مھروانیں ھسار شھید اشرپ پنام ء ریھان نوکاپ دومی ءُ گڈی بھر نبشہ کار سرباز وپا

جنگ گْوستانگی گْواچن ءُ راستی یے کہ سکا بے رھم  ءُ گرانیں چیزے ، ءُ دومی مردم ءِ کشگ ءُ وتی ساہ ءُ سر ءِ نْدر کنگ ھم ارزان نہ اِنت ، بلے لھتیں مول مردم ءَ چہ ساہ ءَ سرگوز کنت۔ پہ مردم ءَ وتی واھشتانی کشگ ، گرم ءُ سارتی ، تُن ءُ گژن، پند  ءُ گرانیں بار ءِ بڈ کنگ ، شپانی بے وابی ، نادْراھیانی درد ءُ تورشت سکا تکانسر کن اَنت ، ءُ اے درسیں جنجالانی ھلاس کنوکیں چیز مھروانیں ھمبلانی مھر اَنت۔

اے ھبر ءَ مرچی ھمک بلوچ پسگ سرپد اِنت کہ راجی سرمچار ءِ چہ بنداتی کدم ءَ داں زند ءِ گڈی دمان ءَ آئی ورگی آپ ءِ چاگل ءَ بہ گر داں کنور ءُ گُدانی شودگ ءَ ھمک کار آئی جند ءِ کوپگاں اِنت۔ اے درسیں جنگ ءِ بھر اَنت ءُ مردم ءِ داں آسری ھمراہ اَنت۔

شھید اشرپ جان پنام ء ریھان نوکاپ پہ اے وڑیں کاراں ھدا ءِ نورے اَت۔ آئی ءَ اے وڑیں کاراں کس ءَ گیگ نہ داتگ ءُ ھمک کار گوں ٹھک ءُ کندگاں کرتگ۔ آئی آدگہ سنگتانی کارانی تہ ءَ وت ءَ ھوار کرتگ ءُ سنگت پاد کرتگ اَنت ءُ گوشتگ کہ اے منی مھر اَنت بائد اِنت تو منی مھراں کبول کن۔

بہ کول ء سنگتے ئیگ ءَ کہ آئی ءَ پہ اوتاک ءُ سنگتانی پھازداری ( گھاٹ ) ءَ ھمک ساھت ءَ چہ وتی وھد ءَ ادارے ءَ پیش وت ءَ سنگراں سر کرتگ ءُ سنگت پاد کرتگ اَنت ءُ شپ ءَ آئی ھمک وھد ءَ چہ وتی پھازداری ءَ نیم ادار ءَ گیش نشتگ ءُ پد ءَ سنگت چہ واب ءَ پاد کرتگ۔ کجام اوتاک ءَ کہ شھید ساڑی بوتگ ءُ اگاں سنگت پہ جنگی سپر یا دگہ کارے ءَ درکپتگ اَنت ، گڑا آیاں ھمے لوٹ کرتگ مارا نوکاپ ءَ بہ دئے اِت کہ مئے سپر ءَ وشنود کنت۔

شھید اشرپ جان جنگ ، سپر یا سنگتانی مھر دیگ ءُ آدگہ کاراں ابید آئی وتی پارٹی ءِ ھمک مڈی واد ءُ باکس ءَ بہ گر داں توپک ءُ سلاھاں آئی وتی وس ءَ ھمک چیز ءِ پھریزگ ءِ جھد کرتگ۔ آئی ءَ مدام گْوشتگ کہ پہ اے چیزانی درگیجگ ءُ نزآرگ ءَ مئے چینچو نمیران بوتگیں ھمبلانی ھون ءُ زندگیں سنگتانی ھید ھوار اَنت۔ آجوئیں ڈیھانی لشکر ءَ بہ گند ئے پہ ارزانی دست بہ کپ اَنت ، بلے پہ چیرجنگیں سرمچاراں باکس ھم مزنیں بستارے دار اِیت ءُ سنگتاں چہ مرگ ءَ رکین ایت۔

شھید اشرپ جان امر ءَ کسان اَت ءُ آ واندگیں سنگتے نہ اَت ، بلے آئی پگر ءُ لیکہ سکا مزن ءُ ھورتچاریں جھدکارے اَت۔ آ وتی تہ ءَ یک مھکمیں ادارھے اَت ، آئی ءَ چہ زمہ واریں سنگتانی دپ ءَ چے کہ اِش کرتگ اَت آئی ءَ وتی باتن ءَ جاگاہ داتگ اَت۔ آئی نہ تھنا سنگتانی گپ یاداشت کرتگ اَنت ، بلکیں املی دْروشم ءَ پیلو کرتگ ءُ پیش داشتگ اَنت۔

