ریڈیو نبشتانک: لشکر بلوچستان ءِ سپہ سالار سرینڈر بیتگ!!

ریڈیو نبشتانک : لشکر بلوچستان ءِ سپہ سالار سرینڈر بیتگ | ڈاؤنلوڈ

مراگش : ریڈیو نبشتانک
بنگپ : بی این پی مینگل ءِ سیاسی کرد ءُ کارانی سر ءَ چمشانک
نبشتہ : کازی ریھان
توار:کازی ریھان

شنگکار:ریڈیو زْرمبش بلوچی

نبشتانک ءِ نکان

لشکر ء بلوچستان ءِ سپہ سالار تسلیم بیتگ !!

چہ ھما روچ ءَ کہ بلوچستان ءَ بلوچ راجدوست ءُ راج پھزی سیاست بزاں راجداری بنا اِنت چہ ھما روچ ءَ گوں زْرمبشت ءَ بندوکیں مردمانی سر ءَ پاکستانی زوراکی ھم بنا بیتگ ، راجدوستیں راجداری چوناھیگا زورگیری ءِ پدگوانک بیت ۔ ھما ڈیھ ءُ سرڈگاراں کہ آیانی بنی جاھمنندانی سر ءَ دری واک ءُ لشکر بیڑ بر اَنت ءُ آیاں چہ وتی گلزمین ءِ مستری ءِ واک ءَ زبھر کن اَنت ، مِھتری ءَ پُل اَنت ، «راجدوستیں راجداری» تیجار کنت ۔ بلوچستان ءَ ینگ بلوچ ، انجمن ء اتھاد ء بلوچاں ، انجمن ء اسلاہ ء بلوچاں ءُ پد ءَ شاھگانیں رنگے ءَ سرجمیں بلوچستان ءَ واجہ ابدل ازیز کرد ، واجہ ایسپ ازیز مگسی ، گوس بکش گزگی مینگل ، گوس بکش بزنجو ، گل ھان نسیر ءُ ملک سئید دھوار ءِ راجداریں سسسا ءِ برورد ءَ « کلات اسٹیٹ نیشنل پارٹی » جوڑبوت۔ آئی ءِ لوٹ ھمیش بیتگ کہ بلوچستان چہ انگریزانی چیردستی ءَ آزات ءُ وتواکیں ڈیھے بہ بیت ۔ آ روچاں کہ بلوچستان ءِ نیم انگریزانی پنجگان اَت ، چُنڈے اُمان ءِ بادشاہ ءِ مُچان اَت ءُ آ دگہ بھر چوناھیگا سرداری کینگاں سیکارچ کرت اتگ اَنت ءُ کلات ءِ واکداری ءِ سیم نز اتکگ ءُ تیوک ءَ کلات ءِ پھناتاں پشت کپتگ اَت، سردار انگریزانی کاسگ چَٹ اَت اَنت ۔ کلات اسٹیٹ نیشنل پارٹی ءِ دْرپش (بیرک / پرچم ) بلوچستان ءِ آزمان ءَ آجوئی ءِ اوستے بوت ءُ چم اِت ، سھر ءُ سبزیں رنگانی میان ءَ استالے کہ زانشت ءِ چیدگ اِنت۔

