📰 روتاک زرمبش بلوچی: پنچ شمبے » 21 مئی2020

🗞سرھال🗞

▪کابل ءِ چک ماتی نادرھجاہ ءِ ارش ءِ پشت ءَ آئی ایس آئی بوت کنت – ڈاکٹر اللہ نزر
▪مشکے: میھی ءَ پاکستانی لشکر ءِ سر ءَ بیڑ برتگ ، لھتے کشتگ ءُ لھتے زدگ کرتگ – بی ایل ایپ
▪ائید ءِ روچ ءَ ھم پہ بیگواھیں مردماں زھرشانی برجاہ بیت– ماما کدیر
▪گوادر: دشت بشولی کنر بازار ءَ 4 کس چات ءَ دم توس بیتگ ءُ بیران بیتگ
▪پی ٹی ایم شال ءِ باسک رھیم ھان ایپ سی ءَ آوار جتگ
▪بالگتر: سھاکی پجارگ نہ بیتگیں مردمانی گسے ءِ سر ءَ بیڑ | یکے کشتگءُ جنینے ءَ ھوار سئے زدگ کرتگ
▪ھب:دگ وھیلے ءَ یک کسے بیران ءُ یکے زدگ بیتگ
▪ڈیرہ بگٹی،تتکگیں ڈودارے دزگیر
▪چاگی: ڈنگاں چہ سلاہ ادین میرانزھی ءَ کمکی زر پُل اتگ اَنتءُ جند لٹ داتگ
▪شال:جناہ ٹاؤن ءَ ٹکٹر ءِ ڈکگ ءَ دو کس بیران
▪رودرتکی بلوچستان: کوروناوائرس ءِ دگہ 65 نوکیں کیس | آماچیں مردمانی کچ2885|38 بیران
▪کورونا: داں 2 جون ءَ دکان بستگیں وھد ءُ پاسانی پابندی بہ کن اَنت
▪روکپتی بلوچسان: 24 ادار ءِ تہ ءَ دگہ 68 نادراہ | 4 بیران
▪روکپتی بلوچستان: کورونا ءِ تالانی ءَ جاور ناگیگ | واکدراں واش ءُ پھرگ ءَ بازارانی بند کنگ ءِ جار جتگ | چھبار ءَ ھم نادراھی تالان روکپتی بلوچستان : بالی مدگانی سیمی چپڑ بلوچستان ءَ پترتگ 🦗
▪سرباز:سرکاری واکداراں پہ گرانھری ءَ امبار کرتگیں چارھزار لیٹر ورگی روگن درجتگ
▪روکپتی بلوچستان:لاپ پری جنیانی مرگ ءُ میر 60 ماں سدی کم بیتگ
#پاکستان

🔹پاکستان ءَ کورونا وائرس ءَ دگہ 23 مردم بیران 1400 نوکیں کیس دیم ءَ اتکگ ، بیران بیتگیں مردمانی کچ 1009 ءَ سر بیتگ ءُ نادراھانی کچ 47176 اِنت

🔹سند سرکار ءَ مسیتانی تہ ءَ اَئید ءِ نماز ءُ مچیانی موکل داتگ۔

🔹 پاکستانی واکدرانی رد ءَ ایل او سی ءَ ھندوستانی لشکر ءِ ارش ءَ سئے شھری ٹپی بیتگ۔

🔹 پاکستان تھریک ء انساپ ءِ پنجاپ پارلیمان ءِ باسک شاھین رزا چہ کورونا وائرس ءَ بیران۔

#ایران 🇮🇷

🔹 ایران ءَ چار شمبے ءَ گر داں پنچ شمبے ءَ 2 ھزار ءُ 346 نوکیں مردماں کورونا ءَ گیپتگ | درسی نادراہ 126 ھزار ءُ 949 کس اَنت | گْوستگیں 24 ادارانی تہ ءَ 64 کس مرتگ| درسی 7 ھزار ءُ 183 کس مرتگ۔

🔹 ایران ءِ مھتر ھسن روھانی ءَ کدس ءِ روچ ءِ رد ءَ گوں سرکاری واکداراں بیتگیں نیادے ءَ گپ جنان ءَ گْوشتگ: ما کدس ءَ نہ شموش ایں ءُ روچے پلستین الم آجو بیت ءُ ما اے زوراکیاں نہ من ایں۔

