ،ھور، ھار ءُ دریا ءِ گْورم بیگ ۔
واش ءَ بیوکیں نوکیں ھورانی دْرچ ءَ پیشگیری ءِ رد ءَ ھنکینی واکدار ھم ساڑی ءُ جاڑیگ کنگ بیتگ اَنت۔
۔۔۔۔۔۔۔
•رسانکدری بنشون ھم ھمے گْوشگ ءَ اَنت کہ دنیگت ھار آماچیں دمگانی جیڑہ گیشوار نہ اَنت ۔ دنیگت چہ ھور ءَ پد نادراھیانی ٹومبگ ءِ ھال نیست بلے میتگاں کل ءُ کنڈاں آپ اُوشتاتگ ءُ اگاں کمیں ھم نادلگوشی کنگ بہ بیت اے دمگاں نادراھی ٹومب اِت کن اَنت ۔ زراآباد کہ یک کشاوردی دمگے آ اُود ءَ ھار ءَ بازیں ڈگارانی زمین ءِ ریک رپتگ المی اِنت کہ پد ءَ زمین در روپگ ءُ ریک مان کنگ بہ بیت داں کشاورد ی برجاہ بہ مان ایت۔
۔۔۔۔۔۔
•بلوچستان ءُ سیستان ءَ چارلک ءُ 70 ھزار ھندی ءُ دری چہ پنچ سال ءَ کستریں زھگ پولیو پھریزی تْرمپ وارینگ بیتگ ۔ دزاپ زانشتجاہ پزشکی تک ءِ کمک «ڈاکٹرسیدمھدی تباتبائی» ءَ شمبے روچ ءَ گْوشتگ کہ ’’ ھمک سال بلوچستان ءَ دو بر ءَ چکاں پولیو پھریزی تْرمپ وارینگ بیت اے رد ءَ بنداتی باریگ گْوستگیں سرجمیں ھپتگ ءَ برجاہ ءُ مروچی آسر بیتگ ۔ ‘‘

پاکستان

•پاکستان ءِ سر وزیر امران ھان ءَ ھندوستان ءَ کشمیر ءِ جاورانی سر ءَ مدامی رنگ ءَ ایراد گران ءَ گْوشتگ کہ ھندوستان جموں ءُ کشمیر ءِ سر ءَ دراُستمانی ءُ زورگری ءِ لیکواں منڈگ ءَ اِنت ۔ ٹیوٹر ءَ شکساتگیں وتی درشان ءَ آئی ءَ گْوشتگ کہ اے لیکو پہ دمگ ءِ تاھیر ءُ ایمنی ءَ چہ درساں مستریں بیھار اِنت
آئی ءَ وتی درشان ءَ نبشتگ ’’ 80 لک کشمیری ءُ ھندوستان ءَ نندوکیں مسلمان چد ءُ پیش مودی ءِ زورگْوشیں شونداتانی وڈالیگ بیگ ءَ اَنت ۔‘‘
۔۔۔۔۔
•چین ءَ ٹومب اتگیں کورونا وائرس جھان ءِ آدگہ ڈیھاں ھم سر بیان اِنت ۔ پاکستان ءِ شھر ملتان ءَ ھم انچیں مردمے نشتر نادراھجاہ ءَ یک کریں تک ءَ نپادی کنگ بیتگ ۔ آئی ءِ نادراھی ٹپاسی کنگ بیگ ءَ اَنت ۔ سرکاری بنشون ھمے گْوشگ ءَ اِنت کہ آیاں نادراہ ءِ تہ ءَ کورونا وائرس ءِ شک اِنت ۔
۔۔۔۔
•بیگواھیں مردمانی وکیل «انامرھیم» یلہ کنگ بیتگ۔ انامرھیم پاکستانی توانداراں بندات ءَ دزگیر کنگ ءَ پد بیگواہ کرتگ بلے رند ءَ چہ پاکستانی دیمپانی وزارت ءِ نیمگ ءَ آمیدگس ءَ گْوشگ بیتگ کہ انامرھیم آیاں دزگیر کرتگ ۔ پاکستانی دیمپانی وزرات ءَ گوستگیں روچاں ھم ھمے گْوشتگ کہ انامرھیم دری ڈیھانی چاریگ اِنت اگاں آئی ءِ وکیل دیمپانی وزارت ءَ آئی ءِ لیپ ٹاپ ءِ رمز ءُ گزرنامگ ءَ بہ دنت انامرھیم یلہ کنگ بیت۔
