نبشتہ کار: سرباز وپا
اے دیار ءَ ھمک روچ یک نوکیں پوسٹرے گندگ بیت، بہ گند ئے اے دیار ءَ نشتگیں مردم چہ ایردستی ءُ پدمنگتی ءِ سوب ءَ چہ جھان ءِ آدگہ چیزاں آشنا مہ بنت بلے پوسٹر ءَ بلوچ ءِ ھمک زھگ شری ءَ زانت ءُ سرپد اِنت۔ چی ءَ کہ اے کرن ءِ تہ ءَ ھمک روچ پہ بلوچ ءَ پوسٹر بھر ءُ بانگ بوگ ءَ اِنت۔ اے سرڈگار ءِ سر ءَ ھمک بھرگ ءِ مردماں الم یک نہ یک پوسٹرے دست ءَ اِنت ءُ دگے ءِ سر ءَ گوں رنج اِتگیں نگاھاں گندگ بیت۔ نوں اے دیار ءِ مردم چہ پوسٹراں شریں وڑے ءَ آشنا اَنت۔
اے چاگرد ءَ شپانک ءُ بزگر ءَ بہ گر دانکہ پروپیسر ءُ راجی رھشون ھم پوسٹر جوڑ بوگ ءَ اِنت۔ چہ مرداں ابید مئے گْرانازیں گْوھار ءُ مکھیں ماس ھم پوسٹر جوڑ بوگ ءَ اَنت۔ اے چاگرد پوسٹراں انچو مان پتاتگ کہ پیرزال ءُ تپلیں زھگان ءَ ھم پوسٹر دست ءَ اِنت۔ گوں پوسٹر ءِ ھواری ءَ اگاں اد ءَ دگہ کسے اردو ءِ دگہ گپ زانت یا نہ زانت بلے ( بازیاب کرو ) اے دانک پہ بلوچ ءِ ھمک بھرگ ءَ یک وردے جوڑ بوتگ۔ اے پوسٹرانی کسہ سکا دْراجکش ءُ مزن بوتگ۔
ما ھمے پوسٹر ( ڈاکٹر مھرنگ بلوچ) ھم گوں ھمے پوسٹرانی دست ءَ کنگ ءَ دیستگ ءُ چہ آئی ءَ آشنا بوتگ ایں۔ اے ھم وتی دست ءِ پوسٹر ءِ کارست ءِ گِس ءَ برگ ءَ سوبین نہ بوت گڑا آئی ءَ اے پوسٹر وتی زندگی ءِ یک بھرے جوڑ کرت۔ چی ءَ کہ آ اے پوسٹرانی رنج ءَ سرپد اَت ءُ آئی ءَ ھمے لوٹ اِت کہ من ھمے پوسٹرانی کسہ ءَ چہ وتی سرڈگار ءَ ھلاس بہ کن آں گڑا پمشکا مرچی آئی جند ھم پوسٹرے جوڑ بوتگ۔
بلے! اے پوسٹر بے توار نہ اِنت گپ ءُ رھشونی کنگ ءُ سکین دیگ ءَ اِنت۔ ھمے گوشگ ءَ اِنت کہ بلوچ ءَ ھمے پوسٹرانی کسہ ھلاس کنگی اِنت۔
گڈی ءَ گوں اے دستونک ءَ کہ من جون 2020 ءَ پہ بانک ڈاکٹر مھرنگ بلوچ ءَ نبشتگ۔
ھک ءُ راست ءِ توار مھرنگ اِنت
راج ءِ چُک ءُ گھار مھرنگ اِنت
ھچ وڑ ءَ گوں ترا نہ بیت دارگ
پہ تو توپان ءُ ھار مھرنگ اِنت
اے بلوچ راج ءِ منی پرزند اِنت
گیرت ءُ لج ، میار مھرنگ اِنت
ہر گور ءَ ماتیں بلوچستان ءَ
چمان جست کن بچار مھرنگ اِنت
شر تر اِنت اَچ لگوریں آ براساں
راج ءِ مئے درد وار مھرنگ اِنت
تو کئے ءُ تئی چی انت بستار
واھُند ء سرڈگار مھرنگ اِنت اِنت
