ھال : 22 جنوری 2020

زرمبش ھال »22 جنوری 2020| ڈاؤنلوڈ

مراگش: ریڈیو ھال
بنگپ : ھال 22 جنوری 2020
شنگکار: ریڈیو زْرمبش بلوچی

روتاک زْرمبش بلوچی

رودرتکی بلوچستان

• ڈیرہ بگٹی ءِ ھند سوئی ءِ جنکانی شھدربرجاہ ءِ چمشودانی تہ ءَ «تامرگر» جنگ ءِ ھال پاشک بیتگ۔نودربراں گوں ری پبلکن نیوز ءِ جھگیراں گْوشتگ کہ ما زھرشانی کنگ لوٹ اِتگ چہ ایشی ءَ شھدربرجاہ ءِ مستر «جاویدکھوکر» ءَ آئی ایس آئی ءِ کارمند لوٹ اِتگ اَنت ءُ جست کنوکیں نودربرانی نام نبشتہ کرتگ ءُ بیھار داتگ اَنت کہ اگاں آیاں اے گپ دیم ءَ برت پہ آیاں شری نہ بیت ۔ آیانی رد ءَ اے «تامرگر» پہ ایمنی ءِ برجاھی ءَ جنگ بیتگ اَنت۔
اے رد ءَ نودربراں ھمے گْوشتگ کہ اگاں پہ ایمنی ءِ برجاھی ءَ اے «تامرگر» جنگ بیتگ اَنت گڑا دیوالانی سر ءَ جنگ بیتین اَنت ، جنکانی چمشود ءَ تامرگر پرچا جنگ بیتگ ۔
زانگ بہ بیت کہ «ماڈل اسکول اینڈگرلز کالج» ڈیرہ بگٹی ءِ ھند «سوئی» ءَ یکیں شھدربرجاہ اِنت ءُ ایشی ءِ تہ ءَ ھم تیوک ءَ «پاکستان پٹرولیم لمیٹڈ» ءِ کارمندانی چک وانگ ءَ اَنت۔
اے شھدربرجاہ «سوئی گیس » ءِ در آیگ ءِ ڈگار ءِ واڑ ءَ جوڑ کنگ بیتگ کہ آ اُود ءَ ھروھد ءَ پانک جن اوشتاتگ اَنت ، ڈی ایس جی ءُ ایف سی ءِ کارمندانی مزنیں کچے پانگ اِنت ءُ تیوک ءَ کارمند وتی پجار تاک ءَ پیش داشت ءُ چہ پانک گساں پجارگ ءُ پٹگ ءَ پد نی آ اُود ءَ سر بہ اَنت۔
ھمے دربرجاہ ءِ پیشیگیں نودربر مرید بگٹیءِ گْوشگ ءِ رد ءَ اے وانگجاہ ءِ سر ءَ مدام پاکستانی لشکر ءِ چم سک بیتگ اَنت ءُ سال 2001ءَ کہ ما وانگ ءَ بیتگ ایں آیاں ایم آئی ءِ کارمندے شھدربرجاہ ءِ مستر کرتگ اَت ھمے گپ ءِ سر ءَ ما زھرشانی ءِ کوشست کرتگ مارا بیھار دیگ بیتگ ءُ ھمے دْرچ دنیگت برجاہ اِنت ۔
• نسیرآباد ءِ دمگ ءَ «نوتال تھانہ» ءِ سیم ءُ ھنداں زمینانی سر ءَ مردم وت ماں وت مِڑ اتگ اَنت۔ پولیس ایس ایچ او شمن سولنگی ءَ تیرگواری کنوکیں سئے ڈوھدار دزگیر کرتگ ، زدگ بیتگیں نادراھجاہ ءَ برگ بیتگ اَنت ۔ زدگ بیتگیں مردماں گْوشتگ کہ مئے کستیگاں مئے زمین چیرجتگ اَنت ءُ وھدے کہ ما وتی زمینانی سر ءَ شتگ ایں مارا گوں تیراں مان بستگ چہ ایشی ءَ ما ٹپی بیتگ ایں۔
• بلوچستان ءَ چہ پَژاپاں وردنی سبزی ءُ کاھوکانی کشار ءِ سر ءَ بندش جتگ بیتگ ۔ بلوچستان ءِ وردنی واک ءِ ترامکار ابراھیم بلوچ ءِ گْوشگ اِنت کہ شال ءِ پجیگ ءَ بازیں دمگاں چہ پَژاپاں سبزی ءُ کاھوک کشگ بیگ ءَ اِنت چہ ایشی ءَ لکانی مردم نادراہ بیگ ءَ اِنت ۔ چہ پس اتگیں آپاں کشگ بیتگیں سبزیاں گٹکانی نادراھی ، ھڈانی نزوری ، زردیویگ ءُ شیمک رنگیں مردم کشیں نادراھی بیت کنت۔
