دانک

نبشتہ کار: ڈاکٹر اللہ نزر بلوچ

رجانک: سرباز وپا

ماھتاک اسپر ءِ چارمی تاک

ھرچی کہ انسانی گوستانک نبیسگ بوتگ آیانی تہ ءَ گیشتر جنگانی اَنت۔ انسانی آسراتی ءِ درگت ءَ جھان ءَ انچو دیمروئی کرتگ بوت کنت کہ گوستانک ءِ سرپدی ءِ بنیاد ءَ ایشی ءِ درور دست نہ کپ ایت، بلے ھاکم ءُ ایردست، زورگر ءُ زورگپت، زوراک ءُ نزور ءِ جنگ انگت برجاہ اِنت۔ ھمے پیم ءَ ما بلوچاں پد ءَ پہ زورگپتیں بلوچستان ءِ آجوئی ءَ وتی جنگ ءُ جھد برجاہ داشتگ۔ اگاں ایشی ءَ دژمن ءِ بگیری ءَ بلوچ گوستانک ءِ دراجکشیں جنگ بہ گوش ئے گڑا بوت کنت کہ راست بہ بیت۔

جنگ انگت ءَ زورگر، ایردست ءُ زورگپتیں راج ءِ میان ءَ اِنت بلے جنگی ابزار، ھنر ءُ وڑ ءُ پیم مٹ بیتگ۔ آوھد شتگ، وھدے کہ سرکار راجاں ءُ ھندانی گرگ ءَ پد وتی نائب داشتگ اَنت، انوگیں جنگ بزاں بیست ءُ یکمی کرن ءَ دوئیں ٹولیانی میان ءَ جنگی ابزار مٹ بیتگ اَنت۔

من نوکیں سال ءِ بابت ءَ بلوچ سرمچار، سیاسی جھدکار ءُ آجوئی لوٹوکاں گوشگ لوٹ آں کہ  ما ھم وتی رویشت ءُ وڑ ءُ پیماں ھمے وڑ ءَ مٹ بہ کن ایں۔ دژمن گوشگ ءَ اِنت کہ من نشانگیں لشکرکشی کنگ ءَ آں بلے بلوچ راج ءُ جھان زانت کہ راستی ءَ آئی بلوچستان ءِ ھمک پنچ کلو میٹر ءَ وتی چوکی مِک کرتگ اَنت۔

اے جاوراں وتی جنگی کارشونی ءُ وڑ ءُ پیم کوھن ءُ نوکیں ٹیکنالوجی ءِ ھساب ءَ مڑگ لوٹ ایت۔ من اے گپ ءَ پد ءَ گوشگ لوٹ آں کہ اگاں دژمن پیداک اِنت آئی ءَ بل کیت کیمپ جنت ءُ نند ایت گڑا آئی ءَ ایمن بوگءَ مہ ھل اِت۔ وھدے کہ آ روگ ءَ بوت گڑا آئی سر ءَ ( کنونشل وار) ءِ وڑ ءَ ارش بہ کن اِت۔

ما چہ دو دھکاں برجاھیں وتی جنگی ءُ سیاسی جھد ءَ پرچا پد ءَ گوں ھورتی ءَ مہ وان این ءُ وتی تجربھاں گوں وتی نوکیں راجی لوٹ آں ھمدپ مہ کن ایں۔ انوں اے سال ءَ زورگر ءِ تھنک ٹینکاں راجی جھدکارانی جنگی کارشونی ءُ دژمن ءِ بوتگیں تاوان ھما داب ءَ پیش کرتگ کہ ایشی ءِتہ ءَ ادارہ ءَ وتی لشکر ءِ نزوری ءُ آجوئی لوٹوکانی  جنگی گھتری من اِتگ اَنت۔ آدگہ جنگی پارٹی یا ٹولی  بہ بنت، بی ایل ایپ ءُ بی ایل اے ءِ ھما کارانی نام گرگ بیتگ۔ راستی ءَ سرمچارانی کاروائی ءُ زورگریں دژمن ءِ تاوان چد ءُ گیشتر اَنت۔ اے تنک ٹینکاں وتی پولکاری ءِ تہ ءَ بازیں انچیں ویلانی گپ جتگ کہ چہ آیاں دژمن ءَ جانی تاوان بوتگ ءُ تونگری سکا تباہ کرتگ۔

اے نوکیں سال ءِ درگت ءَ من جھدکاراں گوشگ لوٹ آں کہ راجی آجوئی جنگ ءُ جھد ءَ یکشل ءَ برجاہ بدار اِت۔ پاکستانی لشکر یک باڑھی لشکرے آ جنگ ءِ سوب ءَ آئی دمبُرتگ ءُ سسائی نادراھی آماچ اِنت۔ مارا دژمن ءِ مالی تونگری گیش تاوان دیگ لوٹ ایت دانکہ زورگر سرپد بہ بیت کہ زورگپتیں بلوچستان ءَ گیشتر زورگپتی ءِ دارگ ءَ نپ نیست۔