🔹 ھما مردماں کہ رمزان ءِ ماہ ءَ یک میلون تومن نہ زرتگ آ داں ھرداد ماہ ءِ 10 ءَ زرت کن اَنت ، پہ ایشی ءَ 6369 ءِ سر ءَ وتی کوڈ ملی ءَ دیم بہ دئے اَنت۔

🔹 ایران ءَ نوکیں رھبندے ءِ رد ءَ ھما جنین کہ آیانی مرد ایرانی نہ اَنت ، آیاں ھم شناسنامہ بزاں ڈیھ ءِ پجار تاک دیگ بیت۔

🔹 ایران ءَ نوک ءِ چاروکانی گْوشگ ءِ رد ءَ باز گمان اِنت کہ یک شمبے ءِ روچ ءَ ائید بہ بیت۔

🔹 تھران ءَ 23 ارزی دلار دزگیر کنگ بیتگ۔ اے ھما مردم اَنت کہ دگہ ملکانی زراں چہ راھدار ءَ ڈن پْروش اَنت۔

🔹 چہ پنچ شمبے ءَ ایران ءِ اے ٹی ایم مشین پیشیگیں وڑ ءَ کار کن اَنت ۔ بزاں چہ آیاں یک میلون تومان ءَ گیش کارت پہ کارت کنگ نہ بیت ءُ روچے چہ دو لک تومن ءَ گیش زیرگ نہ بیت۔

🔹 چہ ھرداد ماہ ءِ بندات ءَ ایرانی بینک داں سھب ءِ 7:30 ءَ بہ گر بیگاہ ءِ 2:30 ءَ کار کن اَنت ءُ پنچ شمبے ءَ داں بیگاہ ءِ یک ءَ کار کن اَنت۔

🔹 ایران ءِ دری کارانی جارکش ءَ گْوشتگ: ٹرمپ ءِ نمدی ءَ جھانی جاندراھی گل ءِ آزادی شک ئیگ کرتگ۔

🔹 ایرانی روتاکانی رد ءَ یروشلم پوسٹ ءِ تہ ءَ اے گپ منگ بیتگ کہ ازرائل ءَ ایرانی زری لشکر ءِ سر ءَ سائبر ارشے کرتگ چہ ایشی ءَ آیانی موشک رد کپتگ ءُ وتی جند ءِ جنگی گراب ئِے نشانگ کرتگ، چہ ایشی ءَ 19 کس مرتگ۔

#اوگانستان 🇦🇫

🔹 اوگانستان ءَ یکیں روچ ءَ 581 مردم چہ کورونا ءَ نادراہ، درسی نادراہ 7653 اَنت۔ 178 بیران بیتگ۔

🔹 اوگانستان ءِ سرکاری تک ءَ ایمنی ءِ برجاھی ءِ کاراں ھمگرنچیں واکدارانی رد ءَ ننگرھار ءَ جنازہ ءِ نماز ءِ سر ءَ وتکش تْراک چہ تالبانانی سوج ءَ بیتگ ءُ کابل ءِ دشت برچی ءَ چک ماتی نادرھجاہ ءِ سر ءَ چہ ھکانی نیٹورک ءُ داھش ءِ نیمگ ءَ ارش بیتگ۔ اے رد ءَ سند دری واکداراں ھم دیگ بیتگ اَنت۔

🔹 اوگانستان ءِ واکدارانی گْوشگ اِنت کہ چہ پاکستان ءِ نیمگ ءَ تالبانانی سر ءَ زور دیگ بیگ ءَ اِنت کہ آ اوگانستان ءِ لھتے دمگ دستیگ بہ کن اَنت۔

🔹 تکار ءَ بیتگیں تالبانانی ارش ءَ نو سرکاری پھزدار بیران بیتگ۔

🔹 تالبان رھشون ملاھبت اللہ آکوندزادہ ءَ کسانیں ائید ءِ درگت ءَ شنگ کرتگیں وتی کلوھے ءَ چہ امریکا ءَ لوٹ اتگ کہ آ کس ءَ اے واک مہ دنت کہ آ تالبان ءُ امریکا ءِ میان ءَ بیتگیں مسام ءَ بے سوب بہ کنت۔

