نبشتہ کار: سرباز وپا
رجانکار: امجد رھیم
لھتیں روچ ءَ اسلام آباد ءَ شھدگ ءِ سر ءَکسانیں جنکے مھرنگ بلوچ ءِ تامُرے شنگ بوت اَت کہ گار ءُ بیگواھیں مٹھا خان مری ءِ چُک اَت۔ آئی وتی پِت ءِ اَکس زُرتگ اَت گریوگ ءَ اَت۔ اِے کسانیں زھگ بیگواھیں ڈاکٹر دین مھمد بلوچ ءِ زھگ سمّی دین ءَ اَمباز کُتگ اَت ھَم گریوگ ءَ اَت۔ کسانیں مھرنگ بلوچ ءِ ھکّل ءُ اَرس یک ھمے وڑیں درد ءِ ندارگ ءَ پیش دارگ ءَاَت گُڑا چارگ ءِ وھد ءَ بلکیں کسّے ءَ وتی اَرس داشت نہ کتگ اَنت، گُڑا اِے ھمے وڑیں ساھتے اَت۔
گپ ایش اِنت اے وڑیں دردناکیں ندارگ پہ بلوچاں نوکیں ھبرے نہ اِنت، اے وڑیں کسّہ بَلوچِستان ءِ تہ ءَ باز وھد اِنت بوگ ءَھرچ روچ اے وڑیں دَردناکیں نِدارَگ پہ چارَگ ءَ ملّگ ءَ اِنت۔
بَلوچِستان ءِ شھدگ اے گپ ءِ گواہ اَنت کہ بلوچ زَھگانی ارس ھرروچ روڑانی سر ءَ رچ اَنت، بلے بلوچ جنکانی رِچوکیں ارس آوان ءَ مروچی مسالے جوڑ کن اَنت، ایشی منانک ھرچ در ءُ دیوار دیگ ءَ اِنت۔
آوانی ارسانی کمیت ایش اِنت کہ مروچی جنکانی وتی بلوچ راج ءِ سروکی ءَ اَنت، آ سمّی دین، پوزیہ بلوچ، سائرہ بلوچ، سیما بلوچ ءُ گُلزادی بلوچ بہ بنت یاکہ دگہ بیگواھیں مَردُم ءِ کھول۔
آئی یک درورے ھست انت کہ لھتیں سال ءَ پیسر یک مھرنگ نامین کَسانیں جنکے آ پہ وتی بیگواھیں پت ابدلگپار لانگو ءِ آجوئی ءَ گریوگ ءَ اَت ءُ جُھد کنگ ءَ اَت بلے ریاست ءَ پہ آئی بے توار کنگ ءَ پتءِ لاش سوگات کرت،بلے اے درد ءِ کسہ بے توار نہ اِنت بلکیں گَھگیری ءِ چیدگ جوڑ بوت مروچی آئرا مَردُم ڈاکٹر مھرنگ بلوچ ءِ نام ءَ زان اَنت کہ آ یک راجی رھشون ءُ اُوست ءِ چراگ جوڑ بوتگ۔
پرچا کہ ارس انسان ءِ نزور نہ اَنت، بلکیں آئی توانمندی ءِ چیدگ ھم بوت کن اَنت ۔ وھدے کہ زوراکی ءَ وتی سیمسر سر گوزگ کرت گرااچمّانی شلوکیں ارس تُوپان کن اَنت، آ تُوپان گوں لس مھلوک ءِ گھگیری ءَ مٹ بنت۔
چہ بلوچ ءِ جنکانی چَمّانی در اتکگیں ھرچ ارس ءِ پِٹ مروچی یک گَھگیری ءِ تھریکے ءِ ترجمانی ءَ کنگ ءَ انت۔ چی ءَ کہ گھگیری انسان ءِ پجار اِنت۔ وھدے کہ یک مردمے یا راجے گَھگیری کنت گُڑا آ ایردستی ءِ سانکلاں پروش ایت۔ گوستانک اے گپ ءِ گواہ اِنت کہ دُگنیا ءِ ھر آشوبی، ھر آجوئی ءُ ھر سوبمندی گَھگیری ءَ بندوک اِنت۔
پاکستان ریاست ھم ھمے جیڑ ایت کہ زور ءِ کارمَرزکنگ ءَ بلوچ گَھگیری نزور بیت بلے اے زانگ لوٹ ایت کہ چہ زلم ءِ دراتکگیں ارسانی ھمک ترمپ گَھگیری کنت ءُ اے گَھگیری زورگر ءِ تباھی بیت۔
شُما باز وھد انت اے بلوچ ماس ءُ گْوھارانی وتی زلم ءِ ھاموش کنگ ءِ جُھد ءَ اَت بلے شمے ھر زُلم ءَ پد گَھگیری مھکم بوتگ۔
اے زورگر ترا اے گپ ھم شَرّیں رنگے ءَ یات کنگ لوٹ ایت کہ اے کَسانیں مھرنگ بلوچ ءُ دگہ کامریڈ مھرنگے جوڑ بیت۔
