ھال : 14 جنوری 2020

زرمبش ھال » 14 جنوری 2020 | ڈاؤنلوڈ

ھال : 14 جنوری 2020

رودرتکی بلوچستان

•بی ایس او آزاد ءِ سرکماش « سھراب بلوچ » ءَ بی ایس و تمپ ءِ راھشون « سمی » ءِ بیرانی ءَ وتی دلپدردی درشان کنان ءَ گْوشتگ کہ ’’ سمی ءَ تمپ رنگیں پدمنتگیں جاھے ءَ پہ بی ایس او ءِ پُرکار کنگ ءَ بنکی کردے پیلو کرتگ ۔ آئی ءَ وتی ڈبو پہ شائستگی ءُ جوانی پیلوکنان زْرمبشت ءُ گل ءِ تہ ءَ جنین آدمانی پُرکار کنگ ءِ کارانی تہ ءَ سھرائیں کردے پیش داشتگ ۔
آئی ءَ گْوشتگ : سمی ءِ گیدر ءُ نترسیں کردگارانی برورد ءَ زورگر ءِ پندل بے سوب بیتگ اَنت کہ آئی ءَ لوٹ اتگ جنین آدم بلوچ زْرمبشت ءَ ھوار مہ کپ اَنت ، آئی ءِ اے کردگار مدام یاد کنگ بہ اَنت۔
•ھرنائی ءِ دمگ « شاھرگ ءُ نسک » ءَ پاکستانی لشکریاں بیڑ برتگ ۔ شش کس آوار جنگ ءَ پد بیگواہ کرتگ ۔
آوار جنگ بیتگیں مردمانی تہ ءَ « شریپ ء ھیرمھمدمری ، وزیر ء وھاب مری ، پرویز ء شکرھان مری ، مرادھان ء دولت مری ، توتی ء ھندو مری ءُ پیرمردیں جنگومری» ھوار اَنت ۔ چہ تیرتیج آواران ءَ ھم «سئید ء اللہ داد » نامیں ورنایے آوار جنگ بیتگ ۔ سئید تیرتیج ءِ نندوک اِنت ۔
•شال ءَ رودرتکی بائی پاس ءَ «دلوتی پاسار» ءَ لوگے ءِ تہ ءَ گیس ءِ پُر بیگ ءَ مات ءُ پت گوں وتی سئے چکاں بیران بیتگ اَنت ۔ چہ گیس ءِ لیک ءَ بیران بیگ ءِ یکیں ھپتگ ءَ اے سیمی وھیل اِنت۔
•جام کمال ءَ چہ امسرک ءُ ھوراں تاوان دیستگیں دمگانی گوں بالگرد ءَ ٹپاسی کرتگ ۔
• زھور بلیدھی ءَ گْوشتگ کہ مکوران ءَ چہ ھور ءَ تاوان دیستگیں دمگاں کمکی کار برجاہ اِنت ءُ راہ پچ کنگ بیگ ءَ اَنت ۔
• شال ءِ «کمک دمگدار اورنگ زیب بادینی » ءُ میٹروپولیٹن کارپوریشن ءِ تْرامکار « تارک مینگل » ءَ گْوشتگ کہ شال ءَ چہ « سیزدہ انچ » ءَ گیش امسرک گواری بیتگ ، آیاں چہ سوادگر ءُ شھریاں دزبندی کرتگ کہ آ چہ شھر ءَ ڈن کوچگی دمگاں روگ ءَ پھریز بہ کن اَنت ۔ آئی ءَ گْوشتگ کہ پہ راھانی پچ کنگ ءَ مئے کر ءَ 12 کسانیں لوڈر ، 2 مزنیں لوڈر ءُ چار گریڈر ھست کہ راھاں پچ کنگ ءَ اَنت۔
•پشتونکا ملی اوامی پارٹی بلوچستان ءِ سروک « اُزمان کاکٹر» ءَ گْوشتگ کہ دو روچانی تہ ءَ چہ گیس ءِ لیک بیگ ءُ بانانی کپگ ءَ 28 مردم بیران بیتگ ، سرکار ھچ رنگیں کمکی گامگیج نہ زیرگ ءَ اِنت۔
•شال ءِ بالیگ پٹ ءَ آسراتی نہ بیگ ءِ انگیز ءَ درسیں بال ماٹو اَنت۔
• نیشنل پارٹی ءَ گْوشتگ کہ سردار اتاالا کلانھیں سیاستدانے ما چوش بِھ نہ جیڑ ایں کہ اے رنگیں کلانھیں کارستانی کرد مان بہ گیش ایت ۔
•بی این پی مینگل ءِ سروک ءُ « پاکستانی سینیٹر ڈاکٹرجھانزیب جمالدینی » ءَ گْوشتگ کہ ما سرکار ءِ ھم سنّت ایں پمیشکا « آرمی ایکٹ » ءِ پلہ مرزی کرتگ ۔
•بلوچستان اوامی پارٹی ءِ ماں کاسگ چٹیں پارلیمان ءَ باسک «ھالد ھان مگسی» ءَ گْوشتگ کہ دوسال سرجم بیتگ بلے سرکار ءَ مردماں آسیدگی نہ داتگ ، گْرانی گیش بیتگ ، سرکار ءَ کہ ھرچی گْوشتگ انی ھما گپانی چپی ءَ کار کنگ ءَ اِنت ۔
•اسلم بھوتانی ءَ گْوشتگ سرکار ءَ سدکی داتگ کہ گوادر ءِ دریاوردانی گْوستگیں روچاں بیتگیں تاواناں پُر کنت ، بلے دنیگت مادنیں گامگیج گندگ نہ بیت داں وھدے کہ زمینءَ ھچ نیست مردم ایمن نہ بہ اَنت ۔
•ماں اسلام آباد ءَ پاکستانی سینیٹر کبیر مھمد شھی ءَ گْوشتگ سی پیک ایوک ءَ مزنیں ٹاپار ءُ بٹالے چہ ایشی ءَ بلوچستان ءَ ھچ رنگیں سیت نہ رس ایت ، چہ امسرک گواریاں راہ ءُ در بند اَنت ۔

