ودار یک گرانیں جنجالے آ اگاں دست ءِ موبائل ءَ کسے ءِ کلوہ ءِ بہ بیت یا کہ در ءِ دپ ءَ نندگ ءُ کسّے ءِ واتر کنگ ءِ ودار بہ بیت۔ گُش اَنت کہ یک دمانے ءِ ودار یک سالے ءِ کچ ءَ بیت۔ ودار یک انچیں چیزے کہ آ ھر وھد مردم ءِ دل ءَ سدیت۔ ودار کنوک ءَ پہ اے ودار ءِ وھد سک گِرْان گوز ایت ھمے ودار گیشتر نا اُمیتی ءِ سوب جوڑ بنت۔
ودار ءَ بازیں وھد ءَ شرّی ءُ سرجم کنگ ءِ اُمیت ءِ نام ھم ھست۔ بلے لھتیں ودار ءِ وھد مردم ءَ چہ تہ ءَ وران کنت۔ یک نیمگے ودار کنوکیں مردم ءِ امیت سرجم بنت ءُ دومی نیمگ ءَ وھد ءِ گوزگ آئی ءِ امیتاں پدر کنت کہ بوت کنت ودار ءِ پد شیرکن اِنت۔ بلے پہ وتی دوستیگیں مردم ءِ ودار کنگ ءَ برے برے جھان ءِ پرک بوت کنت۔
ھمے وڑ ءِ وھد ءِ ھمراھی ءَ ودار گیش بیت ءُ ودار اگاں داں مزنیں مدتے ءَ برجاہ بہ بیت گڑا دل ءِ واھگ ءُ لوٹانی راہ سر ءَ تھنا ایوکی ءِ ساھگ پش کپ ایت۔ وابانی راست بوھگ ءِ ودار کنگ سک دردناک اِنت بلے پہ مردمے ءِ واتری ءَ ودار کنگ ءِ سپر باز درد ءُ رَنج ءَ پُر اِنت۔
آ مردم کہ اے ودار ءِ آس ءَ نہ کپتگ گڑا آ اے ساھت ءَ نہ زانت کہ چنکس گران اِنت بلے ھما کہ چہ اے وھد ءَ گوستگ آ زانت کہ ودارءِ تہ ءَ چونیں درد ءُ تکلیپی ھست۔ ھمے رنگ ءَ زور بیگواھیں ڈاکٹر دین مھمد ءِ کھول اِنت کہ آ پانزدہ سال اِنت ھمے امیت ءَ اَنت کہ دین جان واتر بیت۔
دین جان ءِ جنک سمّی دین یک جاھے گوش ایت کہ چہ زورگریں پاکستانی لشکر ءِ دست ءَ منی پِس ءِ بیگواھی ءَ پد پانزدہ سال سرجم بوتگ کہ انگت مارا اے گوشگ نہ بیت کہ مئے پِس زندگ ءُ سلامت اِنت یا کہ کُشتگ اِش ما وت ءَ چورہ سرپد بہ بہ ایں یا کہ زندگیں پِسے ءِ زھگ سرپد بہ بہ ایں۔
28 جون 2009 ءَ ڈاکٹر دین مھمد کہ آوار جنگ بوت بیگواہ کنگ بوت کہ 28 جون 2024 آیانی ودار ءَ پانزدہ سال سرجم بوتگ انگت ھم آئی جنک سمّی ءُ مھلب ھمے ودار اَنت
آ وھد ءَ کہ ڈاکٹر دین مھمد بیگواہ کنگ بوتگ آئی جنک سمّی ءُ مھلب کسانیں زھگ بوتگ اَنت چہ ھما روچ ءَ آ مدام زھرشانی ءُ پریس کلب آنی دیم ءَ گندگ بنت کہ مرچی رُستگ ءُ مزن اَنت انگت ءَ ھم ھمے پریس کلب آنی دیم ءَ گندگ بنت بلے انوں تھنا پہ دین جان ءِ ھاتر ءَ ناں سرجمیں بلوچ راج ءِ ھاتر ءَ مُدام پریس کلبانی دیم ءَ گندگ بنت۔
آیاں کہ اے پانزدھیں سال پہ ودار گوازینتگ اَنت ءُ انگت گوازینگ ءَ اَنت آ گوں جوانیں وڑے ءَ سرپد اَنت ودار کنگ چنکس درد ءُ تکلیپ دنت مرچی مارا اے ودار ءِ آس ءَ گپتگ باندا روچ دگہ زھگے چو مئے وڑ ءَ وتی پِس ءِ شوھاز ءَ در پہ در مہ بیت ءُ اے اُمیت ءَ مہ نندیت کہ منی پت مرچی کئیت یا باندا کئیت یا کہ سالانی سال ھمے پریس کلب ءُ دگانی سر ءَ نندوک مہ بیت۔
اے وڑیں بازیں بلوچ ورنا ھست کہ آیانی سالانی سال وتی زھگانی ودار اَنت گھار یا کہ لوگبانُک یا آیانی زھگ اَنت مدام گوں ارسیگیں چمّاں دگانی سر ءَ کپتگ اَنت ھمے اُمیت ءَ کہ مئے برات مئے زھگ واتر کن اَنت۔ چوش کہ سمّی ءُ مھلب ءَ ھوار سائرہ، زاکر مجید مات راشد ھسین ءِ مات ءُ دگہ ھزارانی کچ مردم اَنت کہ آ اے ودار ءِ تہ ءَ نشنتگ اَنت۔
