لالا داں گُڈّی ءَ بلوچ راج ئیگ اَت

نبشتہ کار: یاسر بلوچ

 راج ءِ درد وار ءُ راج ءِ پھاز دار راج ءِ ورنا ءُ کماش اَنت، ھر وھد ءَ وتی راج ءِ کوھیں گمانی بار وتی کوپاگاں زرتگ ءُ گوں سکیاں دیم پہ دیم اَنت کہ یک راجی جھدے بنا کرتگ۔ اے ھما جھد اِنت کہ وتی راج ءَ چہ اے تھاری ءَ در کنگ ءُ یک رژنائیں بانداتے ءِ دیگ اِنت ءُ وتی آؤکیں پدریچ ءِ زندمان ءِ رژناہ کنگ اِنت۔

داں اے سْیاہ ءُ تھاریں گلامی ءِ شپ مئے راج ءِ سر ءَ ھست اِنت، مئے انچوش کہ انوگیں پدریچ چوں گلامی ءِ آس ءَ سُچگ ءَ اِنت آیوکیں پدریچ ھم ھمے رنگ ءَ گلامی ءِ آس ءَ سُچ ایت۔ اے گلامی ءِ آس مئے راج ءِ ورنا ءُ کماش، تپلاں مان پتائیت ءُ آیانی زندمان ءَ تباہ ءُ برباد کنت۔

ھمے وڑ ءَ بلوچ راج ءِ ورنا ءُ کماشاں وتی زندمان وتی راج ءِ نام ءَ نَدْر کرتگ ءُ روژنائیں سُھبے ءِ رند گپتگ ءُ درکپتگ اَنت دانکہ اے سْیاہ ءُ تھاریں شپ چہ بلوچ راج ءِ سر ءَ دور بہ بیت ءُ گورگیں سُھبے وش آتک بہ کنت۔ اے سْیاھیں شپ گلامی ءِ شپ اِنت کہ بلوچ راج ءِ چاگرد تھاری ءَ مان پوش اِتگ۔ اے سْیاھیں شپ ءِ سھب بلوچستان ءِ آجوئی اِنت۔ اے سھب ھما وھد ءَ بام دنت کہ آ روچ ءَ بلوچستان چہ زوراکانی دست ءَ آجو بیت۔

چوش کہ لالا ءِ نام ءَ گرگ ءَ اِتاں لالا بزاں ,,براس،، چوش کہ گْوھار وتی براس ءَ گْوش ایت لالا، بلے ما ا٘د ءَ ھما لالا ءِ گپ ءَ اِیں کہ آ تھنا آئی گْوھار ءُ براساں لالا نہ گْوشتگ، بلکیں بلوچ راج ءَ آ لالا ءِ نام ءَ توار کرتگ۔ آ شھید انور پنام ء لالا ھیبتان بوتگ کہ آ مَشکے ءِ جاہ منند ات ءُ مَشکے ءِ نامدارین ءُ جنگولیں سرمچار شھید ابدُلھالک پنام ء سردو جان ءِ برات اِنت۔

شھید انور پنام ء لالا ھیبتان وت ھم راجی جھد ءِ بھرے بوتگ۔ ءُ شھید انور چہ راجی جھد ءِ بھر بوگ ءَ رند مَشکے ءُ دگہ بازیں دمگاں لالا ھیبتان ءِ نام ءَ زانگ بوتگ، بلے ھمک مردم ءَ آ تھنا لالا ءِ نام ءَ توار کرتگ۔ چی ءَ کہ آ راجی جھد کارے بوتگ، پمیشکا آ ھمک گس ءِ مردم ءَ وتی براس لیک اِتگ۔ ھمے سوب ءَ آ ھیبتان یا انور ءِ نام ءَ توار نہ کرتگ اگاں توار کرتگ گڑا آ تھنا لالا ءِ نام ءَ توار کرتگ۔

لالا ھیبتان بندات ءَ بلوچستان لبریشن پرنٹ ءِ سرمچارے بوتگ ءُ باز پند بُرّ اِتگ، جھد کرتگ ءُ دیمونی داتگ۔ چوش کہ آئی زامات ءُ کھول ءِ دگہ مردم دژمن ءِ زوراکیانی دیمپان کنگ بوتگ اَنت ءُ دژمن ءِ دست ءَ آئی مردم شھید کنگ بوتگ انت۔ ھمے سوب ءَ آ پروش دیگ بوت ءُ دژمن ءِ دیم ءَ سِلاھے چگل دات اَنت، بلے آ دژمن ءِ نہ بوت۔

چہ اے ویل ءَ پد مدام پاکستانی پوج ءَ لالا ھیبتان وتی بنجل ءَ برت ءُ پہ وت کار گرگ ءِ زور دات، بلے آ پہ دژمن ءَ کار ءَ تیار نہ بوتگ۔ چہ دژمن ءِ دلسْیاھیاں لالا گیشتر شال ءُ کراچی ءَ شتگ مَشکے ءَ نہ بوتگ۔

وھدے کہ آ دوبر مَشکے ءَ شتگ پد ءَ ھم پاکستانی پوج ءَ پہ ایمنی نندگ نیشتگ، مدام زور داتگ کہ آ سرمچارانی بگیری ءَ کار کنگ ءَ تیار بہ بیت، بلے آ تیار نہ بوتگ۔ ھمے میان ءَ 8 اپریل 2025 ءَ پاکستانی پوج ءَ مَشکے کندڑی ءَ لالا ءِ گس ءَ بیڑ برتگ اَت کہ لالا ھیبتان ءَ زور بیگواہ بہ کناں۔

بلے آ وھدے سرپد بوتگ کہ پوج منی آوار جنگ ءَ آتکگ، گڑا آ وت ءَ پوج ءِ دست ءَ نہ دنت بلکیں گوں پوج ءَ جنگ بندات کنت۔ داں باز اداراں برجاہ بیوکیں میڑ ءَ بازیں کچے ءَ پوج ءِ کارمند مِر اَنت ءُ ٹپی بنت، ھمے میڑ ءَ انور پنام ء لالا ھیبتان ءُ آئی ورناھیں بچ ارشاد نمیران بنت۔

گُڈّی ءَ یک برے پد ءَ گْوشاں لالا ھیبتان داں گُڈّی ءَ بلوچ راج ئیگ اَت، پمیشکا آئی راجدْروھی ءِ زند ءَ گیش پہ وت ءَ شھیدی ءُ سُھر سریں تیر گچین کُرتگ، اَنت۔ ھمیش اَت لالا ءِ مھر گوں وتی ماتیں گُلزمین ءَ، گوں وتی تنگوھیں بچّ ءَ کولیگ بوت بلے راجدْروہ نہ بوت۔ چی ءَ کہ آ سرجم ءَ وتی بلوچ راج ئیگ اَت، پہ راج ءِ وشنامیں زندمان ءَ کُربان بوت۔