📰 روتاک زرمبش بلوچی: دو شمبے»ریڈیو ھال 04 مئی 2020

🗞سرھال🗞

◾️بی این ایم اپریل ماہ ءِ گزارش:پاکستانی لشکر ءِ چہ سد ءَ گیش لشکر کشیاں 12 مردم شھید| 103 بیگواہ | 50 گِس سوتکگ
◾️ تمپ: بی آر اے ءِ سرمچاراں چہ پاکستانی لشکر ءِ انگر ءَ سنگت کش اتگ ءُ دژمن تاوانبار کرتگ
◾️کاھان: #کاھان ءِ نزیک ءَ پاکستانی لشکر ءِ پانگس ءِ سر ءَ سلاھبندیں مردمانی ارش ءَ زورگریں لشکر ءَ تاوان ءِ گمان اِنت۔
◾️میٹ وڈ ءَ برجاھیں پاکستانی لشکر ءِ پانگس ءِ سر ءَ ارش کرتگ‘ یو بی اے
◾️بیگواھیں بلوچانی توار ءِ زھرشانی برجاہ | زھرشانی گدان ءَ 3946 روچ سرجم | پاکستانی لشکر لوگانی سر ءَ ھمروچ بیڑ برگ ءُ زوراکی کنگ ءَ اِنت‘ماماکدیر
◾️پجیگ ءَ پاکستانی لشکر ءِ سر ءَ ارش کرتگ ‘ بی آر اے ۔ یو بی اے
◾️کوروناوائرس:بلوچستان ءَ 36نوکیں نادراہ،نادراھانی کچ1172 ءَ سربیتگ | 3 بیران
◾️آواران: پاکستانی لشکر ءِ لشکر کشی برجاہ | 8 کس آوار
◾️واشک: چہ گاڑی ءِ چپی بیگ ءَ جنینے بیران ءُ 6 کس زدگ
◾️کار ءِ سر ءَ نہ روگ ءِ پد بی ایم سی نادراھجاہ ءِ 8 کارمند ماٹو
◾️شال:دگ وھیلے ءَ مردمے بیران ءُ دو زھگاں ھوار 3کس زدگ
◾️روکپتی بلوچستان: ھم روچ 10 ءَ گر داں 15 کووڈ-19 ءِ نوکیں نادراہ دیم ءَ آیگ ءَ اِنت ‘ ڈاکٹر ھاشمی شھری
◾️چہ 27 اردیبھشت ءَ بازیں جاھاں وانگجاھانی پچ بیگ ءِ گمان اِنت
◾️روکپتی بلوچستان: 17 شھرستاناں کورونا ءِ زور کم اِنت ءُ اسپیت لیکگ بیتگ اَنت
◾️میرجاوہ: گوں سیمسر ءِ پانکاں شپوکانی میڑ | یک شپکے دزگیر | دوگاڑی ءُ 2.5 نیم نشھی نکان ھم گرگ بیتگ
◾️ پاھو سر ءَ اتکگیں دو مردمانی شیرازی کشندہ چہ مولانا ابدلھمید ءِ میانکاری ءَ پاھو ءَ رک اتگ
◾️کووڈ-19: جھان ءَ #کوروناوائرس ءِ آماچیں مردمانی کچ 34 لک ءُ 76 ھزار ءَ گیش بیتگ وھدے کہ 2 لک ءُ 45 ھزار ءَ گیش نادراہ بیران بیتگ۔
🔴پاکستان ءِ گونڈیں ھال

#پاکستان

🔹 چہ کورونا وائرس ءَ دگہ 22 مردم بیران | بیران بیتگیں مردمانی کچ 457 ءَ سر بیتگ ءُ نادراھانی کچ 20080 اِنت۔