بلے سرداراں وش نہ بوت کہ نیزگار ءُ پدمنتگانی اوبادگ بلوچ سرڈگار ءَ « اُستمانی سرکار » ءِ واب ءَ بہ گند اَنت ، کلات اسٹیٹ نیشنل پارٹی چوناھیگا انگریزانی شَورانی دیم ءَ میلانک اَت ۔ انگریز کہ جیڑگ ءَ اَت اَنت ھندوستان ءَ بھر بہ کن اَنت ءُ ونڈے وتی دوست ءُ ھمدلیں ھندوستانی مسلماناں بہ دئے اَنت داں آیانی سیتاں بہ پھز اَنت ءُ اے دمگاں پہ انگریز ءِ دم توسیں جھانی واکداری ءِ ساسار ءَ کڑکے پچ بہ بیت۔پہ ایشی ءَ آیانی زانوگراں سما بوت کہ بلوچستان اگاں نوک جوڑ بیتگیں پاکستان ءِ چیردست کنگ مہ بیت ، پاکستان وتی واکداری ءَ داں دیراں داشت نہ کنت ۔ سردار وَ ھشکیں زنڈیں گردن ءُ پاگ ءُ پڑکہ اَت اَنت ، ھمک سردار دہ ءُ بیست کلدار ءِ نھاد ءَ انگریزانی زرھرید اَت ۔ ھان بلوچ دیریں چہ بلوچ ءِ جامگ ءَ درکپتگ ءُ ھان کلات جوڑ اَت ، کلات ءِ رنگ ءُ شان دری وزیرءُ گزیرانی پندلاں پیلوشتگ اَت ، چہ انگریزاں پرمان ءُ میراھمدیارھان ءَ جی ، ھان کلات ءَ « کلات اسٹیٹ نیشنل پارٹی » ءِ سر ءَ بندش جت ۔ آنگو کہ لباں کلات ترینت اد ءَ بلوچستان ءِ آجوئی ءِ روچ بیگواہ بوت اَنت ، اوستے کہ ھست اَت چارموٹیں سردارانی کپتہ کردی ءِ وڈالیگ بوت۔

انچوش کہ « پاکستان » نامیں ھڑکا کش اتگیں نسیریں بلا اے دمگ ءَ پزور ءُ پُرواک بوت، آئی ءَ وتی پنجگ بلوچستان ءَ سک دات اَنت ۔ سردار وتی نوک نھالیں واجہ ءِ در ءَ شکیندیم بوت اَنت ۔ لھتے سرداراں راجداری ءِ تک ءَ بٹال ءُ ٹاپار دیگ ءِ جاہ ءَ وتی ھند ءُ دمگاں وتی لٹ ءُ پل ءِ برجاھی ءِ سر ءَ دلگوش دات ۔ بلے سئے ٹک مینگل ، مری ءُ بگٹی سرداراں وتی ھند ءُ دمگانی واجھے ءَ ابید سرجمیں بلوچستان ءِ واکداری ءِ تہ ءَ بائیواری ءِ لوٹ کرت۔

آ نیمگ ءَ روس « امریکی ءُ سرمایہ داری » سیتانی دیم ءَ وتی بائیوارینکی لیکھانی پد ءَ جنزان اوگان سرکار ءِ لوٹ ءَ اوگانستان ءَ سر بوت ۔ جھان ءِ گیشتریں ٹِکاں آشوب شنزگ ءَ اَت ، ھمے شنز ءُ شموراں اد ءَ ھم یک رندے پد ءَ «بلوچستان » ءِ ھشکاوگیں سرڈگار ءَ آجوئی ءِ واھگ تْرک اِت ۔ یک نیمگے «بی ایس او رنگیں» اُستمانی گل دومی نیمگ ءَ زوراوریں سردارانی پہ وتی سیتاں سیاسی گر ءُ چیلاں ، بھرمند بیگ۔ ھمے گر ءُ چیلاں برے «کوہ » ، برے «پاکستانی پارلیمان»ءُ برے « لشکر ء بلوچستان»، مینگل سردار ھم بلوچستان ءِ سیاست ءِ ٹوھیں بائیواراں یکے زانگ بیت ۔