آئی ءَ گْوشتگ کہ دیمتر ءَ چہ پَژاپاں سبزی رودینوکیں مردمانی بگیری ءَ ترندیں گامگیج زیرگ بیت ۔ وردنی واک ءِ کارمنداں سرپل ءُ اسمنگلی دگ ءِ نزیک گْوراں ڈگاراں آپ پجارینوکیں لولگ پْروشتگ اَنت ءُ ڈگارانی واھند ھژدارتاک داتگ اَنت۔
•سنجاوی ءَ مردمے تیر جنگ ءُ کشگ بیتگ ۔ « نواب ھان ناسرھیل» نامیں کشگ بیتگیں مردم ءِ درگت ءَ ھمے گْوشگ بیگ ءَ اِنت کہ ایشی ءَ لھتے ماہ پیش ماں دکی ءَ وتی جنین کشتگ ءُ چیربیتگ ءُ پولیس ، کوش ءِ میارگوندی ءَ ایشی ءِ رند ءَ بیتگ ۔اے مرد ءِ کشوکانی درگت ءَ ھم دنیگت زانگ نہ بیتگ۔
•بی این ایم یوکے ھنکین ماتی زبانانی جھانی روچ 21 پروری ءَ مراگشے ایر کنت ءُ 23 مارچ ، بلوچستان ءِ ایردستی ءِ روچ ءَ ھیلکاری پترے دیگ بیت ءُ ھمے پیم سی پیک ءُ بلوچستان ءِ برجاھیں جاورانی درگت ءَ میان استمانی تک ءِ مراگشے لوٹائینگ بیت کہ آئی ءِ تہ ءَ بلوچ راج ءِ زانتکاراں ابید سیاسی راھشون لوٹگ بہ اَنت۔ اے جار بی این ایم یوکے ھنکین ءِ لس باسکی نیاد ءَ پد پرینگ بیتگ ۔لس باسکی نیاد بی این ایم یوکے ھنکین ءِ کماش ھکیم ءِ سروکی ءَ بیتگ ۔ نیاد ءَ ھنکین کارگشاد نیاززھری ءَ ھنکین ءِ گزارش پیش کرتگ ءُ پہ گپ ءُ تْراناں بنگپ ایر کنگ بیتگ اَنت ۔
• ڈیرہ مراد جمالی بازیں جیڑھانی آماچ اِنت ۔ گیس نیست ، پَژاپ دمک ءُ دگاں تچگ ءَ اَنت ، لینانی ٹرانسفارمر ھراب اَنت ۔ چہ اے جیڑھاں شیزاریں مردماں زھرشانی کرتگ ءُ سند بلوچستان ءِ بنکی شھدگ بستگ ۔
•بلوچستان ءِ بندءُبستی دمگ کلہ ابدلا ءِ ھند «ھبیب زھی» ءَ 18 ماھی چک ءِ تہ ءَ پولیو ءِ وائرس گندگ بیتگ ۔ جاندارھی بنشونانی رد ءَ سانمند بیتگیں زھگ ءِ جان ٹپاسی گْوستگیں سال ءِ 31 دسمبر ءَ کنگ بیتگ ۔ سان زرتگیں زھگ ءَ 3 گشت ءَ پولیوپھریزی تْرمپ ھم وارینگ بیتگ ۔ سان زرتگیں زھگ ءِ کھول پنجاب ءِ شھر اوکاڑہ ءَ ھم منندیگ بیتگ ۔ جاندْراھی بنشونانی گْوشگ اِنت کہ سال 2019 ءَ بلوچستان ءَ پولیو ءِ 12 نادراہ پجارگ بیتگ ۔ زانگ بہ بیت کہ پاکستان ، اوگانستان ءُ نائیجریا جھان ءِ ھما ڈیھاں ھوار اَنت کہ اد ءَ پولیو ءِ نادراھی چہ درساں گیشتر ھست ءُ ھیبرپشتونکا ءُ بلوچستان ، پاکستان ءِ ھما بندءُ بستی اُستان اَنت کہ اد ءَ چہ درساں گیش پولیو ءِ نادراھی ءِ گزارش دیم ءَ کئیت۔بلے دومی نیمگ ءَ روکپتی بلوچستان ءَ گْوستگیں 20 سال اِنت کہ ھچ پولیو ءِ نادراھی گندگ نہ بیتگ ۔
