جنگ یک بے رھمیں چیزے کہ آ چہ جنگول ءَ زندمان ءِ درستیں واھشت ءُ تماھاں پل اِیت ءُ تھنا مرگ ءِ بیم ءِ آماچ کنت۔ جنگ نہ تھنا گوں بھادری ءَ کنگ بیت ، بلکیں گوں باسمائی ءُ مھکمیں ارداہ ءَ مڑگ بیت۔ پہ جنگول ءَ جنگ ءِ سوبمندی تھنا سرڈگار ءِ آجوئی ءُ وتواکی نہ اِنت ، بلکیں جنگ ءَ را یک نوکیں رنگے دیگ ءُ جنگ ءِ میان ءَ مرگ ھم جنگول ءِ سوبمندی اِنت۔
اگاں کسے اے گپ ءَ بہ گوش اِیت کہ جنگ یک ازمے آ اے گپ ءَ رد بوت نہ کنت چی ءَ بندات مردم جنگ ءِ بھر بہ بیت آ ھمے جیڑ اِیت کہ من ءَ بس پہ ماتیں سرڈگار ءِ پاسبانی ءَ مرگی اِنت۔ پد ءَ چہ جنگ ءِ میان ءَ جنگول بازیں چیزاں دربران کنت ءُ چہ جنگ ءِ تب ءَ سوڑگ زور اِیت ءُ جوانیں کردے پیلو کنت۔
منی بنگپ یک انچیں راجی بامردے ءِ سر ءَ اِنت کہ آ کسانیں وھدے ءَ جنگ ءِ بھر بیت ءُ بلاھیں سوڑگے زور اِیت ءُ کمیں وھدانی تہ ءَ سکا مزنیں کردے پیلو کنت۔ آ مزن شانیں کرد شھید پدائی ھلیپ جان پنام اسلم اِنت۔
شھید پدائی ھلیپ پنام اسلم یک انچیں وھدے ءَ وتی راجی جز بندات کرت اے جاہ ءِ آھو ءِ تہ ءَ پاکستانی لشکر ءِ نیمگ ءَ زوراکی یکشل ءَ برجاہ اِت اَنت ءُ لشکر ءَ گوں وتی جوڑ کرتگیں چیریں ادارہ ءُ ھندی کشندہ ٹولی ءِ کارمنداں سکا سرگرم اَت۔ اے گپ ءَ ما دلجم اَت اِیں کہ بلوچ راجی جز پہ وت جھدکار ودی کنت ، بلے اے گمان ءَ نہ اَت ایں کہ اے زوتاں ترندیں لشکرکشی ءِ میان ءَ نوکیں ھمبلے ودی بہ بیت۔
اے ھما وھد اَت کہ اکتوبر 2017 ءَ داں مارچ 2018 ءَ پاکستانی لشکر ءَ پہ مئے سنگتانی نزور کنگ ءَ وتی درسیں زور مئے بگیری ءَ کارمرز کرت اَنت۔ آ وتی مالی ءُ لشکری درسیں زوراں چکاسگ ءَ اَت۔ ھمے زوراکیانی میان ءَ چار راجی جنگولیں بامرد پہ ماتیں سرڈگار ءِ پاسبانی ءَ نمیران بوت۔
زورگریں پاکستانی لشکر مئے ھمبلانی پہ رندگیری ءَ وتی برجاھیں لشکرکشی ءَ ھوار لّس مردمانی تہ ءَ گیش ءَ چہ گیش پندل سازی کنگ ءَ اَت کہ آجوئی جنگ ھلاس بوگ ءَ اِنت ءُ اے کوہ چہ راجی آجوئی ءِ سرمچنڈاں ھالیگ کرتگ اَنت۔
2018 ءِ اپریل ءُ جون ءَ پد راجی بامرداں دمگ ءِ تہ ءَ وتی ترّ ءُ گرد بندات کرت گڑا ھمے وھد ءَ شھید پدائی ھلیپ جان گوں سنگتے ءَ رھوت کنت کہ من ءَ الم دز بہ گر اِت کہ من راجی جنگولیں جھدکارے بوگ لوٹ آں۔
گڑا سنگت گوں آئی ءَ گوش اِیت ھمبل اے وھد ءَ کمو وت ءَ بدار کہ دمگ ءِ جاور ناگیگ اَنت۔ انوں یک مزنیں لشکرکشی یے بوتگ ءُ تو درساں سرپد ئے کمو جاور گھتر بہ اَنت گڑا تو بہ یا دانکہ ھیل بہ کن ئے۔ آئی ءِ گپ ھمے یکیں بیت کہ انّا من گیش ودار کرت نہ کن آں ءُ من ءَ دز بہ گر اِت۔
سنگت گوش اِیت کہ اے وھد ءِ تہ ءَ چو جنگ ءِ جنجالاں درساں سرپدئے انگت ءَ کہ تئی ارادہ مھکم اِنت گڑا ترا الم دست گر اِیں ، بلے کمیں وھد ءَ وت ءَ شھر ءِ تہ ءَ بدار پد ءَ ترا زوت ھال کن اِیں بہ یا۔
شھید پدائی ھلیپ جان ءِ یک شری یے اِیش اَت کہ آ شھری کاراں سک تیز بوتگ۔ مال ءُ مڈی ءِ ودی کنگ ءُ سامان ءُ مردمانی دیم دیگ ءُ دزگرگ ءَ ھم سکا تیز بوتگ۔ پمیشکا سنگت ءِ واھشت ھمے بوتگ کہ آ انگت ءَ وت ءَ شھر ءَ بدار اِیت اود ءَ گیشتر کار کرت کنت۔
بلے مھروانیں ھمبل چہ سنگت ءِ گپ ءَ لاچار بیت ھو کنت ، آئی دل ءُ ھیال گوں سلاہ بندیں جھد ءُ ماتکوھانی ندارگ کنگ ءُ دژمن ءِ جانی ءُ سسائی تاوان دیگ ءَ بیت۔
روان اِنت۔۔۔