مئے پدریچ ءِ سیاسی سنچ ءَ کہ ردوم زرت ، ما دیست کہ سردار اتاالا مینگل ، وت سیاست ءِ پڑ ءَ بورتاچی ءَ گون نہ اِنت بلے آئی ءِ جاہ ءَ اکترمینگل آئی ءِ جھگیری کنگ ءَ اِنت ،برے برے کماش اتاالا ءِ ھم روتاکی درشان شنگ بیتگ اَت اَنت کہ برے سرمچاران ءَ شگان ئِے جتگ ءُ برے سرکار ئِے ڈوبار اتگ اَت ۔ برے ورنایاں گْوشتگ اَت ئِے کہ آکوٹانی سر ءَ تْراک کنگ ءَ بلوچستان آجو نہ بیت ، برے سکین ئِے داتگ کہ بلوچستان ءِ ورنا پہ ڈیھ پھزی ءَ وتکوش بہ کن اَنت ۔ کماش اکبرھان بگٹی ءَ کوہ سنگر کرت اَنت ، اکبرھان ھما سراں یکے کہ مدام مینگل ءُ مری سرداراں ڈالچار کرتگ ءُ دل ءِ کر ءَ جاہ داتگ اَت ، زانگ ءَ اَت کہ نی سر ءَ کپتگیں جنگ پہ سرانی موکگ ءَ یلہ نہ کنت نی شکلیں جنگانی باریگ اِنت ۔ھما وھد ءَ آئی ءَ پہ مینگل سردار ءُ آئی ءِ سیاست ءَ شکساتگ اَت کہ : ’’ اے کاگدی شیر اَنت ۔ ‘‘ پرچا کہ چد ءُ پیش اکترمینگل ءَ گُر اتگ اَت کہ اگاں ڈیرہ بگٹی ءَ دانگے تیر آس دیگ بہ بیت آئی ءِ پسہ چہ جھلاوان ءَ رس ایت ۔ اکبرھان پہ ڈیھ ءِ واکداری دیمون بوت ۔ بلوچستان ءَ آس روک بوت ۔ ورنا رم پہ رم ، کوھاں در کپت اَنت ۔ زمین ءَ بی آر پی ، بی ایس او ءُ بی این ایم ءِ کارکن بلوچ راج ءَ آجوئی ءِ پنت ءُ جنگ ءِ سکین ءَ دیگ ءَ اَت آں ۔ نا پہ نیشنل پارٹی ءَ راھے پشت کپتگ اَت نا پہ بی این پی ءَ کہ بلوچ ءِ لوٹاں لگتمال بہ کنت ءُ دگہ سیاستے بنا بہ کنت ۔ چہ اکبر ھان ءِ شھیدی ءَ پد اکترمینگل ءَ « سرداری جرگھے » سلیمان داؤد ءِ سروکی ءَ لوٹ ات ءُ گْوشت کہ میان اُستمانی تک ءَ بلوچستان ءِ آجوئی ءِ پدترینگ ءَ کوشست کنگ بیت ءُ اے رد ءَ ھان کلات بزاں سلیمان داؤد پہ لندن ءَ درکپت۔