• دکیءَ اشکر ءِ کھناں درروپوکیں مزدورے لین ءَ گیپتگ ءُ بیران بیتگ۔بیران بیتگیں مردم ءِ نام «ابدل شکور ء پال مھمد بارکزھی» اِنت ۔ بیران بیتگیں اوگانستان ءِ نندوک بیتگ کہ کھن ءِ سر ءَ گْوزوکیں 11 ھزار ی لین ءَ لچ اتگ ءُ جاہ پہ جاہ بیران بیتگ ۔
• نوشکے ءَ ڈنگاں مردم ترس ءِ آماچ کرتگ اَنت ۔ راھگوزی مردمانی پرپٹاں پچ گرگ ءَ اَنت۔ مروچی سھب ءَ نودربر « ھدا ءِ رھیم ء ھاجی مھمد ھاشم » چہ ڈنگانی تیرگواری ءَ پردگے رک اِتگ۔
آ سھب ءَ گون وتی پرپٹ ءَ وانگ ءَ روگ ءَ بیتگ کہ سلاھبندیں ڈنگاں مانترینتگ ءُ پرپٹ ءِ لوٹ کرتگ ۔ نودربر ءَ چہ پرپٹ ءَ کلیت کش اِتگ اَنت ءُ درشتگ ۔ ڈنگاں آئی ءِ سر ءَ تیرگواری کرتگ بلے پردگ بیتگ ءُ تیر آئی ءَ پیوست نہ بیتگ اَنت ۔ چہ تیرگواری ءَ مردم چہ گساں در کپتگ اَنت ءُ ڈنگ سربالادی تیرجنان تتکگ اَنت۔
• گیس چہ بلوچستان ءَ در کپ ایت بلے بلوچ دنیگت پہ گیس ءَ دری واکانی واستیگ مند اَنت ۔ بلوچستان ءِ گیشتریں دمگاں مردم دار ءُ نپت سوچ اَنت یا جاھے جاھے ایرانی سلنڈر کارمرد کنگ بیت۔بلوچستان ءِ سارتیں دمگاں چہ گیس پِژار ءِ کم بیگ ءَ مردم سرجمیں زمستان ءَ زھرشانی کنگ ءَ اَنت ۔ زھرشانی ءِ نوکیں دْرچانی رد ءَ کلات ءَ شھدگ بند کنگ بیتگ ءُ شال ءَ نندانک دیگ بیتگ ۔ نندانک ءَ بلوچستان ءِ کاسگ چٹیں پارلیمان ءِ باسکاں ھم بھر زرتگ ۔ آیاں گْوشتگ کہ بلوچستان ءِ مردم چہ وتی جند ءِ سرڈگار ءَدر کپوکیں گیس ءِ لوٹگ ءَ زھرشانی ءَ لاچار اَنت ۔ شال ءَ نندوکیں 22 لک مردم اے سارتیں شپ ءُ روچاں بے گیسی ءَ زندگی گوازینگ ءَ لاچار اَنت ۔ 9 جنوری ءَ ھمے سدکی دیگ بیتگ کہ 20 جنوری ءَ گیس پِژار شرکنگ بیت بلے چوش کنگ نہ بیتگ ۔
زھرشانی کنوکاں ھژدار داتگ کہ اگاں گامگیج زیرگ نہ بیت شاھگانیں رنگے ءَ زھرشانی کن ایں۔
• بلوچستان ءَ گورے آرت ءِ ڈکال اِنت ءُ دومی نیمگ ءَ واکدارانی تہ ءَ سنچ ءُ سما گندگ نہ بیت ۔ کلہ سیپ الا ءِ مسلم باگ ھنکین ءَ وردنی تک ءِ سرپچیں گداماں کپتگیں گندیم ءِ ھزارھاں گونی تاوان بیگ ءَ اَنت ۔ چاگردی رسانکدر ءَ شنگ بیتگیں تامربندانی تہ ءَ گندگ بیت کہ گندیمانی گونی آزمان ءِ چیر ءَ ھور ءُ ھمسرک گواری ءِ تہ ءَ کپتگ اَنت ءُ چہ کارمرد کنگ ءِ بَین ءَ شتگ اَنت۔
