ھال : 21 جنوری 2020

زرمبش ھال »21 جنوری 2020|ڈاؤنلوڈ

مراگش: ریڈیوھال
بنگپ :ھال : 21 جنوری 2020

—-★——★——

روتاک زْرمبش

• بلوچستان لبریشن پرنٹ ءِ جنگ ءُ میڑانی سالینہ گزارش شنگ بیتگ ۔ شنگ بیتگیں گزارش ءِ رد ءَ سال 2019 ءَ پاکستانی لشکر ءِ سر ءَ 150 اُرش کنگ بیتگ چہ اے اُرشاں پاکستانی لشکر ءِ 276 کارمند مرتگ ءُ چہ 200 ءَ گیش زدگ بیتگ ۔ اے اُرشاں پاکستانی لشکر ءِ 33 گاڑی ءُ 2 پرپٹ ھم تباہ کنگ بیتگ ۔
گزارش ءَ گْوشگ بیتگ کہ پہ سی پیک ءِ بند ءُ ساچاں شن دیم دیوکیں «سنگ پْروش» ءِ سر ءَ شش رند ءَ اُرش کنگ بیتگ۔آیانی 12 گاڑی ءُ دزگاہ بن دیگ بیتگ اَنت ۔چار «گوشیانی تیر » ھم تاوان دیگ بیتگ ۔ گوادر ءَ زمین بھا کنوکانی بنجاھے ھم نشانگ کنگ بیت۔
گھرام بلوچ ءَ گْوشتگ کہ لیویز ءِ پانک گسے ءِ سر ءَ بیڑ برتگ ءُ آیانی سی توپک ءُ دگہ چیز برتگ اَنت ۔ 16 چاریگ ءُ سرکاری چریک کشگ ءُ لھتے ٹپی کنگ بیتگ ۔
بی ایل ایپ ءَ وتی سالینہ گزارش ءَ اے ھم گْوشتگ کہ آیاں یک برگشتیں سرمچارے ھم کشتگ ءُ گْوستگیں سال ءَ پہ گلزمین ءِ دیمپانی ءَ بی ایل ایپ ءِ 18 سرمچار شھید بیتگ ۔
بی ایل ایپ ءِ جارکش میجرگھرام ءِ رد ءَ جنوری داں دسمبر 2019 ءِ درسیں کاروائیانی سرجمیں گزارش کہ پیش ءَ رسانکدر ءَ شنگ بیتگ اَنت آ بی ایل ایپ ءِ تاکبند آشوب ءَ شنگ کنگ بیتگ اَنت ۔
بی ایل ایپ ھمک سال رسانکدر ءَ وتی جنگ ءُ میڑانی سالینہ گزارش ءَ شنگ کنت۔

• داں گڈی بیگواھیں مردم چہ زندان ءَ در کنگ نہ بیت مئے کوشست ءُ زھرشانی برجاہ مان ایت ۔ اے گپ ماماکدیر ءَ کراچی پریس کلب ءِ دیم ءَ گوں اھوالکار ءُ نودربراں گپ جنان ءَ گْوشتگ ۔ آئی ءَ گْوشتگ : چیزے روچ ءَ پد کراچی پریس کلب ءِ دیم ءَ زھرشانی گدان جنگ بیتگ ، پمیشکا من سیاسی ءُ چاگردی تک ءِ مردمانی پجیگ ءَ نودربر ءُ دگہ پِڑ ءِ مردماں ھم دزبندی کن آں کہ آ مئے زھرشانی ءَ ھمراھداری بہ کن اَنت۔
ماماکدیر دگ وھیل ءَ زدگ بیتگیں نمرہ پرکانی ءُ دگہ مردمانی گندک ءَ نادراھجاہ ءَ ھم شتگ ۔ زانگ بہ بیت وائس فار بلوچ مسنگ پرسنز ءِ چیدگی زھرشانی گدان ھمک زمستان ءَ کراچی ، ءُ گرماگ ءَ شال ءَ جنگ بیت ۔
•شال نواں کِلی بائی پاس ءَ پاکستانی سپاھیگاں دو مردم کشتگ ۔ سرکاری بنشون ھمے گْوشگ ءَ اَنت کہ کشگ بیتگیں دوئیں مردم ناشرکاریں گلانی باسک بیتگ اَنت۔آیاں گْوشتگ کہ کشگ بیتگیں «ھکمت» ءُ «کپایت » ءَ شھر ءَ سئے تراک کرتگ ۔ سرکاری بنشوناں گْوستگیں سال ءَ ڈبل روڈ ءَ آر آر جی ءِ گاڑی ءِ سر ءَ اُرش ، میکانگی روڈ ءَ سرکاری لشکر ءِ سر ءَ اُرش ءُ اسھاک آباد ءِ مسیت ءَ بیتگیں وتکش ءِ زمہ وار ھمے دوئیں کس لیک اتگ اَنت ۔