من سرڈگار ءُ چہ سرڈگار ءَ ڈن نشتگیں سیاسی جھدکار، انسانی ھکانی سرگرمیں سروک ءُ کارکناں گوشگ لوٹ آں کہ ھمے وڑ ءَ شما وتی راجی آجوئی زرمبشت جھان ءِ دیم ءَ شریں وڑے ءَ پیش کرتگ ءُ آیان ءَ سدکی دیگ ءِ جھد کرتگ ستا کرز اَنت۔ بلے پہ آجوئی ءِ وڑیں مزنیں مولے ءَ اے بس نہ اَنت چی ءَ کہ ما یکجاہ بہ بئیں ءُ دژمن ءِ بگیری ءَ جنگ بہ کن ایں۔ چی ءَ کہ چہ سویت یونین ءِ درکپگ ءَ پد اوگان مجاھدانی جتائیں ٹولی نہ امریکہ ءَ یکجاہ کرت کرت اَنت ءُ نہ آئی ایس آئی، نہ سئودی ارب ءَ ۔ مکہ مکرمہ ءَ سوگند ءَ پد ھم وارلاڈ ( جنگی سردار ) یکے دومی ءِ بگیری ءَ اوشتاتگ اَنت دانکہ تالبان جوڑ بیتگ۔

اے جھانی راستی یے، زانت ءُ زانگ ءِ واھندانی گْوشگ اِنت کہ زانوگریں راج،مردم ءُ سروک چہ آدگرانی ردیاں دربَر اَنت ءُ نابودیں راج آیانی سروک چہ وتی ردیاں دربرگ ءِ تجربہ ءَ کن اَنت۔پمشکا من گْوشگ لوٹاں کہ مرچی یا باندا بلوچ آجوئی لوٹوکیں گل یکجاہ بیگ ءَ لاچار بنت۔

من وتی راج ءِ سیاسی جھدکار ءُ سرمچاراں گوشگ لوٹ آں کہ نوں وت ماں وت ءَ وت ءَ زھنی ھساب ءَ یکجاہ کن اِت کہ ھواریں دژمنءِ بگیری ءَ ھواریں زھن ءُ زور ءَ کار مرز بہ کن اِت۔ مرچیگیں دور ءَ سوشل میڈیا یک انچیں زورے کہ اے کسی گون ءَ دارگ نہ بیت۔ ھکی ئیں جھدکار اے پلیٹ پارم ءَ پہ وتی آجوئی ءِ ھک ءَ کارمرز بہ کن اَنت اگاں جھدکار ءُ شھیدانی تہ ءَ پرک ءُ پیر کرت گڑا اے مئے نزوری بیت۔ من گوں ورنایاں دزبندی کناں کہ آ اے وھد ءَ وتی دست ءَ روگ ءَ میل اَنت۔ ورنا ریازی، آئی ٹی ءَ ھوار درسیں بھرگاں نوکیں زانتءُ ٹیکنالوجی ءِ دربرگ ءِ جھد ءَ بہ  کن اَنت کہ میان استمانی مالی سائنسی ءُ سیاسی بابت ءَ دربرگ ھژدری اِنت۔  منی ھیال ءَ ما وتی ماتی زبان ءِ ھواری ءَ انگریزی زبان ءَ ھیل بہ کن ایں چی ءَ کہ نوکیں زانت ءُ ٹیکنالوجی ءِ زانگ ءُ پہ وتی نپاں کارمرز کنگ ءَ انگریزی ھژدری بیتگ۔ نوکیں سال ءَ چے بیت؟ منی بیسہ، ستک ءُ ایمان اِنت کہ پہ آجوئی ءِ نیمگ ءَ لھتیں گام دیم ءَ جنز ایں۔ بلے آجوئی جنگ ءَ بلوچ راج ءَ کجام دیمونی داتگ ءُ دژمن کجام وڑ ءَ مئے راجی ءُ دودمانی چکچینی ءَ کنگ ءَ اِنت، داں آجوئی ءَ مارا چہ ایشی گیش دیمونی دیگ لوٹ ایت۔

جھدکار وت ماں وت نزیکی ودی بہ کن اَنت ءُ چوش کہ ٹیکنالوجی ءِ پہ گِر ءُ دار ءَ کارمرز کنگ اِنت چہ ایشی ءَ پھریز بہ کن اَنت۔ بزاں کہ رھوتی نزام ءِ سوب ءَ گوستگیں سال ءَ چے تاوان بوتگ آ چارگ ءُ نوکیں کارشونی ٹھینگ  بہ بیت دانکہ ما چہ وئیلاں وت ءَ بہ رکین ئے ءُ دژمن ءِ کارشونیاں بے سوب بہ کن ایں۔ انچوش کہ یک دری ڈپلومیٹے ءِ گوشگ اِنت کہ اے دھر ایٹم بمب ءِ نہ اِنت بلکیں چپ chip ءِ جنگ اِنت کہ اے چہ ایٹم بمب ءَ گیش ترسناک اِنت۔

پمشکا ٹیکنالوجی ءِ ھمک مردم وتی راجی جھدکاراں نوکیں ٹیکنالوجی ءِ نپ ءُ تاوانانی بابت ءَ نبشھتی دروشم ءَ سرپد بہ کنت۔