راجی جنز ءِ پڑ ءَ بلوچ جنیناں چے کرد پیلو کنگ لوٹ ایت؟

نبشتہ کار:شھید بانک کریمہ بلوچ

رجانکار: سرباز وپا

شھزانتانی گْوشگ اِنت کہ ھما راج چہ مرگ ءِ رپک ءَ آشنا بہ بیت گڑا آئی ءَ چونیں ھم زوراکے ایردست کرت نہ کنت۔ چہ دْراجکشیں ایردستی ءَ پد بلوچ راجی زرمبشت چہ دیمونیاں گوستانکے زندگ دارگ ءُ دیم پہ وتی منزل ءَ جنزگ ءَ اِنت۔ بلوچ ءَ وتی ایردستی مار اتگ، بلوچ سرڈگار پمیشکا مھر نہ دنت کہ آ چہ مادن ءَ سریچ اِنت، بلکیں مئے گوں سرڈگار ءَ مھر ابرمی جوزگ اِنت ءُ ھمے جوزگ مارا گھگیری ءِ توکل ءَ بکش ایت چہ جان ءَ سرگوزگ ءِ سکین ءَ دنت۔ 

بلوچ دژمن ءُ بلوچ پارلیمنٹ ءِ باسکاں مدام چہ وتی گپانی پارست ءَ بلوچ ءِ جیڑہ ءِ دیم ءَ آرگ ءِ کوشست کرتگ، برے ایشی ءَ سیاسی ءُ برے مالی ءُ برے آئینی جیڑہ گوشتگ۔ برے 1940 ءِ لاھور کرار داد ءِ رٹا جتگ۔ ھمک وھد ءَ جتائیں سیاسی گھتری، بادشاھی، وتواکی ءُ مڈیانی مستری ءُ بلوچستان ءِ وتواکی ءِ وڑیں گپانی رد ءَ راجی ایردستی ءِ چیر دیگ ءُ پہ زانت ءُ سما ءِ بنیاد ءَ بلوچ مھلوک ءِ چہ راجی آجوئی جھد ءَ دزکش کنگ ءِ پندل ساز اتگ۔

بلے راجی زرمبشت ءَ ھمے پیش داشتگ کہ بلوچ ءِ جیڑہ راجی ایردستی اِنت ءُ ایشی گیش ءُ گیوار کنگ چہ ایردستی ءَ درکپگ اِنت۔ بلوچ ءِ واکداری ءُ بلوچ ریاست ءِ ٹھینگ اِنت۔ پہ راجی ایردستی ءِ ھلاس کنگ ءَ مرد، جنین، ورنا ءُ پیریناں ھوار کار کنگی اِنت۔ چہ تابوت ءَ بندیں لاشاں بہ گر داں ژانگولیں لاشاں، چہ آزار جاھاں بہ گر داں بندیگجاھاں راجی آجوئی ءِ اے گرانکدریں سپر برجاہ اِنت ءُ ایشی زور روچ پہ روچ گیش بوان اِنت۔ 

بلوچ راجی زرمبشت ءَ بلوچ جنینانی ھوار بوگ پہ سکا جوان اِنت ءُ اود ءَ پہ زورگریں توانمنداں یک سر دردے اِنت۔ بلوچ راجی زرمبشت ءِ چہ بنداتی روچاں بلوچ جنین سکا دیم ءَ اتکگ اَنت ءُ گوں مھکمی ءَ وتی براسانی گون ءَ اوشتاتگ ءُ جھد اِش دیم ءَ برتگ۔ بلوچ زالبول چینل یا بی ایس او آزاد، یا بلوچ نیشنل پرنٹ ءِ راھبند ءَ جنیناں گام پہ گام دیم ءَ راجی آجوئی ءِ جنز دیم ءَ برتگ۔ بلوچ راجی زرمبشت ءَ بلوچ جنین جوانیں کردے ءِ واھند کرتگ اَنت ءُ آیان ءَ راجی سیاسی زانشت بکش اِتگ۔