• گوادر ءَ سی پیک ءِ پارلیمانی پتر ءِ نیادے بنا بیتگ ۔ نیاد ءِ تہ ءَ بھر زیرگ ءَ پارلیمانی بولکے گوادر ءَ سربیتگ ۔ نیاد گوادر ءِ پرل کانٹینٹل ھوٹل ءَ پتر ءِ کماش ءُ پاکستانی اسمبلی ءِ باسک « شیرالی ارباب » ءِ پاگواجھی ءَ بیتگ ۔ نیاد ءَ بھر زرتگیں پتر ءِ باسکاں سی پیک ءِ بند ءُ ساچی کارانی رپتار ءِ سر ءَ بے تاھیری درشان ءَ کنان سوج داتگ کہ اے شورانی سر ءَ کار گوں تیزی دیم ءَ برگ بہ بہ اَنت۔اے نیاد ءَ گوادر ءِ دریاوردانی جیڑھانی سر ءَ ھم گپ بیتگ ۔ نیاد ءَ سینیٹرکھدہ بابر، ایم پی اے گوادر ھمل کلمتی ، پاکستان ءِ دریاپانک ءِ جھگیر، گوادر بندن ءِ واکداری ءِ کماش، گوادرءِ دیمروی ءِ کارانی واکداری ءِ کماش ، گوادر ءِ کمک دمگدار ءُ آ دگہ واکداراں ھم بھر زرتگ۔
ھمے میان ءَ گوادر ءِ سرجمیں گل سنّت ، باپاریانی انجمن ، گوادر میدسنّت ءُ کلانچی میتگ ءِ مردمانی بولکاں ھم گوں پارلیمانی پتر ءِ باسکاں گند ءُ نند کرتگ ۔
• چہ پنجاب ءَ بلوچستان ءَ آرت آروکیں دہ ویلراں پولیس ناراھیں رنگے ءَ ملام گرگ ءَ اِنت۔آرت آروکیں دہ ویلر «راکھی گاج » ءُ «سکی سرور » پولیس پانک گساں دارگ بیتگ اَنت۔
• یورپی سنّت ءَ پہ بلوچستان ءِ مردمانی آپ پجارینگ ءَ 40 میلون یورو ایر کرتگ ۔ یورپی سنت ءِ ماں پاکستان ءَ سپیر انڈرولا کامینارا ءَ گْوشتگ کہ بلوچستان ءِ مردماں بنیادی آسراتی پجارینگ ءَ یورپی سنّت ءِ کوشست برجاہ مان اَنت۔

رودرتکی بلوچستان

•لادیز ءِ سد ءَ تْرک زرتگ ءُ چہ ایشیءَ 30 ھزار مردمانی زندمانی ترس ءِ دیمپان اِنت
واش ، نسرت آباد، میرجاوہ ءُ کورین ءِ ماں پارلیمان ءَ مردمی جھگیر الی کرد ءَ گوں رسانکدر ءَ گپ جنان ءَ گْوشتگ : لادیز ءِ سد چہ تپتان ءِ کوراں آپ زیر ایت ۔ اے سد پمیشکا جوڑ کنگ بیتگ داں کش ءُ گور ءِ دمگاں زمین چیر ءِ آپ گیش بہ بیت۔
آئی ءَ گْوشتگ کہ ’’ سد ءَ شمسی ھجری ءِ سال 97 ءِ اسپند ءِ ماہ ءَ بیتگیں ھور ءَ ترک زرتگ ،بزاں گْوستگیں سال ءَ ۔ ما اے درگت ءَ رندگیری کرتگ بلے دنیگت پہ ایشی ءِ شر کنگ ءَ گامگیج زیرگ نہ بیتگ اگاں اے درگت ءَ گام چست کنگ مہ بیت 30 ھزار مردمانی زندمانی ترس ءِ دیمپان اِنت اگاں سد بہ سد ایت مردم بیران ھم بوت کن اَنت ۔‘‘
لادیز ءِ سد چہ دزاپ ءَ 85 کیلومیٹر ءِ دیری ءَ جوڑ کنگ بیتگ ۔ شمسی ھجری سالدر ءِ رد ءَ بھمن 1387 ءَ بلوچستان ءَ لادیز ءِ سد ءِ پجیگ ءَ نیکشھر ءِ شھرستان ءَ ھیرآباد ءِ سدھم جوڑ کنگ بیتگ ۔ سرکاری بنشونانی رد ءَ اے وھدی ھیرآباد ءِ سد ھم سرریچ اِنت۔