نواں کلی ءَ یک پرپٹے ھم دست کپتگ کہ آئی ءَ 6 ءَ گر داں 7 کیلو تْراکناکیں مواد لچ اِتگ اَت ، تْراکناکیں مواد گوں بیرنگ ءُ نٹاں منگ بیتگ ءُ گوں دیرواگ ءَ ھمگرنچ اَت ، کہ ناکارگ کنگ بیتگ۔
• سیبی ءِ ھند لھڑی ءَ بچاو بند ءِ نزیک ءَ نندوکیں ھدابکش جت ءُ واگا جت ءِ سئے زھگ زمین چیر ءَ کلیں تْراکناکی ءِ ترکگ ءَ زدگ بیتگ اَنت ۔ پٹ ءُ پول ءَ نارنجکے ءِ کوھنگیں چُنڈے دست کپتگ۔
• ڈیرہ بگٹی ءَ ورگی آپ ءِ ڈکال اِنت ۔ گشیتریں بور لمب اِتگ اَنت۔ لین ءِ نہ بیگ ءَ چہ پشت کپتگیں بوراں ھم آپ کشگ نہ بیگ ءَ اِنت ۔ اے بورانی لین ، زر پُر نہ کنگ ءِ سر ءَ چہ کیسکو ءِ نیمگ ءَ سندگ بیتگ اَنت۔کِلی سُھر، کلی کالی ، زانکوہ ءُ کوھو ءِ پجیگ ءَ بازیں میتگانی بوراں کار یلہ داتگ ۔ چہ بے آپی ءَ مردم تکانسر اَنت۔
• بی این پی مینگل ءِ سروک اکترمینگل ءَ بلوچستان ءَ مردمی اگبالانی پانک جلیلہ ھیدر ءِ بالیگ پٹ ءَ دارگ ءِ سر ءَ وتی ٹیوٹر درشانی ءَ گْوشتگ کہ جلیہ ھیدر ءِ ناراھیں رنگے ءَ دارگ اوپار کنگی کارے نہ اِنت ۔آ ھزارہ ٹک ءُ بلوچستان ءِ جاورانی جھگیر اِنت ۔
• مسلم باگ ءَ لیویز ءَ سوبمندیں کارروائی کرتگ ءُ بھادرھان نامیں آوار جنے دزگیر کرتگ ۔ بھادرھان ءِ سر ءَ ھمے ملام بندگ بیتگ کہ آئی ءَ دہ سالی ئیں جنک زھگ « نادیہ مری ء سھراب ھان » آوار جتگ ۔
• کیچ ءَ دمگدار ءِ کارگس ءَ چہ ھار ءَ بے لوگ بیتگیں جنین آدمے ءَ زھر وارتگ ءُ وت کشی کنگ ءِ کوشست کرتگ ۔ جنین آدم ءِ درگت ءَ ھمے گْوشگ بیت کہ آ میرانی سد ءِ ھارجتیں مردمان اِنت کہ بے لوگی ءَ زند گوازینگ ءَ اِنت ۔ بازیں سال اِنت کہ آ چہ سرکار ءَ پہ لوگ بندگ ءَ زمین لوٹگ ءَ اِنت ۔ اے ھم گْوشگ بیگ ءَ اِنت کہ چد ءُ پیش ھم اے جنین ءَ وتکشی کنگ ءِ کوشست کرتگ ۔ زھر ورگ ءَ پد جنین نادراہ ءَ سر کنگ بیتگ ءُ چہ ڈاکٹرانی درمان ءُ تیمار ءَ ساہ ئِے پھریز اِتگ ۔
ھمود ءَ ساڑی ئیں مردمے ءِ رد ءَ جنین ءَ دو چک ھم ھمراہ بیتگ ءُ آئی ءَ زھر ورگ ءَ پد لوٹ اتگ کہ وتی چکاں ھم زھر بہ دنت بلے مردماں نہ اشتگ۔میرانی سد ءِ پد ءَ کیچ ءِ مزنیں دمگے ءَ ھار ءَ مل اتگ ءُ مزنیں کچے ءَ مردم بے لوگ بیتگ اَنت ۔ چہ ایشاں بازیں کس دنیگت ھم کمکی گدانانی تہ ءَ بندر اِنت ءُ بزگی ءِ زند گوازینگ ءَ لاچار اِنت۔