بلوچ جنین چہ بنداتی روچاں سیاسی پڑ ءَ سرگرم بوتگ اَنت۔ مچی، روانک، شدکشیں گدان ءُ مراگش ءُ آدگہ کارانی رد ءَ جنینانی سائنسی دروشم ءَ زرمبشت ءِ دیم ءَ برگ ءَ جوانیں وڑے ءَ وتی کرد ءَ پیلو کنگ ءَ اَنت۔ گوں وھد ءِ مٹ بوگ ءِ ھواری ءَ راجی زرمبشت گیشتر مھکم بوتگ ءُ ھمے وڑ ءَ گیشتر دیمونی درکار اِنت۔ درسیں شھیدانی ماتاں پہ وتی جگرانی ٹکر ءِ شھیدی ءِ سر ءَ وتی شیرزالی پیش داشتگ کہ چہ ایشی راجی زرمبشت ءِ سپاھیاں دلبڈی رستگ، اے چیز جنینانی مھکمیں کرد ءَ پیش دار ایت۔ ما چہ ھونواریں رسترے ءَ پہ وتی وشھالیں سھب ءِ پچگرگ ءَ جھد کنگ ءَ ایں۔ تھاریں شپانی بامگواہ ءِ کوشستانی بھرے راجی زرمبشت ءَ جنینانی جوانیں کرد آیانی ھمت ءُ جھد ءِ درچ اِنت۔ آجوئی جنگ ءِ پڑ ءَ جنینانی چہ کرد ءَ پیش پہ جنگ ءِ سرپد بوگ ءَ آشوبی ماؤزے تنگ ءِ اے کول ءَ دلگوش کن اِت۔

وانگ زانت ءِ در جنئگ اِنت بلے کِرد ھم یک زانتے ءُ بلکیں زانت انگت گھتر اِنت۔ مئے گھتریں تْرام جنگ ءِ دربرگ اِنت۔ ھرکس ءَ کہ وانگجاہ ءَ وانگ ءِ موہ نہ رس اِتگ آ ھم جنگ ءَ در بُرت کنت، آ جنگ ءِ بھر بیت ءُ جنگ ءَ در بارت۔ آشوبی جنگ یک راجی زمہ واری یے، گیشتِر چوش نہ بیت کہ پیسر ءَ دربر ءُ پد ءَ کار بہ کن، بلکیں پیسر ءَ کار بہ کن پد ءَ در بَر، چے ءَ کہ کار چونائی ءَ وت زانگ ءِ دومی نام اِنت۔

جنگ چوناھا دو پیم ءَ مڑگ بیت۔ یکے پہ ھک ءَ بیت ءُ دومی پہ نا ھکی ءَ بیت، چی ءَ کہ تئی ھک پلگ بوتگ ءُ  وتی ھک ءَ لوٹ ئے گڑا تو ھک ءِ جنگ ءَ کن ئے ءُ تئی دژمن ناھک بیت۔

تچکیں ناشرکار کئے اِنت، اوگان مھلوک یا نیٹو پوج، اراک ءِ مھلوک یا امریکی پوج، پاکستانی پوج یا بلوچ۔