ستمبر 2006 ءَ اکترمینگل ءَ جار جت کہ آ چہ شال ءَ روانکے کش ایت ءُ ماں گوادر ءَ نندانک دنت ۔مشرپ سرکار ءَ سردار زادگ ءِ واگ تْرند گیپت اَنت ، سردار ءِ لشکر پشت کنزان بوت ، آجوئی دوستیں مردم چہ بنیاد ءَ مزنین ءُ کسانیں سردار دوئیناں وتی ابیلاں نہ اشتگ اَت اَنت ۔اکتر ءَ وتی نگیگی دیست ءُ جار جت کہ چہ شال ءَ گوادر ءَ نہ رو ایں بلکیں چہ گوادر ءَ روانکے کش ءُ شال ءَ کا ایں ۔ بلے مشرپ ءَ ھچ نہ من اِت ، اکتر بندیگ بوت آئیءِ ھمراہ چیر ءُ زیر بوت اَنت ۔ ایوک ءَ شھید ھبیب جالب گوادر ءَ سر بوت ، گوادر ءَ دہ ءُ بیست کس شھیدھبیب جالب ءُ ناکوھسین ءِ سروکی ءَ ملاپازل پڑ ءَ در کپت اَنت ، بی این پی ءِ ھچ ڈلگیں کارکن منی دوئیں دیدوکاں نہ دیست ۔ ناکوھسین ءُ ھبیب جالب پولیس ءَ دزگیر کرت اَنت ءُ لشکر ء بلوچستان ءِ روانک چہ بنا بیگ ءَ پیش آسر بوت ۔ 9 مئی 2008 ءَ سندھ ءُ بلوچستان سرکار ءَ اکترمینگل ءِ سر ءَ جتگیں ملام پد زرت اَنت ءُ اکترمینگل یلہ بوت ۔ اپریل 2009 ءَ بی این ایم ءِ سرکماش شھیدواجہ گلام مھمد ، شھیدلالامنیر ءُ شھیدشیرمھمد شھید کنگ بوت اَنت ۔ بلوچستان ءِ ورنایاں پد ءَ باھند کرت ، بی این ایم ءِ کارکناں بی این ایم ءِ کلوہ گوں تیزی ءَ بلوچستان ءِ کنڈ کنڈ ءَ برت ءُ سرکرت ۔ ھما اکترمینگل کہ آئی ءَ «شھیدواجہ گلام مھمد» ءِ نام ھم نادوست اَت ، آئی ءَ جار جت کہ آ مکوران ءَکئیت ءُ مرگاپ ءِ شھیدانی درگت ءَ پچیں مراگش کنت ۔ ھمک مراگش ءَ اکترءَ ھمے گلگ درشان کرت کہ من ھرچی پہ بلوچستان ءَ بہ کن آں بلے منی کرتگین ءَ کس نہ ساڑائیت______ءُ زیت اکترمینگل لندن ءَ شت ءُ داں سالاں بندر ئِے کرت ۔ 2009 ءَ سردار اتاالا ءَ ھم گْوشت کہ بی این پی کوھی گلے نہ اِنت بزانت ھمیش اَت کہ پارلیمانی سیاست ءَ برجاہ دار ایت ۔ ڈن ءَ ھم اکترمینگل ءَ گوں دگہ راجدوستیں گلاں دیری برجاہ داشت ءُ مدام آیانی میان ءَ نسیلی ءُ دیری ءِ کوشست ئِے کرت ۔ داں بی آر پی ءَ ھمے نیمون ءَ بی این ایپ یلہ کرت کہ بی این ایپ پرچا بی این پی ءِ سر ءَ ایراد گیپت ۔ 2013 ءَ پاکستانی گچینکاریاں پیش اکترمینگل ءَ گوں پاکستانی واکداراں دئے ءُ زیر کرت ءُ پہ وتی سیاسی نامداری ءِ برجاہ دارگ ءَ وتی شش دانکانی ھنپ کرت ءُ 25 مارچ 2013 ءَ واتر بوت ءُ پاکستانی الیکشناں بھر ئِے زرت ، اے پیم مئے یات ءُ چم گنداں اکترچہ لشکرءبلوچستان ءُ کلات جرگہ ءِ لوٹاں پدکنز اِت ءُ گوں وتی شش دانکاں پاکستانی لشکر ءِ دیم ءَ سرینڈر بزاں تسلیم بوت۔ اکتر ءَ باور اَت کہ آ 2013 ءِ کلپیں گچینکاریاں باج بارت بلے آ تیوک ءَ وتی جند ءِ نشست ءَ سوبین بوت ءُ دومی نشست چہ گوادر ءَ ھمل کلمتی ئیگ اَت کہ آ چوش روچ پل ءَ ھما دیم ءَ کہ واکدار اَنت ھما نیمگ ءَ تر ایت ۔ ھمے پیم ھمل ءِ بی این پی ءِ نیمگ ءَ لیٹگ اے گپ ءِ ھم درانگازی اَت کہ پاکستانی واکدار ءُ بی این پی ءِ نیام ءَ ھمدلی ءُ ھمدستی بیتگ ۔2018 ءِ گچینکاریاں اے ھمدلی دوسری گیش کرت ءُ نی پہ آیوکیں گچینکاریاں اکترمینگل ءُ بی این پی ءِ راہ ءِ دیم ءِ پل ءُ پلارانی دور کنگ ءَآ گیشترساٹگ ءُ پیازگ بیگ ءَ اِنت ۔ چہ ایشی ءَ «نیشنل پارٹی» ءَ ھم چہ وتی بوٹی ئیں واجہ کاراں پونز کرتگ ءُ گلگ مند اِنت کہ آیانی ھمدلی « سیاھیں بوٹ» ءَ ھچ مان نہ یارتگ ۔ ھمے پیم یک بے تاھیری یے جام کمال ءُ چانیگوارانی تہ ءَ ھم گندگ بیگ ءَ اِنت ۔
اگاں کسے سرپد بیگ مہ لوٹ ایت آ منی درشان کرتگیں اے سیاسی ندارگانی تہ ءَ بی این پی ءُ اکترمینگل ءِ کرد ءَ ھچ پوہ نہ بیت ءُ آ جون 2019 ءَ پاکستانی چاگردی رسانکدر ءَ شنگ بیتگیں اے دانک ءَ ھم پہ نیم چمی دلگوش نہ کنت کہ : اکترمینگل ءَ چہ پاکستانی سرکار ءِ نیمگ ءَ 15 ارب کلدار دیگ بیتگ ۔