• شال گنج بائی پاس ءَ گاڑی ءَ چاردہ سالی زھگے لگت داتگ ءُ کشتگ ۔ زھگ «ندا مھمد ء کپایت الا » ءِ نام پجارگ بیتگ کہ شال ءَ رودرتکی بائی پاس ءِ نندوک اَت۔
• شال ءَ گیس پژار ءِ کمی ءُ گیس ءِ بند بیگ ءِ بگیر ءَ شھریاں زھرشانی کرتگ۔ زھرشانی کنوکاں اسپینی دگ ءِ سر ءَ ٹائر بن داتگ ءُ راہ بستگ ۔ آیانی زھرشانی ءِ تہ ءَ کاسگ چٹیں پارلیمان ءِ باسک «اکترھسین لانگو» ءَ ھم بھر زرتگ ۔
•بلوچستان نیشنل پارٹی مینگل ءِ رسانکدری کارگشاد «آگاھسن بلوچ» ءَ سوئی سدرن گیس شرکت ءِ جنرل منیجر «مدنی سدیکی» ءَ گوں رھوت کرتگ ءُ لوٹ کرتگ کہ شال ءَ گیس ءِ کمی ءِ جیڑہ گیشینگ بہ بیت داں سارتیں دمگانی مردماں آسیدگی بہ رس ایت۔
• بلوچستان ءَ آرت ءِ ڈکال اِنت بلے چہ بلوچستان ءِ ھنکین جاپرآباد ءِ پاسکو ءِ «ڈیرہ الایار » گدام ءَ ھزارھانی ٹن گندیم سندھ ءَ دیم دیگ بیتگ ۔گْوستگیں روچاں بلوچستان ءَ وردنی وزیر « ابدرھمان کیتھران » ءَ ھمے گْوشتگ اَت کہ پاسکو ءِ نیمگ ءَ آیوکیں روچاں پہ بلوچستان ءَ 50 ھزار ٹن گندیم دیم دیگ بیت ، دومی نیمگ ءَ جاور ایش اَنت کہ پاسکوبلوچستان ءِ گداماں گندیماں کشگ ءُ سند ءَ دیم دیگ ءَ اِنت۔
• کاسگ چٹیں سروزیر جام کمال ھان ءَ آرت ءِ گْرانھری ءِ سر ءَ دلگوش گْور کرتگ ءُ درسیں دمگدار ءُ کمک دمگدار پرمان داتگ اَنت کہ آ اے گپ ءَ المی بہ کن اَنت کہ مردماں سرکاری نھاد ءَ آرت ءُ گندیم بہ رس ایت۔
• بلوچ اسٹوڈنٹس ایکشن کمیٹی کزدار ھنکین ءِ سروک ھالدبلوچ ءُ دگراں کزدار پریس کلب ءَ گپ جنان ءَ گْوشتگ کہ ما کزدار زانشتجاہ ءِ بند بیگ ءَ نہ من ایں ۔ آیاں چہ سرکار ءَ لوٹ اتگ کزدار زانشتجاہ بند کنگ مہ بیت ءُ آئی ءِ زمین ھم جھلاوان جاندْراھی شھدربرجاہ ءَ دیگ مہ بیت ۔
• آواران ءَ دوروچی وانگی ءُ ندانکی مراگاھے بنا کنگ بیتگ ۔اے سری رند اِنت کہ آواران ءَ وانگی ءُ ندانکی مراگاھے ایر کنگ بیت۔اے مراگاہ بلوچستان ایجوکیشنل سسٹم ءِ چیردستی ءَ بیتگ۔ مرگاہ ءَ ڈاکٹررمزان بامری، پروپیسر برکت اسمائیل ، بشیربلوچ،آبدمیر، نجیب سائر، ھلیل رونجو، زھیرزرپ،کندیل بلوچ،زاھدبلوچ ، پریدمینگل ،شمیم نسرت ، مکبول وپا، زباد بلوچ ءُ دگراں بھر زرتگ۔اے مراگاہ ءَ نامی ئیں ازمکار اھمدھان بلوچ ءَ ھم وتی ناچی ازم ءِ درانگازی کرتگ ، اھمدھان ھندوستانی کتھک ناچ کنوکیں ازمکارے ۔
مراگاہ ءِ دومی روچ ءَ پہ جنین ءُ نودربراں بھر ایرکنگ بیتگ ۔ آئی ءِ تہ ءَ نودربراں بندوکیں جیڑہ ءُ آیانی کرد ءِ سر ءَ گپ ءُ تْران بیتگ ۔نودربرانی میان ءَ نبشتہ کاری ءُ داستان نبیسی ءِ مردانگیشی ھم بیتگ ۔
