نبشتہ کار: ڈاکٹر اللہ نزر بلوچ
رجانک: سرباز وپا
ماھتاک اسپر ءِ ستمبر 2025 ءِ تاک
وھدے کہ مردم باسمائی زانشت ءِ گڈ آسر ءَ سر بیت، گڑا وت ءَ ھلاس کنت ءُ وتی چاگرد ءُ مردماں وان اِیت۔ وھدے کہ کسے باسمائی ءِ تہ ءَ گْوز اِیت ءُ آئی ءِ تہ ءَ راجی باسمائی ودی بیت، گڑا وتی جند ءَ ھلاس کنت ءُ پہ راج ءَ وتی جان، مال ءُ پہ وتی کھول ءِ دیمونی کنگ ءَ اُوں چَک ءُ پد نہ بیت۔
راجدوستی، وتن دوستی یک ابرمی کارے، اے دگہ سیاسی ٹولی یا دگہ کارے ءِ مھتاج نہ اِنت۔ بزاں آجوئی جنگ ءَ وتی زانت ءُ زانشت ءَ گوں نوک آبادکاریں زوراکی ءُ دودمانی چکچینی ءِ بگیری ءَ وتی جاور ءُ کاراں چاران کنت ءُ آیاں زانت بکش اِیت۔
وھدے کہ جنگ چہ وتی سیمسر ءَ گوز اِیت گڑا زورگپتیں سرڈگار ءِ لس مھلوک چہ وتی آشوبی جنگ ءِ مول ءَ آشنا بیت۔ سرجمیں راج اے جنگ ءُ آشوبی کار ءَ منّ اِیت چہ بے تواری ءَ وتی بھر ءَ ھوار کنت، بلے اے میان ءَ زورگر گوں وتی توان ءَ ھوار درسیں مڈّی بنت آیاں پہ آجوئی جنگ ءِ دارگ ءَ کارمرز کنت ءُ زورگپتیں سرڈگار ءُ راج ءِ سر ءَ نوک نوکیں زوراکی کنت۔
انچوش کہ بلوچستان ءَ زورگر ءَ نوک آبادکاری برجاہ داشتگ۔ مردم بزاں ورنایانی کشت ءُ کوش، چکچینی، زبانانی سر ءَ پابندی ءِ وڑیں کہ انوں وتگڑیں سرکار ءَ بلوچستان یونیورسٹی ءَ بلوچی، براھوئی ءُ پشتون ءِ وڑیں راجی زبانانی سر ءَ پابندی جتگ۔ اے دژمن ءِ گُڈّی چال ءُ ترسناکیں شوربندی ہے۔ انوگیں وھد ءَ راج بزاں ورنا راجی جوزگ ءُ زانوگر بوگ ءَ اَنت گڑا آیانی زانشت ءَ جھان ءِ چونیں ھم راجے داشت نہ کنت۔
اے وھد ءَ اے گپ گوں آشوبی سروک ءُ آجوئی لوٹوکیں گلانی کارشونی ءُ شوربندی ءَ بندوک اِنت کہ اے باسمائیں ورنا ءُ بلوچ راج ءَ چوں آجوئی جنگ ءَ ھوار کن اَنت۔
من گوں آشوبی سروکاں لوٹ کن آں کہ وتی گل ءِ دوستی ءُ چہ گل ءِ نپاں گیشتر راجی نپ ءُ آجوئی زرمبشت ءِ لوٹاں بہ چار اَنت ءُ پیسلہ بہ کن اَنت۔
اے جنگ ءِ مستریں سلاہ سسائی جنگ اِنت۔ انچوش کہ دژمن بلوچ ءِ آجوئی جنگ ءَ برے ٹولی ءُ برے نام گپتیں جنگے گوش اِیت، بلے جھان ءَ دژمن ءِ اے پندل رد کرتگ۔ بلوچستان ءَ جنگ ءِ تیزی ءُ نشانگانی زانگ ءَ دژمن جنگی سسائی نادْراھی ءِ آماچ کرتگ۔ زورگریں پوج ءِ سپاھی چہ بُنجلاں تچ اَنت، برے برے یک یکے وتکشی ھم کنت۔ اے آجوئی جنگ ءِ راستی ءُ سوبمندی اِنت۔
