آ وتن دیوانگے اَت

اے زندمان سپرے ءُ اد ءَ ھر کس وتی داب ءَ جزگ ءُ سپر کنگ ءَ اِنت اے انچیں سپرے کہ ایشی ءِ آسر نیست داں کہ بنی آدم زندگ اِنت وتی داب ءَ جزگ ءَ اِنت زند ءِ سپر ءَ کجام وھد ءَ بنی آدم کہ بیران بوت ءُ چہ جھان ءَ شت گڑا آئی ءِ سپر چہ ھمود ءَ ھلاس اِنت۔اے سپر ءَ انچیں منزل نیست کہ کسّے بہ گْوش ایت کہ من وتی منزل ءَ سر بوتگ آں ، آئی ءَ ھچیں منزل نیست داں زندگ اِنت اِے سپر ءَ جزگ ءَ اِنت ھما وھد ءَ کہ آئی ءِ ساہ ءَ ملکموت گپت گڑا آئی ءِ زند ءِ سپر ھلاس بیت۔

انچوش کہ اے جھان ءِ درسیں مردم زان اَنت ءُ سرپد اَنت کہ مرگ ھرچ مردم ءِ سر ءَ ھست اِنت کہ آ کجام وھد بہ بیت مروچی بیت باند ءَ یا کہ لھتے سال ءَ پد الم پہ مردم ءَ کئیت۔ مردم داں زندگ اِنت آئی ءَ میتگ ، مردم ءُ سیاد پجا کار اَنت انچوش کہ آ بیران بیت آئی ءِ پجار گوں آئی ءَ ھوار ھلاس بیت۔ بلکیں مرگ ءَ پد آئی ءِ ھما کہ پجّار اِنت آئی ءِ یک نشانی یے ھم پش نہ کپ ایت۔

بلے وھدے کہ کسے پہ راج ءَ کارے کنت یا کہ آ مزن نامیں ازم کارے، شائرے بیت یا کہ پہ وتی راج ءَ دگہ انچیں شریں کارے کنت کہ راج آئی ءِ منوگر بیت چوش کہ بلوچی زبان ءِ مزن نامیں شائر واجہ مبارک کازی، میر گل ھان نسیر، سید ھاشمی ءُ دگہ بازیں بلوچی زبان ءِ مزن نامیں شائر بوتگ اَنت کہ آیاں وتی ماتی زبان بلوچی ءَ شائری کرتگ ءُ وتی زبان ءُ راج زندگ داشتگ اَنت کہ بازیں مدتے بیت کہ بلوچی زبان ءِ مزن نامیں شائراں لھتے شائر بیران بوتگ اَنت۔ بلے بلوچ راج داں مروچی ءَ آیاں یات دار ایت۔

چوش کہ بلوچ راج ءَ پہ آیانی گیر آرگ ءَ آیانی نام بازیں ھنداں چار راہ ، زانشجاہ ءُ میتگاں پر کرتگ اَنت۔ چہ ایشی ءَ ابید بلوچ راج ءِ تہ ءَ جھدکار ءُ راھشون بوتگ اَنت کہ آیاں وتی راج پھاز اتگ ، وتی زمین پھاز اتگ وھدے کہ رستریں دُژمن ءَ آیانی سرزمین ءُ راج ءِ سر ءَ ارش کرتگ ، آیاں پہ وشی جنگ داتگ ءُ وتی ساہ نْدر کرتگ ۔ بلوچ راج ءِ تہ ءَ بلوچی ازم کار ءُ شائراں ھوار انچیں ھم بوتگ اَنت کہ آیاں سد سال ءَ گیش اِنت کہ شھید بوتگ اَنت بلے داں مروچی بلوچ راج ءَ آیانی نام زندگ داشتگ اَنت ءُ گْوستانک مدام آیاں یات کنت۔

انچوش گوستگیں وھد ءِ اگاں گْوستانک ءَ بہ چار ایں بہ وان ایں ، بلوچ راج چہ بندات ءَ بہ گر داں مروچی مدام چیردست کنگ بوتگ بلے آدگہ راجانی وڑ ءَ بلوچ ءَ ھم مُدام جنگ داتگ ءُ وتی زمین پچ گپتگ ءُ داں مروچی ءَ ھم جنگ کنگ ءَ اِنت۔ انچوش کہ گْوستگیں وھد ءَ بلوچ راج ءِ بامردیں ورناھاں پہ وتی راج ءَ وتی ھون داتگ انوں دیگ اَنت۔