گوں ڈان ءَ گپ جنان انامرھیم ءَ گْوشتگ کہ آ بے راھیں میارگوندی ءِ سر ءَ چست کنگ بیتگ اَت ءُ نی یلہ دیگ بیتگ پرچا کہ پہ آئی ءِ زندانی کنگ ءَ واکدارانی کر ءَ ھچ رنگیں منانک نیست ۔
۔۔۔۔۔
•ھما رنگ ءَ کہ پاکستان ءِ کرد ءُ کار ساڑایگ بیتگ اَنت باید پاکستان چہ گرے لسٹ ءَ در کنگ بوتیں ۔ اے گپ پاکستان ءِ دری کارانی وزیر شاہ مھمود کریشی ءَ گوں رسانکدری جھگیراں گْوشتگ کہ ’’ ما وتی سیاسی زمہ واری ،ایکشن پلان ءِ سر ءَ گامگیج اے ٹی ایپ ءِ دیم ءَ ایر کرتگ اَنت ءُ اے ٹی ایپ ءَ مارا ساڑاتگ ۔ ابید چہ ھندوستان ءَ ھرکس چہ مئے کرد ءَ ایمن اِنت بلے ھندوستان لوٹ ایت مارا بلیک لسٹ ءِ نیمگ ءَ تیلانک بہ دنت۔‘‘
آئی ءَ اوست درشان کرتگ کہ ’’پیرس ءَ پروری ءِ ماہ ءَ بیوکیں نیاد ءَ مئے گامگیجانی پژدر ءَ اے جیڑہ سیاسی کنگ نہ بیت انچوش کہ لھتے ڈیھ کوشست کنگ ءَ اَنت کہ جیڑہ سیاسی رنگے دیگ بہ بیت اگاں چوش بہ بیت گڑا ھم پہ پاکستان ءَ وشیں مستاگے ۔‘‘
۔۔۔۔۔۔۔۔۔۔۔۔۔
•سند ءِ مزن وزیر ءُ بنجاھی سرکار ءِ نیام ءَ مدام سند پولیس ءِ مستر ایر کنگ ءِ سر ءَ جیڑہ گندگ بیت ءُ انی ھم ھمے جیڑہ ءِ باپشت ءَ سند ءِ مزن وزیر ءَ درائینتگ: ’’استان انچیں سرھنگ لوٹ ایت کہ لنشو مہ بہ اَنت بلکیں استان ءَ ایمنی ءُ تاھیر برجاہ داروک بہ بہ اَنت ۔‘‘
آئی ءَ گْوشتگ کہ ’’پولیس ءَ استان ءِ ایمنی ءِ برجاھی ءَ سرانی دیمونی داتگ لھتے نابودیں سرھنگانی دین ءَ ایشاں تاوان کنگ نہ لوٹ ایں ۔‘‘
۔۔۔۔۔
•نکیب الا کوش کیس ءِ 5 ڈھودارانی پہ مانزمانی یلہ کنگ ءِ دزبندی رد کنگ بیتگ اَنت ۔سرکاری وکیل ءَ گوں آمیدگس ءَ گْوشتگ کہ ایشانی بگیری ءَ گواچن ھست اَنت پمیشکا مانزمانی دزبندی رد کنگ بہ بہ اَنت ۔
۔۔۔۔۔
•سیھون ءَ ادالتی کت ءِ تہ ءَ گوں جنینے ءَ زوراکی ءِ ڈو ءَ پد ماٹو بیتگیں دادگر ءِ یک لک کلدار ملام ءِ پد ءَ 10 روچی مانزمان منگ بیتگ۔
۔۔۔۔
•مانسھرہ ءَ ڈی این اے گزارش ءَ اے گپ پدر بیتگ کہ ڈودار « کاری شمس ادین» ءَ گوں دہ سالی ئیں چکے ءَ جنسی زوراکی کرتگ ۔ میاربار ءَ دسمبر 2019 ءِ گڈی روچاں بالادی کوھستان ءَ یک دینی دربرجاھے ءِ تہ ءَ گوں چک ءَ جنسی زوراکی کرتگ ۔ چک ءِ کھول ءَ آئی ءِ بگیری ءَ پولیس ءَ دزبندی داتگ ۔ لھتے روچاں پد جمیت الما ء اسلام ءِ راھشون مپتی کپایت الا ءُ مھمدابرار تنولی ءَ ڈودار پولیس ءِ دست ءَ داتگ ۔
۔۔۔۔