🔹سند: سرکار ءَ کورونا بندآرگ ءِ وھد ءَ 35 شرکت کار کنگ ءِ اجازت داتگ۔

🔹وزیرستان ءَ پی ٹی ایم ءِ راھشون شھید آرپ وزیر ءِ جنازہ ءِ نماز آئی ءِ میتگ گواھوا ءَ وانینگ ءُ آ ھمود ءَ زمین ءِ میار کنگ بیتگ شھید آرپ وزیر ءِ جنازہ ءِ نماز ءَ بازیں مردمی ءَ بھر زرتگ | 5 مئی ءَ چہ پی ٹی ایم ءِ راھشونانی نیمگ ءَ زھرشانی ءِ جار پرینگ بیت۔

🔹امریکی اھوالکار ڈینیل پرل ءِ کھول ءَ چہ سند آمیدگس ءِ نیمگ ءَ کشندھانی ڈنڈ ءِ کم کنگ ءِ بگیری ءَ پاکستان ءِ بنجاھی آمیدگس ءَ کیس کرتگ۔

🗞رودرتکی بلوچستان🌴🐪🗞

🔴 بی این ایم اپریل ماہ ءِ گزارش:پاکستانی لشکر ءِ چہ سد ءَ گیش لشکر کشیاں 12 مردم شھید| 103 بیگواہ | 50 گِس سوتکگ

📎 شال : #بلوچ_راجی_زْرمبشت ( #بی_این_ایم) ءِ بنجاھی جارکش #دلمراد ءَ مردمی اگبالانی لگتمالی ءِ رد ءَ اپریل ءِ ماہ ءِ گزارش ماں رسانکدراں شنگ کُرتگ ۔
گزارش ءِ تہ ءَ گْوشگ بیتگ: اپریل ءِ ماہ ءَ چیردستیں بلوچستان ءَ زورگیریں پاکستانی لشکر ءِ زوراکیانی تہ ءَ گیشی گندگ بیتگ۔سرجمیں بلوچستان ءَ پاکستانی لشکر ءَ چہ سد ءَ گیش لشکرکشیاں باز مردم آوار جتگ۔لشکرکشیاں زمینی لشکر ءِ ھواری ءَ بمبگواریں بالگرد ھم کارمرد کنگ بیتگ اَنت۔

اپریل ءِ ماہ ءَ #آواران ، #کیچ ، #پنجگور ، #مشکے ، #جاھو ، #مند ، #دشت ، #بلیدہ ، #زامران ، #پروم ، #کاھان ءُ #تلی ءَ ھوار بازیں دمگاں پاکستانی لشکر ءِ رستریں زوراکی برجاہ بیتگ اَنت۔اے لشکر کشیانی تہ ءَ 12 کس پاکستانی لشکر ءُ چریکانی دست ءَ شھید کنگ بیتگ۔کیچ مند ءَ وتی راہ ءَ روگ ءَ بیتگیں مردمانی سر ءَ پاکستانی لشکر ءَ تیرگواری کرتگ۔تیرگواری ءَ ورنایے شھید بیتگ،کولواہ ءَ پاکستانی لشکر ءَ دو شپانک تیرجتگ ءُ جون کور ءِ کش ءَ چگل دات اَنت۔ڈیرہ بگٹی ءَ نادراھے چہ واکدارنی نیمگ ءَ راھداری نہ رسگ ءِ پد ءَ شھید بیتگ۔چہ جتائیں جاھاں دست کپتگیں چار مردمی جونانی پجار نہ بیتگ۔

پاکستانی لشکر ءَ لشکر کشی ءِ میان ءَ 50 ءَ گیش گس سوتکگ ءُ بازیں گسانی سامان ، مردم ءُ پس ءُ دلوت ھم دز اتگ اَنت۔ھمے ماہ ءَ چہ پاکستانی لشکر ءِ آزارجاھاں 21 مردم یلہ کنگ بیتگ۔یلہ بیتگیں مردمانی تہ ءَ 13 مردم ھمے ماہ ءِ جند ءَ بزاں اپریل2020 ءَ لشکرکشیانی میان ءَ آوار جنگ بیتگ اَنت ءُ لٹ دیگ ءَ پد یلہ کنگ بیتگ اَنت۔وھدے کہ 5 کس 2019 ءُ 3 کس 2018 ءِ بیگواہ چہ لشکر ءِ آزارجاھاں یلہ کنگ بیتگ اَنت۔

