بشام ریدگیں کارست ئے

پنچمی بھر

نبشتہ کار: سرباز وپا

راجی آجوئی جنز ءِ پڑ ءَ آ ھمنچو دیم ءَ گام جنان اَت گڑا ھمنچو گیش شیوار ءُ مھکم بوان اَت۔ ھمک سنگت کہ گوں آئی ءَ جنگ ءَ ھمراہ بوتگ اَت گڑا آ سنگت ءَ الّم شھید بشام جان ءِ جنگی کرد ءُ کار ساڑاتگ اِت اَنت۔ وھدے کہ پروری 2016 ءَ راجدْروھی ءِ پژدر ءَ کماندار دینار پنام ء ھسین کشگ بوت ءُ دومی کماندار شیرجان پنام ء دودا جست ءُ دژمن ءِ دیم ءَ سلاہ چگل دات اَنت، بلے آدگہ ایماندار ءُ بلوچ سرمچنڈیں بچاں وتی راجی جنگ انگت ءَ دگہ یک مھکم ءُ جوانیں دروشمے دات ءُ جنگ اِش گیشتر تْرند کرت۔ گڑا چہ آیانی روچ ءَ پد ھمک وھد ءَ سنگت شھید اللہ بشک ءَ گوشگ ءَ بنت کہ تو نوں یک نیٹورکے ءِ کمانداری ءِ زمہ واری بزور، چی ءَ کہ تو یک جنگولیں سنگتے ءُ جنگ ءَ سکا بلد ئے۔ بس آجزیں بشام ءِ مدام گپ ھمے بیت کہ من ءَ دگہ نیٹورک ءِ کمانداری ءِ زمہ واری مہ دے اِت من بس انچو آدگہ سنگتانی رند ءَ گوں باں چنکس کہ منی دست ءَ بہ بیت گڑا من جنگ کنگ ءِ جھد ءَ کن آں، زمہ واری ءِ زورگ سکا مزن ءُ گْرانیں بارے من ایشی ءَ زرت نہ کن آں۔

زمہ واریں سنگت آئی ءَ باز دلبڈی دے اَنت ءُ گوش اَنت کہ اے لگور بوتگیں کماندار پہ جنگی کمانداری ءَ ناماں بوتگ اَنت، آیانی پشت ءَ تو ءُ آدگہ سنگت کار کنگ ءَ بوتگ اِت ءُ جنگانی ساھتاں آیانی دلبڈی بوتگ اِت۔ جنگی رپک ءُ بودناکی تئی تہ ءَ ھست اَنت کجام ھم سنگتاں تو پہ وتی نیٹورک ءَ گچین کن ئے ما ترا سنگت دے اِیں، گڑا تو پہ زمہ واری ءِ زورگ ءَ چی ءَ چک ءُ پد ئے؟ اے جنگ ءِ گْرانیں بار ءَ نوں تئی کوپگاں بوگی اِنت بس نوں تو وت ءَ جاڑیگ بہ کن۔

گڑا چہ درسیں سنگتانی شور ءُ سلاہ دیگ ءَ پد اگست 2016 ءَ آ رازی بیت ءُ نیٹورکے ءِ کمانداری ءِ زمہ واری ءَ زور اِیت۔ آئی نیٹوک ءِ بنداتی سنگت شھید سابر شاد پنام ء یاگی بلوچ ءُ شھید ھاسل مراد پنام ء ساربان بلوچ ءَ ھوار دگہ سے سنگت بنت۔ گوں آئی جند ءَ ھوار آئی نیٹورک ءِ کلیں سنگت شش بنت۔ آ گوش اِیت کہ اے وھد ءَ پہ سنگتانی ھیالداری ءُ کار گرگ ءَ ھمے سنگت بس اَنت اگاں من ءَ پہ سپرے ءَ گیشتر سنگتاں کار بہ بیت گڑا من پہ سپر ءَ دگہ ھم سنگت زرت کن آں۔

شھیدیں بشام جان گوں وتی سنگتاں گوش اِیت دانکہ چہ پارٹی ءِ نیمگ ءَ دگہ دیمے ءَ سپر ءَ روگ ءِ گوشگ نہ بوتگ گڑا مارا ءُ شمارا چہ ڈولیجی چوکی ءَ دانکہ کورک ءَ شپ ءُ روچاں ھمے دگ ءِ پھنات ءَ دارگی اِنت۔ آ داں بازیں وھدے ءَ شپ ءُ روچاں دگ ءَ نزیک وت ءَ داراں کن اَنت۔ ھمک بیگاہ ءَ شپے یک میتگے ءَ روان کن اَنت ءُ گوں مردماں گپ ءُ تران دیوان کناں بنت۔ 

شھید بشام جان ھمک وھد ءَ دو ءُ سے روچ یا ھپتگ ءَ ڈولیجی برجاھیں پاکستانی پوج ءِ کیمپ ءِ سر ءَ اُرش کنت دانکہ پوج چہ وتی کیمپ ءَ در بہ بیت من آئی کاروان ءِ سر ءَ اُرش بہ کنان ءُ دژمن ءَ مزن مزنیں تاوان بہ دے آں۔ بلے آ وتی اے مکسد ءَ سوبیں بیت کہ چہ آ دگہ جاھاں کاروان ءُ بنجلانی سر ءَ اُرش کنگ ءَ ابید ڈولیجی ءُ کورک ءِ میان ءَ پوج ءِ کاروان ءِ سر ءَ مزن مزنیں اُرش کنت کہ آئی ارشانی گپاں پاکستانی پوج ھم منّ اِیت کہ بلوچ سرمچاراں منی سر ءَ اُرش کرتگ ءُ منی کرنل ٹپّی ءُ کپٹن مرتگ اَنت۔

چہ شھید بشام جان ءُ آدگہ جنگولیں سرمچارانی اُرشانی آسر ءَ لگوریں دژمن انچو لاچار بوت کہ آئی کورک ءَ پہ وت ءَ دگہ کیمپے جت کہ من سرمچارانی اُرشاں نزور بہ کناں، بلے راجی پسگانی جنگ ءِ نزور بوگ ءِ جاہ ءَ آئی ءِ سر ءَ اُرش گیشتر تیز بوان بوت اَنت۔

آئی ءِ کمانداری وھد سالے ءُ دو ماہ بوت کہ آ پد ءَ شھید بوت، بلے اے وھدانی میان ءَ آئی دژمن ءِ سر ءَ لھتیں انچیں چیدگی اُرش کرتگ کہ آ اُرشاں دژمن ءِ توانگری گوں ھاکاں ھوار کرتگ ءُ چہ آئی ءِ نام ءَ ترس اِتگ۔ دیم ءَ الّم جھد کن آں کہ شھید ءِ لھتیں گْوستانکی ارشانی بابت ءَ شمارا سرپد بہ کن آں۔

 روان اِنت۔۔۔۔۔۔۔۔۔