سیمی بھر:
نبشتہ کار: سرباز وپا
2013 ءِ گچینکاری ءِ وھد ءَ گڑا شھید اللہ بشک آجز گوں جاہ ء آھو ( جھاؤ ) ءِ آجوئی جنز ءِ سرمچاریں سنگتاں دُرستی بیت ءُ زانت کہ جاہ ء آھو سرمچار کے کے اَنت ءُ جاہ ء آھو ءِ سرمچنڈیں ھمبل زان اَنت کہ اللہ بشک مئے لیکھی سنگتے۔ چوناھیا پہ بلوچ سرمچار ءَ سرجمیں بلوچستان ءِ مانا یک، بلے اے ابرمی راستی یے کہ مردم ءَ وتی جاہ ءُ بُندر گیش دوست بیت۔ گڑا بشامیں اللہ بشک آجز شھید واجہ رھمت پنّام ء ھاکم ءُ آئی ھمبلان ءَ گوش اِیت کہ اگاں شما من ءَ موکل دات کن اِت گڑا من جاہ ء آھو ءِ سنگتانی گون ءَ کار کن آں، چی ءَ کہ جاہ ء آھو منی ھنکین اِنت۔
سنگتانی گْوشگ ھمے بیت کہ ھو جاہ ء آھو پہ تو شرتر اِنت تو برو ھمود ءَ گوں ھما سنگتاں کار بہ کن جْوانتر اِنت۔ بلوچستان بھر ءُ بانگ نہ اِنت، بلوچستان ءِ کجام ھند ءَ پہ تو کار بہ بیت گڑا پارٹی ترا ھمود ءَ دیم دنت۔ گڑا آجزیں اللہ بشک دیم پہ وتی ھند ءُ دمگ ءَ کئیت ءُ گوں جاہ ء آھو ءِ سنگتاں ھوار کار کنت۔ گڑا جاھو ءِ کجام ھم نیٹورک ءِ کماندار پہ جنگاں بشامیں بامرد ءَ وتی ھمراہ کنت، ھمے مار ایت کہ بشام جان دلجم ءُ یک جنگی سنگتے۔ (اے درگت ءَ من شمارا دگہ گپے ھال دیگ لوٹ آں کہ بندات ءَ آئی پنّام بشام نہ اَت، آ وھد ءَ آئی ءِ نام نورا اَت۔ ھما وھد ءَ کہ آئی ءَ نیٹورکے ءِ کمانداری ءِ زمہ واری دیگ بنت گڑا آئی نام بشام کنگ بیت)۔ ھمک کماندار کہ آئی جنگی بودناکی ءَ گند اِیت گُڑا وتی ھمک سپر ءَ آئی ءَ وتی ھمراہ کنگ ءِ جھد ءَ کنت۔
چوش کہ شھید اللہ بشک آجز چہ کورک ءَ نزیک اَت ءُ اے وھد ءَ کورک ءِ کماندار دینار پنّام ء ھسین اَت، گڑا سنگتانی گوشگ ھمے بیت کہ تو ءُ دینار وت ماں وت نزیک اِت تو ھمائی ھمراہ ببو پہ تو جوانتر اِنت۔ سرمچنڈیں اللہ بکش وانندگے نہ اَت، بلے سکا زانتکارے اَت۔ آئی گوشگ ھمے بوتگ اَت کہ شما سنگت گوش اِت من ایشی ھمراہ باں، بلے اے پہ ما آسری سنگتے نہ بیت۔ اے لالچی مردے ءُ زمانگے ءَ ڈُنگے بوتگ ءُ پد ءَ چہ وتی آدّت ءَ لاچار بیت ءُ اے باندا پہ زر بھا بیت۔ سنگت شھید اللہ بشک ءَ گوش اَنت آ دگہ وھدے بوتگ ءُ نوں اے دگہ وھدے، بوت کنت دیم ءَ گیشتر در بہ بارت ءُ شر بہ بیت، اگاں ھمراھداری کرت نہ کنت دگہ چے کنت؟ دگہ ھچ کرت نہ کنت ءُ دُژمن ءِ دیم ءَ لگور بیت۔
آجزیں اللہ بشک دینار ءَ پیسر ءَ دیستگ اَت، آئی تب ءُ کارپداں شر زانگ ءَ اَت کہ چے بوتگ اَنت۔ وھدے کہ راجی جُنز ءِ پڑ ءَ گوں آئی ءَ ھوار بیت دینار ءِ دُرسیں کارپدانی سر ءَ وتی دورگِندیں چمّاں سک دنت ءُ آئی دُرسیں ردی ءُ ناشریاں چاران کنت۔ گڑا آئی ءِ اے گُمان رد نہ بوت کہ دینار پنّام ء ھسین ءَ وتی راہ مٹّ کرت ءُ لالچی بوت۔