ھمے ماہ ءَ چہ کولواہ ءَ پاکستانی لشکر ءَ ماتے گوں زھگاں آوار جتگ ءُ وتی گدان ءَ برتگ اَنت ءُ بازیں روچاں بیگواہ کنگ ءَ پد یلہ داتگ اَنت۔مروچی ھم سرجمیں بلوچستان ءَ بازیں جنین ءُ زھگ پاکستانی لشکر ءِ آزارجاھاں زوراکیانی دیمپان اَنت۔

دل مراد ءَ گْوشتگ کہ داں زمہ واریں جھانی واکدار بلوچستان ءَ مردمی اگبالانی سر ءَ گامگیج مہ زیر اَنت،پاکستانی لشکر ءِ زوراکیانی تہ ءَ کمی گندگ ءَ نئیت۔
—★—
🔴 تمپ: بی آر اے ءِ سرمچاراں چہ پاکستانی لشکر ءِ انگر ءَ سنگت کش اتگ ءُ دژمن تاوانبار کرتگ

تمپ : بی آر اے ءِ بندر ءِ انگر کنگ ءَ اتکگیں پاکستانی لشکر بلوچ سرمچاراں لٹ داتگ ءُ پدکنزگ ءَ لاچار کرتگ۔
#بلوچ_استمانی_لشکر ( #بی_آر_اے ) ءِ جارکش #بیبگر ءَ پہ رسانکدر ءَ شکساتگیں وتی درشانے ءَ گْوشتگ: یک شمبے ءِ سھب ءَ پاکستانی لشکر ءَ #کلبر ءِ کوھاں گل ءِ بندر انگر کرتگ ءُ بیڑ آؤرتگ۔بلوچ سرمچاراں دژمن ءِ سر ءَ ارش کرتگ چہ سرمچارانی ارش ءَ دژمن پدکنزگ ءَ لاچار بیتگ ءُ انگر ءَ کپتگیں سرمچار گوں دراھی ءَ درکپگ ءَ سوبین بیتگ۔

سرمچاراں گوں دژمن ءَ داں ادارے ءَ جنگ برجاہ داشتگ ۔ اے جنگ ءَ زورگریں لشکر ءِ بازیں کارمند مرتگ ءُ باز زدگ بیتگ۔

بیبگر ءَ گْوشتگ:سرمچارانی بگیری ءَ پاکستانی لشکر ءِ انگیں لشکرکشی بے سوب بیتگ اَنت ءُ پْروش وارتگیں لشکر آبادیاں پیرین ءُ جنینانی سر ءَ وتی زھر ءَ کشگ ءَ اَنت۔

آئی ءَ درائینتگ: داں کہ زورگریں لشکر بلوچستان ءَ ساڑی اِنت مئے جنگ برجاہ مان اِیت۔
—★—
🔴کاھان: #کاھان ءِ نزیک ءَ پاکستانی لشکر ءِ پانگس ءِ سر ءَ سلاھبندیں مردمانی ارش ءَ زورگریں لشکر ءَ تاوان ءِ گمان اِنت۔
—★—
🔴میٹ وڈ ءَ برجاھیں پاکستانی لشکر ءِ پانگس ءِ سر ءَ ارش کرتگ‘ یو بی اے

📎 کاھان : یوبی اے ءَ گوں کاھان ءَ ھمدپیں ھند میٹ وڈ ءَ پاکستانی لشکر ءِ پانگسے ءِ سر ءَ ارش ءِ زمہ واری من اِتگ۔

