بلوچستان ءِ جتائیں میتگ ءُ بازاراں دژمن ءِ لشکر مانرتکگ ،مردم ئِے جتگ اَنت ، لُٹ ءُ پُل ءُ پٹ ءُ پول ئِے کرتگ ۔

بلوچستان ءِ جتائیں میتگ ءُ بازاراں دژمن ءِ لشکر مانرتکگ ،مردم ئِے جتگ اَنت ، لُٹ ءُ پُل ءُ پٹ ءُ پول ئِے کرتگ۔

ھاران ءَ مروچی چارمی روچ اِنت کہ پاکستانی لشکر ءِ زوراکی یکشل ءَ برجاہ اِنت۔

مروچی سھب ءَ پاکستانی لشکر ءُ چیریں تْرامگیجانی کارمنداں ھاران شھر، گواش دگ ءُ کَش ءُ گوَر ءِ دمگ انگر کُرتگ ءُ ھاجی مھمد امین ءِ لوگ ءَ دؤر کُرتگ ءُ زھگ ءُ جنین آدم لٹ ءُ کُٹ کُرتگ اَنت ۔
پاکستانی لشکر ءَ مدامگیں پیم ءَ گِساں پُرشت ءُ پُروش کنگ ءَ پد گراں نھادیں مڈی ھم دُز اِتگ اَنت-

زانگ بہ بیت 17 سپتمبر ءَ ھاران ءِ شھر ءَ پاکستانی لشکر ءِ گاڑی ءِ سر ءَ “بلوچ لبریشن آرمی” ءِ سرمچارانی دزتراکی اُرش ءَ پد پاکستانی لشکر ءَ ھاران ءِ جتا جتائیں دمگاں لشکر کشی بندات کُرتگ کہ انگت برجاہ انت۔

کیچ ءِ دمگ کولواہ ءِ ھَند شاپکول، جت، پارگ تنزلہ ءُ ڈنڈار ءِ جنگل زورگیریں پاکستانی لشکر ءَ انگر کُرتگ اَنت-

چیزے روچ اِنت کہ کولواہ ءَ پاکستانی لشکر ءَ وتی سُر پُر گیش کُرتگ اَنت ءُ گوَستگیں شپ ءَ پاکستانی لشکر ءِ یک کاروانے مادگ ءِ کور ءَ بُرز ءَ شُتگ وھدے کہ سُھبی دگہ کاروانے ھمے کور ءَ بُزر ءَ شُتگ۔
پاکستانی لشکر ءِ گیش بیتگیں سُر ءُ پُراں گُماں بیت کہ پاکستانی لشکر ٹوھیں لشکر کشی یے ءَ دلمانگ اِنت۔

ھمے پیم مروچی سُھب ءِ اَدار نُو ءَ زورگیریں پاکستانی لشکر ءَ تمپ ءِ دمگ گومازی سرجم ءَ انگر کُرتگ، شنکن ءِ بازار ءَ بہ گر داں ملانٹ ءِ جھل ءِ چوکی ءَ پاکستانی لشکر ءِ کارمند اُوشتاتگ اَنت ءُ دِیزیگ ءِ کور ءِ دپ ءَ راہ بستگ۔ دمگ پاکستانی لشکر ءِ انگر ءَ بُوَگ ءِ اَنگیز ءَ سرجمیں ھال سربوگ ءَ نہ اَنت ۔
مَند ڈلسر ءَ ھم پاکستانی لشکر ءَ راہ ءُ دگ بستگ اَنت ءُ مردم پَٹ ءُ پول کرتگ اَنت ۔