📰 روتاک زرمبش بلوچی: چار شمبے » 20 مئی 2020

🗞سرھال🗞

◾️بولان ءَ پاکستانی لشکر ءَ بیتگیں اُرش ءِ زمہ واری یو بی اے ءَ من اتگ
◾️#تمپ : زورگریں لشکر ءَ چہ کوھاڈ ءَ دو کس آوار جتگ
◾️سُھبت پور:پولیس ءِ کارروائی ءَ جنین ءِ کشندہ دزگیر
◾️نیشنل پارٹی ءِ باسک ادریس ھٹک ءِ یلہ کنائینگ ءَ ھمک جاہءَ توار چست کرتگ بلے واکداراں گوش نہ داشتگ‘ھاسل بزنجو
◾️ذاکر مجید ءُ زاھد کرد ءَ ھوار سرجمیں بیگواھیں مردم یلہ کنگ بہ بنت– بی ایس او پجار
◾️#پنجگور :پجارگ نہ بیتگیں پرپٹ سوارانی تیرگواری ءَ جھانزیب بیران
◾️کیچ:تربت ءَ تبد ءُ گرم ءَ ایر داتگ
◾️#کورونا : بلوچستان ءَ مساپربریں گاڑی ءُ ریل پچ کنگ نہ بہ اَنت
◾️شال:مزن وزیر جام کمال یک روچی تر ءُ تابے ءَ تُربت ءَ سربیتگ
◾️24 ادار ءِ تہ ءَ بلوچ سرمچارانی ارش ءَ پاکستانی لشکر ءِ 7 کارمند مرتگ‘آئی ایس پی آر
◾️پنجگور:چتکان جھلگ ءَ ناکو ءَ وتی برازتک کارچ جتگ ءُ کشتگ
◾️ناوانندگی چہ کورونا ءَ مستریں وبایے بوت کنت | 2800 وانگجاھانی استاد ءُ کارمندانی مالی جاور ناگیگ اَنت – بلوچستان درسرکاری وانگجاہ
◾️ چھبار: اے دلجمیں گمانے نہ اِںت کہ کورونا نزور بیتگ – ڈاکٹرمھدی میرادی
◾️سرکاری واکدارانی بیڑ ءَ ھیرمند ءَ 6 نشہ بھا کنوک دزگیر چہ ٹنے ءَ برز نشھی نکان گرگ بیتگ
◾️مراحل آماده سازی دو نقاهتگاه منطقه #نجف‌آباد_خاش
◾️واش: کورونا ءِ تالانی دیم ءِ دارگ ءَ ائید ءِ نمازمیتگانی مسیتاں بیت
◾️روکپتی بلوچستان: مردمانی سھام ء ادالت ماٹو اَنت – مھمد باست درازاھی
◾️دزاپ: ٹیلی کام ءِ وائرانی دز دزگیر | 300 میٹر وائر ھم دست کپتگ

🔴پاکستان ءِ گونڈیں ھال

#پاکستان

🔹پاکستان : کورونا وائرس ءَ دگہ 33 مردم بیران 1204 نوکیں کیس دیم ءَ اتکگ ، بیران بیتگیں مردمانی کچ 969 ءَ سر بیتگ ءُ نادراھانی کچ 45002 اِنت۔

🔹سند : کراچی ءِ بنجاھی زندان ءَ 40 زندانی کورونا وائرس ءِ آماچ بیتگ۔

🔹پی ٹی آئی سند ءِ رھشون پردوس شمیم نکوی ءَ سند ءَ گورنر راج ءِ لوٹ کرتگ۔

🔹 پاکستان ءِ چیردستیں کشمیر ءِ سرکار ءَ کورونا وائرس ءِ شنگ بیگ ءَ پد سرجمیں کشمیر ءَ داں دو ھپتگ ءَ بندآرگ ءِ پرمان داتگ۔

🗞رودرتکی بلوچستان🌴🐪🗞

🔴بولان ءَ پاکستانی لشکر ءَ بیتگیں اُرش ءِ زمہ واری یو بی اے ءَ من اتگ

📎 مچ : #ھم_سنتیں_بلوچ_لشکر ( #یو بی اے ) ءِ جارکش #مرید ءَ ماں رسانکدر ءَ وتی شکساتگیں درشانی ءَ گْوشتگ: #بولان_پیر گیب ءَ تیل ءُ گیس ءِ شوھاز کنوکیں شرکت ءِ پھازداریں پاکستانی لشکر ءِ کاروان ءِ سر ءَ سرمچاراں گوں دیرواگیں تراکے ءَ ارش کرتگ۔ چہ اے ارش ءَ زورگریں لشکر ءِ گاڑی سرجم ءَ تباہ بیتگ۔ چہ ایشی ءَ پد سرمچاراں آدگہ گاڑیانی سر ءَ گوں راکٹ ءُ وتکاریں سلاھانی ارش کُرتگ۔