#ھم_سنتیں_بلوچ_لشکر ( #یو_بی_اے) ءِ جارکش #مزار ءَ گْوشتگ: یک شمبے ءِ روزرد ءَ سرمچاراں گوں #کاھان ءَ ھمدپ #میٹ_وڈ ءِ ھند ءَ برجاھیں پاکستان ءِ لشکری پانگس ءِ سر ءَ گوں مزن ءُ کسانیں سلاھاں ارش کرتگ۔چہ اے ارش ءَ زورگریں لشکر ءِ یک کارمندے جاہ پہ سکٹ ءُ باز زدگ بیتگ۔

آئی ءَ درائینتگ:مئے ارش داں بلوچستان ءِ آجوئی ءَ برجاہ مان اَنت۔
—★—
🔴بیگواھیں بلوچانی توار ءِ زھرشانی برجاہ | زھرشانی گدان ءَ 3946 روچ سرجم | پاکستانی لشکر لوگانی سر ءَ ھمروچ بیڑ برگ ءُ زوراکی کنگ ءَ اِنت‘ماماکدیر

📎 شال: #بیگواھیں_بلوچانی_توار ءِ شدکشیں زھرشانی گدان ءَ 3946 روچ سرجم بیتگ۔ ایچ آر سی پی ءِ رمبے ءَ گدان ءَ گندک کرتگ ءُ گوں بیگواھیں مردمانی کھولاں ھمدلی درشان کرتگ۔

اے درگت ءَ بیگواھیں بلوچانی توار ءِ کمک سرکماش #ماماکدیر ءَ گْوشتگ کہ پاکستان ھمک روچ بلوچ ءِ سر ءَ زوراکی ءِ نوکیں درچے چکاس ایت۔ھزارھاں بلوچ بیگواہ ءُ شھید کنگ بیتگ۔بلوچستان ءِ کُنڈکُنڈ ءَ لشکرکشی برجاہ اِنت ءُ مردمانی گِس سوچگ بیگ ءَ اَنت۔گِسانی ساماناں پاکستانی لشکر دزگ ءُ برگ ءَ اِنت،اے وھیل ھمک روچ بیگ ءَ اَنت۔

آئی ءَ گْوشتگ کہ پاکستانی لشکر ءِ زوراکی ءُ کارشون ءِ گندگ ءَ پد ما ھمے گْوشت کن ایں کہ آؤکیں روچاں،پاکستانی لشکر ءِ زوراکی تْرند بہ اَنت بلے جھانی گْوستانک ءَ اے گپ پدر کرتگ کہ چیردستانی توار گوں زوراکی ءَ بند کنگ نہ بیت۔پُرایمنیں مردم پہ زور چہ راہ ءَ گستا کنگ نہ بہ اَنت۔پاکستانی لشکر ءِ درمردمی زوراکی بلوچاں گیش مھکم کنت۔

آئی ءَ گْوشتگ: وتگڑیں راجدوستیں گل مدام پاکستان ءِ ھمگام بیتگ اَنت پرچا کہ آ وتی جند ءَ ھمے وڑ ءَ برجاہ داشت کرت کن اَنت اے چاگرد دژمن نہ ایوک ءَ ایمنیں جھد ءِ دیم ءَ میلانک اَنت بلکیں مردمانی شھیدی ءُ آوارجنی ءَ ھم ھوار اَنت۔

ماما ءَ گْوشتگ کہ پاکستان ھچ میان اُستمان ءِ راھبندانی پابند نہ اِنت ءُ چہ پاکستان ءَ چوشیں اوست ءِ دارگ وتی رد دیگ اِنت۔
—★—
🔴 پجیگ ءَ پاکستانی لشکر ءِ سر ءَ ارش کرتگ ‘ بی آر اے ۔ یو بی اے