•کاسگ چٹیں بلوچستان پارلیمان ءِ جارچین کدوس بزنجو وتی جند ءِ سرکار ءِ سر ءَ ایراد درشان کنگ ءَ اِنت۔آئی ءَ وتی درشانے ءَ گْوشتگ کہ بلوچستان ءِ مزن وزیر جام کمال چہ آئی ءَ ھچ رنگیں بیرے گرگ ءَ نہ اِنت آواران ءِ کمک دمگدار ءَ مٹ کنگ ، سرکار ءِ واکداری ءِ تہ ءَ اَنت ، اگاں توری کمک دمگدار پہ آواران ءَ شر کار کنگ ءَ اِنت ۔ اے رد ءَ دلگوش کنگی گپ ایش اِنت کہ آواران ءَ مردماں لوٹ کرتگ کہ کمک دمگدار مَٹ کنگ مہ بیت بلے سرکار ءَ آئی ءِ مٹ کنگ ءِ پرمان داتگ۔
•بلوچستان ءِ کاسگ چٹیں سرکار ءِ تھی کارانی وزیر زیالانگو ءَ گْوشتگ کہ لیوز ءَ چاریگی تکے جوڑ کنگ بیگ ءَ اَنت ۔ آئی ءَ اے ھم گْوشتگ کہ لیویز ءَ لشکری ھیلکاری دیگ بیت ۔ آئی ءِ کارکرد ءِ گھتر کنگ ءَ نوکیں سلاہ ءُ دگہ چیز ھم بھا ءَ زیرگ بیگ ءَ اِنت۔آئی ءَ گْوشتگ کہ بنجاھی سرکار ءِ چیردستی ءَ کارکنوکیں لیویز سی پیک ءِ راہ ءِ سر ءَ پانک جنت ، چہ ایشی ءَ ایمنی برجاہ بیت ءُ مردماں روزگار رس ایت۔
• زیالانگو بلوچستان ءَ وھیلانی پیش گیری تک ءِ ھم وزیر اِنت ۔ اے رد ءَ آئیءَ گوں رسانکدر ءَ گْوشتگ سرجمیں سانمند بیتگیں دمگاں کمکی کار برجاہ اَنت ، کمکی کارانی تہ ءَ مزن وزیر ءِ بالگرد ءَ باز کمک کرتگ ۔ پی ڈی ایم اے ءِ کارکردگی ءِ گھتر کنگ ءَ بیست کروڑ کلدار ءِ دزگاہ ءُ دگہ المی ئیں چیز بھا زیرگ بیگ ءَ اِنت۔
• بی این پی مینگل ءِ راھشون ءُ گوادر ءَ کاسگ چٹیں پارلیمانی جھگیر ھمل کلمتی ءَ گْوشتگ کہ اکترمینگل ءِ سرجمیں سیاست پہ بلوچستان ءُ بلوچ راج ءَ اِنت ءُ پمیشکا آئی ءَ وزیری انگار اتگ اَنت ۔ آئی ءَ گْوشتگ کہ آیانی گل ءَ ھما ششیں دانک کہ پیش کرتگ اَنت گوں ایشاں بلوچ ءِ باندات بندوک اِنت ۔ آئی ءَ گْوشتگ اسلام آباد ءِ پارلیمان ءَ پہ گوادر ءِ مردمانی سیت ءَ راھبند جوڑ کنگ بیگ ءَ اِنت۔آئی ءَ اے گپ پسنی شھدربرجاہ ءِ سواد ءَ درشان کرتگ اَنت۔آئی ءَ گْوشتگ کہ پسنی ءِ شھدربرجاہ ءِ ماڑی پوسیدگ اِنت ءُ زمین ءَ کلر چتگ پمیشکا ایشی ءِ جوڑ کنگ ءَ پیش زمین ءِ جند ٹپاسگ لوٹ ایت ۔آئی ءَ گوں پسنی ءِ درویارداں گْوشتگ کہ پہ پسنی ءِ جیٹی ءِ شرکنگ ءَ گل ءِ سروک اکترمینگل ءَ گوں پاکستان ءِ سروزیر ءَ گپ جتگ ۔بلوچستان ءِ جیڑھانی سر ءَ سرکار ءُ بی این پی ءِ میان ءِ ھما بولک کہ جوڑ اِنت آئی ءِ جیڑھانی لڑ ءِ تہ ءَ پسنی ءِ جیٹی ھم ھوار اِنت۔
•بولان میڈیکل شھدربرجاہ (بی ایم سی )ءِ زھرشانی گدان 26 می روچ ءَ ھم برجاہ بیتگ ۔
