نبشتہ کار: ڈاکٹر اللہ نزر
رجانک: سرباز وپا
انتونیو گراچی ءِ گُشتن اِنت کہ گوستانک ءِ تہ ءَ مردم مدام دو تونمندی ءِ میان ءَ بیت۔ یا گوں زوراکی کنوک ءَ یا زوراکی اوپار کنوک ءِ گون ءَ ھوار بیت۔ یک نیمگ بیگ ھنچائیں گپے۔ مئے سرڈگار ءَ ھم یک جنگے یکشل ءَ برجاہ اِنت۔ زورگر ءُ ایردستیں راج دیم پہ دیم اَنت۔ اگاں ما گوستانک ءِ تاکدیماں بہ لیٹین ئیں گڑا گندیں کہ درسیں زوراک زورگریں توانمندانی وڑ ءُ پیم یکیں وڑ ءَ بوتگ اَنت۔ آ ریاستی زور ءُ مال ءُ مڈیانی بنیاد ءَ ایردستیں راجاں ھمے وڑ ءَ لپاش اَنت کہ آیانی گھگیری پد ءَ سر چست کُت مہ کنت۔
نزوریں راجانی، زمین، دود ءُ ربیدگ،زبان ءُ گھگیری گوستانک جتا بیت، وتی جھد ءَ جتائیں دْروشُمے ءَ برجاہ دار اَنت۔ آ وھدی بنیاد ءَ جتائیں ایردستیں راجانی جنگلی ءُ سیاسی ھیلہ آں وتی جھد ءِ تہ ءَ کارمرز کن اَنت۔ بلے ھرچ راج ءِ زْرمبشت گوں آئی ءِ زمین، دود ءُ ربیدگ ءُ گوستانکی بنیاد ءَ جتا بیت۔ ھمے سوب اِنت کہ بلوچ راجی آجوئی جنگ ءِ گھگیری، دود ءُ ربیدگی بھر چہ آدگہ راجانی زرمبشتاں جتا ءُ دگہ رنگ اِنت۔
زورگر مدام چہ وتی زور ءِ مدھوشی ءَ ایردستیں راجانی زمین،دود ءُ ربیدگی پجار ءِ ھلاس کنگ ءِ جُھد ءَ کن اَنت۔ نوں اِد ءَ اے جُست ودی بیت کہ دژمن ایوک ءَ توپک ءِ زور ءَ پروش دیگ بیت؟ منی شور ھمیش اِنت کہ جنگ ءِ ھواری ءَ دژمن ءِ ھمک سلیں کارپد گوں راجمستری، سیاسی ءُ سپارتی پِڑ ءُ لبزانک ءِ پارست ءَ پاشک کنگ ھژدری اِنت۔
دژمن ءِ نیمگ ءَ مردمی ھکانی بگیری ءُ جنگی میارباریانی میان استمانی تک ءَ ھم دیم ءَ آرگ ھژدری اِنت۔ دانکہ آئی سلیں شوندات پاشک کنگ بہ بنت۔ من وتی ھمبلاں مدام گوش آں کہ مئے جھد ایوک ءَ چیرجنگی نہ اِنت، بلکیں اے یک دراجکشیں جنگے ایشی ءِ تہ ءَ راج ءِ ھمک مردم ءَ وتی بھر ھوار کنگی اِنت۔
ڈیرے ءِ گوشتن اِنت کہ تو اگاں دژمن ءِ ماڑی ءِ یک ھشتے بہ پروش ءِ گڑا پہ آئی ءَ باگی یے جوڑ بہ ئے۔ بلے مرچی جھان ءَ پہ مردمی آسراتیاں باز دیمروئی کرتگ۔ بلے زورگر ءُ ایردستیں راجانی میان ءَ ھمگرنچی انگت ءَ ھما وڑ ءَ بے رھم اَنت۔ دژمن میان استمانی کانود ءِ رد ءَ میاربار گوشتگیں گسٹاپو ءِ وڑ ءَ کار مرز کنگ ءُ بلوچ ورنا، کماش ءُ جنیناں آوار جنگ ءُ آیانی لاشاں چگل دیگ ءُ جنگی سسائی ھیلھاں کارمرز کنگ ءَ اِنت دانکہ بلوچ راج ءِ یکے دومی ءِ دیم پہ دیمی ءَ بہ اوشتارین ایت۔ بلے بلوچ راج چہ گوستگیں دو دھکاں دژمن ءِ ھنچوش گوں تمردی ءَ دیم پہ دیمی ءَ کنگ ءَ اِنت کہ آ وت سسائی بنیاد ءَ پروش ءِ آماچ بوتگ۔ من سدکاں کہ بلوچ ءِ آجوئی جنگ داں بلوچستان ءِ آجوئی ءِ گرگ ءَ برجاہ بیت۔
درسیں آجوئی لوٹوکیں گل ءُ سروکانی شرپ ءُ ھمسنتی پہ اے زرمبشت ءِ سوبمندی ءَ باز ارزیشت دار ایت۔ بے پرک ءَ گل ءُ سیاسی ھمگرنچیں آجوئی جھد ءِ میان ءَ جان دیوکیں درسیں شھیدانی دیمونی یاد کنگ ءُ مادنیں راہ جوڑ کنگ سک المی اِنت، چی ءَ کہ گل، سیاسی، ٹکی یا کجام بنیادے ءَ شھیدانی بھر ءُ بانگ کنگ ھرچ راجے ءِ تباھی ءِ سوب جوڑ بیت۔ مرچیگیں انپارمیشن ٹیکنالوجی ءِ پارست ءَ دژمن ءِ دروگ ءُ مکاریں گپانی پسہ دیگ سکا ھژدری اِنت، دانکہ سلکاریں گپ پہ آئی ءَ وت ملامتی ءِ سوب جوڑ بہ بنت۔
گڈسر ءَ سن زو ءِ نامداریں گوشتن ءَ مدام گیر بیار اِت: اگاں تو وتی زور ءُ نزوریاں سرپد ئے ءُ دژمن ءِ زور ءُ نزویاں زان ئے، گڑا تو سوبمند بہ ئے ءُ دژمن پروش وارت۔ ھمے کارشونی ءِ بنیاد ءَ ما وتی راجی زرمبشت ءَ سوبمند بہ ایں ءُ دژمن ءَ پروش دئیں۔
دلگوش! اے نبشتانک من چہ ماھتاک اپسر ءَ زرتگ۔