📎 شال: #ھم_سنتیں_بلوچ_لشکر ( #یو_بی_اے ) ءِ جارکش #مرید ءُ #بلوچ_استمانی_لشکر ( #بی_آر_اے ) ءِ جارکش #سرباز ءَ ماں رسانکدر ءَ وتی یکجاھیں درشانے ءَ گْوشتگ: سرمچاراں بولان ءِ بنجاھی شھدگ ءِ سر ءَ درنجن ءَ پاکستانی لشکر ءِ گدان ءِ سر ءَ چہ دونیمگ ءَ گوں راکٹ ءُ مزنیں سلاھاں ارش کرتگ۔ چہ اے ارش ءَ پاکستانی لشکر ءَ مزنیں کچے ءَ جانی ءُ مالی تاوان بیتگ۔

تران کنان ءَ آھاں گْوشتگ: چہ زورگر ءِ گدان ءَ کمیں گستا پاکستانی لشکر ءِ تر ءُ تابی رمب ءِ سر ءَ ھم ارش کنگ بیتگ۔اے ارش داں ادارے ءَ برجاہ بیتگ ءُ پاکستانی لشکر ءِ 4کارمند بیران بیتگ ءُ باز زدگ بیتگ ۔چہ سوبمندیں ارش ءَ پد سرمچار وتی سنگراں واتر بیتگ اَنت۔

گڈی ءَ آھاں گْوشتگ کہ پاکستانی لشکر ءِ بگیری ءَ ارش داں بلوچستان ءِ آجوئی ءَ برجاہ مان اَنت۔
—★—
🔴کوروناوائرس:بلوچستان ءَ 36نوکیں نادراہ،نادراھانی کچ1172 ءَ سربیتگ | 3 بیران

📎 شال:کورونا وائرس گوں تْرندی ءَ برجاہ اِنت۔جاندراھی تک ءِ رد ءَ #کوروناوائرس ءَ بلوچستان ءِ 13 ھنکین وتی انگر ءَ کرتگ دگہ 36نوکیں نادراھانی دیم ءَ آھگ ءَ پد نادراھانی کچ 1172 ءَ سربیتگ ءُ 3کس بیران بیتگ۔بیران بیتگیں مردمانی کچ 19 ءَ سربیتگ۔
—★—
🔴آواران: پاکستانی لشکر ءِ لشکر کشی برجاہ | 8 کس آوار

📎 آواران: #جاھو ءَ پاکستانی لشکر ءِ لشکرکشی برجاہ اِنت 7 کس پاکستانی لشکر ءَ آوارجتگ ءُ برتگ۔آوار جتگیں مردم #سکی_داد_ء_دینار ، #پکیر_ء_بیان ، #اشرپ_ء_الابکش ، #بشیراھمد_ء_بازو ، #کاروالا داد_ء_دینار ءُ #بشام اَنت۔

اے مردم پاکستانی لشکر ءَ چہ جاھو ءِ ھلک #سورگرلاراندڑی ءَ آور جتگ ءُ بمبگواریں بالگردانی سر ءَ وتی گدان ءَ برتگ اَنت۔

یات بہ اِت کہ جاھو ءَ پاکستانی لشکر ءِ لشکر کشی ءَ 3 ھپتگ سرجم بیگ ءَ اِنت۔اے وھد ءَ جاھو #سورگر سرجم ءَ پاکستانی لشکر ءِ انگر ءَ اِنت۔

آواران #ڈل_بیدی ءَ ھم پاکستانی لشکر ءَ بیڑ برتگ ءُ #پیرجان_ء_ائیدو آوار جتگ ۔بیڑ ءِ وھد ءَ پاکستانی لشکر ءَ زھگ ءُ زالبول بیھار داتگ اَنت ءُ گِسانی سامان دز اِتگ ءُ برتگ اَنت۔