•ھیبرپتونکا ءِ ھنکین لکی مروت ءَ ھشت ماھی زھگے ءُ سند ءِ ھنکین سجاول ءَ ھم چکے ءِ تہ ءَ پولیو ءِ وائرس گندگ بیتگ اَنت۔سال 2020 ءَ سند ءَ اے پولیو ءِ دومی نادراھی اِنت ۔چہ ایشی ءَ پیش 22 جنوری ءَ ٹنڈو الھیار ءَ ھم پولیو گْورجتگیں چکے پجارگ بیگ ۔گْوستگیں سال ءَ سرجمیں پاکستانی بست ءُ بند ءَ 136 پولیو ءِ نادراھی ءِ آماچ بیتگیں چک پجارگ بیتگ، چہ ایشاں درساں گیش 96 ھیبرپکتونکا ، سند ءَ 25 ، بلوچستان ءَ 11 ءُ پنجاب ءَ 8 نادراہ پجارگ بیتگ۔ زانگ بہ بیت کہ پاکستان ،ا وگانستان ءُ نائیجریا جھان ءِ ھما ڈیھ اَنت کہ اد ءَ پولیو وائرس دنیگت زندگ ءُ ھست اِنت ۔ وھدے کہ جھان ءِ گیشتریں ڈیھاں اے نادراھی کمتر اِتگ ءُ نیستی ءِ رد ءَ اِنت ۔ پاکستان ءِ ھم بندیں ڈیھ ایران ءَ گْوستگیں بیست سال اِنت پولیو ءِ ھچ نادراہ دیم ءَ نے اَتکگ۔
۔۔۔۔۔۔۔۔
•پاکستانی بند ءُ بست ءِ چار اُستانانی سرکاری واکدارانی میان ءَ نسیلی گیش بیان اِنت ۔ پنجاب ءُ بلوچستان ءَ پد نی ھیبرپکتونکا ءَ ھم نسیلیاں تیجار کرتگ ءُ پاکستان تھریک ء انساپ ءِ جند ءِ باسک وتی سرکار ءَ ڈوبارگ ءَ اَنت ۔زانگ بہ بیت کہ اے وھدی پاکستانی بست ءُ بند ءَ پنجاب ءُ ھیبرپکتونکا ءَ تھریک ء انساپ ءِ سرکار اِنت ۔ بلوچستان ءَ تھریک ء انساپ گوں باپ ءَ یکجا اِنت ءُ سند ءَ پیپلز پارٹی ءِ سرکار اِنت ، چوش اے وھدی سرکار ءِ سئے ئیں اُستانانی واکداری پادگاں لرزگ بنا کرتگ ۔ ھیبرپکتونکا ءَ پارلیمان ءِ باسک ءُ پاکستان تھریک ء انساپ ءِ راھشون مھمدالی ترکئی ءَ وتی جند ءِ سرکار ڈوبار اِتگ کہ ’’ ھیبرپکتونکا ءَ سرپچیں رنگےءَ گوچلی بیگ ءَ اِنت ءُ مزن وزیر مھمودھان ءِ برات سرکاری کارمنداں جاہ پہ جاہ کنگ ءُ واکداری دیگ ءَ اِنت ۔ آئی ءَ پرویز کٹک ءِ گْوستگیں سرکار ساڑاتگ ءُ اے رد ءَ گْوشتگ کہ : ھما بوجیگ ءِ بُکینگ ءِ شور بیتگ ما آ بوجیگ ءَ سوار نہ بہ ایں پمیشکا گھتر اِنت کہ جاور شر کنگ بہ بہ اَنت۔‘‘
۔۔۔۔۔
•لاھور ءَ جنین آدمانی زانشتجاہ ءَ پارسی ، سیاسی زانشت ءُ میان اُستمانی سیادی ءِ تک ءِ نیمگ ءَ ایران ءُ پاکستان ءِ سیادیانی سر ءَ سئے روچی سساتْرانی مراگشے برجم دارگ بیتگ ، اے مراگش ءَ ایرانی سپیر ءَ گْوشتگ کہ ایران ءُ پاکستان ءِ سیادی باز جوان اَنت ۔
۔۔۔۔
•سند ءِ اُستاندار « امران اسمائیل» ءَ گْوشتگ کہ ڈیھ ءَ آرت ءِ ڈکال اینچو نہ اِنت کہ پیش دارگ بیگ ءَ اِنت۔
۔۔۔۔۔
