بلک شراتون ءِ زھگ گوں وتی رمگاں کوہ ءَ وانڈہ اَت کہ لھتیں سلاہ بندیں دزاں آئی زھگ گوں رمگ ءَ آوار جتگ ءُ برتگ۔ اے بدیں ھال شراتون ءِ گوشاں کپت پہ آئی ءَ زندگی چو مھشر ءَ بوت۔
آئی ءِ نزیکیں ھماسگ براھیم ءِ زھگ ءِ سور تیار اَت آئی ءَ چہ شھر ءَ ڈھلی لوٹائینتگ اِت اَنت۔ بلے اے کزا میان کپت۔ آ بلوچے اَت ءُ دل ئِے میار کنگ ءَ اَت۔
براھیم ءَ وتی زھگ ءِ سور ءِ شاتکامی ھم دارگی نہ اَت بلے چہ بلوچی ءَ پہ ھمساھگی ءِ میار ءَ شراتون ءَ دپ ءِ سلاہ جنگی اَت۔ آئی ءَ اے گپ زانت کہ من ءَ شراتون مکن نہ کنت۔
براھیم پہ ناکامیں دلے شت شرتون ءِ گس ءَ آ وتی گس ءِ دیم ءَ نشتگ اَت ءُ گشان ءِ لمبے سر ءَ بستگ اَت ئِے۔ براھیم آئی ءِ جاور دیست اَنت آپ ءِ ورگی انہ اَت بلے چہ شرتوان ءَ پرس ات ئِے۔
گھار شراتون من پہ واھگے وتی زھگ ءِ سور تیار کرتگ بلے من نہ زانتگ کہ دگہ چوشیں ویلے دچار کپ ایت۔ مھمان چہ دور ءَ آتکگ اَنت ءُ ڈھلی ھم دارگ نہ بنت اگاں تو من ءَ موکل دے ئے گڑا من وتی زھگ ءِ سور ءَ بندات کن آں؟
شراتون ھڑیسکگے جت ءُ وتی ارسانی پھک کنگ ءَ اَت ءُ گوشت ئِے نہ لالا براھیم تئی زھگ دگرے نہ اِنت منی اولاد اِنت۔ تو پہ مرادے ءَ تیار کرتگ وتی زھگ ءِ سور ءَ بہ کن ءُ ھدا ترا مراد بہ دنت پہ منی زھگ ءِ گاری ءَ وتی زھگ ءِ سور ءَ مدار پمن اے ویل چہ برزا نبشتہ بوتگ۔ آ باری من ءُ تو دوئیناں نہ زانت کہ اے وڑیں ویلے بیت۔
پہ منی ھماسگی ءَ ملامت مبو وتی زھگ ءَ سور بدے ھدا ترا مراد بہ دنت۔
براھیم شاکارگے جت ءُ پاد آتک۔ گوش ایت شر اِنت گھار تو کہ من ءَ موکل داتگ گڑا من وتی زھگ ءِ کار ءَ بندات کن آں۔
رنجیگیں شراتون پہ وتی زھگ ءِ آجوئی ءَ دوا لوٹگ ءُ مازگ بندگ ءَ اَت۔ براھیم وتی زھگ ءِ سور ءَ ڈھل ءِ چاپ گپتگ اَت ءُ ناچ ءَ اَت۔