روکپتی بلوچستان

•بلوچستان ءُ سیستان ءِ «استاندار اھمدالی موھبتی » ءَ گوں رسانکدر ءَ گپ جنان ءَ گْوشتگ کہ زرباری بلوچستان ءَ بیتگیں ھور ءَ 890 کوچگ آپ ءَ گٹ بیتگ اَنت ، شپ ءُ روچ ءِ کارانی برود ءَ داں انیگ ءَ 500 کوچگانی راہ پچ بیتگ ۔بزاں دنیگت 390 ھارجتیں کوچگاں پہ روگ ءُ درکپگ ءَ زمینی راہ نیست ۔
ایرانی رسانکدر ایرنا ءِ جھگیر ءِ ھال ءِ رد ءَ راہ نہ بیگ ءِ انگیز ءَ کمکی کار اوشت ءُ سست روی ءِ آماچ اَنت ، نزیک ء 120 ھزار ھارجتیں مردم 250 ءَ بہ گر داٰ ں300 کوچگ، چھبار ءِ کوچگانی تہ ءَ کمک لوٹ اَنت ، دشتیاری ءِ دمگ ، پلان ءِ لھتے ھند ءُ تلانگ ءُ کسرکند ءِ لھتے ءِ جاھاں راہ بند اَنت ، سدھانی کساس ءَ کمک رسینوکیں باربری ءُ کسانیں گاڑی راھانی پچ بیگ ءِ ودار کنگ ءَ اَنت۔
سرکاری بنشون ءِ گْوشگ ءِ رد ءَ پہ مردمانی کمک ءَ « سپاہ » ءَ سئے بالگرد دیم داتگ کہ مردماں کمک کنگ ءَ اَنت۔
سپاہ ء پاسداران ءِ « سرکماندار سردارھسین سلامی » ھم چہ کنرُک ءِ بالیگ پٹ ءَ بلوچستان ءَ اتکگ ، چہ سپاہ ءِ نیمگ ءَ ھمے گْوشگ بیگ ءَ اِنت کہ سردارسلامی پہ ھارجتیں مردمانی جاور ءِ چارءُ گزار اتکگ۔ھمے پیم ایرانی رھوتی کارانی وزیر« مھمد جواد آزری جھرمی» مروچی سئے شمبے ءَ چھبار ءَ سر بیتگ ، داں ھارجتیں مردمانی جاور ءَ بہ گند ءُ کمک رسانی کاراں سیل بہ کنت چہ اے نام گیپتگیں مردماں ابید ایرانی « پارلیمان ءِ کارمستر الی لاریجانی » ھم دوشمبے ءَ چھبار ءَ اتکگ داں اے جاورانی چارگزاری ءَ بہ کنت۔
رسانکدری بنشونانی رد ءَ چہ 12 ھزار ءَ گیش ھارجتیں مردماں کمک رسینگ بیتگ ءُ ھمے میان ءَ 53 لاپ پری جنین پہ نادراھجاہ برگ بیتگ ۔
چہ ھار ءَ جاشک ءِ 53 وانگجاہ پُرشت ءُ پْروش بیتگ۔
•ایرانی پارلیمان ءِ جھگیراں « چھبار ءِ آزات ھنکین » ءِ کارانی سیم ءُ کارپڑ ءِ شاھگان کنگ ءِ سر ءَ ھم پتی درشان کرتگ۔