•پاکستان ءَ چہ زمین زمین ءَ جنوکیں بلیسٹک موشک «گزنوی» ءِ چکاس جنی کرتگ ، سرکاری بنشون ءِ رد ءَ اے چکاس سوبمند بیتگ۔
•پاکستانی بنجاھی پٹ ءُ پولی ترامگیج ءِ سائبر بردست ءِ نیمگ ءَ ھبیرپکتونکا ءِ ھنکین شانگلہ ءَ کرپٹوکرنسی جوڑ کنوک ءُ بھا کنوکانی یک کدگے پول اتگ ءُ چہ پنجاب ءَ سیادی داروکیں دومردم دزگیر کرتگ۔
کرپٹو کرنسی کاگد یا دگہ رنگےءَ نیست اَنت ایوک ءَ نمبر اَنت کہ مانگیش اتگیں شماریاتی رنگے ءَ جوڑ کنگ بہ اَنت ءُ دنیگت ایشانی باندات ءُ کارمرد کنگ ءِ درگت ءَ مزنیں وڑے ءَ سرپدی نیست بلے جھان ءِ تہ ءَ بٹ کوئن چہ نامداریں کرپٹوکرنسی ءِ رد ءَ ھوار اِنت ۔ اے کرپٹو کرنسی چہ امریکی ڈالر ءَ ھم توانمند تر اِنت اے وھدی یک بٹ کوئنے 83000 ڈالر ءِ نزیک ءَ اِنت بلے ایشی ءِ ارزشت ءِ سرپد بیگ چہ لس مردم ءِ وس ءَ ڈن اِنت ءُ نا کہ اے کرنسی آ دگہ کرنسیانی پیم ءَ ھرجاہ ھرچ کنگ بیت پمیشکا گھتر ھمے بیت کہ مردم وت ءَ چہ اے رنگیں کرنسیانی زیرگ ءَ بہ پھریز اَںت۔
نام گیپتگیں کرپٹوکرنسی ءِ کدگ شانگلہ ءِ کوھی دمگاں جوڑ کنگ ءُ چہ پنجاب ءِ شھراوکاڑہ ءَ آنلائن کارمرد کنگ بیتگ ۔

ایران

•ایران ءِ ھال رسانیں تند جاہ «ھبرگزاری ء پارس» چہ امریکی واکدارانی نیمگ ءَ بند کنگ بیتگ ۔ ایرانی سرکاری بنشونانی رد ءَ لھتے ایرانی بینکانی تندہ جاہ ھم بندکنگ بیتگ اَنت بلے آیانی ڈیھ ءِ تہ ءِ تندجاھی ڈس پیشیگیں رنگ ءَ کار کنگ ءَ اَنت۔

اوگانستان

اوگانستان ءَ ایمنسٹی انٹرنیشنل ءَ گْوشتگ کہ امریکا ءُ تالبان وتی گپ ءُ تْرانانی تہ ءَ اے مسامبندی ءَ ھم ھوار بہ کن اَنت کہ چہ دوئیں نیمگ ءَ جنگی راھبندانی انان دارگ بیت ءُ بے سلاھیں مردمانی سر ءَ بالی بیڑ آسرینگ بہ اَنت ۔ آئی ءَ زور داتگ کہ باید اوگانستان ءَ دست گوشیں مردمانی کوش سرجمی ءَ ھلاس کنگ بہ بیتءُ ھچ دست گوشیں مردم چہ ھچ نیمگ ءَ کشگ مہ بیت۔
۔۔۔
•اوگانستان ءِ جاندْراھی وزارت ءَ کورونا وائرس ءِ پیشگیری ءِ رد ءَ چہ میان اُستمان ءَ لوٹ کرتگ چوش کہ اوگانستان چین ءِ ھمساھگ اِنت پمیشکا اے رد ءَ چہ کورونا ءِ دیم ءَ پیشگیری ءِ کاراں آیاں میان اُستمانی کمک پکار اِنت۔
۔۔۔۔۔
•اوگانستان ءِ مھتر ءِ نوکتریں پرمانے ءِ رد ءَ اوگانستان ءِ درسیں زندانانی چارگزار یک جتاءُ برجمیں تْرامگیجےءِ دست ءَ دیگ بہ اَنت ۔ اے پرمان ءِ پژدر ایش اِنت کہ سرکار لوٹگ ءَ اِنت زندانانی چارگزار لشکری توانانی دست ءَ مہ بیت بلکیں اے زمہ واری درلشکری واکداراں دیگ بہ بیت۔
