مشکے گُرانڈی ءِ شھیدانی روچ
نبشتہ کار: یاسر بلوچ
ھر مردم ءِ وتی کرد ءُ بستارے بیت، ھر مردم وت ءَ یک کچ ءُ جاہ ءَ سر کنت، چوش کہ راجی جھد کار ءِ وتی یک جتائیں کچ ءُ بستارے ۔ ھمک مردم جھدکار ھم بوت نہ کنت دانکہ آئی توکل مھکم مہ بیت ءُ آئی ءَ سگ ءُ اوپار مہ بیت۔ چی ءَ کہ داں کسے وتی توکل ءُ ایمان ءَ مھکم کرت نہ کنت گڑا آ ھچ بر شریں جھدکارے نہ بیت۔
کسے کجام کار ءِ تہ ءَ کہ جھد کنت الّم آئی تہ ءَ تاوان ھست ءُ نپ ءُ پائدگ ھم بیت۔ بلے یک روچے آئی جھد الّم رنگ کار ایت۔ پہ زمین ءِ موکگ ءَ جھد کنگ ءَ ھون ریچگ لوٹ ایت۔ پہ ھون ءِ ریچگ ءَ ھما مردم جاڑیگ بیت کہ آئی توکل ءُ ایمان مزن بہ بیت۔ بلے وھدے کہ جھد پہ راج ءُ زمین ءَ بہ بیت گڑا اود ءَ مزنیں توکل ءُ مزنیں ایمان لوٹ ایت۔ داں تئی توکل ءُ ایمان مھکم نہ بنت گڑا دژمن ھم تئی نزوری ءِ درگیجگ ءِ جھد ءَ کنت ءُ مردم ءَ پروشگ ءِ جھد ءَ کنت۔
وھدے کہ دژمن مردم ءِ نزوری ءَ زانت گڑا آئی ءَ الّم پروش دات کنت۔ آ پمشکا جھدکارانی کھولاں جنگ ءُ کشگ ءِ بیھار ءَ دنت یا آیاں گار ءُ بیگواہ کنت آ ھمے سرپد بیت چہ ایشی جھد کار پروش وارت مئے دیم ءَ سرا جھل کنت پہ وتی راج ءُ زمین ءِ جھد ءَ دزکش بیت ءُ پما کار کنت۔
گُوش اَنت کہ جنگ سکّیں بے رھمیں چیزے چہ دوستیں سنگتاں تو گستا کنت سیاد ءُ آزیزاں گستا کنت۔ ھما سنگت ءُ دوستیں مردم کہ پہ چم ءِ چارگ ءَ دل نہ بنت بلے ھمایاں جنگ سدیت ءُ دور کنت۔ وھدے کہ ھما مھروان ءُ دوستیں سنگت کہ بے آیاں یک پاسے ءِ گوازینگ باز گران بوتگ بلے مرچی سرجمیں زند ابید چہ ھما پُل گونگیں سنگتاں گوازینگ لوٹ ایت اِنت۔
چوش کہ ھمک جھد کار ءِ دیمونیانی مٹ کس نہ بیت ءُ ھر کسے وتی داب ءَ جھد کنت، کسے سنگراں نند ایت ءُ دژمن ءِ سر ءَ تیرگوار ایت کسے وتی جھدکارانی سر ءَ نبشتہ کنت ھمک مردم ءِ جتائیں کردے بیت۔ کسے ماں سنگراں نشتگیں جنگولے ءَ وردنے چیزے دنت کہ آ کوھاں پہ مئے وشیں باندات ءَ کپتگ اَنت تُن ءُ گژن اوپار کنگ ءَ اَنت۔ اے ھمک بلوچ ءِ سر ءَ پرز اِنت کہ وتی راجی جنگولاں کمک بہ کنت۔
بلوچ راجی آجوئی جنز ءِ چہ سرمچاراں نمیرانیں سنگت شھید کیپٹن سرور پنام دُرّک بلوچستان لبریشن پرنٹ (بی ایل ایپ) ءِ چہ اسنائپر ٹولی ءِ سنگتاں یکے اَت۔ آ سکا لائک ءُ شیواریں جنگولے اَت۔ آ مشکے گجر ءِ جاہ منند اِنت ءُ چہ دو ھزاد دوازدہ ءَ راجی جنز ءَ ھوار بوتگ۔ آئی گوں توکل ءُ ایمان ءَ جھد ءِ ھر وڑیں سکّی ءُ جنجالانی دیمپانی کرتگ بلے آئی ایمان ھمینکس مھکم بوتگ کہ چہ وتی راجی جھد ءَ پدکنز نہ بوتگ۔