گْوستگیں روچ ءَ ھم لشکر ءَ چہ ڈل بیدی ءَ #کادربکش_ء_موسا آورجتگ اَت۔

چیردستیں بلوچستان ءَ چہ گْوستگیں ماہ ءَ پاکستانی زورگریں لشکر ءِ زمینی ءُ آزمانی لشکر کشی یکشل ءَ برجاہ اِنت۔
—★—
🔴واشک: چہ گاڑی ءِ چپی بیگ ءَ جنینے بیران ءُ 6 کس زدگ

📎 واشک: #واشک #ناگ ءَ زامیاد گاڑی یے ءِ چپی بیگ ءَ جنینی بیران ءُ دگہ 6کس زدگ بیتگ۔
زدگ بیتگیں نزیکیں نادراھجاہ ءَ سرکنگ بیتگ اَنت۔
—★—
🔴کار ءِ سر ءَ نہ روگ ءِ پد بی ایم سی نادراھجاہ ءِ 8 کارمند ماٹو

📎شال: وتگڑیں بلوچستان سرکار ءَ #کورونا وائرس ءِ پژدر ءَ کار ءِ سر ءَ نہ روگ ءِ پد ءَ #بی_ایم_سی_نادراھجاہ ءِ 8 کارمند ماٹو کرتگ۔
—★—
🔴شال:دگ وھیلے ءَ مردمے بیران ءُ دو زھگاں ھوار 3کس زدگ

📎شال: #شال_ڈبل_روڈ ءَ گاڑی ءِ ڈکگ ءَ #سلمان نامیں مردمے بیران بیتگ ۔وھدے کہ #مھمدارسلان ، #ایان ءُ #بی_بی_اربیازدگ بیتگ اَنت۔پولیس ءَ جون ءُ زدگ بیتگیں نادراھجاہ ءَ سر کرتگ اَنت۔

🗞*روکپتی بلوچستان*🗞

🔴 روکپتی بلوچستان: ھم روچ 10 ءَ گر داں 15 کووڈ-19 ءِ نوکیں نادراہ دیم ءَ آیگ ءَ اِنت ‘ ڈاکٹر ھاشمی شھری

📎دزاپ: روکپتی بلوچستان ءِ #بلوچستان ءُ #سیستان پرگنگ ءَ ھم روچ کورونا ءِ داں 10 ءَ بہ گر 15 نادراہ گیش بیگ ءَ اِنت۔

بلوچستان ءَ جاندراھی تک ءِ سروک #ڈاکٹرسیدمھمدھاشمی_شھری ءَ گوں جاندراھی تک ءِ وزیر ءَ بیتگیں تامربندی نیاد ءَ اے گپ جتگ اَنت۔

آئی ءَ گْوشتگ: مردمانی باور ءُ گمان ءَ چپ گرم ءِ گیش بیگ ءَ کورونا ءِ زور کم نہ بیتگ۔بلوچستان ءَ کووڈ-19 ءِ نادراھانی کچ 700 ءِ نزیک ءَ رس اتگ۔گیشتریں نادراہ شھرانیگ اَنت ءُ چہ ایشان 85 ماں سدی نادراہ دزاپ شھر ئیگ اَنت۔

آئی ءِ گْوشگ اَت: نادراھجاہ ءَ کورونا ءِ نادراھانی آیگ کم بیتگ بلے پرانکی ئیں نادراھاں زانگ بیت کہ کورونا چہ ھما مردماں شنگ بیگ ءَ اِنت کہ آیانی تہ ءَ نادراھی ءِ ھچ نشانی نیست اَنت۔
—★—
🔴چہ 27 اردیبھشت ءَ بازیں جاھاں وانگجاھانی پچ بیگ ءِ گمان اِنت

📎 دزاپ : چہ #کورونا ءِ پژدر ءَ بند کنگ بیتگیں وانگجاھانی چہ 27 اردیبھشت ءَ پچ بیگ ءِ گمان درشان کنگ بیگ ءَ اِنت۔ چہ سرکاری بنشون ءِ نیمگ ءَ گْوشگ بیگ ءَ اِنت ھما دمگاں کہ کورونا ءِ پژدر ءَ جاور گھتر اَنت گوں جاندراھی پھریزاں وانگجاہ پچ کنگ بہ اَنت۔