جارکش ءَ گْوشتگ:سرمچارانی ارش ءَ پاکستانی لشکر ءُ شرکت ءِ لھتے انجنیئر ھم مرتگ۔

یو بی اے ءِ جارکش مرید ءَ اُرش ءِ زمہ واری من اِتگ ءُ دری ڈیھانی شرکت ھژدار داتگ اَنت کہ آ بلوچستان ءَ وتی کار ءُ بار ءَ بند بہ کن اَنت۔

جارکش ءَ گْوشتگ: چوشیں ارش داں بلوچستان ءِ آجوئی ءَ برجاہ مان اَنت۔
—★—
🔴#تمپ : زورگریں لشکر ءَ چہ کوھاڈ ءَ دو کس آوار جتگ

📎 تمپ: #کْوھڈ ءَ پاکستانی لشکر ءَ لشکر کشی ءِ کنان ءَ دو کس #اشیتاک_ء_ماسٹرسدیر ءُ #ابید_ء_آدم آوار جتگ اَنت۔
—★—
🔴 سُھبت پور:پولیس ءِ کارروائی ءَ جنین ءِ کشندہ دزگیر

📎 #سُھبت_پور : پولیس ءَ کارروائی کُرتگ ءُ گْوستگیں روچ ءَ ننگ ءِ نام ءَ کُشگ بیتگیں جنین ءِ کشندہ #مھمدموسا_ء_مھمدھسن ءُ #زولپکار_ء_مھمدموسا دزگیر کرتگ اَنت۔
—★—
🔴نیشنل پارٹی ءِ باسک ادریس ھٹک ءِ یلہ کنائینگ ءَ ھمک جاہءَ توار چست کرتگ بلے واکداراں گوش نہ داشتگ‘ھاسل بزنجو

📎 شال: #نیشنل_پارٹی ءِ بنجاھی سروک ءُ پاکستانی سینٹر #ھاسل_بزنجو ءَ گْوشتگ: شش ماہ اِنت نیشنل پارٹی ءِ بنجاھی باسک ءُ مردمی اگبالانی پلہ مرز#ادریس_ھان_ھٹک بیگواہ اِنت ما پہ ایشی ءِ یلہ کنائینگ ءَ ھمک جاہ توار چیست کُرتگ بلے واکداراں ھچ سما نیست کہ ڈیھ ءِ زمہ واریں شھری یے روچ رھمانی سرکاری واکداراں آوار جتگ آئی ءِ میار بس ھمیش اِنت کہ آ ئی ءَ ڈیھ ءِ تہ ءَ پہ مردمی اگبالاں تواری چست کرتگ۔آ ڈیھ ءَ راھبندا ءِ واکداری ءِ واھگدار اَت۔ڈیھ ءَ راجمستری ءُ پارلیمنٹ ءِ بالادستی لوٹگ ءَ اَت ادریس ھٹک ءَ ھمے گپ ءِ ڈن دیگ بیگ ءَ اِنت۔
آئی ءَ گْوشتگ : بلوچستان ءَ سداں گیش سیاسی باسک گْوستگیں بازیں سال اِنت کہ بیگواہ اَنت ءُ آزار جاھاں زوراکی ءُ در مردمی آزارانی دیمپانی کنگ ءَ اَنت۔
آئی ءَ لوٹ کُرتگ: آئید ءَ پیش سرجمیں بیگواھیں سیاسی باسک یلہ کنگ بہ بہ اَنت داں بیگواھیں مردم گوں وتی کھولاں ائید ءِ مرادیں شاتکامیاں پہ وشی بہ گْوازین اَنت۔
—★—
🔴ذاکر مجید ءُ زاھد کرد ءَ ھوار سرجمیں بیگواھیں مردم یلہ کنگ بہ بنت– بی ایس او پجار