• مستونگ ءَ شال ءُ کراچی شھدگ ءِ سر ءَ ژلی ءِ ھند ءَ چہ کھڈکوچہ ءَ واتر بیوکیں پولیوبولک وھیل ءِ آماچ بیتگ چہ ایشی ءَ «ھاجی نزام الدین کمبرانی» ءُ دگہ جنین آدمیں کارمندے بیران بیتگ اَنت۔
• چہ نوشکے ءَ «ھسن بزنجوء لال مھمد بزنجو» چہ پاکستانی آزار جاھاں یلہ بیتگ ، ھسن بزنجو داں پنچ سال ءَ پاکستانی آزار جاھاں بندیگ بیتگ ۔ھسن بزنجو بندر ءَ تیرتیج آواران ءِ نندوک اِنت۔ بی این پی مینگل ءِ بنجاھی پتر ءِ باسک ھورشیدجمالدینی ءَ پہ ھسن بزنجو ءِ یلھی ءَ چاھواری پترے داتگ۔ زانگ بہ بیت کہ انیگیں روچاں چہ پاکستانی آزارجاھاں یلہ بیتگیں بندیگ بی این پی مینگل ءِ مردمانی دست ءَ دیگ بیگ ءَ اَنت ۔ بی این پی مینگل ءِ ھمے گْوشگ اِنت کہ اے مردم آیانی کوشستانی برورد ءَ یلہ کنگ بیگ ءَ اَنت۔

روکپتی بلوچستان

• بلوچستان ءُ سیستان ءِ سانائی ، مادن ءُ باپاری کارانی سروک مھمودرزا رھمتیان ءَ سئے شمبے ءِ روچ ءَ گْوشتگ کہ چہ بلوچستان ءِ سیمسراں باپاری چیزانی ڈیھ ءَ ڈن بھا کنگ ءِ تہ ءَ گیشی اتکگ ۔ آئیءَ گْوشتگ کہ چہ بلوچستان ءِ گمرک ءُ پاسارُکاں اے میان ءَ نوسد ءُ نود ءُ ھپت ھزار ءُ سئے سد ءُ ھپتاد ءُ یک ٹن چیز ڈن ءَ برگ بیتگ کہ آیانی نھاد چہ 757 میلون ڈالراں گیش بیتگ ۔ آئی ءَ گْوشتگ کہ باپاریاں چہ گمرگ ءُ سیمسری پاسارکاں سیمٹ ، نیبگ ، ھامگیں نود، گیس، گوکرت، ناہ ، گدشودگی پوڈر، ڈامبر،کاشیگ ، پلاسٹکی چیز پاکستان ، اوگانستان ، ترکی ، کویت ، امارات ءُ دگہ دمگاں برتگ۔
بلوچستان ءُ سیستان ءَ اے وھدی ھپت سیمسری پاسارک کار کنگ ءَاِنت۔ اے پاسارک ھیرمند، میر جاوہ ، سراوان ءَ کوھک ءُ جالک ، پیشن ءُ ریمدان ءَ کارکنگ اَنت۔ چہ ایشاں ابید سرکار لوٹ ایت کہ نیمروز ءِ شھرستان ءَ بش دلبر، تھت ء ادالت، میرجاہ ءَ بدوکی ءُ سراوان ءَ میل 46 ءَ دگہ سیمسری پاسارُک جنگ بہ بیت۔ سرکاری بنشونانی رد ءَ اے درگت ءَ چن ءُ لانچ بیگ ءَ اِنت۔
• پھرگ ءِ مردماں پہ ھارجتاں 70 ٹن ءِ چیز کمک داتگ ۔
• اے سالی میان اُستمانی تامری مراگاہ ءَ بنگیجی مراگش ایر کنگ نہ بیت ءُ اے درگت ءَ مَن اتگیں زر پہ ھار آماچیں مردمانی کمک ءَ دیم دیگ بہ اَنت ۔بلوچستان ءُ سیستان ءَ دودمانی تک ءِ کارانی مستر ھسین مسگرانی ءَ گوں رسانکدر ءَ گْوشتگ کہ میان استمانی تامرانی سی ءُ ھشتمی سالینہ مراگاہ گوں «دھہ ء پجر» ءِ مراگاھانی ھمراھی ءَ برجاہ دارگ بیت بلے آئی ءِ تہ ءَ بنگیجی مراگش گون نہ بیت۔
