نبشتہ کار: سرباز وپاؔ
دومی بھر
چوش کہ من ءَ شھید ناکو ھیر بکش ءُ شھید اورنگزیب پنام ء شادین ءِ سنگتی ءِ میان ءَ شھید اورنگزیب ءِ گون ءَ باز وھد ءَ یکجاہ بوگ ءِ موہ رستگ۔ شھید اورنگزیب ءِ تہ ءَ من سکا بازیں ھیل دیستگ کہ آئی شھید ناکو ھیر بکش ءِ چھرگ جتگ۔
ھیر نوں من بندات ءَ شھید ناکو ھیربکش ءِ سر ءَ چیزے گپ جنگ لوٹ آں۔
شھید ناکو ھیر بکش ءِ نام من پیسر ءَ باز بر ءَ اش کرتگ اَت وھدیکہ کہ ۔ 16 دسمبر 2009 ءَ جاہ ءِ آھو کورک ءَ مزن وانگجاہ ءَ مچی یے شھید اھمد برامی ءِ نام ءَ دارگ بوت۔ اے مچی ءَ چہ بی این ایم ءِ بنجاھی سنگتاں شھید واجہ ڈاکٹر منان جان، واجہ چئیرمین ھلیل آتکگ اِت اَنت۔ چہ جاہ ءِ آھو ءَ ابید گریشگ، آواران ءُ بیلہ ءَ جتائیں ھندانی مردم آتکگ ات اَنت۔ ھمے مچی ءَ من شھید ناکو ھیربکش دیم پہ دیمی دیست من ءُ آ وت ماں وت درستی بوت ایں۔
ھمے روچ ءَ مچی کہ ھلاس بوت سنگتاں ھمے گوشت کہ بی این ایم ءِ باسک مہ رو اِت کہ مئے ءُ شمئے دیوانے بیت۔ مچی ءَ پد ما بی این ایم ءِ درسیں سنگت یکجاہ بوت ایں ءُ سنگتاں ھمے گوشتگ کہ بی این ایم جاہ ءِ آھو ھنکین ءِ آرگنائزنگ باڈی ءَ اڈ دے ایں۔ کم چہ کم ما اے دیوان ءَ بیست باسک ءَ گیش اَت ایں۔
پہ آرگنائزنگ باڈی ءِ کماشی ءَ شھید ناکو ھیر بکش ءُ دگہ ھمبلے اوشتات اَنت۔ آئی ءِ ووٹ چار بوت اَنت ءُ ناکو ھیر بکش آرگنائزنگ باڈی ءِ کماشی ءَ سوبین بوت۔
چہ ھما روچ ءَ پد من ءُ شھید ناکو ھیر بکش جتائیں وھد ءُ جتائیں جاھاں ڈیک وارتگ۔ چہ ھمے یکجاھی ءُ گندگ ءُ ننداں من شھید ناکو ھیربکش ءِ تہ ءَ ھمے چیز دیست کہ آ سکا جزباتی تب ءِ ھمبلے اَت ءُ آ کسانیں گپانی سر ءَ سکا جزباتی بوتگ بلے آئی ءَ زانشت ءِ بودناکی ءَ وت ءَ داشتگ ءُ اوپار ئے کرتگ، آئی ءِ تہ ءَ گپ گوش دارگ ءِ بودناکی ھست اَت۔
آئی سسا ءَ چونیں ھم گپے آتکگ آئی ءَ درشان کرتگ۔ بلے وتی ھمک سوڑگ ءِ سر ءَ چو درون ءِ کوہ ءَ مھکم بوتگ ءُ اوشتاتگ۔
چہ ایشی ءَ ابید دگہ ھم بازیں رند ءَ ھرتالانی میان ءَ مردماں وس کرتگ کہ وتی ھرتال ءَ ھلاس بہ کن اِت بلے آئی ءِ گپ ھمے بوتگ کہ اے ھرتال ما چہ پارٹی ءِ جار ءِ پد ءَ کرتگ دانکہ ھرتال ءِ وھد آسر نہ بوت گڑا ساری ءَ منی لاش چست کنگ بیت رند ءَ دگ پچ بیت۔
پارٹی داتگیں ھمک زمہ واری آئی گوں شریں وڑے ءَ پیلو کرتگ آئی وتی اے راجدوستی سیاسی سپر ءِ تہ ءَ پہ نزور شون دیگ ءَ کس ءَ موہ نہ داتگ۔ شھید ناکو ھیر بکش پارٹی ءِ بنداتی سنگت اَت گڑا دمگی مردمانی ھمک جست ءِ پسو دیگ ءَ ساڑی اَت ءُ ھمک کار ءَ چاڑکہ اَت۔
چہ جھد ءَ ھوار بوگ ءَ پد آئی ءِ کِر ءَ پہ وتی زات ءَ کم وھد بوت بوتگ اَنت، بزاں آئی وتی کھول، نزیکیں سیاد ءُ ازیز آ وڑ ءَ وھد دات نہ کرتگ اَنت ءُ آئی ءَ مدام لیکھ ءُ لیکھی سیادیانی مھکم کنگ ءِ جھد کرتگ۔ مدام پہ راجی کاراں تچ ءُ تاگ کنگ ءُ وتی پارٹی ءُ راجی جنز ءِ مھکم کنگ ءَ بوتگ۔
روان اِنت