شال: #بلوچ_نودربرگل_پجار ( #بی_ایس_او_پجار) ءِ بنجاھی جارکش ءَ گْوشتگ: بلوچ نودربر راھشون #ذاکرمجید ءُ #زاھد کرد ءَ ھوار سرجمیں بیگواھیں مردم یلہ کنگ بہ بہ اَنت۔بیگواھیں مردمانی جیڑہ *بلوچستان* ءَ ناگیگ بیان اِنت۔بلوچستان ءَ ھمک روچ بیگواھیں مردمانی کچ گیش بیان اِنت ایشانی تہ ءَ گیشتریں بیگواہ نودربر اَنت۔

آئی ءَ گْوشتگ: #نیشنل_پارٹی ءِ سروک ءُ مردمی اگبالانی پلہ مرز #ادریس_ھان_ھٹک ءَ ھوار سداں سیاسی بندیگانی ساسالانی سال بندیگ کنگ مردمی اگبالانی بگیری اِنت، بلوچستان ءِ مردم بیگواھیں مردمانی زندمان ءِ درگت ءَ پریشان اَنت۔

درشان ءِ تہ ءَ بلوچستان ءِ نودربر راھشونانی آوار جنی ءُ دزگیری مزنیں جیڑھے لیکگ ءُ گْوشگ بیتگ: چہ ایشی ءَ بلوچستان ءِ نودربرانی تہ ءَ دلپروشی ءُ ترسے تالان اِنت،سرکار نودربر راھشوناں ھوار سرجمیں سیاسی باسکانی یلہ کنگ ءَ وتی کرد ءَ پیلو بہ کنت۔

آئی ءَ گْوشتگ :بلوچستان ءَ مستریں جیڑہ بیگواھی اِنت،بیگواھیں مردم یلہ کنگ بہ بہ اَنت ءُ یک تچکیں راھے گیشینگ بہ بیت۔گْوستگیں سرکار ءَ گپ ءُ تران ءِ سر ءَ جیڑھانی گیش ءُ گیوار کنگ ءِ باز کوشست کرتگ ھمے شوندات کارگرگ ءُ سرجمیں بیگواھیں مردم یلہ کنگ بہ بہ اَنت ءُ بلوچستان ءِ جیڑہ ءِ گیش ءُ گیوار کنگ ءَ سرجمیں سیاسی گل وتی کرد ءَ پیلو بہ کن اَنت۔
—★—
🔴 #پنجگور :پجارگ نہ بیتگیں پرپٹ سوارانی تیرگواری ءَ جھانزیب بیران

📎 پنجگور: #وشبود ءَ ناشناسیں سلاہ بندیں پرپٹ سوارانی تیرگْواری ءَ #جھانزیب_ء_ابدالسلام بیران بیتگ آئی ءِ جون نادرھجاہ ءَ سرکنگ بیتگ۔

—★—
🔴ڈیرہ مراد جمالی: پٹرول پمپ بن گیپتگ | 3 کس ستکگ ءُ زدگ بیتگ

📎 نسیر آباد : #ڈیرہ_مرادجمالی شھدگ ءِ نزیک ءَ پٹرول پمپے ءِ بنگرگ ءَ 3کس سُتکگ ءُ زدگ بیتگ۔پٹرول پمپ ءِ نزیک ءِ دُکان ءُ دو گاڑیاں ھم تاوان بیتگ۔دو آس کشیں گاڑی گوں مزنیں کوشستے ءَ آس ءِ توسگ ءَ سوبمند بیتگ اَنت۔
—★—
🔴کیچ:تربت ءَ تبد ءُ گرم ءَ ایر داتگ

📎تربت: #تربت ءَ تبد ءُ گرم ءَ ایر داتگ۔ زیکیں روچ ءَ تربت بلوچستان ءِ گرم تریں جاہ بیتگ،گرمی ءِ کچ 50 سینٹی گریڈ پیتبند کنگ بیتگ۔
—★—
🔴 #کورونا : بلوچستان ءَ مساپربریں گاڑی ءُ ریل پچ کنگ نہ بہ اَنت

📎 شال: وتگڑیں سرکار ءَ یکبرے پد ءَ مساپربریں گاڑی ءُ ریل ءِ پچ نہ کنگ ءِ سوڑگ کُرتگ۔

وتگڑیں مزن وزیر #جام_کمال ءِ چیردستی ءَ بیتگیں نیاد ءَ #کوروناوائرس ءِ درگت ءُ نادرھجاھاں کورونا ءِ پھریزی سامانانی درگت ءَ چمشانک دیگ بیتگ۔
—★—
🔴شال:مزن وزیر جام کمال یک روچی تر ءُ تابے ءَ تُربت ءَ سربیتگ

