پنجگور» ما پہ وتی بیگواھیں مردم ءَ بے تاھیر اِیں ‘ لشکری گْوش اَنت ما کُشتگ آئی ءِ چیرک گْوش اَنت زندگ اِنت ‘بیگواھیں ھیربشک ءِ کھول

بیگواھیں ھیر بکش ء ھزور بکش جاھمنند پروم ءِ کھول ءِ مردماں گوں اھوالکاراں گْوشتگ کہ پاکستانی لشکر ءُ آئی ءِ مردم کُشیں چیرکانی ھندی سروک مئے ٹپاں واد پِر کنگ ءَ اَنت ۔

کھول ءِ مردمانی گْوشگ اِنت کہ ھیر بکش ء ھُزور بکش 16 اکتوبر 2014 ءَ چہ لوگ ءَ پاکستانی لشکر ءُ چیریں تْرامگیجانی کارمنداں آوار جتگ ءُ بیگواہ کُرتگ ۔ بازیں وھدے ءَ پد 09 اگست 2018 ءَ ما گوں آ دگہ بیگواھیں مردمانی کھول ءِ مردماں پنجگور ءَ ایپ سی بُنجل ءِ دیم ءَ پہ وتی مردمانی آجوئی ءَ نندانک جتگ ءُ زھرشانی کُرتگ ۔ چراِیشی ءَ چہ پد 14 اگست 2018 ءَ پاکستانی لشکر ءِ کرنل ءَ مارا پنجگور ءِ ایپ سی بُنجل ءَ لوٹائینتگ ءُ پنجگور ءِ کرنل سلیم کادری ءَ گْوشتگ کہ ما ھیر بکش گوں دگہ سئے بیگواھیں مردمانی ھمراھی ءَ کُشتگ ءُ پنجگور ءِ دمگ پروم درگ ءِ دپ ءَ کَل کُرتگ اَنت۔ اے وھد ءَ بریگیڈئر زھیر اکتر، کمانڈنٹ سُھیل اھمد، اسسٹنٹ کمشنر زپر بلوچ ءُ ھنکین چئیرمین ابدالمالک ءُ مردم کُشیں چِیرکانی ھندی سروک بجار شمبے زھی ھم ساڑی بوتگ اَنت ۔ چَہ کرنل سلیم کادری ءِ اے گپاں پد ما ھیر بکش ءِ پُرس داشتگ بلے لھتے روچاں پد پاکستانی چیرک نواب شمبے زھی ءُ سئود ءَ گْوشتگ کہ پُرس مہ دار اِت ھیر بکش زندگ اِنت بلے چَہ پنجگور ءِ بُنجل ءَ در کنگ ءُ دگہ جاگھے ءَ برگ بوتگ ۔

کھول ءِ مردمانی گْوشگ انت کہ ما ھیر بکش ءِ گَماں بے تاھیر اِیں ءُ پاکستانی لشکر ءَ اگاں ھیر بکش کُشتگ گُڈا مارا تچک ءَ بُہ گْوش اِیت ۔سرکاری چیرک ءُ پاکستانی لشکر روچے یک گپے کن اَنت اے ٹپانی واد پِر کنگ ءَ ابید دگہ ھچ نہ اِنت-

یاد بہ بیت 18 جولائی 2018 ءَ پنجگور ءِ دمگ پروم درگ ءِ دپ ءَ یک “یک گوریں مانشے” در کپتگ اَت ءُ چَہ مانش ءَ سَے کُنٹ دست کپتگ اَت بلے اَنچوش کوھن بوتگ اَنت کہ پجارگ نہ بیتگ اَنت ءُ چَہ آیانی دست کپگ ءَ پد پنجگور ءِ بیگواھیں مردمانی کھول ءِ مردمانی گَم گیش بوتگ اَنت پرچا کہ اے سَری رند نہ اِنت کہ پنجگور ءَ ھوار سرجمیں بلوچستان ءَ وھد پہ وھد بیگواھیں مردمانی کُنٹ چَہ “یک گوریں مانشاں” دست کپگ ءَ اَنت۔

چَہ پنجگور ءَ سیادی داروکیں جھگیرے ءِ گْوشگ اِنت کہ پنجگور ءَ 2010 ءَ بہ گر داں 2018 ءَ درزنے ءَ گیش کل کرتگیں کُنٹ گندگ بوتگ چَہ ایشاں لھتے ءِ پجار بیگواھیں بلوچ پُسگانی نام ءَ بوتگ کہ پاکستانی لشکر ءَ آوار جنگ ءَ پد شھید کُرتگ ءُ کَل کُرتگ اَنت وھدے کہ بازیں مردمی کُنٹ بے کَسانی وڑ ءَ کل کنگ بوتگ اَنت ۔