بانک کریمہ: بلوچ ءِ سیاسی ءُ چاگردی توکل ءِ چیدگ

نبشتہ کار: ھلیل بلوچ

رجانکار: سرباز وپا

بلوچ راجی گوستانک ءَ لھتیں مردم تھنا نام نہ اَنت بلکیں یک اھدے، یک دودمانی لوٹ ءُ یک مچی زانشتے ءِ چیدگ جوڑ بنت۔ بانک کریمہ بلوچ چہ ھما ناماں یکے اِنت۔ آ تھنا یک سیاسی کارکن، یک نودربر یا گلے ءِ اگدہ دار نہ بوتگ، بلکیں بلوچ بلوچ جنینانی سیاسی وتواکی، گھگیری ءُ چاگردی توکل ءِ کٹوکیں چیدگ اِنت۔

کریمہ چہ وتی جپاکشی ءُ یکشلیں جھد ءَ آجوئی زرمبشت ءَ را یک نوکیں توانمندیں ارواھے بکش اِتگ، چہ ھمیشی آسر ءَ بلوچ جنین ءُ جنک بزاں سیاست، زھرشانی ءُ دگانی سر ءَ گندگ بوتگ اَنت، ایپ آئی آر ھم کنگ بوتگ اَنت۔ کریمہ ءِ پیش داشتگیں روایت آیاں زندگ داشتگ ءُ آ نہ تھنا تچک ءَ زرمبشت ءِ بھر اَنت بلکیں زنداناں آزاراں ھم اوپار کنگ ءَ اَنت۔

منی گوشگ ءِ مول اے نہ اِنت کہ کریمہ بنداتی جنک اِنت آ سیاست ءِ بھر بوتگ یا دگہ اگدھے ءِ سر ءَ بوتگ۔ چہ آئی پیش ھم جنین بوتگ اَنت، انچوش کہ میڈم نائلہ کہ یک پارٹی یے ءِ بھر بوتگ، گودی نوشین، اپشین کہ آ گوں بی ایس او ءَ ھوار بوتگ اَنت، شکر بی بی، مھرجان ءُ آدگہ جنین کہ ” خواتین پینل “ راھبند ءَ سرگرم بوتگ اَنت، بلے کریمہ چہ درستاں جتا اَت۔ آ بلوچ اسٹوڈنٹ آرگنائزیشن ءَ بنجاھی پتر ءُ کابینہ ءِ بھر بوتگ، بلے آئی سیاست تھنا گوں گل ءَ بندوک نہ بوتگ ھمک جاہ ءَ ھژدری بوتگ آئی گوں مردماں گند ءُ نند کرتگ، گس گس ءَ شتگ ءُ آیان ءَ گوں زرمبشت ءَ ھوار کرتگ۔ آ چہ ابرم ءَ وش تبے اَت ءُ ناگیگیں جاور ءُ موسمانی اوپار کنوکے اَت، آئی ءَ چہ نزیک ءَ مار اِتگ اَت۔

بازیں ھنداں ما ھواری ءَ گوں مردماں گند ءُ نند ءُ سپر کرتگ۔ نہ سارتی ءُ ترندیں گوات ءَ آ داشتگ ءُ نہ دژمن ءِ ترس اَت۔ راستے کہ آ سکا نہ ترسے اَت۔ کریمہ چہ کسانی ءَ آ زمزیل ءُ تاسر ھلاس کرتگ اَنت کہ جنک آ کار ءَ کرت نہ کن اَنت آ درسیں کار تھنا مردانی کار اَنت۔ اے وڑیں کوھنیں مارشت پہ آئی ءَ ھژدری نہ اِت اَنت، اے رد ءَ بلکیں ھما چاگرد ءِ کرد بوتگ کہ آئی چہ مستریناں در برتگ، اود ءَ مھر ءُ بیسہ ءِ سیادی بوتگ، انچوش کہ استاد واھد کمبر، شھید ڈاکٹر ھالد، سمیر، جلیل ءُ باھوٹ ءِ میان ءَ مار اِتگ کہ آ یکے دومی گون ءَ چو سنگتانی وڑ ءَ پیش بوتگ اَنت۔

من وھدے کہ کریمہ ءِ مھروانیں ماس دیستگ گڑا من مار اتگ کہ کریمہ چہ ماس ءِ کٹ ءَ نہ ترسی ءُ مھروانی ھیل کرتگ ءُ مزن بوتگ۔ نہ تھنا چہ اے واک ءَ مھکم اَت بلکیں آئی ناگیگیں جاورانی اوپار کنگ ءُ جنجالانی دیم پہ دیمی کنگ ءِ ھنر ھم چہ وتی ماس ءَ دربرتگ اَت کہ آ وت مھروانی ءُ نہ ترسی ءِ یک درورے اَت۔ آ نہ تھنا یک شریں سیاسی رھشونے اَت نہ تھنا بلوچ راج ءَ دوست اَت بلکیں میان استمانی تک ءَ ھم پجارگ بوتگ ءُ میان استمانی پورماں پہ بلوچ جھد ءَ سرگرم اَت۔ بی بی سی ءِ سد نامداریں جنینانی لڑ ءَ ھوار کنگ ھمے گپ ءِ درور اِنت۔