📎 شال: سئے شمبے ءِ روچ ءَ وتگڑیںِ مزن وزیر #جام_کمال یک روچی تر ءُ تابے ءَ تربت ءَ دمگدار ءِ کارگِس ءَ سربیتگ۔دمگدار ءَ جام کمال ایمنی ءُ #کورناوائرس ءِ درگت ءَ سرپدی داتگ۔
آئی ءَ ھنکین جاندراھی بنجل ءَ ھم تر ءُ تاب کرتگ ءُ یک کریں تْرھجاھاں ابید آدگہ آسراتیانی چار ءُ گزار ئِے کرتگ ءُ ایپ سی ءِ بنجل ءَ ھم شتگ۔
—★—
🔴24 ادار ءِ تہ ءَ بلوچ سرمچارانی ارش ءَ پاکستانی لشکر ءِ 7 کارمند مرتگ‘آئی ایس پی آر

📎 روالپنڈی : پاکستانی لشکر ءِ رھوت دار ( #آئی_ایس_پی_آر) ءَ درشانی ءَ گْوشتگ: بلوچستان ءَ دو جتائیں اُرشاں 7لشکری کارمند مرتگ۔

آئی ایس پی آر ءَ گْوشتگ: چہ شال ءَ 90 کلومیٹر گستا #بولان_پیرگیب ءَ ایپ سی بلوچستان 79 ونگ ءِ تر ءُ گردی پیکپ گاڑی دگ ءِ کش ءَ چیر کرتگیں وت ساچیں دیرواگیں تراکے ءَ گوں نشانگ کنگ بیتگ۔

تراک ءِ پد ءَ گاڑی تباہ بیتگ ءُ گاڑی ءَ سواریں شش کارمند بیران بیتگ۔چہ مرتگیناں یک جونیئر کمیشنڈ آپیسر ءُ گاڑی ءِ ڈرائیور ھم ھوار اَنت۔

آئی ایس پی آر ءِ رد ءَ مرتگینانی تہ ءَ نائب سوبیدار اھسان اللہ ھان، نائیک زبیر ھان، نائیک اِجاز اھمد، نائیک مولا بکش، نائیک نور مھمد ءُ ڈرائیور ابدالجبار ھوار اَنت۔

دومی نیمگ ءَ کیچ مند ءَ بیست کلومیٹر دور چکاپ ءَ ھم ایپ سی ءِ پانگس ءِ سر ءَ سرمچاراں اُرش کرتگ۔اُرش ءَ لشکری کارمند امداد الی کشگ بیتگ۔

پیرگیب ءَ بیتگیں ارش ءِ زمہ واری #ھم_سنتیں_بلوچ_لشکر ( #یوبی_اے) ءُ#چکاپ ءِ ارش ءِ زمہ واری #بلوچ_استمانی_لشکر ( #بی_آر اے ) ءَ من اتگ۔ رمزان ءِ ماہ ءُ #کووڈ19 ءِ جاوراں بلوچستان ءَ پاکستان لشکر ءِ زوراکیانی تہ ءَ گیشی اتکگ ءُ دومی نیمگ ءَ ڈیھ پھازیں بلوچ سرمچاراں ھم وتی بیڑ گیش کرتگ اَنت۔

روکپتی بلوچستان ءِ سیم ءَ نزیکیں ھند ءُ دمگاں بیتگیں بیڑانی سر ءَ پاکستانی واکدارانی ھمے گْوشگ اَنت کہ اے بیڑانی پشت ءَ ھما واک اَنت کہ آ سیم ءَ آ دست نندوک اَنت بلے پیرگیب ءَ بیتگیں ارش پاکستانی سرکار ءَ اے ٹاہ ءَ گواچنی ءَ رد کنت کہ آئی ءَ بلوچستان ءِ جنگ ءَ باج برتگ ءُ بلوچ سرمچار نزور کرتگ اَنت۔گندگ بیت کہ ھر وھدے بلوچانی بگیری ءَ پاکستانی لشکر ءَ وتی زوراکی گیش کرتگ سرمچاراں ھم گوں وتی چیرکی جنگی رپکاں دژمن بے وار کرتگ۔
—★—
🔴پنجگور:چتکان جھلگ ءَ ناکو ءَ وتی برازتک کارچ جتگ ءُ کشتگ

📎 پنجگور: #چتکان_جھلگ ءَ ناکو ءَ وتی برازتک کارچ جتگ ءُ کشتگ۔ پولیس ءَ ڈودار دزگیر کرتگ۔
—★—
🔴ناوانندگی چہ کورونا ءَ مستریں وبایے بوت کنت | 2800 وانگجاھانی استاد ءُ کارمندانی مالی جاور ناگیگ اَنت – بلوچستان درسرکاری وانگجاہ

