رُژن ءِ سپر

نبشتہ کار: ڈاکٹر شلی بلوچ

من ھما کندیل ءِ پئیم ءَ رُژن بالینتگ وتی

‏بالواں چاگرد ءِ چہ من راہ سازینتگ وتی

‏مئے تب ءِ سر ھیلی ءِ انگت نہ پرشتگ مھکمی

‏ھمبلاں مکرانی بِلّے اگل تاچینتگ وتی

(شھید ‏چیئرمین گُلام مھمد)

اے ھما رژن ءِ آسر اِنت کہ تیوگیں بلوچستان چہ آئی رژنائی ءَ وتی راجی پجّار ءَ گندگ ءُ آئی ارزِشت ءَ زانگ ءَ اِنت۔ اے ھما رژنائی اِنت کہ ایشی ءَ سرجمیں چاگرد رژنا ءُ باسما کُتگ۔ ھما رژنائی ءِ تہ ءَ راجی پدریچ وتی وشیں باندات ءِ پولگ ءَ درکپتگ اَنت۔

اے ھما رژن ءِ پگر اِنت دیم پہ سوبمندی ءَ گوں ترندیں گاماں جنزگ ءَ اِنت۔ ھما رژن ءَ راجدپتر ءِ تاکدیمانی نبشتہ کتگیں لبز پہ ساپ ءُ سلہ پیش داشتگ اَنت، ھمے لبزانی وانگ ءَ بلوچ راج ءِ شیر بیمّیں بچ ءُ مھنازیں جنک وتی راجی زمہ واریاں مارگ ءُ زانگ ءَ اَنت۔

اے رژن ءِ سپر اِد ءَ نہ اُوشت اِیت ءُ جنزاں کنت داں وتی گڈی منزل ءَ سر بیت۔ پہ اے رژن ءِ مھکم دارگ ءَ ھیشی سر ندر، زندانی ءُ بیگواہ بوتگاں، بلے رژن ءِ کاروان جنزان اِنت۔

 اے رژن ءَ زات ءُ زُریات ھلاس کُتگ، اے رژن ءَ بلوچ ءِ دمگانی تہ ءَ بھر ءُ بانگی ھلاس کُتگ، اے رژن ءَ میر ءُ متبری ھلاس کُتگ، اے رژن ءَ مرد ءُ زالبول ءِ نیام ءِ پرک ءُ تپاوت ھلاس کتگ ءُ چاگرد ءِ تیوگیں مردم یکیں راہ ءِ مساپر کتگ اَنت۔

اے رژن ءَ وانگجاہ ءُ دربرجاھانی نودربر پہ راجدوستی ءِ درداں شیوار کتگ ءُ زانت بکشتگاں، اے رژن ءَ شپانک، دھکان ءُ بلوچ چاگرد ءِ ھر تب ءُ میل ءِ مردم پہ راجدوستی ءَ باسما کُتگ اَنت۔ اے رژن پہ پھرے بلوچ ماتانی لیلوانی تہ ءَ نازینگ بوگ ءَ اِنت۔ اے رژن بولان ءُ ڈھاڈر ءَ شھم ایت ءُ اے رژن گجنیں گْوادر ءِ نیلیں زر ءِ چولانی تہ ءَ بلگ ءَ اِنت۔ اے رژن بلوچستان ءِ ھر دمگ ءُ میتگاں، ھر کڈُک ءُ گدان ءَ گندگ بوگ ءَ اِنت۔

اے رژن ایوک ءَ ندارگاں پیش نہ داریت، بلکیں ایشی ءَ زبان رودینتگ ءُ توار جَنگ ءَ اِنت، سکین دیگ ءَ اِنت، رھشونی کنگ ءَ انت ءُ راج ءُ چاگرد ءَ مھکم کنگ ءَ اِنت۔

اے ھما زانت چکاریں راجدوستیں تب ءِ سرھیلی ءِ مھکمی اِنت کہ سال بدل بوتگاں بلے رژن ءِ گام نزور نہ بوتگ اَنت، اے رژن ءِ سپر ءَ رِپک ءُ پندل، مکر ءُ ھیلہ باز دیستگ، بلے اے گوں کس ءَ دارگ نہ بوتگ، گوں مھکمی ءَ جنزان اِنت۔

اے رژن نہ کوہ زانت، نہ کوچگ، اے رژن نہ شپ زانت ءُ نیکہ روچ، اے رژن ءَ نہ ھار ءُ ھیروپ ھلاس کنت ءُ ناں کہ لُنج ءُ تاموریں لوڑ وتی مُج ءِ تہ ءَ گار کُت کنت، بلکیں اے ابدمانیں رژنے ایشی ءَ ماہ ءُ سال نیست، اے رژن ھمک وھد ءَ بلان اِنت، سپر کنان اِنت۔ اے رژن ءِ سپر اِنت، سپر در سپر۔۔۔۔۔۔۔۔۔۔۔۔۔۔۔۔۔