—★—
🔴روکپتی بلوچستان: 17 شھرستاناں کورونا ءِ زور کم اِنت ءُ اسپیت لیکگ بیتگ اَنت

📎 روکپتی بلوچستان: چہ سرکار ءِ نیمگ ءَ 17 شھرستان اسپیت لیکگ بیتگ۔ اے ھما شھرستان اَنت کہ سرکار ءِ نز ءَ اد ءَ #کورونا ءِ پژدر ءَ جاور گیگ اَنت۔
اے شھرستان ایش اَنت۔

🔹️ #تپتان
🔹️ #چھبار
🔹️ #واش
🔹️ #دشتیاری
🔹️ #دلگان
🔹️ #زابل
🔹️ #زهک
🔹️ #سیب_ءُ_سوران
🔹️ #پنوچ
🔹️ #کسرکند
🔹️ #کنرک
🔹️ #مهرستان
🔹️ #میرجاوه
🔹️ #گھ ( #نیکشھر)
🔹️ #نیمروز
🔹️ #هامون
🔹️ #هیرمند

اے شھرستانانی تہ ءَ #دزاپ ، #پھرگ ءَ #شستون ( #سراوان ) گون نہ اَنت۔
—★—
🔴میرجاوہ: گوں سیمسر ءِ پانکاں شپوکانی میڑ | یک شپکے دزگیر | دوگاڑی ءُ 2.5 نیم نشھی نکان ھم گرگ بیتگ

📎 #میرجاوہ: سیمسر ءِ سلاھبندیں شپک ءُ سرکاری واکانی میان ءَ میڑ بیتگ۔ میڑ ءِ آسر ءَ 2.5 ٹن جتاجتائیں نشھی نکان دست کپتگ ءُ مردمے دزگیر کنگ بیتگ۔

سیمسرپانکانی سروک #سردارمھمدملاشاھی ءَ گْوشتگ:سرکاری واک چہ چیریں ھالے ءَ شپوکانی درگت ءَ سرپد بیتگ اَنت ءُ بیڑ اش برتگ۔ بیڑ ءِ آسر ءَ یک ڈودارے ءِ دزگیری ءِ پجیگ ءَ 2 ٹویوٹا گاڑی، 2 ٹن ءُ 306 کیلوگرام وڑ وڑیں نشھی نکان کہ ایشانی تہ ءَ 2 ٹن ءُ 70 کیلوگرام تریاک، 143 کیلوگرام ھشیش،60 کیلوگرام شیشہ ءُ 33 کیلوگرام دگہ نشہ گون بیتگ۔ ابید چہ ایشاں سلاہ ھم گرگ بیتگ۔
—★—
🔴 پاھو سر ءَ اتکگیں دو مردمانی شیرازی کشندہ چہ مولانا ابدلھمید ءِ میانکاری ءَ پاھو ءَ رک اتگ

📎 دزاپ: دو کوش بیتگیں مردمانی پشت پداں چہ #مولاناابدلھمید ءِ گْوشگ ءَ کشندہ پھل کرتگ۔

کشندہ ایران ءِ شھر #شیراز ءِ نندوک اِنت کہ آئی ءَ 13 سال پیش #شستون ( #سراوان ) ءَ دو کس کشتگ ءُ ھمے میار ءَ زندان ءَ بیتگ۔ چہ آمیدگس ءِ نیمگ ءَ آئی ءَ مرگ ءِ ڈنڈ دیگ بیتگ بلے چہ مولانا ابدلھمید ءِ گْوشگ ءَ 10 اردیبھشت ءَ کشگ بیتگیں مردمانی پشت پداں ھون بھا زرتگ ءُ کشندہ چہ مرگ ءِ ڈنڈ ءَ آزات کرتگ۔
🔚