📎 شال:بلوچستان درسرکاری وانگجاھانی مزن سنت ءِ جارکش نذر بڑیچ، سنت ءَ ھواریں گلانی سروک ءُ باسکاں پہ واکداراں پچیں نمدی یے نبشتگ ۔ آیاں نمدی ءِ تہ ءَ نبشتگ: بلوچستان 2800 ءَ گیش وانگجاھاں 8 لک ءَ گیش نودربر،50 ھزار ءَ گیش استاد ءُ آدگہ کارمند مالی ناگیگیانی آماچ اَنت۔اگاں اے نیمگ ءَ دلگرش دیگ نہ بوت آؤکیں وھد ءَ بےکاری ءُ ناوانندگی ءِ پد ءَ پہ بلوچستان ءَ چہ کورونا ءَ مستریں وبایے تالان بیت۔
—★—

🗞*روکپتی بلوچستان🏝️*🗞

🔴 چھبار: اے دلجمیں گمانے نہ اِںت کہ کورونا نزور بیتگ – ڈاکٹرمھدی میرادی

📎 چھبار: مردم #کورونا وائرس ءِ درگت ءَ سرپد اَنت بلے آ پہ اے نادراھی ءَ پیشیگیں وڑ ءَ سنگین نہ اَنت پمیشکا مردمانی تہ ءَ اے وائرس ءِ تالانی گیش بیتگ۔ اے گپ #چھبار ءِ جاندراھی تک ءِ کارمستر #ڈاکٹرمھدی_میرادی ءَ گْوشتگ۔

آئی ءَ گْوشتگ: اے گمان کنگ کہ کورونا ءِ وائرس نزور بیتگ داں انیگ ءَ اے گپ ءِ دلجمی نیست ءُ ما ھمے گندگ ءَ ایں کہ نادرھانی کچ گیش بیگ ءَ اِنت۔مردم دلگوش بہ کن اَنت کہ دمگ کورونا ءِ زور گیش بیتگ ءُ نادرھانی ماں نادرھجاہ ءَ نپادی کنگ ءِ لوٹ گیش بیتگ۔

ھمے پیم واکدارانی گْوشگ اِنت کہ پھرگ ءَ ھم مردمانی چاگردی شملگ ءِ انان نہ داشتگ چہ ایشی ءَ کورونا ءِ نادراہ گیش بیتگ اَنت۔
—★—
🔴سرکاری واکدارانی بیڑ ءَ ھیرمند ءَ 6 نشہ بھا کنوک دزگیر چہ ٹنے ءَ برز نشھی نکان گرگ بیتگ

📎 دزاپ: #ھیرمند ءَ سرکاری واکاں بیڑ برتگ ءُ 6 مردم دزگیر کرتگ۔ سرکاری واکانی رد ءَ دزگیر بیتگیں مردم نشہ ءِ باپاری اَنت۔

#بلوچستان ءُ #سیستان ءَ ترامکاری ءِ سروک #مھمدکنبری ءَ گْوشتگ:پولیس ءَ ڈیھ ءِ میانی پھناتاں سیادی داروکیں نشہ بھا کنوکیں رمبے ءِ رندگیری کرتگ۔ چہ ایشی ءِ آسر ءَ ھیرمند ءَ 6 نشہ ءِ باپاری ، 4 گاڑی ءُ چہ پنھانیں جاھاں یک ٹن ءُ 117 کیلو ءُ 93 گرام نشھی نکان در جتگ۔ ایشانی تہ ءَ 59 کیلو ءُ 993 گرام تریاک،17 کیلو ءُ 600 گرام ھروئین ءُ 93 کیلو ءُ 500 گرام شیشہ ھوار بیتگ۔
—★—
🔴واش: نجپ آباد ءَ پہ کورونا ءِ نادراھاں 45 نپادی یک کریں تْرھجاھے برجم

واش: #نجپ آباد ءَ کورونا ءِ نادراھی ءِ تالانی ءَ بے تاھیری ودی کرتگ پہ کورونا ءِ گر ءُ دار ءَ سرکار ءَ پہ #کورونا ءِ نادراھاں 45 نپادی یک کریں تْرھجاھے برجم کرتگ۔
—★—
🔴واش: کورونا ءِ تالانی دیم ءِ دارگ ءَ ائید ءِ نمازمیتگانی مسیتاں بیت