اے درسیں کار آئی ایمانداری ءِ نشانی اِت اَنت کہ آ گوں بلوچ راجی زرمبشت ءَ چینچو ایماندار اَت۔ من آئی زند ءَ چہ بازیں سنگتانی دپ ءَ آئی ایمانداری ءِ کسہ اِش کرتگ اَنت ، بلے آئی وتی ایمانداری ءِ یک انچیں گپے مارا پیش داشت آ روچ ءَ من چہ آئی چمانی تہ ءَ آشوبی کرد ءِ راستیں دْروشم دیست۔ من ھما روچ ءَ ھمے گپ مار اِت کہ ایمانداری کجام چیز ءِ نام اِنت۔

جنوری 2020 ءَ وھدے کہ ما سپرے ءَ درکپ اِیں شھید نوکاپ ءُ لھتیں سنگت اَچ ما پیش شپ ءَ راہ ءِ سر ءَ گسے ءَ وپتگ اِت اَنت۔ ما نیم روچ ءَ آیانی کر ءَ سر بوت اِیں ءُ نہ نشت اِیں ، بلکیں دیم پہ وتی سپر ءَ رھادگ بوت اِیں۔ ھمے اشتاپی ءِ تہ ءَ آئی ءَ وتی دورگند بے ھال کرتگ اَت۔ ما داں ادارے ءَ سپر کرت کم چہ کم بیست کلو میٹر ءَ شت اِیں ءُ آپے ءِ سر  ءَ داشت۔ آئی ءَ سما کرت کہ منی دورگند من ءَ گوں نہ اِنت۔ آ موٹرسیکل ءِ کچی ءَ چارگ ءَ اَت کہ ھمے ترانگ ءَ کپت من ھما گس ءَ بے ھال کرتگ ، گڑا آ سکا پریشان بوت۔ 

آ یک برے وتی موٹرسیکل ءَ سوار بوت من رواں وتی دورگنداں کاراں ، گڑا سنگتاں نیشت کہ آ جاہ نوں دور اِنت ءُ مئے سپر دْراجکش اِنت۔ دورگند گسے ءَ ایر اِنت شما باند ءَ واتر کن اِت۔ بلے شھید اشرپ جان سکا بے چاڑ بوت ءُ گْوشت ئے کہ پارٹی ءِ مڈی اِنت ، اگاں گار بوت بزاں پمن سکا بلاھیں تاوانے۔

سنگتے ءَ درائینت ءُ گْوشت: ” ھدا سنگتانی ھیر ءَ بہ کنت، اے پنجاہ شست ھزار ءِ چیز ءِ گار بوگ انچوکیں مزنیں تاوانے نہ اِنت۔”

شھید اشرپ جان انچو سنگت ءِ پسو ءَ گْوشت کہ ” گپ پنجاہ ءُ شست ھزار ءِ نہ اِنت ، بلکیں منی بیسہ ءُ زمہ واری ئیگ اِنت۔ من ءَ سنگت چہ چر ایشی شرتریں دورگندے دئے اَنت۔ گوں اے دورگند ءَ مئے چینچو سنگت ءِ واری ءُ ازابی بندوک بوتگ۔ چر ایشی ءَ ابید یک شھیدیں سنگتے ءِ گڈی یاتگار اِنت کہ من ءَ گوں بوتگ۔”

چہ آئی اے گپانی جنگ ءَ ما چٹ ھیران بوت اِیں ، گڑا سنگتے ءَ شھید اشرپ جان ءَ تسلا دات ءُ گْوشت: ” اے گس ءِ مردم مئے دوازواہ ءُ زمہ واریں مردم اَنت ، آ تئی دورگند ءَ پھریز اَنت۔ اگاں دگہ سنگتے تئی دورگند ءَ بہ بارت آ ترا الم ھال دئے اَنت کہ کے برتگ۔” چہ سنگتانی بازیں دلبڈی دیگ ءَ پد ما دیم پہ وتی سپر ءَ رھادگ بوت اِیں۔

ھما مھروان ، نترس ءُ جپاکشیں اشرپ جان 16 مئی 2024  ءَ نوندڑہ جاہ ءِ آھو ( جھاؤ) ءَ انچیں کاروائی ءِ میان ءَ شھید بیت کہ بلوچ راجدپتر ءِ تاکدیماں پہ مدامی نمیران اِنت۔ جزماں لگوریں دژمن چہ وتی اے وڑیں تاوانے ءَ کدی بے ھال بوت نہ کنت۔ وھدے کہ دژمن وتی تاوان ءَ گیر بہ یار اِیت ، گڑا نمیرانیں اشرپ جان ءَ ھم الم یات کنت۔ ھمے یات مئے باندات ءِ آجوئیں ، گنج ءُ گوھر ، سیکین ءُ توکل ، زانت چکاریں درونت اِنت۔

ھلاس۔۔۔