نبشتہ کار: سرباز وپاؔ
ند بنی آدم ءِ لیکھی، زانشتی ءُ دودمانی دیمروئی ءِ بنیاد اِنت۔ چہ ھمے ند ءِ بنیاد ءَ بنی آدم ءِ ھیال، مارشت ءُ زانشت لبزانی دروشم ءَ ابدمان بنت۔ ند انسان ءَ وتی مارشتانی نبشتہ کنگ ءِ ھاٹیگ ءَ بکش ایت کہ ندکار ءِ ھمے مارشت داں پشت ماں پشت ءَ راجی گوستانک ءِ تاکدیماں ابدمان بنت۔
ھمے ند اِنت کہ آ راست ءُ دروگ ءِ میان ءَ پرک ءَ گیشین ایت۔ ھمے ند اِنت کہ چاگرد ءَ زانت بکش ایت ءُ انسانیت ءُ انساپ ءِ لوٹاں پیلو کنگ ءِ راہ ءَ پیش دار ایت۔ پمیشکا گوشگ بیت کہ ند چہ زھم ءَ توانمند اِنت، چی ءَ کہ زھم بس جان ءَ ٹپ کنت، بلے ند انسان ءِ زھن ءُ لیکھاں مٹ کنت۔ ند آشوب ودی کنت، راجاں باسما کنت ءُ پہ ایردستی سانکلانی پروش دیگ ءَ مزنیں کرد پیلو کنگ پرمائیت۔
پہ ند ءِ بابت ءَ ھمے گوشگ بیت کہ ند یک زمہ واری یے ءُ امانتے ھم زانگ بیت، پمیشکا پہ نبشتہ کار ءَ ھژدری اِنت کہ آ ند ءَ پہ زاتی نپ ءُ کینگداری ءَ ابید پہ راستی، ھکّ ءُ انسانیت ءَ کار بہ بند ایت۔ یک ایمانداریں نبشتہ کارے چاگرد ءِ تہ ءَ یک مزنیں گھتری یے کار ایت ءُ یک نپ دوستیں نبشتہ کارے چہ ھمے ند ءِ رد ءَ مردمانی زھنانی ھراب کنگ ءِ کوشست ءَ کنت۔
اگاں کسے ند ءِ ارزشت ءَ سرپد بہ بیت ءُ ند ءَ پہ ایمانداری کار بہ گیت چاگرد ءِ تہ ءَ الّم بازیں جنجالانی آماچ بیت، بلے راجدپتر آئی ءَ گوں شرپ ءُ جوانیں دانکاں وتی تاکدیماں پہ مدامی ابدمان کنت۔
ندکار ھما مردم اِنت کہ آ وتی ھیال ءُ مارشتاں لبزانی دروشم ءَ داں آدگہ مردماں سر کنت۔ یک ندکارے ءِ ند چاگرد ءِ سر ءَ مزنیں سانے دور دنت گڑا اے ندکار ءِ زمہ واری بیت کہ آ راستیاں بہ نبیس ایت ءُ چہ وتی نبشتگیں لبزاں شر ءُ ناشر ءِ پرک ءَ بہ گیشین ایت۔ شریں نبشتانک مردمانی بیسہ ءَ کٹ ایت ءُ چاگرد ءِ تہ ءَ گھتری کار ایت۔
ندکار ءِ دگہ یک زمہ واری یے ھمیش اِنت کہ آ چاگرد ءِ تہ ءَ بیوکیں زوراکی ءُ ناھکیاں پیش بدار ایت۔ کج ءَ زوراکی بوگ ءَ بوت گڑا اود ءَ ندکار ءَ بے توار بوگی نہ اِنت، بلکیں چہ وتی نبشتانکانی رد ءَ نزورینانی توار بہ بیت ءُ آیانی درداں درشان بہ کنت۔ یک ندکارے چہ وتی ایمانداری ءَ پہ انساپ ءُ برابری ءَ وتی کرد پیلو کرت کنت۔
یک ندکارے ءَ اے گپ الّم دل ءَ دارگی اِنت کہ ندکار یک انسانے آ جند پہ مدامی نہ مان ایت، بلے آئی نبشتگیں لبز پہ مدامی مان اَنت۔ پمیشکا یک ندکارے ءَ وتی نبشتگیں لبز ھما داب ءَ کماھگی اَنت کہ چوش مہ بیت کہ باندا وتی نبشتگیں لبزانی دیم ءَ ملامت بہ بیت۔