پاکستان

•پاکستانی مزن آمیدگس ءَ « پی آئی اے نجکاری کیس» ءَ گوش داران گْوشتگ کہ ما ریاستی سازماناں بند بیگ ءَ نہ ھل ایں ، ھما مردم بالیگ تاچگ ءَ اَنت کہ آیاں کلپیں مدرک گون اِنت ، چوشیں کارمنداں یک پہ یک گچین کن ءُ کش ایں ۔
•سرکاری وکیل ءَ گوں آمیدگس ءَ گْوشتگ کہ انامرھیم ءِ گور ءَ انچیں کاگد ءُ کراچ بیتگ اَنت کہ چہ آیاں زانگ بیت کہ آ پہ دری ڈیھاں چاریگی کنگ ءَ بیتگ۔پاکستانی سر آمیدگس ءَ بیگواھیں مردمانی وکیل « انامرھیم » ءِ یلہ کنگءِ سر ءَ « لاھور مزن آمیدگس » ءِ پرمان ماٹو کرتگ ۔
•پاکستانی سرکار ءَ پاکستان ءِ پیشیگیں سروزیر نوازشریپ ءِ ،کہ پہ نادراھی ءِ درمان کنگ ءَ چہ زندان کشگ بیتگ ، درگت ءَ گْوشتگ : مارا آئی ءِ نادراھی ءِ سر ءَ شک اِنت ، اے رد ءَ مارا ھما دستاویز دیگ بیتگ اَنت اے ناسرجم اَنت۔زانگ بہ بیت کہ گوستگیں پاکستانی سروزیر ءِ اکسے شنگ بیتگ کہ آئی ءِ تہ ءَ آ چاھواری جاھے ءَ چاہ ورگ ءَ اِنت۔
•پاکستان ءَ ھمے مالی سال ءِ بنداتی ششیں ماھاں گاڑیانی بھا بیگ ءِ تہ ءَ کمی اتکگ ۔
•ماں لندن ءَ ایم کیو ایم ءِ سروک « امران پاروک » کوش کیس ءِ رد ءَ آمیدگس ءَ گْوشگ بیتگ کہ گواہ وتی گپانی پیتبند کنائینگ ءَ ساڑی نہ اَنت ، اے رد ءَ واکداراں گیشتر موہ دیگ بہ بیت۔
•پاکستانی بست ءُ بندءَ چہ سارتی ءِ زور ءَ 75 مردم بیران بیتگ ، اے مردم پاکستانی چیردستیں کشمیر ءُ بلوچستان ءَ بیران بیتگ اَنت ۔
•چہ روالپنڈی پولیس ءِ نیمگ ءَ گْوشگ بیتگ کہ پولیس ھیلکاری بنجل ءِ مستر « ایس ایس پی میاں ابرار ھسین نیکوکارہ » ءَ وت کشی کرتگ۔
•ھما گچینی آمیدگس ءَ کہ پرویز مشرپ مرگ ءِ ڈنڈ داتگ « لاھور ءِ مزن آمیدگس » ءَ آمیدگس ءِ جند ناراھیں آمیدگسے لیک اتگ ۔

ایران

•ایران ءِ مھتر ھسن روھانی ءَ گْوشتگ کہ یوکرینی بالیگ ءِ کپگ ءِ وھیل ءِ سر ءَ باید گچینی آمیدگسے ، جوڑ کنگ بہ بیت۔اے درگت ءَ بازیں مردم دزگیر ھم کنگ بیتگ ءُ سرکاری بنشون ھمے گْوشگ ءَ اَنت کہ اے کار ءِ زمہ واری ءَ یک مردمے ءِ سر ءَ لڈگ جْوان نہ اِنت۔ایرانی سرکار ءَ چہ راجانی سنّت ءَ ھم لوٹ اتگ کہ آ پہ اے وھیل ءِ پول ءَ گوں آیاں کمک بہ کنت۔
•تھران ءِ شھرداری ءَ جار جتگ کہ آ بلوچستان ءِ ھارجتیں مردماں 100 میلیارد تومن ءِ کمک کنت ۔
•سرجمیں ڈیھ ءِ « بیمہ ءِ مستر گلامرزا سلیمانی » ءَ سئے شمبے ءِ روچ ءَ گوں باپاریاں تْران کنان ءَ گْوشتگ چوش کہ ڈیھ ءُ دمگ ءَ لوگءُ پاباری جاہ ترسانی آماچ اَنت ، پمیشکا چہ سرکار ءِ نیمگ ءَ چوشیں زرے ایرکنگ بیتگ کہ ابرمی کارانی پد ءَ اتکگیں تاواناں پُر بہ کنت۔چہ پارلیمان ءِ منگ ءَ پد سال 99 شمسی ھجری ءَ ھمیشی ءِ سرءَ کاربنا کنگ بیت۔اے رد ءَ پہ ھمک لوگے ءَ 30 ملیون چہ سرکار ءِ ونڈ ءُ بیمہ ءِ شرکتانی نیمگ ءَ دیگ ءِ شور کرتگ ۔ اے درگت ءَ اے ھم شور ھست کہ سالے 120 ھزار تومن پہ بیمہ ءَ دیگ بہ بیت چہ ایشاں 60 ھزار تومن سرکار ءُ 60 ھزار مردم دئے اَنت۔
• سئے یورپی ڈیھاں شور کرتگ کہ آ گوں ایران ءَ ماٹو بیتگیں گپ ءُ تْران ءَ بنا کن اَنت ۔ پرانس ، برتانیا ءُ جرمنی « ایران ءِ ھستگی پت نامک » ءِ باسک اَنت ۔ ھستگی پت نامک ھما بولک اِنت کہ گوں ایران ءَ لوٹ کنگ ءَ اِنت کہ آ « ھستگی تراک » بزاں ایٹم بم جوڑ مہ کنت ۔اے سئے ئیں ڈیھ مروچی پہ یورپی سنّت ءَ نمدی نبیس اَنت ۔ دومی نیمگ ءَ برتانیا ءِ سروزیر « بوریس جانسون » ءَ گْوشتگ کہ ٹرمپ اگاں بہ لوٹ ایت اے گپ ءُ تْرانانی بھر بیت کنت۔
•امریکی در ی کارانی وزیر مایک پومپئو ءَ ایراد گیپتگ کہ سردار سلیمانی ءِ جنازہ ءَ مردم ایرانی سرکار ءَ پہ زر ءُ لب آؤرتگ ءُ مُچ کرتگ اَنت ءُ اے زوراکانی کار اِنت۔