📎واش: کسانیں ائید ءِ نماز درسیں میتگی مسیتاں گوں جاندراھی ءِ پھریز ءُ چاگردی شملگ ءَ وانگ بیت۔ #واش ءَ کہ #کورونا ءِ تالانی ءَ پد جاور ناگیگ اَنت ۔ دمگدار #ساھب_گل_سالھی ءَ درائینتگ: گوں شھرستان ءِ کورونا ءِ گر ءُ داری پتر ءُ آدینگ ءِ نمازانی پیشوکاں گپ ءُ تراناں پد کورونا ءِ تالانی ءِ دیم ءِ دارگ ءَ اے شور کنگ بیتگ۔آئی ءَ گْوشتگ واش ءِ جاور انچائیں روچانی وڑ ءَ نہ اَنت گْوستگیں روچاں نادراھانی کچ دو ھمینچک گیش بیتگ کہ آیانی تہ ءَ نیم #نجپ_آباد ءِ جاھمنند اِنت۔

سرکاری واکاں شون داتگ کہ مردم ائید ءَ گوں یک دومی ءَ دست ءُ دْروت ءُ امبازگری ءَ پھریز بہ کن اَنت اگاں مردماں پھریز نہ کرت جاور ھراب تر بہ اَنت۔

سرکاری واکداراں جار جتگ کہ ائید ءَ مزھبی پیشوک گوں کس ءَ گند ءُ گدار نہ کن اَنت ، نا دست ءُ دْروت ءُ امباز گری بیت۔دکان سھب ءِ ادار 7 ءَ گر داں بیگاہ ءِ ھشت ءَ پچ بہ اَنت ءُ اگاں کسے اے پرمان ءَ مان مہ یار ایت آئی ءِ دکان بند کنگ بیت۔
—★—
🔴روکپتی بلوچستان: مردمانی سھام ء ادالت ماٹو اَنت – مھمد باست درازاھی

📎 تھران: #بلوچستان ءُ گچینی #سراوان ءِ مردمانی سھام ء ادالت ماٹو اَنت۔اے گپ ماں #ایرانی_پارلیمان ءَ سئے شمبے ءِ روچ ءَ بیتگیں نیاد ءَ سراوان ءِ مردمانی جھگیر #مھمد_باست_درازھی ءَ گْوشتگ۔

آئی ءَ گْوشتگ: من چہ یازدھمی پارلیمان ءُ سرکار ءَ لوٹ کن آں کہ آ دمگ ءِ درسیں پروجیکٹ ، نادرھجاہ ، گیس رسانی کار، سراوان ءُ واش ءِ دگ، 300 کیلومیٹری کوچگی راہ،دمگ ءَ آپ رسینوکیں پائپ لائن ءِ جاہ پہ جاہ کنگ، مجمتما آموزش ء آلی ء سلامت ءُ سراوان ءِ سراسری زانشجاہ ءِ جوڑ کنگ ءِ درگت ءَ گامگیج زیرگ بہ بیت۔

آئی ءَ گْوشتگ: بژنی گپے کہ بلوچستان ءُ گچینی منی دمگ ءَ مردمانی سھام ء ادالت ماٹو کنگ بیتگ اَنت سرکار ءَ باید اِنت اے جیڑہ ءِ گیشینگ ءَ مادنیں گامگیج بہ زیر ایت۔

آئی ءَ دھمی پارلیمان ءِ منت گیپتگ کہ آئی ءِ جوڑ کرتگیں رھبند ءِ رد ءَ راج ءُ مزھبانی ایرجنگ ءُ ایلنگی ناراہ لیکگ بیتگ۔
—★—
🔴دزاپ: ٹیلی کام ءِ وائرانی دز دزگیر | 300 میٹر وائر ھم دست کپتگ

📎 #دزاپ: پولیس ءَ 37 سالی ورنایے ٹیلی کام ءِ وائرانی دزی ءِ میار ءَ دزگیر کرتگ۔ پولیس ءِ رد ءَ میاربار ءَ 21 رند ءَ ماں دزاپ شھر ءَ ٹیلی کام ءِ وائرانی دزی من اتگ۔پٹ ءُ پول ءَ چہ آئی ءَ 300 میٹر دزی ءِ وائر ھم دست کپتگ۔دز ءِ کار بیتگ کہ وائر ئِے بن داتگ ءُ تہ ءِ سیم کلنڈی زیروکانی گْور ءَ بھا کرتگ اَنت۔

🔚