مروچیگیں وھد ءِ ورنایاں کہ آیانی گیش واھگ گوں زمین ءَ بندوک اِنت زند ءِ اے دگہ ھزار وشی اش یل داتگ اَنت ءُ گلزمین ءِ گم دل ءَ اش زرتگ اَنت ۔ھرچ مردم ءِ زند یک بری اِنت ءُ آ جیڑ اَنت کہ مئے زند یک برے ھست وھدے کہ چہ اے جھان ءَ رو ایں گڑا دوبر نہ یا ایں گڑا روگ ءَ پیسر انچیں کارے بہ کن ایں کہ مئے آؤکیں پدریچ مارا یات بہ دار ایت ءُ وشھال بہ بیت۔ آ کار یکین اِنت ، وتی زمین ، زبان ءُ راج ءِ رکینگ۔

آ کجام رنگ ءَ کہ بہ بیت پہ وتن ءَ جنگ بہ بیت یا کہ وتی راج ءِ چیردستی ءِ بارو ءَ نبشتہ کنگ یا کہ وتی زبان ءَ شائری کنگ ءُ وتی زبان ءِ نازینگ۔ ھرچ مردم ءِ وتی کردارے بیت چوش کہ بازیں ورناھاں سلاہ زرتگ ءُ جنگ بندات کرتگ۔ بازیں وتن دیوانگ کہ جنگ ءَ شھید بوتگ اَنت بلے آ بھ پشت ءَ نہ کنز اِتگ اَنت۔ وتن دیوانگیں ورناھانی کاروان سک مزن اِنت ءُ شھیدانی لڑ بے کساس اِنت کہ آ کاروان ءَ مزن کسان درس ھوار اَنت۔

ھما کاروان ءِ بھرے شھید لتیپ پنام ھمید ھم بوتگ کہ آئی ءَ جنگ ءَ ھوار بوگ ءِ وھد ءَ ھمے کول کرتگ داں کہ منی ساہ مان اِنت گوں دُژمن ءَ مڑ آں، دژمن ءِ دیم ءَ سلاہ چگل نہ دے آں۔ شھید ھمید ءَ وتی زندمان ءَ دیستگ ءُ ھمے مار اِتگ کہ مروچی من ایردست آں ، اگاں من ایردستی ءِ بگیری ءَ جنگ نہ کرت گڑا منی آؤکیں پدریچ ھم انچوش منی زندمان ءِ وڑ ءَ ایردست بیت ءُ لگتمال کنگ بیت۔

شھید لتیپ پنام ھمید مشکے ءِ جاہ منند اَت ءُ آ بلوچستان ءِ بازیں ھنداں راج پھازانی ھمراہ بوتگ۔ شھید ھمید بلوچستان آجوئی سنگر (بی ایل ایپ) ءِ سپاھی یے بوتگ بازیں ھنداں جنگی سنگراں نشتگ ءُ گوں دژمن ءَ جنگ ئِے داتگ۔ بلے بھ وتی دل ءَ اے ھیال ئِے نہ یارتگ کہ من جنگ بہ آں۔ آئی ءَ زانتگ کہ مرگ چون ءَ پہ من روچے کئیت اگاں من جنگ ءَ دزکش بہ بہ آں وھدے کہ منی مرگ بئیت من الم مر آں من کہ وت ءُ راج ءِ پھازداری ءُ زمین ءِ پھازداری ءَ کہ جنگی سنگراں شھید بہ آں داں جھان ھست من ابدمان بہ آں ، گْوستانک ءَ یات دارگ بہ آں۔

شھید ھمید نوزدہ اکتوبر 2019 ءَ گوں سنگتانی ھواری ءَ روگ ءَ اَت کہ دژمن ءِ میان ءَ کپت اَنت ءُ گوں دژمن ءَ جنگ اش دات۔ گوں دژمن ءَ جنگ دیان ءَ آدگہ سنگت پہ سلامتی در کپت اَنت ءُ ھمید ءَ تیر وارت ءُ نمیران بوت۔

اے جنگ ءَ ھمید ءِ وڑیں بازیں ورناھاں وتی دیمونی داتگ ءُ شھید بوتگ اَنت۔ لھتے چہ مرگ ءِ ترس ءَ چہ سنگراں تتکگ اَنت ءُ دژمن ءِ دیم ءَ سلاہ اش چگل داتگ اَنت۔ گْوستانک لگوریں مردم ءَ بھ یات نہ دار ایت ءُ ناں کہ راج آیاں گیر کار اَنت۔راج وتی شھیداں یات دار اَنت، پہ شھیدانی یات دارگ ءَ وتی میتگ ، چاراہ ءُ زانشتجاھانی ناماں شھیدانی نام کن اَنت۔ وھدے کہ شھیدانی دیمونیانی گپ بیت، شھیداں سھریں دْروت نْدر کن اَنت ءُ آیانی دلیری ءِ سر ءَ پھر بند ایت راج۔