#مزن_ھور

#امان🇴🇲

🔹 مَشکت: اُمان ءَ کورونا ءِ 292 نوکیں نادراہ ، درسی نادْراھانی کچ 5671 اِنت۔

🔹 امان ءِ جاندراھی ءِ وزارت ءِ ٹوھیں واکداری ءَ گْوشتگ کہ ماں امان ءَ کورونا نادْراھانی کچ گیش بیان اِنت بلے لکاپی ءَ گیش نہ اِنت۔

🔹 امان ءَ نوکیں سرکاری کاردارانی پگارانی کم کنگ ءِ جار جتگ۔

🔹 امان ءَ پٹرول ءِ نیادانی کم کنگ ءِ جار پرینتگ۔

🔹 امان ءِ سرکار ءَ ائید ءِ وشیانی درگت ءُ مچی ءُ ھور تہ ھوری نہ کنگ ءِ سر ءَ کڈن کرتگ ءُ کسے کہ اے پَرمان ءَ نہ من ایت آ ملام کنگ بیت۔

#کویت🇰🇼

🔹 کویت ءَ دگہ 1073 کس کووڈ-19 ءِ نادْراہ ، نادْراھانی درسی کچ 16764 ءَ سر اِنت۔

🔹 کویت ءِ رھبند ٹاھیونکے ءَ دری مَردمانی سر ءَ سنگ ایر کنگ ءِ پنت داتگ۔

#گتر🇶🇦

🔹 گتر: گْوستگیں 24 ادار ءِ تہ ءَ دگہ ھچ مردم کورونا ءِ نادراہ نہ بوتگ، ماں گتر ءَ بازینے دْراہ کنگ بوتگ ءُ درسی 5634 مردم نادْراہ اِنت۔

🔹 سئے شمبے ءِ روچ ءَ ماں گتر ءِ بندیگ جاہ ءَ 12 کس کورونا ءِ ناْدراہ دیم ءَ اتکگ ۔مردمانی اگبالانی پانک ءَ گْوشتگ دگہ بندیگ ھم نادْراہ بوت کن اَنت۔

🔹 گتر ءِ سرکاری رھوت ءَ داں مئی ماہ ءِ آسر ءَ دکان ءُ کار ءُ بارانی بَند کنگ ءِ جار جتگ۔

🗞رودرتکی بلوچستان🌴🐪🗞

🔴کابل ءِ چک ماتی نادرھجاہ ءِ ارش ءِ پشت ءَ آئی ایس آئی بوت کنت – ڈاکٹر اللہ نزر

📎 شال: #بلوچستان_آجوئی_سنگر ( #بی_ایل_ایپ) ءِ سروک #ڈاکٹر اللہ_نزر ءَ #اوگانستان ءِ بنجاھی شھر #کابل ءَ چک ماتی نادرھجاہ ءِ سر ءَ بیتگیں ارش ایرجتگ ءُ ماں چاگردی رسانکدر ٹیوٹر ءَ ٹیویٹے ءَ شکساتگ ءُ گْوشتگ:کابل ءَ چک ماتی نادرھجاہ ءِ سر ءَ ارش،زھگ ءُ آھانی ماتانی کوش ءَ گوں تْرندی ءَ ایرجن آں۔چوشیں کارانی پشت ءَ مدام پاکستانی آئی ایس آئی بیت پرچا کہ اگاں اوگانستان مھکم بہ بیت آ جھان ءَ بلیک میل کرت نہ کنت۔
—★—
🔴مشکے: میھی ءَ پاکستانی لشکر ءِ سر ءَ بیڑ برتگ ، لھتے کشتگ ءُ لھتے زدگ کرتگ – بی ایل ایپ

📎 مشکے : #بلوچستان_آجوئی_سنگر ( #بی_ایل_ایپ) ءِ جارکش #میجرگھرام ءَ #مشکے ءَ پاکستانی لشکر ءِ سر ءَ بیتگیں اُرش ءِ زمہ واری من اتگ ءُ گْوشتگ کہ #مشکے #میھی ءَ سرمچاراں پاکستانی لشکر ءِ پانگس ءِ سر ءَ گوں دیر جنگیں توپکاں ارش کرتگ ءُ یک کارمندے کشتگ۔