• کمکی سازمان سُھر نوک ءِ بنشون ءِ رد ءَ چہ ھار ءَ سان چتگیں 12 ھزار ءُ 60 کس ءَ ادارکی دوار دیگ بیتگ۔چہ ھار ءَ بلوچستان ءِ 14 شھرستان ءَ تاوان بیتگ کہ آیانی تہ ءَ پھرگ، واش ، دلگان ، زاھدان، سرباز ، سراوان ، سب ءُ سوارن ، پنوچ ، کنرک ، میرجاوہ ، مگس ، نیکشھر ءُ ھیرمند ھوار اَنت۔اے ھاراں دو کس بیران بیتگ چہ ایشاں یکے سرباز ءَ ھار ءَ برتگ ءُ دگرے کنرُک ءَ ماڑی ءِ ڈرگ ءَ چیرتراتگ۔رسانکدرانی رد ءَ بلوچستان ءِ ھار چہ گلستان ءِ ھار ءَ سئے ءُ نیم ھمینچک مستر ءُ شاھگان تر بیتگ۔
• انیگیں ھور ءَ بلوچستان ءِ سد سر ریچ بیتگ اَنت ۔ سرکاری بنشون ءِ رد ءَ پیشن ءُ ھیرآباد ءِ سد ھشت سال ءَ پد سرریچ بیتگ ءُ شئے کلگ ءُ زیردان ءَ سد وتی جوڑ بیگ ءَ پد سری رند اِنت کہ سرریچ اِنت ءُ آئی ءِ تہ ءَ 110 ملیون چارپھناتی آپ امبار اِنت۔
• زاھدان ءِ زانشتجاہ ءِ کماش ڈاکٹرھاشمی شھری ءَ گْوشتگ کہ بلوچستان ءَ 16 ھزار ڈنی زھگاں پولیو ءِ تْرمپ وارینگ بیتگ ۔اے زھگ بلوچستان ءِ آ دگہ زھگانی پجیگ ءَ زاھدان ، میرجاوہ ، واش ، سراوان ءُ سب سوران ءَ پولیو ءِ تْرمپ وارینگ بیتگ اَنت۔آئی ءَ گْوشتگ کہ جھان ءَ چہ درساں گیش پولیو ءِ نادراھی سئے ڈیھ نائیجریا، پاکستان ءُ اوگانستان ءَ بیت ۔ پاکستان ءُ اوگانستان ءَ روگ ءُ آیگ ءِ سر ءَ اے وائرس ءِ مئے نیمگ ءَ آیگ ءِ گمان ھست پمیشکا ھمک سال دو رند ءَ اے گامگیج چست کنگ بیت۔ آئی ءَ گْوشتگ 20 سال اِنت کہ ایران ءَ ھچ زھگ پولیو ءَ نہ گیپتگ ۔ آئی ءَ درائیںتگ بلوچستان ڈیھ ءِ سیمسر ءِ پانک اِنت پمیشکا ھمک زھگ توری ھرچی بہ بیت ، پجارتاکے ھست کہ نیست آئی ءَ پولیو ءِ تْرمپ وارینگ بیت۔

پاکستان

•پاکستانءِ مزن وزیر ءَ گْوشتگ کہ من ءَ گْرانی ءِ سما اِنت چہ منی جند ءِ پگار ءَ ھم لوگ ءِ ھرچ پیلو نہ بہ اَنت۔
• این ڈی ایم ءِ سروک ءَ چہ سروزیر ءِ نیمگ ءَ بلوچستان ءَ بیوکیں ھمسرک ءُ ھور گواریاں تاوانبار بیتگیں مردمانی درگت ءَ بستگے ءِ جار پرینتگ۔آئی ءَ گْوشتگ کہ مرتگیں مردمانی کھولاں پنچ لک ، ٹپیاں پنجاہ ھزار ءُ ھما مردماں کہ آیانی لوگ سرجمی ءَ پْرشتگ اَنت لک کلدار کمک دیگ بیت۔