کریمہ گوں سیاست ءِ ھواری ءَ شائری ءُ اکس کشی ھم کرتگ ءُ گوں زیمر ءَ ھم نزیکی بوتگ ءُ آئی ءَ زیمر ھم دربرگ لوٹ اتگ۔ یک جاھے ءَ نامداریں سروزی استاد مراد سروز ءَ ساز ءَ اَت کہ من، کریمہ، آئی یک سنگتے، لکوجان ءُ واجہ دل مراد ساز ءَ گوش دارگ ءَ اَت ایں۔ کریمہ گوشت کہ من ھم دربرگ لوٹ آں گڑا استاد مراد گوشت کہ تو ھم در برت کن ئِے۔

ھمے پروگرام ءَ مئے شریں اکس کش دل مراد بلوچ ریکارڈ کنگ ءَ اَت، بانک کریمہ چہ آئی ریکارڈ یا اکس لوٹ اِت بلے دل مراد نہ دات داں ادارے ءَ گیش کریمہ ءُ دل مراد ءِ میان ءَ جاک اَت گڈی ءَ من دل مراد بلوچ ءُ شھید بانک کریمہ ءِ میان ءَ پیسلہ کرت۔ آ کج ءَ ھم بہ شتیں گڑا اے وڑیں سنگتی ءِ چاگِرد بوتگ اَت، اے وڑیں بازیں ویل ھست اَنت کہ آ ھمک وھد ءَ کریمہ ءِ ترانگ ءَ گیج اَنت۔ آ وھد ءَ من ھم پارٹی ءِ چیئرمین اِت آن ءُ آ ھم بی ایس او ءِ چیئرپرسن اَت۔ مئے نزیکی ھست اَت گیشتریں وھد ءَ ما جیڑھانی سر ءَ شور ءُ سلاہ کرتگ اَت۔ ما باز بگیری ھم داشتگ بلے چہ ایشی ءَ ابید بازیں سیاسی دیوان ءُ لھتیں مچیاں ھوار بوتگ ایں۔

آئی وتی سنگتانی باز ھیال داشتگ ءُ آیانی زانشتی ءُ سیاسی لوٹانی پیلو کنگ ءُ آیان ءَ وشاں کرتگ۔ آئی باز بر ءَ من ءَ کارانی بابت ءَ گوشتگ اَت کہ پلاں کار ترا کنگ لوٹ ایت، آ سنگت ءَ اے چیز درکار اِنت ءُ دیگ لوٹ ایت۔ آئی ھمک وھد ءَ گوں وتی کار ءُ گوں وتی کاراں ھمگرنچیں سنگتانی بابت ءَ جیڑ اتگ۔ آ سکا مھروان اَت ءُ سکا مڑ اتگ ھم، ھمک مردم ءَ ھمے مار اتگ کہ کریمہ چہ آئی ءَ گیشتر من ءَ مھر دیگ ءَ اِنت۔ ما بازیں نزوریانی سر ءَ گوں یکے دومی ءَ گپ جتگ ءُ پہ شریاں گامگیج زرتگ۔

2008 اَت ستمبر یا اکتوبر ءِ ماہ اَت، چیئرمین گلام مھمد، لالا منیر، رازک گل ءُ آدگہ تربت ءَ اتکگ اِت اَنت۔ اود ءَ واجہ یوسپ کہ شھید چیئرمین ءِ براس اِنت، پولیس ءِ زندان ءَ بندیگ اَت، آئی سر ءَ یکیں شپ ءَ مند ءُ پنجگور ءَ تراکانی بھتام ءِ ایپ آئی آر نبشتہ اَت۔ ما آئی چارگ ءَ شت ایں، آ وھد ءَ من کارگشاد اِت آں۔ یک پولیس اپسرے ءَ مئے گون ءَ گوں چیئرمین ءَ دلگوش گور کرت ءُ گوں ھمدردی ءَ گوشت کہ بانک کریمہ انگت کسانیں جنکے اِنت، آئی ءَ بہ گوش اِت کہ وتی ھیال ءَ بدار ریاست ترا گیت ءُ تاوان ھم دات کنت۔ منی آ وھد ءَ زھن ءَ آھگ ءَ نہ اَت کہ اے ھمدردی سلاھے، بیھارے یا چونیں ھم کلوھے۔