اُرش ءَ پد پاکستانی لشکر ءَ سرمچارانی رند ءَ کپگ ءِ کوشست کرتگ گڑا سرمچاراں یک رندیں پد ءَ جتگ اَنت۔اے اُرش ءَ دژمن ءِ بازیں سپاھیگ مرتگ ءُ باز زدگ بیتگ۔

گُڈی ءَ میجرگھرام ءَ گْوشتگ: مئے ارش داں بلوچستان ءِ آجوئی ءَ برجاہ مان اَنت۔
—★—
🔴 ائید ءِ روچ ءَ ھم پہ بیگواھیں مردماں زھرشانی برجاہ بیت– ماما کدیر

شال: شال ءَ #بیگواھیں_بلوچانی_توار ءِ زھرشانی گدان ءَ 3964 روچ سرجم بیتگ۔ ایجوکیشنل الائنس ءِ سروک #زبیرشاہ_آگا ءُ آئی ءِ ھمراھاں گدان ءَ گندک کرتگ ءُ گوں بیگواھیں مردمانی کھولاں ھمدردی درشان کرتگ۔

بیگواھیں بلوچانی توار ءِ کمک سرکماش #ماماکدیر ءَ گْوشتگ کہ ھمک سالانی پیم ءَ اے سال ءِ ائید ءَ ھم شد کشیں زھرشانی گدان سھب ءِ ادار 11 ءَ گر داں بیگاہ ءِ 4 ءَ برجاہ بیت۔

آئی ءَ گْوشتگ: ائید ءِ روچ ھما روچ اِنت کہ گِس ءِ زھگ ءُ مزنیں درس وش بہ اَنت۔ائید پہ نیزگاراں نوکیں گد،سواس ءُ وشی زور ایت ءُ کئیت،ائید ھما گِساں بیت کنت کہ آ اود ءِ جاور گیگ بہ بہ اَنت ءُ گِس ءَ وشی بہ بیت،آ گِس کہ پرسیگ اِنت،آ گِس ءَ کزا یک سنگ دلے ائید بہ کنت۔

ماما کدیر ءَ گْوشتگ: اگاں ما پہ ھورتی بلوچ راج ءِ سر ءَ بیوکیں زوراکیاں بہ چار ایں گڑا گند ایں کہ سرجمیں بلوچ راج پرسیگ اِنت۔سرجمیں بلوچستان ءَ پاکستانی لشکر ءِ لشکر کشی برجاہ اِنت۔ھمک روچ چہ ژانگولیں جونانی دست کپگ ءَ ھمک گس پرسیگ اِنت،ھمک چم ارسیگ اِنت ءُ بلوچستان سچگ ءَ اِنت۔ھمک نیمگ ءَ ارسانی ھار تچگ ءَ اِنت۔اے رندی ھم جھان ءِ مسلمان گوں ائید ءِ وشیاں دلگوش اَنت بلے بلوچ وتی مردمانی ژانگولیں جوناں دست گِرگ ءَ اَنت۔

آئی ءَ گْوشتگ : چوشیں ڈیھے ءَ کہ آبادیانی سر ءَ تیرگواری بہ بیت،ورنا آزارجاھاں بند بہ بہ اَنت، جنین آزارجاھاں رسترانی زوراکیانی دیمپان بہ بہ اَنت،مات پہ وتی جگر بنداں اندوھانی بدھال بہ بہ اَنت،گھار اھوالکارانی انجمن ءِ کارگس ءِ دیم ءَ پہ براتانی یلہ کنگ ءَ سالانی سال زھرشانی کنگ ءَ بہ بہ اَنت،زھگ گوں تیراں سمبگ بہ بہ اَنت،وشیانی جاہ ءَ ھلار کُرتگیں سر بہ بہ اَنت،نوکیں روچ ءِ بِندات چہ ژانگولیں جوناں بہ بیت،گڑا ائید ءِ وشی چہ آ ڈیھ ءَ باز دیر بہ اَنت۔

آئی ءَ گْوشتگ: اے مارشت ودیگ بیت کہ تئ ساھگ ءِ پچ گِرگ ءِ تُرس بہ بیت تو چہ وتی جند ءِ ساہ ءَ بہ ترس ئے گڑا چوں ائید کنگ بیت؟