• چھبار ءِ آزات دمگ ءِ نیمگ ءَ گْوشگ بیتگ کہ آ چہ ھار ءَ سانمند بیتگیں دربرجاھاں ، بند ایت ءُ شرکنت۔
•اے سالی پھرہ ءِ گُلجاھاں چہ چارھزار ٹن ءَ گیش «ھَیار» پیداک بیتگ ۔ پھرہ ءِ کشاوردی تک ءِ کارمستر ءَ گْوشتگ کہ آبان ماہ ءِ گڈی روچاں بہ گر داں انی چار ھزار ٹن ءَ گیش ھیار چںگ ءُ ماں بازاراں پہ بھا برگ بیتگ ۔
• 12 ھزار ءُ 450 ھار آماچیں مردم پہ دوار ءُ بندر ءَ چہ سھرنوک ءِ نیمگ ءَ چادری گدان دیگ بیتگ ۔ سھرنوک ءِ رد ءَ بلوچستان ءِ 933 کوچگاں سھر نوک کمک رسانی کنگ ءَ اِنت۔
• پھرہ ءِ پیش نادراھجاھی ءُ پزشکی زانشتجاہ ءِ سروک ءَ گْوشتگ کہ ھار ءَ 33 ایمرجسنی بنجل تاوانبار کرتگ۔
• چھبار ءِ آپ شیرین کن ءِ توان گیش بیتگ نی چہ چھبار ءِ آپ شیرین کن ءَ روچے 5 ھزار چار پھناتی میٹر آپ جوڑ بیت۔اے ھال چہ بلوچستانءِ بندنی ءُ دریاوردی سازمان ءِ رسانکدری بنشونے ءِ نیمگ ءِ شکسایگ بیتگ ۔ چھبار ءِ آپ شیرین کن چہ دریا ءَ آپ زیر ایت ءُ وش کنت ءُ اے آپ مردماں پہ ورگ ءَ پجارینگ بیت ۔ بلے چھبار ءِ بازیں میتگانی مردم گلگ مند اَنت کہ آیانی گس ءَ مدامی آپ نئیت ءُ اگاں کئیت ھم آپ ءِ آیگ ءِ زور کم اِنت ءُ ابید چہ لینی گلگلاں چکگ نہ بیت۔
•بازیں میان اُستمانی سازمانانی جھگیراں ھم بلوچستان ءِ ھار آماچیں دمگاں تر ءُ تاب کرتگ ۔ میان اُستمانی سازمانانی جھگیراں شھرستان کنرک ءِ دمگ زرآباد ءِ کوچگ ءُ ھار ءَ برتگیں ڈگار چار اتگ اَنت داں زانگ بہ بیت کہ آیاں چونیں کمک پکار اِنت ۔
•چہ تھران ءِ مسیتاں پہ بلوچستان ءِ ھار آماچیں مردماں 324 میلون تومن ءِ کمک یکجا کنگ بیتگ ۔ اے کمک چہ کمیتہ امداد تھران ءِ نیمگ ءَ چہ تھران ءِ مسیتانی نمازیگاں یکجا کنگ بیتگ اَنت۔
• چہ ایران ءِ بنجاھی گمرگ ءِ نیمگ ءَ داں دومی پرمان ءَ 41 چیز ءِ چہ بلوچستان ءُ سیستان ءِ سیمسراں ڈن دگہ ڈیھاں برگ ءِ سر ءَ بندش جتگ ۔ چہ ایشاں گندیم ، دری ڈیھاں جوڑ بیتگیں چاھیتاک ، پیکنگ ءَ کارمرد بیوکیں کاگد، چاپی کاگد ءُ روتاک، اشتری چک بزاں ھر،چہ 500گرام ءِ بستگاں گیشتریں نیمگ، چہ کار ءَ کپتگیں پلاسٹک،مٹر، مکئی ءِ توم ،روگن،زندگیں مرگ،گرم ءُ ٹنٹ اتگیں مرگ،گوشت ءُ ماھیگ ءِ پوڈر،لوبیا،ڈبکی چماٹا،آرت،نبشتہ کنگی دپتر، کاگدی دزمال ، روگنی توم،گاڑیانی ٹائر،ھشکیں شیر،کاہ ،مرگانی وردن ءُ دگہ لھتے چیز ھوار اِنت ۔ زکیں روچاں چہ بلوچستان ءُ سیستان ءِ سرکاری واکداری ءِ نیمگ ءَ اے گپ گْوشگ بیتگ کہ چہ بلوچستان ءِ سیمسری ھنداں چہ دگہ ڈیھاں باپار ءِ تہ ءَ گیشی اتکگ۔
