منی مردم زندگ مان اَنت | لیلہ ھالد | بیست ءُ یکمی بھر | سرباز وپا

( لیلہ ھالد ءِ سر گْوست )

’’ وانگ ءُ آشوب ‘‘

من چہ رجانکار ءِ کمک ءَ گْوشت: جی ھاں من سرپد آں۔ آئی ءَ درائینت گڑا تو اے وڑ ءَ چی ءَ کرتگ؟ من وت ءَ بے سما کرت ءُ پسو دات ’’ من چی بھر ءُ بانگ کرتگ آ سیاسی چیز نہ بوتگ اَنت۔‘‘ آئی ءَ چہ کارگشاد ءِ دست ءَ پنتاک زرت ءُ یک ءُ دو گالرد ونت ءُ گوں زھر ءَ گوشت کہ’’باریں اے آرٹیکل نمبر شش ءِ رد ءَ نہ اَنت، اے سیاسی لٹریچرے نہ اِنت؟‘‘

من گوشت’’ من سرپد نہ آں کہ پنتاک چی ءَ گْوشگ بیت۔ نوں بے چارگیں ڈین ءَ سیاست، سیاسی نبشتانک ءُ ھمے وڑیں لٹریچر ءِ بارو ءَ گپ بندات کرت۔‘‘

من آئی ءِ درسیں گپانی سر ءَ تپاک بوت آن ءُ گْوشت کہ ’’ پہ من ءَ پلستین سیاست نہ اِنت، اے منی مرگ ءُ زند ءِ گپ اِنت۔ من ءَ کسے امریکی یا ھما مردم کہ اربی گپ کرت نہ کن اَنت، آ من ءَ اے گپ ءَ گْوشت نہ کن اَنت من ءَ پہ وتی ڈیھ ءَ کجام وڑ ءَ جنگ کنگ ءُ چوں جھد کنگ لوٹ ایت۔‘‘

ڈین ءَ من ءَ کینگداریں شاگردے لیک اِت ءُ ھمے چیز ءَ شر سرپد بوت کہ من چہ زانشتجاہ ءَ کشگ بہ بہ آں دانکہ من گل ءِ بزانت ءَ سرپد بہ بہ آں۔ من گوشت کہ ’’ تو بہ کن ءُ پیش بہ دار۔‘‘ نوں تچکی ءَ گوں ھکل ءُ کوکار گْوشت کہ ’’ تو سی آئی اے ءِ کارمندے، یک روچے کئیت من تئی جاہ ءَ کرسی ءِ سر ءَ نند آں تئی وڑیں درساں کش آں۔ من چہ آئی ءِ کارگس ءَ اوگام جنان ءَ در کپت آں۔ زندگ بات پلستین زندگ بات، اے این ایم ءُ آشوب سوبین بات۔‘‘

ڈین ءَ اے گپ اش کرت اَنت ءُ سرگنوک بوت، منی ھیال ءَ آئی ءَ چہ وتی سروگانی ءِ کرسی ءِ سر ءَ نندگ ءَ پیش دو چار دانگ تاھیر دیوکیں گولی ورگی اِنت۔

1963 ءَ من وتی بنداتی سال ءِ چکاس ءَ سوبین بوت آں۔ منی ھیال اَت کہ من پد ءَ پہ وانگ ءَ زانشتجاہ ءَ وتی نام ءَ دے آں، بلے من ءَ زر نیست اَت۔ نوں من پہ وت کارے پٹگ ءَ اَت آں۔ منی بنکی وانگ بے کار اَت چہ آئی ءَ من ءَ ھچ رسگ ءَ نہ اَت۔ اے وھدانی تہ ءَ من تھنا سیاست ءُ آشوب ءِ جھد ءِ راہ ءَ پرکار بوتگ آں بلے چہ بنکی وانگ ءِ بارو ءَ ھچ نہ رس اتگ۔ وانگ ءَ بنداتی سے سالانی تہ ءَ من ءَ گْوستانک ءُ لبزانک دوست بوت اَنت، وانگ ءِ گڈی ءَ من ءَ میتھمیٹکس ءُ کیمسٹری دوست بوت اَنت۔ پد ءَ من پارماکیولوجی یا کشت ءُ کشار ءِ بارو ءَ دربرگ ءَ جیڑ اِت وھدے کہ ما واتر پلستین ءَ رو ایں گڑا ما سائنسی بنیاد ءَ کشت ءُ کشار بہ کن این ءُ چہ ڈگاراں ، چہ سیھونیاں شرتر کار گپتگ بہ کن ایں۔