وتی گام نرم نرم ءَ ایرکنگی اَنت۔ راجی جنگ مدام جتائیں بھراں گوزاں بنت ءُ دیم ءَ جنز اَنت۔ جنین ھم چو مردینانی وڑ ءَ تیار کنگی اَنت کہ ما ایردستے ءِ ایردست ایں۔ چہ درساں پیش ایردستی ءِ مارشت دیگی اِنت کہ کجام وڑ ءَ ھزاراں سال کوھنیں سرڈگار بلوچستان گوں لشکرکشی ءُ توپک ءِ زور ءَ دستیگ کنگ بوتگ۔ ایشی بزانت ھمیش اِنت کہ سیاسی ھیلکاری الّمی اِنت۔ چونیں ھم مردمے ایردستی ءَ مہ زانت ما دگہ زوراکے ءِ ایردست ایں گڑا پہ وتی ایردستی ءِ بگیری ءَ چوں پاد کیت؟ سیاسی ھیلکاری ءَ ابید چونیں ھم زرمبشتے منزل ءَ سر بوت نہ کنت۔ جنگی پندل سازی ءَ جنین شریں وڑے ءَ کرت کنت۔ دودا ءُ کمبر ءِ ماس ءُ دادشاہ ءِ گْوھار ءِ کرد پیلو کنگی اِنت۔ جھان ءَ چنچو جنگ مڑگ بوتگ ءُ مڑگ بوگ ءَ اِنت اُود ءَ جنیناں جتائیں کرد پیلو کرتگ۔ پلستین ءِ آجوئی جنگ یا چین ءِ جنگ بہ بیت جنین گوں مرداں اوشتاتگ اَنت، بلے ھمک چاگرد ءِ روایت ءُ پاسداری بنت۔ چونیں ھم ٹکی یا چاگردی جنگ بہ بنت اود ءَ جنین ھوار بنت۔ اگاں ما بہ پول ایں اسلام ءِ جنگ ءَ ام الامت بی بی آئشہ ءَ گند ایں۔

اگاں ما ایردستیں چاگرداں بہ چار ایں کجام ھم جنین کم گندگ نہ بنت، آ توپک چست کرت کن اَنت، آشوب ءِ ھمک دور ءَ چہ مرداں پشت ءَ نہ بنت، بلے پہ اے کرد ءِ پیلو کنگ ءَ پہ جنیناں آشوبی پارٹی ءُ پہ جنکیں نودربراں گل ھژدری اِنت ءُ آ پارٹی ءِ شریں مارشت ءُ چاگرد ءِ تہ ءِ جوانیں کردے بہ بیت ءُ سرجمیں مھلوک گوں آئی پگر ءُ مارشت ءَ بندوک بہ بیت جنین ھم پہ وت ءَ یک جتائیں جاھے جوڑ بہ کن اَنت۔ وانگجاھانی تہ ءَ جنین ٹیچر بہ بنت ءُ آ وتی نودربراں شریں وڑے ءَ راجی ءُ آشوبی ھیلکاری بہ دے اَنت۔

اے چیز ھژدری اِنت کہ بلوچ جنین راجی زرمبشت ءِ پڑا سیاسی ءُ سلاہ بندیں جھد ءَ پہ وتی کرد ءِ پیلو کنگ ءَ آجوئی زرمبشت ءَ ھوار بہ بنت۔

جنگ مدام لس مھلوک ءِ سر ءَ کپ ایت آ اے وڑ اِنت کہ کہ یک راجے ءِ سرڈگار ءِ سر ءَ زوراکے کیت ءُ دستیگ کنت ءُ راج ءِ درسیں مڈیاں لُٹ ءُ پل بہ کنت ءُ وتی ڈیھ ءَ دیم بہ دنت نزوریں راج ءَ پہ نان ءِ چنڈنے ءَ چمدار بہ کنت، آئی زبان، دودمان، دود ءُ ربیدگ ءَ سرجم ءَ ھلاس بہ کنت گڑا نزوریں راج الّم یک نہ یک روچے وتی دژمن ءَ پجہ کار ایت ءُ پہ جنگ ءَ پاد کیت گڑا کم کم ءَ سرجمیں راج بھر زور ایت ءُ ایشی ءِ تہ ءَ درست وتی کرد ءَ پیلو کن اَنت۔ وھدے کہ جنگ یک راجی جنگے بہ بیت ءُ راجی پدریچ ءِ گپ بہ بیت گڑا ھمک مردم وتی گنجاھشت ءِ ھساب ءَ ھوار بیت ءُ گوں مردانی ھواری ءَ جنین ھم ھوار بنت ءُ وتی جتائیں کردے پیلو کن اَنت۔ چہ چین ءِ آشوب ءَ پد وھدے کہ لھتیں امریکی جنکیں نودربر  کیت ءُ آ گوں چینی کمیونسٹ پارٹی ءِ کارگشاد چو این لائی ءَ گند ءُ نند کن اَنت، چی ءَ کہ آ جنکیں نودربر ھم امریکی کمیونیسٹ پارٹی ءِ مردم بنت۔ آیاں گوشتگ کہ ما ھم چین ءِ چینانی وڑ ءَ کار کنگ لوٹ ایں۔