گوش اَنت کہ اگاں کسے گوں وتی راج ءُ سرڈگار ءَ دَگا بہ کنت گڑا آ رُزوا بیت، بلکل دینار پنّام ء ھسین ھمے پیم بوت۔ وھدے کہ آ لالچ ءَ کپ اِیت ءُ وتی راہ ءَ مٹّ کنت، گُڑا آئی ھوش انچو روت کہ گوں وتی دُرسیں سنگتاں سلاہ کنت ءُ گوش اِیت بیا اِت ما ءُ شما آجوئی جُنز ءَ یل کن اِیں ءُ دُژمن ءِ ھمراہ بہ اِیں۔ پد ءَ سرمچارانی رندگیری ءَ کن اِیں، اِیشاں کُش اِیں ءُ ھلاس کن اِیں۔ شُمارا گوں دیم ءَ کس ءَ کار نیست من پہ شما وت راہ در گیپتگ، بس شما منی ھمراہ بہ بہ اِت۔ من دیم ءَ گپ جتگ شمارا زر ءُ شوک شوکیں توپک رس اِیت، پد ءَ ما ءُ شما اے زِگریاں ساہ ءِ کشّگ ءَ نیل اِیں۔
بہ گندے گوں آئی ءَ ھمائی دابیں لھتیں سنگت رد کپ اِیت ءُ پہ چم جھلی ءَ جاڑیگ بیت، بلے آجزیں بامرد ءِ اِرادہ گوں گُلزمین ءُ راج ءَ مھکم اِنت گڑآ ایشی کے پْروش دات کنت۔ نمیرانیں ھمبل چے کہ گند اِیت گُڑا دُرسیں ھالاں دمگی کماندار ءَ گوش اِیت بیا کہ مئے کماندار ءِ ارادہ اے وڑ اِنت، بلے شمارا ھیال دارگ لوٹ اِیت۔ زمہ واریں سنگت شھید اللہ بشک آجز ءُ دینار ءِ بابت ءَ شر سرپد اَنت کہ کے لب وار ءُ کے اِیماندار اِنت۔
زمہ واریں سنگت آجزیں اللہ بشک ءَ گوش اَنت کہ تو دگہ ھچ مہ کن، تو گوں آئی ھمراہ ئے، آ ترا ھرچی گوش اِیت تو بس ءُ ھاں بہ کن بہ چار باریں دیم ءَ آ وتی سر ءَ کُج ءَ کشّ اَنت۔ اے مْیان ءَ دینار ءُ آئی ھمپگریں سنگت بلوچ راجی جُنز ءُ راجی جھدکاراں چونیں بدّیں گپ گوش اَنت گڑا شھید بشام جان آیاں چار اِیت ءُ ٹھک دنت دگہ ھچ نہ گوش اِیت۔ آیانی گوں دُژمن ءَ ھال ءُ اھوال کنگ ءَ ھوار دُرسیں گپّ ءُ کاراں چاراں کنت۔ آیانی دُرسیں ٹیم ءِ سنگتاں یک یک ءَ چاراں کنت، باریں کے پہ دپ آیانی ھمراہ اِنت یا پہ دل روگ ءَ دلمانگ اَنت۔ کم چہ کم دہ ءُ پانزدہ روچ ءَ گیش گوں آیاں ھمراہ بیت ءُ آیانی گپاں گراں کنت ما چوں روین ءُ مارا کے دست گیت؟ ما اول کُج ءَ رو اِیں؟ کدی مئے سپر بیت، دُرسیں چیزّاں پکّا کنان کنت۔
شھید بشام اے دُرسیں گپاں پارٹی ءِ زمہ واریں سنگتانی دیم ءَ ایر کنت کہ منی سنگتانی گپ ءُ ھال ایش اَنت۔ سنگت گوش اَنت کہ تو سرپد بوت ئے آ روچے دو ءَ پد روگ ءَ اَنت، گڑا مارا ھال بہ دے اگاں انچو پہ اشتاپ سر گپت اَنت ترا چہ آیاں یکے دو ءِ جنگ ءَ گیگ بوت بہ جن اگاں گیگ نہ بوت وتی جند ءَ کش ءُ بیا، بلے انوں وادر بہ کن ءُ انگت ءَ بہ چار۔
ھمے روگ ءُ دُژمن ءِ دیم ءَ سلاھانی چگل دیگ ءِ گپ مدام برجاہ بیت دانکہ چاردہ پروی 2016 ءَ آیانی روگ ءِ گپ پکّا بیت کہ باندا ڈی سی مئے دیم ءَ کئیت ءُ مارا دست گیت، باندا سھب ءَ مھلہ چہ اِد ءَ در کپگی اِنت۔ نوں آجزیں اللہ بشک ءَ چہ آیانی کِر ءَ درکپگ ءُ سنگتانی کِر ءَ روگ ءَ گیگ نہ بیت کہ سنگت باندا روگ ءَ اَنت، بیا اِت ایشاں دزگیر کن اِیں۔