• پنجاب ءَ سرکاری گل ءِ پارلیمانی باسک وتی جند ءِ گل ءُ سرکار ءِ بگیری کنگ ءُ وتی درشانانی تہ ءَ بے تاھیری پدر کنگ ءَ اَنت ۔ آ چہ پنجاب ءِ مزن وزیر ازمان بزدار ءِ کارکردگی ءَ وش نہ اَنت ۔ اے زھر کنوکیں باسک چہ لیہ ءَ سردار شھاب الدین ھان ، چہ ڈیرہ گازی ھان ءَ سردار مھی ادین ھان کھوسگ ءُ مھمدداؤد، چہ بھکر ءَ ملک گزنپراباس چینہ ءُ آمرانایت الا شاھانی،چہ سرگودھا ءَ پیسل پاروک چیمہ ءُ منیب سلتان چیمہ،چہ چینوٹ تیمورلالی ، چہ روالپنڈی ءَ اجازھان ، چہ ھاپزآباد ءَ جھانگیربھٹی ، چہ وھاڑی ءَ الی ھاکواکی ءُ مھمداپزل، اپتکارگوندل ، گلریز ازگرچن ءُ دگہ سئے جنین آدمیں باسک ھوار اَنت۔
•13 جنوری ءَ سیھون ءَ آمیدگس ءِ دادگرے ءَ وتی کت ءِ تہ ءَ گوں جنین آدمی ءَ جنسی زوراکی کرتگ ۔ سند ءِ مزن آمیدگیس ءِ سروک اھمدالی شیک ءَ دادگر ماٹو کرتگ ءُ مزن آمیدگس ءَ گزارش دیگ ءِ پرمان داتگ۔
• پشاور ءَ چہ تندوراں ارزانیں نھاداں بھا زیرگ بیتگیں نگن ڈن ءَ گرانتریں نھادے ءَ بھا کنگ بیگ ءَ اَنت۔
•چہ برتانیا ءَ میرپور ءَ اتکگیں دو گھار چہ گیس ءِ لیک بیگ ءَ دمتوس بیتگ ءُ بیران بیتگ اَنت ۔ 18 سالی ئیں نادیہ ءُ 24 سالی ئیں ماریہ لنکاشائر ءِ دمگ
پریسٹن ءِ نندوک بیتگ اَنت۔
• سکھ سیاسی راھشون رادیش سنگ ءَ بیھار رسگ ءَ پد پاکستان یلہ داتگ ۔ آئی ءَ گوں بی بی سی ءَ گپ جنان ءَ گْوشتگ کہ آ ءُ آئی ءِ کھول ءِ زندگی ترس ءِ آماچ بیتگ پمشیکا آئی ءَ پاکستان یلہ داتگ ۔ آئی ءَ گْوشتگ کہ انی من اے گْوشت نہ کن آں کہ اے وھدی من کج ءَ آں بلے وھدے کہ من پھریزیں ھندے ءَ سربہ بہ آں وتی بندر ءِ درگت ءَ سرپدی دئے آں۔آئی ءَ گْوشتگ کہ وھدے چہ پشاور ءَ لاھور شتگ آں منی گمان ھمے بیتگ کہ پنجاب ءَ من ءَ باھوٹ کنگ بیتگ ، روزگار رس ایت بلے چوش نہ بیتگ ءُ منی سئے چک وانگجاہ ءَ زیرگ نہ بیتگ ۔ سکھانی جندءِ دربرجاھاں وتی پوڑی چل ھزار گْوشتگ کہ چہ منی وس ءَ ڈن بیتگ۔آئی ءَ اے ھم گلگ کرتگ کہ پنجاب ءِ سکھاں ھم آئی ءِ کمک نہ کرتگ۔
•رینجرز ءَ چہ کراچی گلستان جوھر ءَ ایم کیو ایم ءِ راھشون نسار پنھور دزگیر کرتگ۔

ایران

• مھترھسن روھانی ءَ الیکٹرکی کارانی تک ءِ یک پترےءَ گْوشتانک داتگ ءُ گْوشتگ کہ مردم باید ارزان ءُ نزیک تریں راہ ءَ چہ سرکاری تندجاھاں وتی کاراں بہ کن اَنت ۔زانگ بہ بیت کہ ایرانی سرکار ھمے کوشست کنگ ءَ اِنت کہ سرکاری کارانی تہ ءَ کاگد ءِ کارمردی ءِ تہ ءَ کمی بئیت ءُ آیانی الیکٹرونک راجی پجارتاک پہ آیانی درسیں کاراں کار مرد بہ بیت ۔ اے درگت ءَ ایرانی الیکٹرک راجی پجارتاک ءِ تہ ءَ چپ ھم مانگیجگ بیتگ کہ چہ آئی ءِ کمک ءَ چہ اے ٹیم ایم مشین بزاں چہ وتپرداچ ءَ زر ھم کشگ بیتگ ۔ اے وھدی ھم ایران ءَ گیشتریں کار گوں الیکٹرکی کارڈاں بیگ ءَ اِنت چوش کہ چہ پمپ ءَ نپت زیرگ ءُ دکاناں سودا گرگ۔ نی سرکار ءِ کوشست اِنت کہ اے درسیں کار یکیں پجارتاک ءِ سر ءَ بہ بہ اَنت ۔