گوشگ ءِ مول ھمیش اِنت کہ کریمہ پہ ریاست ءَ ھما وھد ءَ ھم ترسے اَت کہ آئی مھلوک ءِ تہ ءَ یک نودربر ءِ بستار ءَ سیاست بندات کرتگ اَت۔ ریاست ءَ ھم زانتگ اَت کہ پہ اے ماڑی ءِ ڈیرینگ ءَ اے جنک بنداتی لڑ ءَ ھوار بیت آ راستے گوں مھکمیں ارادہ ءُ زانشت ءَ بنداتی لڑ ءَ اَت۔
چہ آئی درانڈیھ ءَ روگ ءَ پیش من ءَ یک دوستے ءَ چہ امریکہ ءَ پون کرت ءُ گوشت کہ اد ءَ پہ کریمہ ءَ کار اِنت، آ اد ءَ بازکار کرت کنت ءُ مئے مول ءَ گامے دیم ءَ بارت۔ من گوں اے گپ ءَ بگیری نہ داشت کہ راستے کریمہ باز کار کرت کنت بلے من انگت ءَ آئی روگ ءِ ھک ءَ نہ اِت آں۔ بلکیں چہ آئی کینڈا ءَ روگ ءَ پیش منی گوں آئی گُڈّی پون ءَ گپ اَت کہ من ءُ آ بنگپے ءِ سر ءَ اڑتگ اَت ایں۔

آ ھزارانی کچ ءَ میل دور اَت ھم وتیانی کِر ءَ اَت ءُ گوں وتی راج ءَ آئی مھر گیش گندگ بوگ ءَ اِت اَنت۔ کینڈا آ گوں پارٹی ءَ ھوار بوتگ اَت اے پہ مئے پارٹی ءَ یک سکا مزنیں وشیں ھالے اَت کہ نودربر سیاست ءَ پد آئی پارٹی ءَ ھوار بوگ یک نوکیں دورے ءِ بنگیج بیت۔

وھدے کہ منان جان ءِ شھیدی ءَ پد من ڈاکٹر مراد ءِ پہ کارگشاد گچین کنگ ءَ جار جتگ اَت گڑا بانک کریمہ من ءَ پون کرت ءُ گوشتگ کہ چیئرمین من ھمے جیڑ اتگ کہ نوں من کارگشاد باں اے ڈاکٹر مراد چہ کج ءَ اتک۔ آئی ءِ تہ ءَ اے بودناکی ھست اَت کہ آ دیم ءِ وھد ءَ چونیں ھم پارٹی یے ءِ سروکی ءِ پرز ءَ پیلو کرت کنت کہ انچوش آئی نودربر رھشونی ءِ کرد پیلو کرتگ اَت۔

بانک کریمہ گوں وتی سنگت ءُ مردماں ھما وڑ چو ماس ءَ مھروان بوتگ کہ ایشی ھمے جنک کریمہ ءَ لمہ کریمہ جوڑ کرتگ ءُ لکانی کچ ءَ مردمان ءَ دوست اَت۔ آ منی دوست اَت، لمہ اَت، لاڑُک اَت، پہ مڑگ ءَ سنگت اَت ءُ استاد اَت، چی ءَ کہ من بلیک بیری ءِ کار نہ زانتگ گڑا شئے ءُ کریمہ ءَ من ءَ سوج داتگ۔ آ راستے کہ یک مھروانیں استادے اَت۔ درد ءُ وشیاں دوئیناں ما یکے دومی ءِ گون ءَ اوشتوک بوتگ ایں۔ پہ کریمہ ءَ شاشان ءُ چلتن ءِ وڑیں مزنیں درد بہ گنداں اے منی وھم ءُ گمان ءَ ھم نہ اَت۔ مرچی ھم باور نہ بیت کہ آ مئے میان ءَ ساڑی نہ اِنت۔ چہ شھیدی ءَ دو روچ پیش منی گوں کریمہ ءَ گپ ءُ تران بوت۔ ما روایتی سیاسی جاورانی سر ءَ گپ جت، بلے منی گمان ءَ نہ اَت کہ دو روچ ءَ پد منی نزیکیں جھدکارے ءِ اے وڑ ءَ گسر بوگ ءِ بدیں ھال رس ایت۔

اے چہ دو دھکاں گیش ءِ جھد ءَ بازیں سنگت گسر بوتگ اَنت ءُ ما وت ءَ پہ ھر پیمیں جاورانی دیم پہ دیمی کنگ ءَ جاڑیگ کرتگ، بلے لھتیں سنگتانی گستائی زندگی ءِ تہ ءَ انچیں جاہ ھور کنت کہ آئی چہ وھد ءِ گوزگ ءَ ابید ھم جاہ پر کنگ نہ بیت۔ کریمہ ءِ گستائی ھم انچیں گمے، یک انچیں ٹپے کہ آ سرجمیں زند ءَ منی ھمراہ اِنت۔ کئے زانتگ اَت کہ رکستی ءِ گپ کجام وڑیں جتائی مئے تالہ ءَ اِنت۔