—★—
🔴گوادر: دشت بشولی کنر بازار ءَ 4 کس چات ءَ دم توس بیتگ ءُ بیران بیتگ

📎 گوادر: #دشت_بشولی #کنربازار ءَ پہ آپ ءِ کشگ ءَ مردمے ءَ جنریٹر زرتگ ءُ چات ءَ ایر کپتگ چہ جنریٹر ءِ دیت ءَ آ چات ءِ تہ ءَ دم توس بیتگ ءُ کپتگ۔ پہ آئی ءِ کشگ ءَ دگہ سئے کس ھم چات ءَ ایر کپتگ آ ھم بیران بیتگ اَنت۔

بیران بیتگیں مردم #درجان_ء_امام_بکش ، #یھیا_ء_الھی ، #لتیپ_ء_امام_بکش ءُ #ابدالمالک_ء_ھداداد اَنت۔اے وھیل چار شمبے ءِ بیگاہ ءَ کپتگ۔
—★—
🔴پی ٹی ایم شال ءِ باسک رھیم ھان ایپ سی ءَ آوار جتگ

📎 شال: چار شمبے ءِ روچ ءَ بیگاہ ءِ ادار 6 ءَ چہ ال ھیر نادرھجاہ ءِ پاکستانی ایپ سی ءَ پشتون پانک زْرمبشت پی ٹی ایم ءِ باسک #رھیم_ھان آوار جنگ ءَ پد بیگواہ کرتگ۔
—★—
🔴بالگتر: سھاکی پجارگ نہ بیتگیں مردمانی گسے ءِ سر ءَ بیڑ | یکے کشتگءُ جنینے ءَ ھوار سئے زدگ کرتگ

📎 # بالگتر : سئے شمبے ءُ چار شمبے ءِ میانی شپ ءَ #بالگتر _سھاکی ءَ پجار نہ بیتگیں سلاھبنداں گسے ءِ سر ءَ بیڑ برتگ چہ آیانی تیرگواری ءَ مردمے بیران ءُ سئے کس زدگ بیتگ۔زدگ بیتگینانی تہ ءَ جنینی ھم ھوار اِنت۔

بالگتر ءَ کشگ بیتگیں مردم ءِ نام زریپ ء پلان گْوشگ بیتگ ءُ ٹپیانی تہ ءَ زمیر ء نیسر ءُ ھاشم ء مھمد امین ھوار اَنت ۔
—★—
🔴 ھب:دگ وھیلے ءَ یک کسے بیران ءُ یکے زدگ بیتگ

📎 ھب: شیزور گاڑی ءِ چپی بیگ ءَ #بلوچ_ھان_ء_شاہ_نورمری جاھمنند #ھب_چورنگی بیران ءُ گاڑی ءِ ڈرائیور #ھان_مھمدبراھوی جاھمنند #ھب_جام_کالونی زدگ بیتگ۔بیران ءُ زدگ بیتگیں کراچی ءِ سرکاری نادراھجاہ ءَ سرکنگ بیتگ اَنت۔
—★—
🔴ڈیرہ بگٹی،تتکگیں ڈودارے دزگیر

📎ڈیرہ بگٹی: #ڈیرہ_بگٹی ءِ ایس پی پلائٹ لیپٹیننٹ ریٹائرڈ #اتاالرھمان_ترین ءِ پرمان ءَ سی آئی اے پولیس ڈیرہ بگٹی ءَ کارروائی کرتگ ءُ تتکگیں ڈودارے دزگیر کرتگ۔
—★—
🔴چاگی: ڈنگاں چہ سلاہ ادین میرانزھی ءَ کمکی زر پُل اتگ اَنتءُ جند لٹ داتگ

چاگی: #زیارت_بلانوش_زرد ءَ پجار نہ بیتگیں دزاں توپک ءِ زور ءَ #سلاہ_ادین_میرانزھی لٹ شاپ کرتگ ءُ چہ آئی ءَ گھبود پاؤنڈیشن ءِ نیمگ ءَ رس اتگیں کمک 25500 ھزار کلدار،موبائل ءُ وردنی سامان پچ گیپتگ ءُ تتکگ اَنت۔
—★—
🔴شال:جناہ ٹاؤن ءَ ٹکٹر ءِ ڈکگ ءَ دو کس بیران