• نوروز ءَ ایرانی سرکار وتی ھمک کارمند ءَ یک میلیون ءُ دوسدھزار تومن ائیدیگ دنت ۔ ایرانی سال ءِ بنداتی ماہ بزاں پروردین ءِ بنداتی 15 ئیں روچاں نوروز ءِ جشن دارگ بیت ۔ سرجمیں ایران ءَ مردم پہ سیل ءُ سواد در کپ اَنت ءُ گیشتر مردم اے 15 ئیں روچاں چہ وتی شھراں ڈن گوازین اَنت۔
• ایرانی مھتر ءَ گْوشتگ کہ مھرکمیں راجانی دیمپانی ءِ برورد ءَ امریکا چہ پندلاں پشومان بیت۔ ھسن روھانی ءَ ماں تھران ءَ گوں وینزویلا ءِ دری کارانی وزیر ءَ نیاد کنان ءَ اے گپ جتگ اَنت ۔ آیاں وت ماں وت ءَ سدکی داتگ کہ دوئیں ڈیھ وت ماں وتی رھوتاں دیمروی دئے اَنت۔
• یوکرین ءِ مھتر ولودیمیرزلنسکی ءَ دو شمبے ءِ روچ ءَ گوں ایرانی دگ ءُ شھرانی دیمروی ءِ وزیر مھمد اسلامی ءَ گندک کرتگ ۔
•ایران ءَ چہ پرانس ءُ امریکا ءَ لوٹ کرتگ کہ آئی ءَ پہ یوکرینی بالیگ ءِ بلیک باکس ءِ وانگ ءَ ٹکنیکی چیزانی رد ءَ کمک بہ کن اَنت ۔ دنیگت اے درگت چہ ھر دوئیں ڈیھانی نیمگ ءَ پسو دیگ نہ بیتگ۔پیش ءَ دگہ ڈیھاں لوٹ کرتگ کہ ایران بلیک باکس ءَ پہ وانگ ءَ پرانس ءَ دیم بہ دنت بلے ایران ءِ ھمے گْوشگ اِنت کہ آ بلیک باکس ءَ وتی ڈیھ ءِ تہ ءَ ٹپاس ایت ۔

جھان

•اوگانستان ءِ گچینکاریانی پتر ءَ گْوشتگ کہ آیاں گچینکاریانی سر ءَ شش ھزار شکایت دست کپتگ ۔
• چین ءَ مردم کشیں وائرس ءِ چہ مردمے ءَ دومی مردم ءَ روگ ءِ گپ راست لیکگ بیتگ ۔چین ءَ چہ اے وائرس ءَ سانمند بیوکیں 200 مردم دیم ءَ اتکگ۔زانگ بہ بیت کہ دنیگت سائنسدان گینی نادراھی ءِ انگیز بیوکیں اے وائرس ءِ درگت ءَ پٹ ءُ پول کنگ ءَ اَنت ءُ پہ زانوگراں اے یک نوکیں وائرسے ۔
• یمن ءَ لشکری بنجلے ءِ سر ءَ موشک چگل دیگ بیتگ چہ ایشی ءَ 80 سپاھیگ مرتگ دنیگت اے کارپد ءِ زمہ واری کس ءَ پہ وت نہ زرتگ۔
•اراک ءِ بنجاھی شھر بگداد ءَ مردم سرکار ءِ بگیری ءَ زھرشانی کنگ ءَ اَنت ، گْوستگیں روچ ءَ زھرشانی کنوک ءُ پولیس وت ماں گر ءُ چیل بیتگ اَنت ۔ چہ اے میڑ ءَ دو پولیسانی پجیگ ءَ چار کس بیران بیتگ ۔
پولیس ءَ زھرشانی کنوکانی سر ءَ ارسریچیں گیس چگل داتگ ءُ تچکے ءَ تیرگواری کرتگ ۔
زھرشانی کنوک پیش ءَ چہ سرکار ءَ ڈیھی کارانی تہ ءَ لھتے گھتری آرگ ءِ لوٹ کنگ ءَ بیتگ اَنت بلے نی آیانی ھمے گْوشگ اِنت کہ اراک ءِ انیگیں سرکار ھلاس کنگ ءُ نوکیں ادارکی سرکارے آرگ بہ بیت ءُ چہ وھد ءَ پیش گچینکاری کنگ بہ بہ اَنت۔