اوگانستان

•اوگانستان ءِ گچینکاری تک ءَ گْوشتگ کہ پنچ ھزار گچینکاری گسانی « گچیندانک » پد شماری کنگ بہ اَنت ۔
•یوکرینی وھیل دیستیں بالیگ ءَ سرانو بیتگیں ھپت اوگانیانی پجار بیتگ ۔
•چہ ھور ءُ امسرک گْواری ءَ اوگانستان ءَ 24 بیران ءُ 40 زدگ بیتگ ۔
•اوگانستان ءِ « مھتر اشرپ گنی » ءَ گْوشتگ کہ چہ مروچیگ ءَ دیم پولیس جنگانی تہ ءَ بھر نہ زیر ایت ۔ گْوستگیں 18 سال ءَ پولیس ءَ جنگانی تہ ءَ بھر زرتگ ءُ نی باید وتی جند ءِ ڈبو ءَ پیلو بہ کنت کہ راھبند ءِ واکداری اِنت۔ آئی ءَ گْوشتگ کہ پولیس ءِ نیرو ءَ ساز ءُ سامان ءِ رد ءَ پُرھاٹیگ کن ایں ءُ اے کارانی تہ ءَ ڈنی دزمانجنی ءَ آسرین ایں ۔

جھان

•بنگلہ دیش ءَ «سوپی » ستک داریں مردمے ءِ درشان ءِ بگیر ءَ مردماں زھرشانی کرتگ ءُ پولیس ءَ سوپی اسلام ءِ بگیری ءَ درشان دیگ ءِ ملامءَ دزگیر کرتگ۔
•جرمنی ءِ آمیدگس ءَ سوریا ءَ کشت ءُ کوش ءِ تہ ءَ ھوار بیگ ءِ میار ءَ شامی شھرمنندے داں سَندویے زندانی کنگ ءِ ڈنڈ داتگ ۔
•امریکا ءَ چین ، کرنسیانی تہ ءَ رد ءُ ناراھی کنوکیں ڈیھانی لڑ ءَ در کرتگ ۔
•پلپین ءَ تال نامیں « آس شانے » ءِ پرُکار بیگ ءَ پد مردماں گْوشگ بیتگ کہ آ چہ کر ءُ گْور ءَ پاد بہ یا اَنت ۔ چہ آسشان ءَ مزنیں کچے ءَ پُر درکپتگ ءُ دیمتر ءَ گمان اِنت تاوانباریں مواد در بہ کپ ایت ۔
•سائنسداناں شھاب سِنگےءِ ٹپاس کنان انچیں موادے در گیپتگ کہ آیانی رد ءَ اے ماں جھان ءِ درساں کوھن تریں مواد اِنت ۔ آیانی گْوشگ ءِ رد ءَ اے مواد مئے روچ ءُ آئی ءِ چاگرد ءَ تروکیں سیارگانی جوڑ بیگ ءَ پیسر تر اِنت۔
•سائنسداناں شپچر ءِ چھرگیں پھبادے جوڑ کرتگ کہ وھیل جتیں دمگاں بیوکیں کمکی کاراں دزیاری کنت ۔