نبشتہ کار: سرباز وپاؔ
بچکند گندگ ءَ یک سکا کسانیں چیزے بلے آئی سان سکا مزن ءُ ارزِشت دار اِنت۔ بچکند یک انچیں زیبداریں جوزگے کہ آ نہ تھنا مردم ءِ دْروشم ءَ بْراھدار کنت بلکیں مردمانی دلاں ھم وتی نیمگ ءَ کنت۔ بچکند مردم ءِ اندر ءِ وشی، مھر ءُ مھروانی، دلکشیں مارشتانی چیدگ اِنت۔ ھمے بچکند گم جتیں دلاں دلبڈی ءُ توکل بکش اَنت ءُ دلگرانیں مردماں وشاں کن اَنت۔ جنجالانی ساھتاں مردم ءِ زرد ءَ تاھیر دے اَنت۔ پچکند نہ تھنا دوستیں مردماں پہ وشانی ءَ کمک کنت بلکیں مردم ءِ اندر ءَ اوستانی یک چراگے بالین اِیت۔
گڑا اے دابیں شوکیں بچکند رھشونیں ھمبل بیگواھیں شبیر جان ءِ لُنٹانی سر ءَ مدام گندگ بوتگ اَنت۔ چی ءَ کہ شبیر جان یک مھروان ءُ بچکند دْروشمیں ورنایے ءُ آئی ءَ ھمک وھد ءَ گوں نرمیں گالوار ءُ بچکنداں مردمانی سرپد کنگ ءِ جھد کرتگ۔ چی ءَ کہ اے شوکیں بچکنداں چہ آئی لُنٹانی زیبائی ءَ ابید بلکیں بے مٹیں سکین ءُ کوھیں توکلے گوں بوتگ۔ آئی ءِ ھمے شوکیں بچکنداں مھر درنز اِتگ۔
آئی ءَ چہ وتی اے شوکیں بچکنداں مردمانی دل کٹ اِتگ اَنت ءُ سیاسی کارانی تہ ءَ توکل ءُ ھاٹیگ بکش اِتگ۔ آئی شوکیں بچکندانی توکل دژمن ءَ کدی ھم پروش دات نہ کرتگ۔ ھما شبیر جان ءِ شوکیں بچکندانی توکل ءَ مرچی یک گوستانکے زندگ داشتگ ءُ اے زرمبشت گوں توانمدی ءَ برجاہ اِنت اے ھما لیکہ بنیاد اِنت کہ اے واب آئی شوکیں چماں دیستگ اَنت۔ آئی دیستگیں واب مرچی گوں راستی ءَ مانا بْوان اَنت۔
مھروانیں شبیر جان ءِ پچکندگانی توکل مرچی ھزارانی کچ ءَ گھگیریں سر وشی کرتگ، بلکیں آئی ءِ ھما بچکندانی توکل آئی شیرزالیں گْوھار بانک سیما بلوچ ءِ شیرزالی جوزگ ءُ جھدانی میان ءَ ساپ گندگ بیت۔ اے جھد ءِ پڑ ءَ بانکیں سیما بلوچ ھر پیمیں سکی ءُ جنجال دیستگ اَنت۔ گرم ءُ سارت، تُن ءُ گُژن، دژمن ءِ بیھار، دُژمن ءِ سپاھیانی دست ءَ لٹّ ءُ کُٹ، ایپ آئی آر ءُ زندانی بوگ اے درسیں جنجالانی بلے آ نزور نہ بوتگ بلکیں گوں شیرزالی ءَ دیم پہ دیمی کرتگ۔
لگوریں دژمن چہ مکاری ءُ درسیں زوراکیاں بے سوب بوتگ ءُ آئی داں رھشونیں شبیر جان ءِ مرگ ءِ پندل ساچ اِتگ دانکہ سیما چہ وتی پل گونگیں براس شبیر جان ءَ دل ایکیم بہ بیت ءُ چہ وتی جھد ءَ دزکش بہ بیت۔ ھو بہ گند ئے برے برے سیما بلوچ ھمے پندلانی آماچ بیتگ ءُ دلپروشی ءِ نیمگ ءَ تیلانک گپتگ، بلے رھشونیں شبیر جان ءِ ھما شوکیں بچکندگانی گیراں بانکیں سیما پد ءَ چہ بے اُوستی ءِ سیمسراں کش اِتگ ءُ ھاٹیگ بکش اِتگ۔
من جزماں کہ شبیر جان ءِ اے شوکیں بچکندگ ءِ توکل شیرزالیں سیما بلوچ ءَ نزور بوگ ءَ نیل اَنت ءُ دانکہ آئی جھد ءِ سوبمندی ءَ گوں آئی ءَ ھمراہ اَنت۔