📎 #شال: #جناہ_ٹاؤن ءِ نزیک ءَ چہ ٹکٹر ءِ ڈکگ دوکس بیران بیتگ۔بیران بیتگیں مردمانی تہ ءَ یکے ءِ نام #رھمان _ھان اِنت ءِ دومی انگت زانگ بیگ ءَ نہ اِنت۔پولیس ءَ بیران بیتگیں مردم سرکاری نادراھجاہ ءَ سر کرتگ اَنت۔
—★—
🔴رودرتکی بلوچستان: کوروناوائرس ءِ دگہ 65 نوکیں کیس | آماچیں مردمانی کچ2885|38 بیران

📎 شال:بلوچستان ءَ #کوروناوائرس گوں تیزی ءَ تالان بیگ ءَ اِنت۔وتگڑیں سرکار ءِ گوش ءَ مورے نہ وارت۔ جاندارھی تک ءِ رد ءَ کوروناوائرس ءِ دگہ 65نوکیں کیس دیم ءَ اَتگ۔آماچیں مردمانی کچ2885 ءَ سربیتگ ءُ داں انیگ ءَ 38 مردم بیران بیتگ۔
—★—
🔴 کورونا: داں 2 جون ءَ دکان بستگیں وھد ءُ پاسانی پابندی بہ کن اَنت

📎 شال : #بلوچستان ءَ کورونا ءِ تالانی ءِ دیم گیری ءَ دکانانی پہ بستگیں وھد ءُ پاساں بند ءُ پچ کنگ ءِ پرمان دیگ بیتگ اے پرمان ءِ رد ءَ داں جون ءِ 2 ءَ دکانداراں اے وھد ءُ پاسانی ردءَ کار کنگی اِنت۔

وتگڑیں سرکار ءِ تھی کارانی وزیر ءِ پرمان ءِ رد ءَ رمزان ءَ دکان سھب ءِ 3 داں بیگاہ ءِ 5 ءَ پچ بہ اَنت وھدےکہ رمزان ءَ پد سھب ءِ 8 ءَ بہ گر داں بیگاہ ءِ 6 ءَ بازار پچ بہ اَنت۔
پرمان ءِ تہ ءَ گْوشگ بیتگ کہ ترون ،وردنی دکان ءُ پہ تھلگجاھاں وھد ءِ پابند بیگ المی نہ اِنت۔

🗞*روکپتی بلوچستان🏝️*🗞

🔴روکپتی بلوچسان: 24 ادار ءِ تہ ءَ دگہ 68 نادراہ | 4 بیران

📎 دزاپ: سرکاری بنشون ءِ رد ءَ روکپتی بلوچستان ءَ گْوستگیں 24 ادار ءَ 68 مردم چہ کورونا ءَ نادراہ بیتگ۔ درسی نادراہ 310 اَنت ءُ چہ ایشاں 4 کس گْوستگیں 24 ادار ءَ بیران بیتگ داں انیگ ءَ چہ کورونا ءَ 73 کس بیران بیتگ۔چہ درساں گیشتر نادراہ دزاپ جاندارھی زانشجاہ ءِ پرگنگ ءَ اَنت کہ852 اَنت۔ زابل ءَ 238 ءُ پھرگ جاندراھی زانشجاہ ءِ پرگنگ ءَ 220 نادراہ اَںت۔
—★—
🔴روکپتی بلوچستان: کورونا ءِ تالانی ءَ جاور ناگیگ | واکدراں واش ءُ پھرگ ءَ بازارانی بند کنگ ءِ جار جتگ | چھبار ءَ ھم نادراھی تالان

📎 دزاپ : روکپتی بلوچستان ءَ کورنا ءِ تالانی ءَ جاور ناگیگ بیان اَنت۔ واش، پھرگ ءُ چھبار ءَ پھریز نہ کنگ ءِ پد ءَ کورونا ءِ نادراہ گیش بیتگ اَنت۔واش ءَ دکانانی انجمن ءِ سرکماش ءَ #واش ءُ #تپتان شھرستان ءَ چہ ائید ءَ پد سئے روچ ءَ بازارنی بند کنگ ءِ جار پرینتگ۔ چہ ائید ءَ پیش سھب ءِ ھشت ءَ بہ گر داں بیگاہ ءِ شش ءَ پچ بہ اَنت۔