سیکنڈری وانگجاہ ءَ بنداتی سالاں من لنکن، لینن، ھٹلر ءُ نپولن ءِ بارو ءَ ونتگ اَت۔ بندات ءَ من اے درستانی شیدا بوتگ آں، بلے نوں من لنکن ءَ وتی وھد ءَ لبرل بیگ ءُ لینن ءَ پہ مردمی ءِ بنیاد ءَ گْوستانک ءِ مزنیں کارستانی دیم ءَ مزن لیک آں کہ ایشی ءِ رندگیری ماؤ، ھوچی منہ ءُ چی گوریر ءَ کرتگ۔ بندات ءَ من ھٹلر ءَ مزن سرپد بوتگ آں کہ آئی ءَ یھودیانی بگیری کرتگ، من رند ءَ سرپد بوت آں کہ اے درس آئی ءَ پہ وتی زات ءِ شرپ ءَ کرتگ اَنت۔ پد ءَ من ءَ آ ھم دوست نہ بوت۔

لبزانک ءِ تہ ءَ من ءَ ڈکنز ءُ شا دوست بوتگ اَنت۔ من ءَ اے درسیں نبشتگیں کتاب دوست بوتگ اَنت، بلے من شا ءِ گیگان ءَ نبشتانک نبیسگ ءِ جھد کرتگ۔ استاد ءَ منی گیگان ءِ جھد دوست نہ بوت۔ من ءَ اربی شائری ءِ تہ ءَ امیّہ ءُ اباسی وھد ءِ شائری دوست بوتگ۔ بس منی درسیں وانگ ھمے بوتگ۔

1960 ءُ61 ءَ من ءَ باز وھد ھست اَت، اے وھد ءَ من گاندی ونتگ۔ آئی ءِ دودمانی کارست باز جوان اَت، بلے من ءَ انچوش گمان بیگ ءَ اَت کہ آ چہ ودی بیگ ءَ ایردست بوتگ ءُ آئی ءَ بھ ایردستی ءِ رندگیری یل نہ داتگ۔ زاتی ءُ چاگردی ھساب ءَ من ارب جنکے ءِ وڑ ءَ شریں زندمانے گوازینگ ءَ اَت آں۔ داں شش سال ءَ من ءَ وتی یک پلستینی ھم تبکے کہ آ زمینداریں کھولے ءِ مردمے اَت، دوست بوتگ۔ پیسر ءَ آئی ءِ چہ جنکاں دور دارگ ءِ روشت ءَ منی دلگوش وتی نیمگ ءَ برتگ اَت، رند ءَ من آئی ءِ بارو ی؟ سرپد بوت آں ءُ آئی ءِ کینگداری ءِ سوب وت دیم ءَ آتک۔ گوں آئی ءِ مات ءَ اسرائیلیاں زوراکی کرتگ اَت اے ھمایاں گیر آرگ ءَ اَت۔ اے ھما وھد ءِ ویلے بوتگ کہ وھدے مردم 1948 ءَ سدپ ءِ ھند ءَ یل کنگ ءَ بوتگ اَنت، اے وھد ءَ آ وت پہ کار کنگ ءَ بودیگ بوتگ اَت، پمیشکا آ گوں مات ءَ یکجاہ نہ بوتگ۔

ھما اِنت کہ من امریکن زانشتجاہ ءَ آتکگ آں من گوں آدیل ءَ ڈیک نہ وارتگ۔ من نزانتگ کہ آ مئے مجاھدانی ھمراہ اِنت یا گوں شھیداں ھوار اِنت۔ یا وَ آ بے اوست بوتگ ءُ ارب ءِ ھندے ءَ نشتگ ءُ زند گوازینگ ءَ اِنت۔

منی وھد وھد ءِ سر ءَ دوست گیش بوتگ اَنت، بلے من گوں کس ءَ پہ ھاسیں نزیکی ءَ وھد نہ کش اتگ چی ءَ کہ من ءَ گوں آشوب ءَ اشک بوتگ۔

( رواں اِنت…)