۔۔۔۔۔۔
•مھمداشرپ گنی ءِ گچینکاری بولک ءِ یکمی کمک «امرالا سالھ» ءَ گْوشتگ کہ گوں تالباناں بیتگیں گپ ءُ تْران باید ڈیھ ءِ « جرگہ» ءِ دیم ءَ ایر کنگ بہ بہ اَنت ، جرگہ آیاں رد کنت یا من اِیت اے ھمائی ءِ سر ءَ بہ بیت ءُ ھچ ڈنی ڈیھ گوں تالباناں بیوکیں گپ ءُ تْراناں اوگانیانی جھگیری کرت نہ کنت یا چوشیں گپے کہ آئی ءِ سر ءَ ھم پتے بہ بیت آئی ءَ چہ اوگاناں منارینت کنگ ءِ توان نہ دار ایت۔

جھان

امریکا ءَ من اتگ کہ ماں اراک ءَ آیانی لشکری بنجل ءِ سر ءَ 8 جنوری ءَ بیتگیں ایران ءِ موشک بیڑ ءَ پد 34 سپاھیگ زدگ بیتگ ۔ اے ٹپ آیانی مژگ ءِ تہ ءَ بیتگ اَنت ۔ چہ ایشاں 8 پہ دارگ ءُ درمان ءَ امریکا ، 9 جرمنی ءُ یکے کویت ءَ دیم دیگ بیتگ ۔ 16 سپاھیگانی اراک ءِ جند ءَ درمان ءُ تیمار کنگ بیتگ ءُ چہ ایشاں 17 پد ءَ وتی کارانی سر ءَ واتر بیتگ ۔
۔۔۔۔۔۔۔
•ترکی ءِ استان ایلازہ ءَ بیوکیں زمین چنڈ ءَ کم ءَ کم 18 کس بیران ءُ ماڑیاں تاوان رس اتگ ۔ ریکٹراسکیل ءَ زمین چنڈ ءِ زور 6.8 پیتبند کنگ بیتگ ۔ زمین چںڈ ءِ گرینک ایلازہ استان ءِ سیوریس نامیں کوچگے گْوشگ بیتگ ۔
۔۔۔۔۔۔۔
•امریکا ءَ چوشیں لاپ پُری جنینانی وتی ڈیھ ءَ آیگ ءِ سر ءَ بندش جتگ کہ آ پہ وتی چکانی امریکی شھریت ءَ پہ چلگ بیگ ءَ امریکا ءَ رو اَنت ۔ امریکا ءِ ڈیھ ءِ راھبندانی رد ءَ امریکا ءَ ودی بیوکیں ھمک زھگ ءَ امریکا ءِ بنکی شھرمنندی ءِ بستار رس اِیت۔
۔۔۔۔۔۔۔
•امریکا ءِکمک دری کارانی وزیر ایلس ویلز ءَ گْوشتگ کہ پاکستان ءِ سی پیک ءِ رد ءَ چینی سرمایہ گزاری کمکے نہ اِنت بلکیں وامانی رنگ ءَ پاکستان ءِ سر ءَ بارے ۔ آئی ءَ اے ھم گْوشتگ کہ امریکا پاکستان ءَ چوشیں سرمایہ گزاری ءِ کنگ ءَ ساڑی اِنت کہ چہ آئی ءَ مردماں روزگار بہ رس ایت ءُ باید امریکا ءَ ھم پاکستان ءَ سرمایہ گزاری کنگ ءِ برابری ءِ بنیاد ءَ موہ دیگ بہ بیت۔
۔۔۔۔۔۔۔۔۔۔
• چہ چین ءَ شنگ بیوکیں کورونا وائرس جھان ءَ تالان بیگ ءَ اِنت ۔ چین ءَ چہ ایشی ءَ 41 مردم بیران بیتگ ۔ چین ءَ پہ ایشی ءِ گر ءُ دار ءَ ھنگامی بنیاد ءَ جتائیں نادراھجاھے بندگ بیگ ءَ اِنت ۔ ھزارنپادی اے نادراھجاہ آیوکیں دہ روچانی تہ ءَ ساڑی کنگ بیت۔کورونا نادراھی ابید چہ چین ءَ پاکستان ، تھائی لینڈ،ویت نام ،زرباری کوریا،تائیوان ، پرانس ، نیپال ، امریکا ، آسٹریلیا ءُ سنگاپور ءَ ھم گندگ بیتگ ۔