کامریڈ چو این لائی ءَ گوں آیاں گوشتگ کہ بلکیں شما کرت بہ کن اِت، بلے شمئے ءُ چین ءِ جنینانی میان ءَ یک سکا مزنیں پرکے ھست۔ یکے ٹکی ءُ دومی ما چہ ھونیگیں آشوبے ءَ گوستگ ایں ءُ اد ءَ گیشتر جنین گوں مردیناں اوشتاتگ اَنت ءُ جنگاں مڑ اتگ اَنت ءُ چین یک کشت ءُ کشاری ءُ نیم ایردستی ءِ دور ءَ گوستگ ءُ گوں ایشی ھواری ءَ گوں چاپان زورگر ءَ ھم مڑ اتگ۔

وھدے کہ ما راجی جنگ ءَ یک انچیں چاگردے ءَ چار ایں کہ ٹکی زندگی گوازینگ بہ بیت ءُ جنین چادر ءُ چار دیوالیانی شرپ بہ بیت ءُ درآمدیں مردمانی دیم ءَ جنین ءِ نام ءِ گرگ گناہ بہ بیت۔ جنینانی گوں درآمدیں مردماں گپ جنگ ایب بہ بیت گڑا جنینانی کرد ءِ پیلو کنگ کمو گراں بیت ءُ چہ ایشی شری ءَ ابید گیشتر تاوان دنت۔

کج ءَ کہ مولویانی مستری بوت ءُ وتی گوشتانک ءُ نبشتانکانی تہ ءَ جنین نزور لیک اِت ءُ گس ءِ براہ گوشت گڑا  اے وڑیں چاگردانی تہ ءَ اود ءَ نرم نرم ءَ پاد ایرکنگی اَنت۔

جنکیں نودربراں وانگجاھاں پنتانک بھر ءُ بانگ کنگی اِنت۔ پوسٹر ءُ شھیدانی اکس جنگی اَنت ءُ وتی وانگجاھاں سیاسی چست ایر بندات کنگی اِنت۔ الّم اے کار گران اِنت۔استاد ءُ آدگہ جنکیں نودربر کہ آ تئی ھمپگر نہ اَنت آیانی بگیریانی دیم دارگی اِنت۔ کم کم ءَ آیانی تب وش بوان کنت ءُ آ ھم تئی لیکہ ءِ پلہ مرزی ءَ کن اَنت۔ بندات ءَ شمئے کاروان کسان بیت، بلے پد ءَ مزنیں کاروانے بیت ءُ وتی دزگوھاران ءَ آشوبی کتاب بدے اِت۔ وتی گسانی تہ ءَ وتی براس، ماس ءُ پس ءُ دزگھارانی کِر ءَ آجوئی ءُ ایردستی ءِ جیڑھانی سر ءَ گپ بہ کن اِت۔جنیناں ھمے وڑ کنگ لوٹ ایت کہ آ وتی گسانی تہ ءَ  گوں وتی براس ءُ لوگواجھاں سیاسی  چست ءُ ایراں گپ بہ جن اَنت۔ گساں کتاب بہ وان اِت ءُ چے کہ در برت پد ءَ وتی ھمساھگ ءُ سیاداں جنیناں بہ گوش اِت ءُ آیاں ایردستی ءِ مارشت ءَ بہ دے اِت ءُ ایردستانی سر ءَ چے کہ زمہ واری بیت ما آیاں ھما زمہ واریانی بابت ءَ بہ گوش ایں، وتی ھندانی نزیکیں جنکانی وانگجاھاں بہ رو این ءُ استاد ءُ جنکیں نودربراں بلوچستان ءِ جاور ءُ پاکستان ءِ بلوچ دژمنی، وانگ ءُ مالی لٹ ءُ پلانی بابت ءَ سرپد بہ کن ایں۔