چہ بنجاھی سرکار ءِ اے پرمان ءَ بلوچستان ءُ سیستان ءِ سیمسریں ھندانی پہ راھدار بیوکیں باپار جھل کئیت ءُ گمان ھمیش اِنت شپکی گیش بیت۔
پاکستان
•پاکستان ءِ دیمپانی وزارت ءَ چاریگی ءِ بھتام ءَ دزگیر کنگ بیتگیں « بیگواھیں مردمانی وکیل انامرھیم » ءِ یلہ کنگ ءِ سر ءَ ڈک جتگ کہ اگاں آئی ءِ وکیل آئی ءِ گزرنامک ءَ مارا بہ دنت ءُ لیپ ٹاپ ءِ رمز ءَ بہ گْوش ایت ما «انامرھیم» ءَ یلہ کن ایں۔
•پاکستان ءِ سروزیر «امران ھان» ءَ یوٹیوب ءُ دگہ ٹکنالوجی شرکتانی سروک گندک کرتگ اَنت ءُ چہ آیاں لوٹ کرتگ کہ آ پاکستان ءَ سرمایہ گزاری ءِ پجیگ ءَ ڈیھ ءِ شریانی پدر کنگ ءَ ھم کمک بہ کن اَنت۔چہ اے شریانی پدر کنگءَ سروزیر ءِ مول ھمیش بیت کہ پاکستان ءِ تہ ءَ بیوکیں ھرابیں کار ءُ پہ مردماں تاوانیں سرکاری کارپد چیر دیگ بہ بہ اَنت ءُ آیانی سر ءَ ھچ رنگیں ایراد گرگ مہ بیت۔اے گپ آئی ءَ ماں وتی سوئزرلیںڈ ءِ سواد ءَ گوں نام گیپتگیں شرکتانی سروکاں جتگ اَنت۔
• ماں اوگانستان ءَ پاکستانی سپارتجاہ ءَ گْوشتک کہ آیاں چہ اوگانستان ءَ چیز آرگ ءِ سر ءَ ھچ وڑیں بندش نہ جتگ۔
•پاکستانی دری کارانی وزیر «شاہ مھمود کریشی » ءَ گْوشتگ کہ امریکا ءِ مھتر ڈونلڈ ٹرمپ زیت پاکستان ءِ سواد ءَ کئیت ۔ پاکستان ءِ سروزیر امران ھان سوئزرلینڈ ءَ ورلڈاکنامک پورم ءِ پتر ءَ گوں ڈونلڈ ٹرمپ ءَ دوچار کپتگ۔
• چین ءَ ٹومب اتگیں کورونا وائرس ءِ رد ءَ پاکستان ءِ جاندْراھی ءِ وزرات ءَ ھژداری جارے پرینتگ۔ اے جار ءِ پد ءَ چہ چین ءَ آیوکیں مردمانی جاندْراھی ٹپاسگ بیت ۔ کورونا یک وائرسے چہ ایشی ءَ مردماں گین ءِ نادْراھی گْور جنت ۔ چہ ایشیءَ چین ءِ شھر ووھان ءَ باز مردم سانمند بیتگ ۔ چین ءِ جاندْراھی تک ءِ نیمگ ءَ گْوشگ بیتگ کہ اے وائرس چہ یکے ءَ دگہ مردماں گیپت کنت۔
• سیھون ءَ ادالتی کت ءَ گوں جنکے ءَ جنسی زوراکی کنوکیں دادگر ءِ بگیر ءَ کیس کنگ بیتگ ۔ جنین ءِ جان ٹپاس کنوکیں ڈاکٹر موھین ادین ءَ گْوشتگ کہ جنین ءِ بالاد ءَ ھچ رنگیں ٹپ ءُ چانکرانی نشان نہ بیتگ۔
• ھیبرپکتونکا ءِ ھند بکاھیل ءَ شکی پرپٹے پولیساں دارگ ءِ کوشست کرتگ ، پرپٹ ءِ سوار تتکگ اَنت ءُ پرپٹ پولیس ءِ دست ءَ کپتگ پرپٹ ءَ تراکناکیں مواد لچوک بیتگ ۔ پولیس ءِ تراکناکانی ناکارگ کنوکیں تک ءِ کارمنداں پرپٹ گستائیں جاھے ءَ برتگ ءُ ترکینتگ ۔
ایران
