نبشتہ کار: سرباز وپاؔ
ھما اِنت کہ ماھکان ءِ زھگ اُمیت بیگواہ کنگ بوتگ آ ھمک رمزان ءَ دبوج ءِ وھد ءَ آئی اکس ءَ وتی دیم ءَ ایر کنت ءُ چہ دبوج ءَ پیش پہ آئی سلامتی آجوئی ءَ دُوا لوٹ اِیت۔ اے روچ ءَ ھم دبوج ءِ وھد نزیک اَت پیرزالیں ماھکان ءَ پہ وتی دبوج ءَ چہ ھیزک ءَ شیر کش اِتگ اَت، شیر ءُ ھرماگ وتی دیم ءَ ایر کرتگ اِت اَنت ءُ پہ وتی زھگ ءِ آجوئی ءَ دُوا لوٹگ ءَ اَت۔
ھمے میان ءَ میتگ ءِ زھگانی کوکارانی توار بوت کہ چہ جمبر ءِ شینکاں جھل اَئید ءِ نوک اِنت۔ ھمے زھگانی کوکارانی میان ءَ میست ءِ ملا ءَ ھم بانگ دات۔
پیرزالیں ماھکان ءِ دل انگت ایکیم نہ اَت کہ منی زھگ اَئید ءَ سر نہ بیت۔
آئی ءَ چہ ملا ءِ بانگ ءَ پد گوں شیر ءُ ھرماگ ءَ دبوج کرت ءُ چہ دبوج ءَ پد نماز ونت۔ ھمے نماز وانگ ءَ پد دُوا ءِ وھد ءَ آئی چمانی ارس شیپگران اِت اَنت ءُ پہ وتی زھگ ءِ آجوئی ءَ دُوا لوٹگ ءَ اَت۔
نماز ءَ پد آئی ءَ وتی پیش ءِ مُسلہ چِست کرت ءُ گس ءِ دیم ءَ ٹَنگ اِت، بلے سک بے تاھیر اَت۔ آئی ءَ زھگ ءِ زھیراں انچو کرتگ اَت کہ گس ءِ تہ ءَ نندگی نہ اَت۔
پیرزالیں ماھکان وتی گس ءِ دیم ءَ اُوشتاتگ اَت ءُ آئی ءِ چم پہ میتگ ءِِ کِشک ءَ سک اِت اَنت، لھم لھم ءَ توار کنگ ءَ اَت، اُو اُمیت جان زوت بیا کربان آں باندا اَئید اِنت ءُ من پہ تو پُچ ءُ چمپل ھم زرتگ۔
گوں ھمے لھمیں گوانکانی میان ءَ آئی چمانی ارس شلگ ءَ اِت اَنت دانکہ تھارونکی ءَ مانشانت۔ ماھکان کاپر ءِ نزیک ءَ اُوشتاتگ اَت کہ آئی ءَ دیست کاپر ءِ سر ءَ تّریں پیشے ایر اِنت۔ آئی ءَ ھمے پیش زُرت ءُ دیم پہ گنج ھاتون ءِ گِس ءَ شت۔
گنج ھاتون وتی بُزانی شنک میچینتگ اِت اَنت ءُ شنکاں کڈک ءَ کنگ ءَ اَت۔ آئی ءَ دیست کہ ماھکان ءَ پیشے گون اِنت ءُ پیداک اِنت، گوش اِیت ماھکان برو منی گس ءِ تہ ءَ آچ ءِ کِش ءَ بہ نند من شنکاں واڑ ءَ کنان ءُ کایاں۔
ماھکان گس ءَ پترت ءُ آچ ءِ پھنات ءَ نشت۔ شنکانی پیرگ اَت، ماھکان چار اِت کہ گس ءِ تہ ءَ تھاری اِنت آئی آچ ءِ کُٹینک ٹپ اِت اَنت دانکہ آچ مزن بہ بیت ءُ گِس رُژنا بہ بیت۔
گنج ھاتون ءَ شنک کڈ ءَ کرت اَنت ءُ اتک گس ءَ ھمے آچ ءِ پھنات ءَ نشت۔
ماھکان زوت زوت ءَ گوشت گنج ھاتون ھمے پیش ءَ بزور ءُ پہ اُمیت جان ءَ مازگے بہ بند باریں منی پل اِنشپی کئیت یا نہ۔
گنج ھاتون پیش زرت ءُ مازگ اولی بر ءَ بست ءُ پچ کرت، دومی بر ءَ پد ءَ بست ءُ پچ کرت آئی ھچ نہ گوشت۔ سیمی رند ءَ مازگ ءِ بندگ ءَ پد گوش ایت کہ اُمیت جان سلامت اِنت، بلے مازگ ءَ ڈکے مان اِنت اِنشپی مشکل اِنت کہ بیت۔
ماھکان ءِ زئیپیں اُوست یک برے پد ءَ ناتوام بوت ءُ آ گوں وتی تُستگیں دل ءَ بے توار بوت۔
گنج ھاتون چہ چاہ دانی ءَ شیرچاہ ءِ پیالے کش اِت ءُ ماھکان ءِ دیم ءَ ایر کرت گوش ایت: ھو دادا ماھکان رمزان پہ سلامتی ھلاس بوت ءُ پہ زندگیناں اَئید اتک۔ گوں ھمے گپ ءِ اش کنگ ءَ ماھکان ءَ درّائینت، کہ من وتی اَئید ءِ نوک نہ دیستگ۔
یک برے پد ءَ آئی ءِ چمانی ارس شیپگراں بوت اَنت۔ آئی ءَ وتی سر بالشت ءِ سر ءَ ایر کرت ءُ دمانے تچک بوت۔۔۔۔۔۔۔