ھما کہ وانندگ اَنت آیاں لوٹ ایت کہ آدگہ جھان ءَ سوبمند ءُ بے سوبیں زرمبشتاں بوان اَنت ءُ آیانی شری ءُ نزوریاں، بے سوب ءُ سوبمندیانی بابت ءَ در بہ بر اَنت چی ءَ کہ چونیں ھم راجے جنگ ءِ دربرگ ءُ ھیل دیگ ءِ کار ءَ ابید داں گڈی آسر ءَ سر نہ بیت۔ اے راستی منگی اِنت کہ جنینانی راجی جنز ءَ ھوار کنگ ءَ ابید راجی جنگ سوبین نہ بنت۔ انچوش کہ گزوات ءَ جنیناں ٹپی ئیں آپ داتگ اَنت ءُ ھمے وڑ ءَ وھدے کہ چونیں ھم راجی زرمبشتے ءَ وتی نادراھجاہ بہ بیت گڑا جنین آئی ءَ شریں وڑے ءَ پھریز اَنت ءُ ھال سر کنگ ءِ کار بہ بیت کرت ئے کن اَنت۔ ھمے سوب ءَ جنین گھگیری کنوکانی بگیری ءَ جتائیں پندل چکاسگ بوتگ اَنت بلوچ گھگیری کنوکانی سر ءَ بھتام جنگ ءِ شوربندی کار گرگ بوتگ گڑا دومی نیمگ ءَ دژمن ءِ سیاست کنوکیں پاکستان ءِ پارلیمنٹ ءَ نشتگیں پارٹی پہ نوٹ ءُ ووٹ ءِ سیاست ءَجنیناں کارمرز کنگ ءَ اَنت۔

بلے جنیناں اے گپ  شریں وڑے ءَ سرپد بوگ لوٹ ایت کہ ھما پارٹی کہ پارلیمنٹ ءَ نشتگ اَنت آ بلوچ راجی زرمبشت ءَ تاوان دیگ ءَ اَنت۔ بلوچ جنین اے وڑیں پارٹیاں چہ دور بہ بنت ءُ ووٹر مہ بنت اے کارپد وت یک مزنیں تاوانے بیت۔  بلوچ جنین سرپد کنگ بہ بنت آ شر ءُ ناشر ءِ میان ءَ پرک ءَ بہ زان اَنت دانکہ یک ماسے ءِ زھگ، گوھارے ءِ براس، جنینے ءِ لوگواجہ ردیں راھے ءَ روگ ءَ اِنت آ وتی چماں بند مہ کنت بلوچ جھد ءِ تاوان دیگ ءَ ھوار مہ بیت۔

آجوئی جنگ ءَ جنینانی بھر زورگ ءِ بابت ءَ ماؤزے تنگ ءِ اے کول ءَ الّم دلگوش کن اِت کہ زانشت یک انچیں سائسنے ءُ ایشی تہ ءَ ھچ وڑیں  ایمانداری ءُ گرور ءِ ھچ گنجاھش نیست۔ اگاں شما بلوچ جنین زانشت لوٹ اِت گڑا شمارا آشوب ءِ تہ ءَ بھر زورگ لوٹ ایت۔ اگاں شما آشوبی لیکہ ءُ آئی وڑ ءُ ڈولاں زانگ لوٹ اِت گڑا شمارا آشوب ءَ ھوار بوگی اِنت۔ مرچی باندا دژمن سیاست ءِ پڑ ءَ چہ بلوچ جنینانی کرد ءَ سکا ترس آماچ اِنت۔