•ایران ءِ مھتر «ھسن روھانی» ءَ گْوشتگ کہ ھدا ءَ مئے ڈیھ ءَ کہ توانے داتگ آ راج ءُ مردمی ھاٹیگ اِنت۔ایران ءِ مردم مئے مستریں ھاٹیگ اَنت ءُ ھیچ توان چہ ایشانی اوشتانک، دیمون دئی ءُ سنّت ءَ برزتر نہ اِنت۔آئی ءَ گْوشتگ کہ باید لس مردمانی ایکم کنگ ءِ نیمگ ءَ دلگوش گْور بہ کن ایں ۔ ایوک ءَ یک گل ءُ راجے ءِ ایکمی مارا جاھے نہ بارت ءُ سر نہ کنت۔
آئیءَ گْوشتگ کہ مئے ڈیھ ءَ جوڑ بیوکیں چہ نپتی چیزاں ابید ھم چیز ڈن ءَ روگ ءَ اِنت ءُ ایشانی کچ گیش بیتگ۔گوں ڈنی ڈیھاں باپار ءَ 20 میلیارد ڈالر ڈیھ ءِ بنجاھی بینک ءَ اَتکگ ءُ چہ بے نپتی چیزانی ڈن بھاکنگءِ باپار ءِ پژدر ءَ اے گزرانکی توان ءِ نشان اِنت ۔
• ایران ءِ امریکا ءَ کشگ بیتگیں نامی ئیں جنرل سلیمانی ءِ نزیکیں ھمراھاں یکے بسیج کماندار «ابدل ھسین مجدمی» ایران ءِ زرباری روکپتی شھر «دارھوین» ءَ کشگ بیتگ ۔ مجمدی وتی لوگ ءِ دیم ءَ پجارگ نہ بیتگیں سلاہ بنداں تیر جتگ ءُ کشتگ ۔ سرکاری بنشون ءِ رد ءَ دنیگت کس ءَ اے کوش ءِ زمہ واری نہ من اتگ۔
•ایرانی جوھری تْرامگیج ءِ سروک «الی اکبر» ءَ گْوشتگ کہ امریکی مھتر ءِ زور ءِ سر ءَ پرانس ، جرمنی ءُ برتانیا ءَ ایران ءِ جیڑہ ءِ گیشوار ءِ راھبند ءِ پُرکار کنگ ءِجار پرینتگ ۔الی اکبر ءِ رد ءَ آیانی اے جار امریکا ءِ دیم ءَ آیانی نزوری ءَ پیش دار ایت۔
• ایران ءِ وانگ ءِ وزیر «مھسن ھاجی میرزائی» وتی سری ڈنی سواد ءَ سوریا ءَ شتگ ۔ آئی ءَ گْوشتگ کہ ما سوریا ءِ چہ جنگ ءَ تباہ بیتگیں دربرجاھانی جوڑ کنگ ءَ ساڑی اِیں ۔ آئی ءَ گْوشتگ کہ ما چہ ھشت سالی جنگ ءَ تباہ بیتگیں لوگ ءُ دربرجاھانی جوڑ کنگ ءَ باز دربرتگ ءُ ھمے بنیاد ءَ ما سوریا ءِ کمک کنگ ءَ ساڑی ایں۔
•ایرانی واکدارنی نیمگ ءَ گْوشگ بیتگ کہ یوکرینی بالیگ آیانی پانکجنانی دو موشکاں نشانگ کرتگ بلے دنیگت بلیک باکس وانگ نہ بیتگ ۔ زانگ بہ بیت کہ ایران یکشل ءَ گْوشگ ءَ اِنت کہ آ بلیک باکس ءَ وت ڈیھ ءِ تہ ءَ ٹپاس ایت ءُ دری ڈیھ ھمے گْوشگ ءَ اَنت چوش کہ ایران ءِ کر ءَ چوشیں آسراتی نیست پمیشکا آ بلیک باکس ءَ پہ وانگ ءَ ڈن ءَ دیم بہ دنت۔
• ایران ءَ کینیڈا ءِ سر ءَ اے گپ ءَ ایراد گیپتگ کہ کینیڈا ءَ یوکرینی بالیگ ءِ جھلاد بیگ ءَ مرتگیں دو انچیں ایرانیانی اگبالانی لوٹ کرتگ کہ آیانی کر ءَ ایران ءَ ابید کینیڈا ءِ ھم شھریت بیتگ۔ایرانی واکدار ھمے گْوشگ ءَ اَنت چوش کہ ایران دو شھریت ءَ نہ من ایت پمیشکامرتگیں مردمانی اُگبالاں گوں آ دگہ ایرانیانی اُگبالاں ھم تنگ شُمار ایت ۔ اے درگتاں آیاں ریش کند کنان ءَ گْوشتگ کہ چہ مات ءَ ماتو ءَ گیشتر تورگ ءَ اِنت۔