شپ ءَ گِس ءَ نان ورگ ءَ پد دینار، شھید اللہ بشک ءُ دگہ پلی نامیں سنگتے بنت گڑا دینار گْوش ایت کہ سنگتاں شپ ءَ بیا اِت رویں پلاں کُڈک ءَ مئے وابجاہ بوتگ ءُ اِنشپی ھمود ءَ وپس اِیں ءُ سھب ءَ مھلہ رو ایں۔ شپ ءَ رو اَنت ءُ ھما کڈکاں وپس اَنت ءُ سھب ءَ مھلہ پاد کاینت، گڑا دینار گوش اِیت سنگتاں نوں روچ بوتگ چاہ بہ کن اِت کہ مارا پد ءَ سپرے دیم ءَ اِنت۔ اگاں ما دیر بہ کن اِیں روچ ءَ روگ ءِ وھد ءَ گوں سنگتاں ڈیک بور ایں مئے جند ءَ کُش اَنت۔
شپ ءَ آ وپس اَنت ءُ سھب ءَ مھلہ پاد کاینت گڑا دینار وتی سنگتاں گوش ایت کہ زوت وت ءَ تیار بہ کن اِت نوں روگ ءِ وھد اِنت۔ گڑا شھیدیں بشام گوش اِیت کہ اگاں ما رو اِیں ءُ توپکاں چگل دے اِیں ءُ پد ءَ پوج ءِ ھواری ءَ واتر جاہ ء آھو کا اِیں، گڑا تئی ارادہ چے اِنت؟ گڑا دینار وتی وابجاہ ءَ وسپوک بیت ءُ ھمےگوش اِیت اگاں ما گوں پاکستانی پوج ءَ واتر اتک اِیں گڑا اے سرمچارانی زھگ ءُ جنیناں براں کن اِیں ءُ گوں آیاں بدکاری کن ایں۔ گوں ھمے گپ ءَ ھوار بشامیں بامرد وتی سی تیری ءِ لاک ءَ پچ کنت ءُ دینار ءَ رکبار کنت۔ اے ھمے وتی وابجاہ ءَ مر ایت۔ گڑا دومی سنگت گوش ایت تو گنوک ءِ سنگت کُشت؟ شھید اللہ بکش گوش اِیت کہ تو وتی توپک ءَ چگل دے دست ھالی بو آسنگتانی کِر ءَ رو اِیں، آ گوش اِیت کہ من نیاھاں آ وتی دست ءَ پہ توپک ءَ بارت کہ من اللہ بشک ءَ جن آں گڑا اللہ بکش ءِ توپک ءِ لاک ساری ءَ پچ بیت آ سنگت پلُی ءَ ھم کُش اِیت۔ چہ ایشی ءَ پد ھما کہ پارٹی مڈّی بنت توپک ءُ تیر یا آدگہ سامان بنت دُرساں زور اِیت ھما کہ آیانی جند ءِ زات ءِ بوتگ اَنت آیاں ھمیشانی سرانی کِر ءَ ایر کنت۔
شھید اللہ بشک آجز پنّام ء بشام جان موٹر سائیکل ءَ اسٹارٹ کنت ءُ پارٹی ءِ مڈّیاں زور ایِیت تچک ءَ سنگتانی اوتاک ءَ روت۔ شھید بشام کہ اُود ءَ سر بیت لھتیں سنگت نہ زانت کہ چے بوتگ، بلے زمہ واریں سنگت زان اَنت کہ بشامیں بامرد ءَ وتی کار کرتگ۔ ھمے سنگت کہ سرپد نہ اَنت آ بشام ءَ جست کن اَنت اِش کنگ ءَ دو سنگت شھید بوتگ، گڑا آ گوش اِیت من دگہ نیمگے ءَ بوتگ آں من سرپد نہ آں۔ وھدیکہ آ گوں زمہ واریں کمانداراں نند اِیت گڑا ھمے گوش اِیت کہ بیا سنگتانی ارادہ اے وڑ بوتگ ءُ من وتی کار کرتگ۔ گڑا سنگت گوش اَنت کہ سکا شر کرتگ۔ ناشر ءُ راجدْروھیں مردم ءِ وڑ ھمیش اِنت۔
شھید بشام جان گوں مردی توکل ءَ مدام ابدمان بوت ءُ آ دوئیں گْوستانک ءِ تاکدیماں پہ مدامی بنّام اَنت۔
روان اِنت ۔۔۔۔۔۔