# گھ، #پھرگ، #کنرک ، # سرباز ، #پنوچ ، #کسرکند ، #بمپور، #دلگان ، #چھبار ءُ ھمے دمگانی آپریچاں 220 کس نادراہ اِنت اے دمگاں چہ درساں گیش نادراہ پھرگ ءُ چھبار ءَ اَنت۔پھرگ ءِ دمگدار #ابوزرکوسری ءَ چہ آدینگ ءِ روچ ءَ داں دو ھپتگ ءَ بازارانی بند کنگ ءِ جار جتگ آئی ءَ گْوشتگ: مردماں پھریز نہ کرتگ چہ ایشی ءَ کورونا ءِ نادراھی تالان بیتگ ءُ نی سرکار لاچار اِنت کہ مردمانی سر ءَ پابندی بہ جنت ءُ آیاں گر ءُ دار بہ کنت۔

اد ءَ گپے دلگوش کنگی اِنت کہ باز انچیں نادراہ ھست اَنت کہ آ دم توسی ءِ زنگ ءَ جن اَنت ءُ نادراھجاہ ءَ رو اَنت ، نادراھجاہ ءَ آیانی نادراھی پجارگ نہ بیت پمیشکا آ کورونا ءِ نادراھی ءِ شک ءَ دارگ بہ اَنت ءُ باز مردم ھمے میان ءَ بیران بیت۔ بیران بیتگیں مردمانی آزمائش ھم گرگ بیت چہ اے آزمائشاں زانگ بیگ ءَ اِنت کہ چہ ایشانی تہ ءَ ھم باز مردم چہ کورونا ءَ بیران بیگ ءَ اِنت۔
—★—
🔴 روکپتی بلوچستان : بالی مدگانی سیمی چپڑ بلوچستان ءَ پترتگ 🦗

📎 دزاپ : روکپتی بلوچستان ءَ بالی مدگانی سیمی چپڑ پترتگ۔

#بلوچستان ءُ #سیستان ءَ کشاری تک ءِ سروک #گلام_ھیدرزورکی ءَ گْوشتگ: بالی مدگ یک مزنیں وھیلے کہ اگاں ایشی ءِ دیم دارگ بہ بیت کشار ءُ باگانی برورداں مزنیں کچے ءَ تاوان رس ایت۔

آئی ءَ گْوشتگ: بالی مدگانی سیمی چپڑ ءِ آیگ ءَ داں انی 110 ھزار ایکڑ زمین ءَ زھر چنڈگ بیتگ۔
—★—
🔴سرباز:سرکاری واکداراں پہ گرانھری ءَ امبار کرتگیں چارھزار لیٹر ورگی روگن درجتگ

📎 سرباز: سرکاری واکداراں پہ گرانھری ءَ امبار کرتگیں چار ھزار لیٹر روگن در گیپتگ۔

سرباز شھرستان ترامکار سرھنگ سیامک مرادی ءَ گْوشتگ: #سرباز یک کوچگے ءَ یک مردمے ءَ پہ گیشیں سیت ءِ زیرگ ءَ ورگی روگن امبار کرتگ اَنت۔ وھدے کہ واکداراں اے درگت ءَ ھال رس اتگ آیاں امبار مھر کرتگ ءُ واھند ءَ آمیدگس ءَ لوٹائینتگ۔چہ سرکاری واکانی نیمگ ءَ اے روگنانی نھاد 45 میلون تومن گْوشگ بیتگ۔
—★—
🔴روکپتی بلوچستان:لاپ پری جنیانی مرگ ءُ میر 60 ماں سدی کم بیتگ

📎دزاپ : #دزاپ_جاندراھی_زانشجاہ ءِ واکدارانی گْوشگ اِنت کہ زاشجاہ ءِ چیردستی ءَ کارکنوکیں نادرھجاھاں اے سالی چہ پیسرگیں سالاں لاپ پری جنینانی بیرانی ءِ تہ ءَ 60 ماں سدی کمی اَتگ۔
🔚