اوگانستان
•اوگانستان ءِ پارلیمان ءِ جھگیراں مروچی چار شمبے ءِ روچاں بیتگیں نیادے ءَ آیوکیں سال ءِ راجی بجٹ گوں گیشتریں باسکانی ھم پتی ءَ من اتگ ۔ پہ آیوکیں شمسی ھجری سال 1399 ءَ اوگانستان ءِ سرجمیں راجی بجٹ 428 اوگانی میلیارد بزاں 5.5 میلیارد ڈالر ءَ گیش بیت کہ چہ ایشاں 289 میلیارد اوگانی بزاں چہ 3.7 میلیار ڈالر ءَ گیش لس بجٹ ءُ 139 میلیارد اوگانی بزاں چہ 1.8 میلیارد ڈالر ءَ گیش ڈیھ ءِ دیمروی کارانی بجٹ اِنت ۔
اوگانستان ءِ لس بجٹ سرکاری کارمندانی پگار، سرکاری کارگس ءُ چاگردی تکانی دیمروی ءَ ھرچ کنگ بیت۔
• جھانی بینک ءَ وتی نوکتریں گزارشے ءَ گْوشتگ کہ اوگانستان ءِ گزارنکی ردوم ءِ آمید 2.9 ماں سد اِنت ۔ آئی ءَ گْوشتگ کہ سال 2020 ءَ گزرانکی ردوم ءِ آمید 3.3 ماں سد ءَ سر بیت ۔ جھانی بینک ءَ گْوشتگ کہ سیاسی جاوراں باپار ، سرمایہ گزاری ءُ مزدوری ءِ ردوم ءِ سر ءَ کَشانکی سان اِشتگ ۔
• مھمدھارون چکانسوری اوگانستان ءِ دری کارانی تک ءِ سروک نامینگ بیتگ ۔ چہ اوگانستان ءِ مھتر ءِ ماڑی ءَ شنگ بیوکیں جارے ءَ گْوشگ بیتگ کہ چہ «مھتر اشرپ گنی» ءِ پرمان ءَ داں وھدے نوکیں وزیرے ایر کنگ نہ بیت چکانسوری اے وزارت ءِ سروک مان ایت۔
• اوگانستان ءِ مردمی اگبالانی وتکواکیں کمیشن ءَ گْوشتگ کہ دہ روچ پیش اوگانستان ءِ استان ھرات ءِ ھنکین شینڈنڈ ءَ نیٹو ءِ لشکر ءَ گوں بالی گراباں اُرش کرتگ ءُ دہ بے سلاھیں مردم کشتگ ۔
کمیشن ءِ سروک «شھزاداکبر» ءَ گوں رسانکدر ءَ گْوشتگ کہ اے اُرش ءَ سئے جنین ءُ سئے چک ھم کشگ بیتگ ۔
جھان
• جھانی گزرانکی مراگش ءَ تْران کنان امریکا ءِ مھتر ءَ گْوشتگ ابرمی چاگرد ءِ زانوگر تباھی ءِ ربال اَنت ۔ چہ بازیں دھکاں ایشانی پیش گْوشی رد بیان اَنت ۔
• چین ءَ انٹرپول ءِ پیشیگیں سروک مینگ ھونگ وائی گوچلی کنگ ءِ میار ءَ 13 سال ءِ زندان داتگ ۔
•پرانس ءَ شنگ بیتگیں کتابے ءِ شنگکارءَ اے گپ ءِ سر ءَ پھلی لوٹ اتگ کہ آئی ءِ شنگ کرتگیں کتاب ءِ تہ ءَ نبشتہ کنگ بیتگ کہ «نائن الیون » ءِ اُرشانی شور امریکی چیریں ترامگیج سی آئی اے ءَ کرتگ ۔
•واشنگٹن ءَ سھودی سپیر ءَ اے گپ رد کرتگ کہ چہ آیانی ڈیھ ءِ بادشاہ ءِ سراوبادگ « مھمد ء سلمان» ءِ گوشی ءِ سر ءَ ایمازون ءِ سروک «جیپ بیزوس» ءِ گوشی ھیک کنگ بیتگ ۔ آئی ءَ اے گپ ءِ پٹ ءُ پول کنگ ءِ لوٹ کرتگ۔