شھید دُرّک دو رند ءَ جنگانی میان ءَ تیر وارتگ ءُ ٹپی بوتگ۔ ھمے راجی آجوئی جنگ ءِ میان ءَ آئی ءِ دو برات کشگ بوتگ، بلے شھید دُرّک نزور نہ بوتگ۔ چہ دژمن ءِ ھیلھاں ھمنچو زور دیگ بوتگ کہ وتی کھول ءَ زور ئے یا آجوئی جنگ گڑا آئی اے پیسلہ ءِ دیم ءَ آئی زمین زرتگ چی ءَ کہ آئی زانتگ داں زمین ھست من ھست آں، زمین ھست زبان ھسست، زمین ھست گڑا راج ءُ راجی پجار ھست۔
اگاں زمین مہ بیت من نہ باں، منی کھول ھم نہ بیت گڑا مرچی کہ من زمین ءَ دوست داراں اے زمین منی مات اِنت ابید چہ زمین ءَ منی ءُ منی کھول ءَ ھچ بستار نسیت۔ شھید دُرّک ءَ دژمن ءِ تیر وتی جان ءَ سگ اِتگ اَنت ءُ آئی گوں ٹپیگیں جاوراں توکل مھکم بوتگ ءُ جنگی سنگر مھکم داشتگ اَنت۔
ھمے رنگ ءَ شھید آزم پنام باسد، شھید الی پنام اتا ءُ شھید کینگی پنام مسلم ھم بلوچستان لبریشن پرنٹ ءِ جنگول اَنت کہ آیاں جتاھیں ھند ءُ دمگاں دژمن ایمنی ءَ نہ اِشتگ ءُ مدام آئی سر ءَ آس گوار اِتگ ءُ شھید ابدُالستار پنام مھراج بلوچ لبریشن آرمی (بی ایل اے) سرمچارے اَت کہ آ دو ھزار شانزہ ءَ بی ایل اے ءَ ھوار بوتگ ءُ وتی جھد برجاہ داشتگ۔
چوش کہ نمیرانیں سنگت کینگی جان پنام مسلم کہ شھید سلیمان پنام شیھک جان ءِ زھگ ءُ شھید زاکر ءُ شھید مسلم پنام شھمیر ءِ برازتک اِنت ءُ شھید سپر ھان ءُ شھید الی نواز گوھر ءِ گھار زتک ءِ زھگ اِنت۔
شھید کینگی پنام مسلم دوھزار بیست ءُ یک ءَ بی ایل ایپ ءَ ھوار بوتگ ءُ آ بی ایل ایپ ءِ بمب جوڑ کنوکیں ٹولی ءِ بھرے بوتگ۔ آ تراکناکیں شورہ (آئی ای ڈی) بمب جوڑ کرتگ۔ آ بمب ءِ کار ءَ سک بلد بوتگ۔
شھید کینگی ءِ پِت شھید سلیمان، آئی ناکو شھید زاکر گوں وتی ناکو سپر ھان ءَ ھوار دو ھزار پانزہ ءَ میھی میڑ ءَ گوں دوازدہ جنگول شھید بوتگ اَت۔ شھید مسلم پنام شھمیر دو ھزار بیست ءَ ماں راگے ءِ کوھاں گوں دژمن ءَ جنگ ءَ وتی ناکو زتک سکندر ءُ تروزتک منسور ءُ دگہ یک سرمچارے ساد اللہ ءَ ھوار شھید بوتگ اَت۔
گوستگیں سال ءِ ھمے روچ ءَ بزاں سی دسمبر 2023 ءَ پُل رنگیں سنگت کیپٹن سرور پنام دُرّک، کینگی سلیمان پنام مسلم، الی بلوچ پنام اتا، ابدُلستار پنام مھراج ءُ آزم پنام باسد پہ ماتیں سرڈگار ءِ موکگ ءَ نمیران بوتگ اَنت۔
انچوش کہ واجہ بشیر بیدار وتی شئیرے ءَ گوش ایت:
ھونے کہ پہ ھک ءَ رچیت
ھاک ءِ تہ ءَ بیگواہ نہ بیت
گڑا ھمے پیم ءَ پہ ماتیں زمین ءِ موکگ ءَ شھید بوتگیں بامردانی ھون ھم ھمے گلزمین ءِ سر ءَ رتکگ اَنت اے کدی بیگواہ نہ بنت پہ مدامی مئے دلانی تہ ءَ اَنت۔ مرچی سی دسمبر مشکے گرانڈی ءَ ندر بوتگیں شھیدانی شھیدی سالروچ اِنت ما پہ شانے وتی راجی بامرداں یاد کنگ ءَ ھواری ءَ آیانی پگر ءِ برجاہ دارگ ءِ کول ءَ کن این ءُ ھمایانی پد ءُ رنداں جنزاں بہ ایں۔
